Fesili Mai le ʻAufaitau

O le ā le “malologa” lea e faasino i ai le Eperu 4:9-11, ma e mafai faapefea e se tagata ona “sao atu i lena malologa”?

Na tusi atu le aposetolo o Paulo i Kerisiano Eperu i le uluaʻi senituri, e faapea: “Ua tuuina mai pea o le malologa faasapati mo tagata o le Atua. Auā o le ua sao atu i lona malologa, ua malolo foi o ia i ana lava galuega, faapei o le Atua i ana lava. O lenei, ina tatou finafinau ia ina ia sao atu i lena malologa.”—Eperu 4:9-11.

Ina ua taʻua e Paulo le mālōlōga a le Atua mai Ana galuega, e manino mai sa ia faasino atu i le mea o loo taʻua i le Kenese 2:2, e faapea: “Ua faauma e le Atua i le aso fitu lana galuega na faia e ia; ona malolo ai lea o ia i le aso fitu i lana galuega uma na faia e ia.” Aiseā na “malolo ai [Ieova] i le aso fitu”? E mautinoa lava e leʻi mālōlō Ieova ina ia mapu mai ‘ana galuega uma na faia.’ Ua saunia e le fuaiupu e sosoo ai se manatu i le pogai na ia faia ai faapea: “Ona faamanuia atu lea e le Atua i le aso fitu, ma na faasaina [“faapaiaina,” NW ] ai; auā na malolo ai o ia i lana galuega uma lava na faia e le Atua ma na saunia.”—Kenese 2:3; Isaia 40:26, 28.

Sa ese le “aso fitu” mai isi aso e ono na muamua atu auā o le aso lea na faamanuiaina e le Atua ma faapaiaina, o lona uiga, o se aso sa faatulaga, pe tuuina atu, mo se fuafuaga faapitoa. O le ā lenā fuafuaga? Muamua atu, na faailoa mai e le Atua lana fuafuaga e faatatau i le fanau a tagata ma le lalolagi. Na fetalai atu le Atua i le uluaʻi tamāloa ma le fafine: “Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.” (Kenese 1:28) E ui na tuu atu e le Atua i le fanau a tagata ma le lalolagi se amataga lelei atoatoa, ae o le a alu se taimi e faatoʻilaloina ma liua ai le lalolagi atoa e avea ma parataiso e faatumulia i se aiga faaletagata lelei atoatoa, e pei ona fuafuaina e le Atua. O lea, i le “aso fitu,” na mālōlō ai le Atua mai galuega tau i le foafoaga faalelalolagi ina ia faataga ai mea ua māeʻa ona ia foafoaina ina ia fua mai e tusa ai ma lona finagalo. E oo atu i le faaiʻuga o lenā “aso,” ua tatau ona faataunuuina mea uma sa fuafuaina e le Atua. O le ā le umi o lenā mālōlōga?

Pe a toe foʻi atu i upu a Paulo i le tusi o Eperu, sa ia faasino atu i le “tuuina mai pea o le malologa faasapati mo tagata o le Atua,” ma sa ia pulunaunauina ona uso a Kerisiano ia finafinau “ina ia sao atu i lena malologa.” E faaalia e lenei faamatalaga e faapea i le taimi na tusia ai e Paulo nei upu, o le “aso fitu” o le mālōlōga a le Atua, lea sa amata pe ā ma le 4,000 tausaga muamua atu, o loo faaauau pea. O le a lē faaiʻua lenā aso seʻia faataunuuina atoatoa fuafuaga a le Atua e faatatau i le fanau a tagata atoa ma le lalolagi i le faaiʻuga o le Pulega o le Afe Tausaga a Iesu Keriso, o ia ‘o le Alii o le sapati.’—Mataio 12:8; Faaaliga 20:1-6; 21:1-4.

I le iai o lenā faamoemoe matagofie i le lumanaʻi, na faamatala mai e Paulo le auala e mafai ona ulu atu ai se tasi i le mālōlōga a le Atua. Na ia tusi mai, e faapea: “O le ua sao atu i lona [Atua] malologa, ua malolo foi o ia i ana lava galuega.” Ua taʻu mai e lenei mea iā i tatou e faapea, e ui sa iai se amataga lelei atoatoa, ae e leʻi ulu atu le fanau a tagata i se tulaga aotele i le mālōlōga a le Atua. O le pogai o lenei mea ona e leʻi umi se taimi na tausisia ai e Atamu ma Eva le mālōlōga a le Atua i “le aso fitu” e ala i le talia o ana faatulagaga mo i laʻua. Na i lo lenā, sa la fouvale ma mananaʻo ia tutoʻatasi mai le Atua. O le mea moni, sa la mulimuli atu i le auala a Satani na i lo le talia o taʻitaʻiga alofa a le Atua. (Kenese 2:15-17) O le iʻuga, na la melea ai le faamoemoe o le ola e faavavau i se lalolagi parataiso. Mai lenā taimi, sa faapologaina ai loa le fanau uma a tagata i le agasala ma le oti.—Roma 5:12, 14.

E leʻi faalavelavea fuafuaga a le Atua i le fouvalega a le fanau a tagata. O loo faaauau pea le aso o lona mālōlōga. Peitaʻi, na faia e Ieova se sauniuniga alofa—le togiola—e ala mai i lona Alo, o Iesu Keriso, ina ia mafai ai e i latou uma e talia le togiola e faavae i le faatuatua, ona tulimataʻia le faasaʻolotoina ma mālōlō ai mai le avega mamafa o le agasala ma le oti. (Roma 6:23) O le māfuaaga lenā sa uunaʻia ai e Paulo ona uso a Kerisiano ina ia ‘malolo mai a latou lava galuega.’ Sa manaʻomia ona latou talia le sauniuniga a le Atua mo le faaolataga ma ia aua neʻi taumafai e saʻilia lo latou lumanaʻi i la latou lava auala, e pei ona faia e Atamu ma Eva.  Na manaʻomia foʻi ona latou ʻalofia a latou lava galuega mo le taʻuamiotonuina o i latou lava.

O le lafoaʻia o saʻiliga manatu faapito po o mea masani o le olaga ina ia faia le finagalo o le Atua, o le a matuā mālōlō ma faatoʻafilemu ai. Na fofogaina atu e Iesu lenei valaaulia, e faapea: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30.

O le talanoaina e Paulo o le mālōlōga a le Atua ma le auala e ulu atu i ai se tasi, e mautinoa sa avea o se faalaeiauga i Kerisiano Eperu i Ierusalema, o ē na onosaia le tele o puapuaga ma tauemuga ona o lo latou faatuatua. (Galuega 8:1; 12:1-5) E faapena foʻi ona avea upu a Paulo ma faalaeiauga i Kerisiano i aso nei. I le iloaina ua i faitotoʻa le faataunuuga o le folafolaga a le Atua o le aumaia o se lalolagi parataiso e ala mai i lona Malo amiotonu, e tatau foʻi la ona tatou mālōlō mai a tatou lava galuega ae ia finafinau e ulu atu i lenā mālōlōga.—Mataio 6:10, 33; 2 Peteru 3:13.

[Ata i le itulau 31]

O le folafolaga a le Atua i se lalolagi parataiso o le a faataunuuina i le faaiʻuga o lona aso mālōlō