Faatuatua Moni—Po o Mafai Pea Ona Maua?

“O le faatuatua o se mea o loo ola, o se talitonuga malosi i le alofa tunoa o le Atua, e matuā moni ma mautinoa lea e lamatia faaafe ai le ola o le tagata talitonu.”—MARTIN LUTHER, 1522.

“Ua tatou iai nei i se sosaiete lea ua toetoe ai lava a leai atu se faatuatuaga ma ni gaoioiga faa-Kerisiano.”—LUDOVIC KENNEDY, 1999.

E MATUĀ eseese lava taofi e faatatau i le faatuatua. I taimi ua teʻa, sa avea le faatuatua i le Atua ma mea sa masani ai. I aso nei, i le lalolagi faatalitonugatā ma le iai o puapuaga, ua vave ona mou atu le faatuatua moni i le Atua ma le Tusi Paia.

Le Faatuatua Moni

I le toʻatele, o le “faatuatua” ua na o le mauaina lea o se talitonuga faalotu po o le mulimuli atu i se ituaiga o tapuaʻiga. Peitaʻi, e pei lava ona faaaogā ai i le Tusi Paia, o le “faatuatua” o lona uiga o le talitonuina aʻiaʻi—e atoatoa, o le mautinoa e lē maluelue i le Atua ma ana folafolaga. O se uiga lea e faailogaina ai se soo o Iesu Keriso.

I se tasi o taimi, na fetalai ai Iesu Keriso e faatatau i le manaʻoga o le tatalo ma ia “aua le faavaivai.” O le faia faapea, na ia lāgā ai se fesili, po o le a tumau pea ona iai le faatuatua moni i o tatou aso. Na ia fesili ai e faapea: “A sau le Atalii o le tagata, pe maua ea e ia [lenei] faatuatua i le lalolagi?” Pe aiseā na ia lāgā ai se fesili faapena?—Luka 18:1, 8, LF.

Leiloa le Faatuatua

E tele ni mea e māfua ai le leiloa atu po o le ā lava le faatuatua atonu na iā i latou. O nei mea e aofia ai tigā ma tofotofoga o le olaga i aso faisoo. Mo se faataʻitaʻiga o le polofesa o Michael Goulder, sa avea o ia ma patele i Manchester, i Egelani, i le taimi o le faalavelave lea na paʻū ai le vaalele i Munich i le 1958 lea na toʻatele le ʻausoka a le Manchester United na maliliu ai. I se polokalame i le televise a le BBC, na faamatalaina ai e Joan Bakewell o ia o se tagata faasalalau e faapea o Goulder na ia “lagonaina le vaivai ina ua ia vaaia le tulaga matuā mafatia o tagata.” O se tasi o mea na tupu, na “leiloa ai lona faatuatua i se Atua o lē e faalaa ane i iʻuga tuupoina a tagata.” Na taʻua e Goulder ona talitonuga e faapea “o le Tusi Paia e lē . . . o le  afioga lē masesē a le Atua” ae, na i lo lenā, o “upu sesē a tagata, atonu o loo iai sina faagaeeina tauatua i lea vaega ma lea vaega.”

I nisi o taimi e mou ese atu ai lava le faatuatua. O le mea lenā na tupu i se tusitala ma o se tagata faasalalau foʻi o Ludovic Kennedy. Ua ia taʻua faapea e mai lava i le taimi o laʻitiiti o ona “lagona faalētonu ma mea e lē o mautinoa ai [e faatatau i le Atua] sa lāgā mai lea taimi i lea taimi ma na tupu aʻe ai ma [lona] lē talitonu.” E foliga mai e leai se tasi e mafai ona avatua iā te ia ni tali e faamalieina ai i ana fesili. O le maliu o lona tamā i le sami o se mea na leʻi faatalitalia lea na matuā faavaivaia ai lava lona faatuatua ua leva ona matuā vaivai. O tatalo i le Atua ina ia “faasaoina i matou mai lamatiaga i le sami faapea ai ma le sauā o le fili” na leʻi taliina ina ua osofaʻia ma faatamaʻia e vaatau a Siamani ia le vaa laʻupasese lea na suia e fai ma vaatau lea sa iai lona tamā, i le taimi o le Taua Lona Lua a le Lalolagi.—All in the Mind—A Farewell to God.

O nei mea na tutupu o ni mea lava e masani ai. O le ‘faatuatua,’ e pei ona taʻua e le aposetolo o Paulo, ‘e le o i tagata uma.’ (2 Tesalonia 3:2) O le ā sou manatu? Po o le faatuatua moni ea i le Atua ma lana Afioga o loo mafai pea ona maua i se lalolagi o loo faateleina ai le faatalitonugatā? Ia iloilo le mea o loo talanoaina i le mataupu o loo sosoo mai e faatatau i lenei mataupu.