Ia Faamaoni—O le ā Lona Uiga?

SA MANATU tagata Iutaia o le lotu mavae a tagata Hasitaio mai le senituri lona lua T.L.M. e faapea o i latou o ni tagata sa matuā faamaoni lava. O lo latou igoa e sau mai le upu cha·sidhʹ, o le upu autū faa-Eperu mo le “faamaoni.” E sau mai le nauna cheʹsedh, lea e masani ona faaliliuina i le “alofa agalelei,” “alofa faamaoni,” “agalelei,” “lelei,” “alofa mutimutivale.” E tusa ai o se faamatalaga a le Theological Dictionary of the Old Testament, o le cheʹsedh “e gaoioi, e feoeoeaʻi, ma tumau [ma] e lē na o se uiga o le tagata e faailoa mai ai, ae faapea foʻi le gaoioiga lea ua māfua mai i lenei amio. O se gaoioiga e faasaoina pe atili faaleleia ai le olaga. O se faalaa ane mo se lelei o se tasi o loo mafatia i se tulaga lē lelei po o ni mafatiaga. O se faailoaga mai o le uiga moni o se faigāuō.”

E mautinoa i le tele o gagana, e leai se upu e tasi e mafai ona faamatalaina ai le uiga atoa o loo fesootaʻi ma lenei upu Eperu e pei ona faaaogā ai i le Tusi Paia. I taimi uma lava o loo faaaogā ai, o loo faauiga e le Tusi Paia le faamaoni e sili atu na i lo le tau ina tausisi atu ma le faamaoni i ni tautoga. E aofia ai le manatu o le pipiimau faatasi ai ma lagona alofa, faapea ma le faia o gaoioiga lelei ina ia maua ai e isi ni aogā. Ina ia malamalama i le uiga o le faamaoni moni, seʻi manatu i le auala na faaali atu ai e Ieova le faamaoni iā Aperaamo, Mose, Tavita, le nuu o Isaraelu, faapea foʻi i tagata lautele.

Sa Faaalia e Ieova le Faamaoni

Na fetalai atu Ieova i lana uō o Aperaamo: “O aʻu nei o lou talita.” (Kenese 15:1; Isaia 41:8) Sa lē na o ni upu e tau ina avane ai. Na puipuia ma laveaʻia e Ieova Aperaamo ma lona ʻauaiga mai iā Farao ma mai iā Apimeleka. Sa ia fesoasoani iā Aperaamo ina ia laveaʻiina Lota mai le osofaʻiga auaufaatasi a ni tupu se toʻafā. Na toe faafoʻisia e Ieova le malosi faafanautama o Aperaamo ua 100 ona tausaga ma Sara ua 90 ona tausaga, ina ia mafai ona auala mai iā i laʻua le Fanau na folafolaina. Sa fesootaʻi e lē aunoa Ieova ma Aperaamo e ala mai i faaaliga, o faalepō, o agelu sa fai ma avefeʻau. O le mea moni, na faaalia e Ieova lona faamaoni iā Aperaamo a o soifua o ia faapea foʻi i le taimi ina ua leva lava ona maliu. A o mavae atu senituri, sa tausisi pea Ieova i ana folafolaga i ē na tupuga mai iā Aperaamo, le nuu o Isaraelu, e ui lava i so latou lē usiusitai. O le faiā a Ieova ma Aperaamo sa avea o se faaaliga o le faamaoni moni—le alofa ua faatinoina i gaoioiga.—Kenese, mataupu 12 e oo i le 25.

Na taʻua faapea sa “fetalai mai foi Ieova ia Mose, o loo fesagai lava, faapei o le tagata ona tautalatala ma lana uo.” (Esoto 33:11) Ioe, o le faiā na maua e Mose ma Ieova sa sili atu ona māfana na i lo o se faiā a se isi lava perofeta na iai e muamua atu iā Iesu Keriso. Na faapefea ona faaalia e Ieova lona faamaoni iā Mose?

Ina ua 40 tausaga o Mose ma sa iā te ia le malosi ma le tomai, na ia gaoioi faamaualuga ai ina ia faasaʻolotoina e ia lava ona tagata. Peitaʻi, sa lē o se taimi talafeagai lenā. Na oo ina tatau ona  sola ese mo le faasaoina o lona ola. E 40 tausaga sa avea ai o ia ma leoleomamoe i Mitiana. (Galuega 7:23-30) Peitaʻi sa leʻi tuulafoaʻia o ia e Ieova. Ina ua oo i le taimi talafeagai, sa toe faafoʻi atu Mose e na te taʻitaʻia ese le nuu o Isaraelu mai Aikupito.

Sa faapena foʻi ona faaalia e Ieova lona faamaoni iā Tavita, le tupu taʻutaʻua lona lua o Isaraelu. A o avea Tavita ua na o se tama talavou, sa fetalai atu Ieova i le perofeta o Samuelu: “Tulai ia, ina faauu ia te ia, auā o ia lava lena.” Mai lava i lenā taimi, sa faamaoni ai Ieova e puipuia ma taʻitaʻia Tavita a o faasolo ina avea o ia ma tagata matua, o lē o le a fai ma tupu o Isaraelu uma i se taimi mulimuli ane. Sa laveaʻiina o ia e Ieova “nai le lima o le leona ma le lima o le urosa” faapea foʻi ma le lima o le Filisitia tinoese o Koliata. Sa faasolosolo le tele o manumalo na foaʻi atu e Ieova iā Tavita a o tau ma fili o Isaraelu, ma sa ia laveaʻiina Tavita mai le tao a le tagata lotovale ma le mataʻua, o Saulo.—1 Samuelu 16:12; 17:37; 18:11; 19:10.

E mautinoa sa lē o se tagata lelei atoatoa Tavita. O le mea moni, sa matuā matuiā ana agasala na fai. Peitaʻi ane, na i lo le lafoaʻia o ia, sa faaali atu i ai e Ieova lona alofa faamaoni iā Tavita o lē na matuā salamō. I le gasologa o le olaga o Tavita, sa gaoioi pea lava pea Ieova e faasaoina ma faaleleia atili le olaga. Sa ia faalaa ane e puipuia se tasi sa matuā mafatia. Maʻeu se alofa agalelei!—2 Samuelu 11:1–12:25; 24:1-17.

Ina ua malilie le nuu o Isaraelu i aiāiga o le feagaiga o le Tulafono Faa-Mose lea na osia i le Mauga o Sinai, na latou ulu atu ai i se faiā faapitoa o se nuu atoa ua tuuina atu iā Ieova. (Esoto 19:3-8) O lea, ua faamatalaina ai Isaraelu e peiseaʻī sa iai sa latou faiā tau faaipoipoga ma Ieova. Sa taʻu atu iā Isaraelu e faapea: “Ua valaau Ieova ia te oe, e pei o le avā.” Ma na fetalai atu Ieova iā te ia: “O le alofa e faavavau ou te alofa atu ai ia te oe.” (Isaia 54:6, 8) Na faapefea ona faaalia e Ieova lona faamaoni i lenei faiā faapitoa?

Sa tausolomua Ieova e saunia mea mo manaʻoga o tagata Isaraelu ma faamalosia a latou sootaga ma ia. Sa ia laveaʻiina i latou mai Aikupito, sa faamaopoopoina i latou o se nuu, ma aumaia i latou i “le nuu o tafe ai le suāsusu ma le meli.” (Esoto 3:8) Sa ia saunia e lē aunoa faatonuga faaleagaga e ala mai i ositaulaga, o sā Levī, ma se faasologa e lē motusia o perofeta ma avefeʻau. (2 Nofoaiga a Tupu 17:7-9; Neemia 8:7-9; Ieremia 7:25) Ina ua liliu atu le nuu e tapuaʻi i isi atua, sa faasaʻoina i latou e Ieova. Ina ua latou salamō, sa ia faamagaloina i latou. E lē natia le mea moni, sa avea le nuu o Isaraelu o se “avā” sa faigatā tele. Peitaʻi, sa leʻi vavevave Ieova e faateʻa ese o ia. Ona o ana folafolaga sa faia iā Aperaamo, na Ia mafuta atu ai pea ma le faamaoni i le fanauga a Isaraelu, seʻia oo ina faataunuuina Ana fuafuaga e fesootaʻi atu ma i latou. (Teuteronome 7:7-9) Maʻeu se faaaʻoaʻoga e sili ona lelei mo i latou ua faaipoipo i aso nei!

Ua faaalia mai foʻi e Ieova lona faamaoni i tagata lautele e ala i lona saunia mai o manaʻoga autū o le olaga mo tagata uma, pe amiotonu pe amiolētonu. (Mataio 5:45; Galuega 17:25) E lē gata i lenā, ua ia saunia mai foʻi le taulaga togiola a lona Alo, ina ia maua e le fanau uma a tagata le avanoa e saʻoloto ai mai saisaitiaga a le agasala ma le oti, ma olioli ai i faamoemoega matagofie o le ola i se olaga lelei atoatoa, e faavavau i le Parataiso. (Mataio 20:28; Ioane 3:16) O le sauniuniga o le togiola sa avea o  se gaoioiga silisili mo le faasaoina ma le faaleleia atili o le olaga. Sa avea moni lava “o se faalaa ane mo se lelei o se tasi o loo mafatia i se tulaga lē lelei po o ni mafatiaga.”

Ia Faaali Lou Faamaoni e Ala i Gaoioiga Lelei

Talu ai e uiga faatasi ma le alofa agalelei, ua aofia ai foʻi la i le faamaoni se uiga malosi o le fetufaaʻi i se auala alofa. Pe afai ua faaalia mai le alofa agalelei iā te oe, e mafai foʻi la ona faatalitalia lou toe faaalia atu o lea lava uiga. O le faamaoni e toe totogi mai foʻi i le faamaoni. E faamaonia le malamalama o Tavita i tulaga ua aofia ai i le upu cheʹsedh, e ala i ana upu nei: “Ou te ifo i lou malumalu paia, ou te vivii atu foi i lou suafa.” Aiseā? “Ona o lou alofa ma lou faamaoni.” (Salamo 138:2) Talu ai sa maua e Tavita le alofa agalelei mai iā Ieova, e manino lava la sa uunaʻia ai o ia e tapuaʻi ma vivii atu iā te ia. O lea, a o tatou mafaufau i le faaaliga mai o le alofa agalelei o Ieova iā i tatou, po ua uunaʻia ai ea i tatou e tali atu i ai? Mo se faataʻitaʻiga, pe afai e faalumaina le suafa o Ieova, pe avea ea lou manatu mamafa mo lona talaaga lelei, ma māfuaaga e te tautala atu ai e faamaonia lona saʻo?

O le mea lenā sa tupu i se tasi e leʻi leva tele ona avea ma Kerisiano, faapea ma lana avā, ina ua la auai atu i le falelauasiga o so la tauaiga na maliu i se faalavelave tau uilaafi. Sa leai se sauniga faalotu na faia, ma na maua e tagata uma na auai se avanoa e faia ai se faamatalaga e uiga i lē ua maliu. Na lauga se tasi alii ma tuuaʻia ai le Atua ona o le oti o lenei tama talavou a o leʻi taitai lona olaga, ma ia faapea mai, ‘sa finagalo le Atua ina ia iai o ia i le lagi, o lea ua ia aveina ai o ia.’ Sa lē manofo lo tatou uso Kerisiano. Ona laa atu loa lea o ia i le pulelaa, e ui lava sa leʻi iai sana Tusi Paia po o ni ana faamaumauga. Na ia fesili atu: “Pe tou te manatu ea e fiafia mai le finagalo o le Atua, o lē e alofa mutimutivale, e agalelei, o lē e ona le malosi uma lava, i ni tulaga faapenei?” Ona faia loa lea o sana lauga e leʻi fuafuaina mo le sefulu minute, i lona sii maia o nisi upu o le Tusi Paia o loo faamalamalama ai le māfuaaga ua tatou feoti ai, le mea ua faia e le Atua ina ia faasaoina ai le fanau a tagata mai le oti, ma le faamoemoe ofoofogia o le toetū mai i le ola e faavavau i se lalolagi parataiso. Sa matuā taufai pati faaumiumi le silia ma le 100 o tagata sa iai i le aofia. I se taimi mulimuli ane na toe manatua ai e le uso e faapea: “Sa ou lagonaina i loʻu loto se olioli sa ou leʻi lagonaina lava muamua. Na ou faafetai atu iā Ieova mo le aʻoaʻoina o aʻu i lona atamai ma le foaʻi mai iā te aʻu o le avanoa ou te taʻutonuina ai lona suafa paia.”

O le faamaoni iā Ieova e aofia ai le faamaoni i lana Afioga, le Tusi Paia. Aiseā? Auā o loo ala mai i itulau o le Tusi Paia, le aʻoaʻoina o i tatou e Ieova i le auala tatou te ola ai. O tulafono ma mataupu silisili o loo faamauina ai e mautinoa lava o ni aʻoaʻoga e sili ona lelei ma sili ona aogā ia mo le olaga. (Isaia 48:17) Aua neʻi e faatagaina omiga mai isi po o ou lava vaivaiga e faapogaia ai ona e liliu ese mai le pipiimau atu i tulafono a Ieova. Ia e faamaoni atu pea i le Afioga a le Atua.

O le faamaoni i le Atua e aofia ai foʻi le faamaoni atu i lana faalapotopotoga. A o faagasolo atu tausaga, sa talafeagai ona iai ni faasaʻoga ma ni fetuutuunaʻiga e faia i lo tatou malamalamaga i nisi o mau. O le mea moni, e leai se tasi o mafai ona faatutusa mai iā i tatou, i le lelei ona fafagaina faaleagaga. (Mataio 24:45-47) E moni lava, ua lagolagoina ma le faamaoni e Ieova lana faalapotopotoga i ona pō nei. Pe lē mafai ea foʻi la ona tatou faia faapena? Sa faia faapea e A. H. Macmillan. A o toetoe lava oo i lona maliu, sa ia faapea mai ai: “Ua ou vaai i le tuputupu aʻe o le faalapotopotoga a Ieova mai sina amataga itiiti sa iai, ina ua ou tuuina atu aʻu i le Atua, i le luasefulutolu o oʻu tausaga iā Setema o le 1900, i se sosaiete i le lalolagi aoao o tagata fiafia o loo latou folafolaina ma le maelega ana upu moni. . . . Ua ou matuā mautinoa lava, a o oʻu iloa le lalata mai o le iʻuga o laʻu auaunaga i le Atua i le lalolagi e faapea, o loo taʻitaʻia e Ieova ona tagata ma tuuina mai iā i latou mea tonu lava o loo latou manaʻomia i le taimi tatau.” Sa auauna ma le faamaoni le uso o Macmillan mo le toetoe lava 66 tausaga, seʻia oo i lona maliu iā Aokuso 26, 1966. Sa avea o ia ma se faaaʻoaʻoga lelei o le faamaoni atu i le faalapotopotoga vaaia a le Atua.

 E lē gata i le faamaoni i le faalapotopotoga, ae pe o le a tatou faamaoni ea o le tasi i le isi? Pe a fesagaʻi ma le faamataʻu mai o se sauāga ogaoga, po o le a tatou faamaoni atu pea i o tatou uso ma tuafāfine? I le vaitaimi o le Taua Lona Lua a le Lalolagi, na faataatia ai e o tatou uso i Holani se faaaʻoaʻoga lelei o le faamaoni. Sa iai se toeaina mai le faapotopotoga o Groningen, o Klaas de Vries lona suafa, sa matuā tuʻifesiliina ma le sauā o ia e leoleo nanā a le ʻau Nasi, sa lokaina i le pa simā e leai se fesootaʻiga ma tagata mo aso e 12 ma e na o le falaoa ma le vai sa maua, ona toe tuʻi foʻi lea i fesili. Sa faatū atu le gutu o le fana iā te ia ma faamataʻu i le fasiotia, a o tuu atu i ai le lua minute e faailoa mai ai vaipanoa o loo iai uso sa taʻimua i le faapotopotoga, faapea foʻi ma isi faamatalaga tāua. Na pau lava upu na taʻu ane e Klaas e faapea: “E augapiu se isi mea e tou te iloa mai iā te aʻu. . . . O le a lē avea aʻu o se faalata.” E faatolu lava ona faafefe o ia i le fana. Na iʻu lava ina sisii lima o leoleo, ma avatu loa Klaas i le isi falepuipui. Sa lē taitai ona ia faalataina ona uso.

Pe o le a faasafua atu ea lo tatou faamaoni i lo tatou tauaiga e sili ona latalata mai iā i tatou—la tatou paaga faaipoipo? E pei lava ona sa faamamalu atu Ieova i lana faiā faalefeagaiga ma le nuu o Isaraelu, po o tatou faamaoni ea i a tatou tautoga o le faaipoipoga? E lē gata ina ia iai se faamaoni lē maluelue, ae ia naunau foʻi e faamausalī se faiā vavalalata ma lau paaga. Ia e tausolomua e faamautinoa le faatumauina o lau faaipoipoga. Ia lua faaalu ni taimi e faifaimea faatasi ai, talatalanoa saʻoloto ma ia tatala atu faalogona o le tasi i le isi, ia lagolagosua ma faalaeiau le tasi i le isi, ia faalogologo atu le tasi i le isi, ia taliē faatasi, ia fetagisi faatasi, ia fai mea fiafia faatasi, ia galulue faatasi e ausia ni lua sini fai faatasi, ia faafiafia e le tasi le isi, ma ia iai se lua faigāuō e māfana. Aemaise lava ia lua faaeteete ina ia ʻalofia le faatupu aʻe o ni faalogona māfana faaleituaiga mo isi tagata. E ui ina saʻo ma talafeagai ona faatupuina ni masaniga e oo lava foʻi i ni faauōga vavalalata ma isi tagata i tua atu o la oulua faaipoipoga, ae o faalogona māfana faaleituaiga e tatau ona muta mai i lau lava paaga. Aua neʻi e faatagaina se isi tagata e faalavelavea ai la oulua faiā ma lau paaga.—Faataoto 5:15-20.

Ia faamaoni pea i isi ou uso talitonu ma aiga. A o faasolo atu tausaga, aua neʻi e faagaloina i latou. Ia fesootaʻi atu pea i ai, tusi atu i ai, telefoni i ai, asiasi atu i ai. Po o le ā lava lou tulaga o iai i le olaga, ia e taumafai ina ia aua neʻi e faatigā i o latou loto. Ia e faia mea uma e mautinoa ai latou te fiafia e taʻu faapea e latou te iloa oe pe e aiga mai iā te oe. O lou faamaoni atu iā i latou o le a e malosi ai pea mo le faia o le mea e tonu ma o le a avea ai ma puna o faalaeiauga mo oe.—Eseta 4:6-16.

Ioe, o le faamaoni moni e aofia ai gaoioiga lelei ina ia faasaoina ni faiā tautele. Ia e faia le mea e te mafai ina ia totogi atu ai le alofa agalelei o Ieova. Ia faataʻitaʻi i le faamaoni o Ieova i a outou feutagaʻiga ma le faapotopotoga Kerisiano, i lau paaga faaipoipo, i lou aiga ma au uō. Ia faamaoni e folafola atu le lelei o Ieova i ou tuaoi. Na tonu le faisalamo ina ua ia faapea mai: “O le alofa mai o Ieova ou te pese ai lava e faavavau; ou te faailoa atu i loʻu gutu lou faamaoni i lea tupulaga ma lea tupulaga.” (Salamo 89:1) Po ua tatou lē o tosina māfana atu ea i sea Atua? E mautinoa, “e faavavau lava lona alofa.”—Salamo 100:5.

[Ata i le itulau 23]

A. H. Macmillan