Ia Faataʻitaʻi iā Ieova a o Toleniina Lau Fanau

“Pe lē faasaʻoina ea e mātua uma lava a latou fanau?”—EPERU 12:7, Contemporary English Version.

1, 2. Aiseā ua faigatā ai i mātua ona tausia aʻe a latou fanau i aso nei?

NA FAAALIA i se suʻesuʻega na faia i Iapani i ni tausaga ua mavae e faapea, e tusa ma le ʻafa o tagata matutua sa faatalatalanoa na latou lagona e faapea, sa itiiti lava ni fesootaʻiga sa faia i le va o mātua ma a latou fanau ma ua tele ina tuufau e mātua a latou fanau. I se isi suʻesuʻega sa faia i lenā atunuu, e toetoe lava o le kuata o i latou na tali mai, sa ioe e faapea, e latou te leʻi iloa pe faapefea ona feutagaʻi ma le fanau. E lē na o atunuu o Asia e tupu ai lenei mea. Ua lipotia mai e le Toronto Star e faapea: “E toʻatele mātua i Kanata ua latou taʻutino mai lo latou lē mautinoa pe faapefea ona avea i latou o ni mātua lelei.” I so o se vaipanoa lava, ua iloa ai e mātua le faigatā ona tausia aʻe o a latou fanau.

² Aiseā e fesagaʻi ai mātua ma faafitauli i le tausia aʻe o a latou fanau? O le māfuaaga autū lava, talu ai o loo tatou ola nei i “aso e gata ai,” ma ua oo mai “aso faigata.” (2 Timoteo 3:1) E faaopoopo atu i ai, ua taʻua e le Tusi Paia le “leaga o manatu o loto o tagata e afua mai ina o tama iti.” (Kenese 8:21) Ma o talavou lava ia o loo tele ina lamatia i osofaʻiga a Satani, o lē ua pei “o se leona tagi” o loo taumafai e puʻea i latou e leai se poto masani. (1 Peteru 5:8) E mautinoa le anoanoaʻi o toʻatugā ua fesagaʻi ma mātua Kerisiano, o loo taumafai e tausi aʻe a latou fanau “i aoaiga ma apoapoaiga a [Ieova].” (Efeso 6:4) E mafai faapefea e mātua ona fesoasoani i a latou fanau ina ia ola aʻe e avea o ni tagata tapuaʻi taʻumatuaina a Ieova, o loo mafai ona latou iloa “le lelei ma le leaga”?—Eperu 5:14.

3. Aiseā e manaʻomia tele ai toleniga ma taʻitaʻiga faamātua mo le tausia aʻe ma le manuia o le fanau?

³ Na faapea mai le tupu poto o Solomona: “Ua fusifusia le valea i le loto o le tama.” (Faataoto 13:1; 22:15) Ina ia liaʻi ese mai i o latou loto lenā valea, e manaʻomia ai e talavou ni faasaʻoga alofa mai o latou mātua. Peitaʻi, e lē o taimi uma e talia ai e talavou na faasaʻoga. O le mea moni, e masani ona latou lē fiafia i fautuaga e tusa lava po o ai e avatuina. O le mea lea, e tatau ai i mātua ona faamasani e ‘aʻoaʻo le tama e tusa ma lona ala.’ (Faataoto 22:6) Pe a talia e le fanau na aʻoaʻiga, e mafai ona latou maua ai le ola. (Faataoto 4:13) Maʻeu se matuā tāua mo mātua ona iloa po o ā mea ua aofia ai i le toleniina aʻe o a latou fanau talavou!

Aʻoaʻiga—Le Mea e Uiga i Ai

4. O le ā le faauigaina autū o le upu “aoaiga” e pei ona faaaogā ai i le Tusi Paia?

⁴ Ona o le popole o nisi mātua ina nei tuuaʻia i le faileagaina o tamaiti—pe sasa, fai i ai upu malolosi, pe faatigā i o latou faalogona—ua māfua ai ona mumusu e toe faasaʻo a latou fanau. E lē manaʻomia ona tatou teulotoina na popolega. O le upu “aoaiga” e pei ona faaaogā i le Tusi Paia, e leai ma sona faatatauga atu i se faileagaina po o le faasauā. O le upu Eleni mo le “aoaiga” e autū lona fesootaʻi atu i faatonuga, aʻoaʻoga, faasaʻoga, ma i nisi taimi e faasino atu foʻi i le sasa faamaʻini ae i se uiga alofa.

5. Aiseā e aogā ai le tilofaʻia o le auala o loo feutagaʻi ai Ieova ma ona tagata?

⁵ I le sauniaina o na aʻoaʻiga, ua faataatia ai e Ieova le Atua se faaaʻoaʻoga e sili ona lelei. I le faatusatusa atu o Ieova i se tamā faaletagata, na tusi ai le aposetolo o Paulo e faapea: “Pe lē faasaʻoina ea e mātua uma lava a latou fanau? . . . E faasaʻo e o tatou tamā faaletagata i tatou mo se taimi puupuu, ma e latou te faia faapea ona ua latou manatu o se mea lea ua sili ona lelei mo lea taimi. Peitaʻi e faasaʻo e le Atua i tatou mo so tatou lava lelei, auā o lona finagalo lea ina ia faapaiaina i tatou.” (Eperu 12:7-10, Contemporary English  Version) Ioe, e aʻoaʻia e Ieova ona tagata mo se fuafuaga ina ia mafai ona latou paia pe mamā. E mautinoa lava le tele o mea e mafai ona tatou aʻoaʻoina e faatatau i le aʻoaʻiina o fanau, e ala i le tilofaʻia o le auala ua toleniina ai e Ieova ona tagata.—Teuteronome 32:4; Mataio 7:11; Efeso 5:1.

Alofa—Le Malosi e Uunaʻia Ai

6. Aiseā e ono faigatā ai mo mātua ona faataʻitaʻi atu i le alofa o Ieova?

⁶ “O le Atua, o le alofa lava ia,” o le faamatalaga lenā a le aposetolo o Ioane. O lea la, o le toleniga o loo saunia mai e Ieova e uunaʻia i taimi uma lava e le alofa. (1 Ioane 4:8; Faataoto 3:11, 12) Po o le uiga ea o lenei manatu e faapea, o mātua o ē ua masani i le alolofa atu i a latou fanau, o le a faigofie ona latou faataʻitaʻi atu iā Ieova i lenei itu? E leai. O le alofa o le Atua o se alofa e faavae aʻe i mataupu silisili. Ma ua taʻua e se alii aʻoga atamai i Tusitusiga Eleni e faapea, o lenā alofa “e lē o taimi uma e fesootaʻi atu ai i faanaunauga masani.” E lē tauaso le silasila a le Atua ona o ni lagona faaootia loto. E silasila pea o iā i le mea e sili ona lelei mo ona tagata.—Isaia 30:20; 48:17.

7, 8. (a) O le ā le faaaʻoaʻoga o le alofa e faavae i mataupu silisili sa faataatia e Ieova i feutagaʻiga ma ona tagata? (e) E mafai faapefea e mātua ona faataʻitaʻi iā Ieova i le fesoasoani atu i a latou fanau e atiina aʻe le tomai e usitaia ai mataupu silisili o le Tusi Paia?

⁷ Seʻi manatu i le alofa na faaalia e Ieova i feutagaʻiga ma le fanauga a Isaraelu. Sa faaaogā e Mose se faatusatusaga matagofie e faamatalaina ai le alofa o Ieova mo lona nuu tau amata o Isaraelu. Tatou te faitau i ai: “E pei o le aeto ona faaoso i ana tama, e faapepepepe i luga o ana tama, e fola ona apaau, e saposapo ia te i latou, e ave ia te i latou i luga i ona apaau; sa faapea Ieova e toatasi ona taʻitaʻi ia [Iakopo].” (Teuteronome 32:9, 11, 12) Ina ia aʻoaʻo le felelei a lana toloaʻi, e ‘faaoso ai e le [aeto tinā] ana tama,’ e ala i le feminoiaʻi solo ma apatā ona apaʻau ina ia faaoso ai lana toloaʻi e felelei ese mai le faamoega. A oo loa ina oso ese se tamaʻi aeto mai le faamoega, lea e masani ona fau i luga o se papa maualuga lava, ona ‘faapepepepe lea o le [aeto tinā] i luga’ o lana tama. Afai e foliga mai o le a paʻū le tamaʻi aeto i le laueleele, ona lele faavave ifo lea o le aeto tinā i lalo o lana tama, ma toe faatiʻetiʻe iā te ia “i ona apaau.” E faapena foʻi le auala sa tausia ai ma le alofa e Ieova le nuu sa faatoʻā fanau mai o Isaraelu. Na ia tauaaoina mai i tagata le Tulafono e auala mai iā Mose. (Salamo 78:5-7) Ona puipuimalu lava lea e le Atua le nuu, ma nofosauni e laveaʻia lona nuu pe a latou fesagaʻi ma ni puapuaga.

⁸ E mafai faapefea ona faataʻitaʻi atu mātua Kerisiano i le alofa o Ieova? Muamua, e ao ona latou aʻoaʻo atu i a latou fanau mataupu silisili ma tapulaa o loo iai i le Afioga a le Atua. (Teuteronome 6:4-9) O le sini ina ia fesoasoani atu i fanau ia latou iloa fai ni filifiliga e ōgatusa ma mataupu silisili o le Tusi Paia. I le faia o lenei mea, ua peiseaʻī ai o loo faapepepepe ifo mātua i luga o a latou fanau, a o mātaʻitūina le auala o loo latou faatatauina ai mataupu silisili ua latou aʻoaʻoina. A o matutua aʻe le fanau ma faasolosolo mālie ona avatu i ai lo latou saʻolotoga, e nofosauni mātua alolofa e ‘lele faavave ifo i lalo’ ma ‘toe ave a latou fanau i o latou apaau’ i so o se taimi lava o le a iai se lamatiaga. O le ā le ituaiga o lamatiaga?

9. O le ā le lamatiaga patino lea e ao i mātua alolofa ona mataala i ai? Ia faataʻitaʻi mai.

⁹ Sa lapataʻia e Ieova le Atua le fanauga a  Isaraelu e tusa o āuga e aumaia e aumea leaga. (Numera 25:1-18; Esera 10:10-14) Ua avea foʻi o se lamatiaga taatele i aso nei le sesē o tagata e auaumea atu i ai. (1 Korinito 15:33) E lelei mo mātua Kerisiano ona faataʻitaʻi iā Ieova i lenei itu. Na amata ona fia uō se teine e igoa iā Lisa e 15 ona tausaga, i se tama sa lē tutusa ana tapulaa tau amio ma talitonuga faaleagaga, ma le tulaga sa iai le aiga o Lisa. Ua faamatala mai e Lisa e faapea: “Na vave lava ona mātauina e oʻu mātua se suiga i laʻu amio ma la faailoa mai ai so la popolega. O nisi taimi sa la faasaʻoina aʻu, a o nisi taimi sa la faalaeiau mai ma le alofa.” Na faia lelei se latou fesagaʻiga ma Lisa ma la faalogologo atu ma le onosai, o inā na fesoasoani ai iā te ia e faafetaiaʻia le mea lea sa la iloa atonu o le aa o le faafitauli—le faanaunauga ia talia mai e ana aumea. *

Ia Tatala Pea Laina o Fesootaʻiga

10. I ā auala na faataatia ai e Ieova se faaaʻoaʻoga lelei i le fesootaʻi mai i le fanauga a Isaraelu?

¹⁰ Ina ia taulau manuia i le toleniina o fanau, e ao ai i mātua ona tauivi e tatala pea laina o fesootaʻiga ma a latou fanau iti. E ui ina silafia lelei e Ieova mea o loo i o tatou loto, ae o loo ia faalaeiauina lava i tatou ina ia talanoa pe fesootaʻi atu iā te ia. (1 Nofoaiga a Tupu 28:9) Ina ua uma ona tuuina mai e Ieova le Tulafono i le fanauga a Isaraelu, ona ia tofia lea o sā Levī e aʻoaʻoina i latou, ma sa ia aauina mai foʻi perofeta e feutagaʻi ma faasaʻoina i latou. Sa ia naunau foʻi e faafofoga mai i a latou tatalo.—2 Nofoaiga a Tupu 17:7-9; Salamo 65:2; Isaia 1:1-3, 18-20; Ieremia 25:4; Kalatia 3:22-24.

11. (a) E faapefea ona faaleleia e mātua ni fesootaʻiga lelei ma a latou fanau? (e) Aiseā e tāua ai mo mātua ona avea o ni ē faalogologo lelei pe a fesootaʻi ma a latou fanau?

¹¹ E faapefea ona faataʻitaʻi atu mātua iā Ieova pe a latou fesootaʻi ma a latou fanau? Muamua lava ma o le mea sili foʻi lea, e tatau ona la faaavanoa se taimi mo le fanau. E lelei foʻi i mātua pe a ʻalofia faamatalaga lē magafagafa na e faatauemu ai, e pei o le, “Na pau lava lenā? Faʻita lava o se mea tāua”; “E valea lenā mea”; “Ae o le ā le isi mea e te manaʻo ai? Seʻi vaai a i si ou tamaʻi mosimosi.” (Faataoto 12:18) O le auala e mafai ai e mātua atamamai ona faalaeiau le fanau e faaali mai o latou lagona, o lo la taumafai lea e avea ma nisi e faalogologo lelei. O mātua e lē amanaʻiaina a latou fanau a o laiti, atonu o le a lē amanaʻiaina foʻi i latou e le fanau pe a matutua aʻe. E naunau lava Ieova i taimi uma e faafofoga mai i ona tagata. E faafofoga mai pea o ia iā i latou o loo liliu atu ma le lotomaulalo iā te ia i le tatalo.—Salamo 91:15; Ieremia 29:12; Luka 11:9-13.

12. O ā uiga e mafai ona faaalia e mātua ina ia faigofie ai mo le fanau ona faalatalata atu iā i latou?

¹² Seʻi manatu foʻi i le tulaga ua mafai ai e nisi vala o le uiga totino o le Atua ona faigofie ai mo ona tagata le faalatalata atu ma le saʻoloto iā te  ia. Mo se faaaʻoaʻoga, na matuā matuiā le agasala a le tupu o Tavita o le nuu anamua o Isaraelu e ala i lo la faia o le mulilua ma Patesepa. Ona o se tagata lē lelei atoatoa, sa faia foʻi e Tavita nisi agasala matuiā i lona olaga. Peitaʻi, sa lē taitai ona foʻi ai i lona faalatalata atu iā Ieova ma saʻili atu mo lana faamagaloga ma faasaʻoga. E leai se masalomia, o le alofa agalelei ma le alofa mutimutivale o le Atua na faafaigofie ai mo Tavita ona liliu atu iā Ieova. (Salamo 103:8) O le faaalia o na uiga faale-Atua e pei o le agalelei ma le alofa mutimutivale, ua mafai ai e mātua ona tatala pea laina o fesootaʻiga, e tusa lava pe faia e fanau ni mea sesē.—Salamo 103:13; Malaki 3:17.

Ia Magafagafa

13. O le ā e aofia ai i le magafagafa?

¹³ Pe a faalogologo atu i a latou fanau, e ao i mātua ona magafagafa ma faaalia “le poto mai lugā.” (Iakopo 3:17) Na tusi mai le aposetolo o Paulo: “Ia iloa e tagata uma lo outou magafagafa.” (Filipi 4:5, NW ) O le ā le uiga o le faapea atu, ia magafagafa? O se tasi o faauigaina o le upu Eleni lea e faaliliu i le “magafagafa” o le “lē soona maumauaʻi i le upu o le tulafono.” E mafai faapefea e mātua ona faaalia le magafagafa, ae i le taimi e tasi, o loo la tausisia maumauaʻi tapulaa tau amio ma le faaleagaga?

14. Na faapefea ona faaalia e Ieova lona magafagafa i a la feutagaʻiga ma Lota?

¹⁴ Ua faatulaga mai e Ieova se faaaʻoaʻoga mataʻina i le magafagafa. (Salamo 10:17) Ina ua ia faatonuina Lota ma lona aiga e ō ese mai le aai ua faamalaiaina o Sotoma, sa “faatuatuai” pea Lota. Mulimuli ane, ina ua fai atu i ai le agelu a Ieova e sola atu i atumauga, na faapea ane Lota: “Ou te le lavā sola i le mauga . . . Faauta mai ea, o le aai lela [Soara] e lata mai, ou te sola i ai, o si aai itiiti foi lea; seʻi ou sola ane i ai, e le o si aai itiiti ea?” Na faapeʻī le finagalo o Ieova i lenei mea? Na ia fetalai mai: “Faauta, ua ou talia foi lou manao i lena mea, ou te le faaumatia lena aai ua e fai mai ai.” (Kenese 19:16-21, 30) Sa finagalo malie Ieova e talia le talosaga a Lota. Ioe, e manaʻomia ona pipiimau mātua i tapulaa ua faataatitia mai e Ieova le Atua i lana Afioga, le Tusi Paia. Peitaʻi, atonu e talafeagai ona amanaʻia manaʻoga o le fanau iti pe afai e leai ni mataupu silisili o le Tusi Paia e ono solia ai.

15, 16. O le ā se lesona e mafai ona aʻoaʻoina e mātua mai le tala faatusa o loo taʻua i le Isaia 28:24, 25?

¹⁵ O le magafagafa e aofia ai le sauniunia o loto o le fanau ina ia mafai ona latou taliaina aʻoaʻiga. I se auala faafaatusa, na faatusatusa ai e Isaia le tulaga o Ieova i se faifaatoʻaga ma ia faapea mai: “Ua galue ea i le suotosina i aso uma lava le ua galue i le suotosina ina ia lulu ai saito? Ua suatia ea e ia ma faamaluluina lona fanua? A uma ona faalauleleia e ia le eleele, e le saaluuina ea e ia le kiseka, ma lulusoloina le kumina, ma totōina le saito faaatusolo, ma le karite i le mea e totō ai, ma le kaseme i lona tuaoi?”—Isaia 28:24, 25.

¹⁶ E ‘galue [Ieova] i le suotosina ina ia lulu saito’ ma ‘suatia ma faamaluluina lona fanua.’ O inā e na te sauniunia ai loto o ona tagata a o ia leʻi aʻoaʻiina i latou. Pe a faasaʻoina a latou fanau, e mafai faapefea e mātua ona ‘suotosinaina’ loto o a latou fanau? Sa faataʻitaʻi atu se tasi tamā iā Ieova ina ua ia faasaʻoina lona atalii e fā tausaga le matua. Ina ua tuʻi e lona atalii se tamaitiiti e latou te tuaoi, sa muamua ona faalogologo atu ma le onosai le tamā i faamolemolega na taʻu mai e lona atalii. Ona ia gaoioi loa lea e peiseaʻī o loo ia ‘suotosinaina’ le loto o lona atalii, e ala i le faamatala atu e le tamā o se tala e uiga i se tamaitiiti na mafatia i faiga sauā sa faia i ai e se tagata fia malosi. I le faalogo atu i lea tala, na iʻu ai ina faapea mai le tamaitiiti e tatau la ona faasala le tagata fia malosi. O lenā ‘suotosinaina’ sa sauniunia ai le loto o le tamaitiiti ma faafaigofie ai ona ia malamalama e faapea, o le tuʻiina o le tamaitiiti e latou te tuaoi o se gaoioiga a se tagata fia malosi ma e sesē.—2 Samuelu 12:1-14.

17. O le ā se lesona i le faia o faasaʻoga faamātua ua saunia mai i le Isaia 28:26-29?

¹⁷ Na faatusatusa atili atu e Isaia faasaʻoga a Ieova i se isi gaoioiga tau faatoʻaga—le soligasaito. E faaaogā e se faifaatoʻaga ni meafaigaluega eseese mo le soliina o le saito, e fuafua lava i le mafiafia o le aputi o le saito. E faaaogā se laau umī mo le sasaina o le kiseka ona e vaivai, ma se tootoo malō mo le kumina, peitaʻi e faaaogā se taavale toso mamafa e leai ni ona uili, pe faaaogā foʻi le ituaiga e iai uili, e soli ai saito ua sili atu ona mafiafia o latou aputi. Peitaʻi, o le a ia lē matuā solia foʻi saito malo i se tulaga o le a matuā nutililii ai. E faapena foʻi pe a finagalo Ieova e aveesea so o se mea e lē  lelei mai ona tagata, e na te fesuisuiaʻia ana auala e feutagaʻi ai ma i latou, e fua i manaʻoga ma tulaga o loo iai i lenā taimi. E lē taitai ona pulepuletutū pe soona ʻinaʻinā o ia. (Isaia 28:26-29) O nisi fanau e tau lava o le faataupupula atu i ai o o latou mātua, ona latou iloa lea o le mea e tatau ona fai, ma e leai lava ma se isi tala e toe manaʻomia. O isi e manaʻomia ona faamanatu pea lava pea i ai, a o isi foʻi e ono manaʻomia ai se faatauanau malosi atu i ai. O mātua e magafagafa o le a latou faia ni faasaʻoga e ōgatusa ma manaʻoga o tamaiti taʻitoʻatasi.

Ia Avea Talanoaga Faaleaiga o ni Mea e Fiafia Ai

18. E mafai faapefea e mātua ona faaavanoa se taimi mo le suʻesuʻega faale-Tusi Paia faifai pea a le aiga?

¹⁸ O nisi o auala e sili ona lelei mo le faatonuina o lau fanau o se suʻesuʻega faale-Tusi Paia e faifai pea ma le talanoaina o le mau o le Tusi Paia i aso taʻitasi. E sili atu ona uigā le suʻesuʻega faaleaiga pe a faifai pea. Pe afai e lē o iai se faasologa lelei i se taimi e fai ai, e foliga mai la o le a lē taitai ona iai i se tulaga e faifai pea. E tatau ai la i mātua ona ‘faatau mai le taimi’ mo le suʻesuʻega. (Efeso 5:15-17, NW) E ono avea o se luʻi le taumafai e faatulaga se taimi maʻoti e fetaui mo tagata uma. Na iloa e le ulu o se tasi aiga e faapea, a o matutua aʻe le fanau, sa amata ona eseese a latou faasologa, ma faafaigatā ai le mauaina o se taimi e potopoto faatasi ai le aiga atoa. Peitaʻi, sa masani ona faatasitasi le aiga i pō o sauniga a le faapotopotoga. O inā loa e faatulaga ai e le tamā ina ia faia le suʻesuʻega a le aiga i se tasi o na pō. Na sologa lelei lenā fuafuaga. Ua avea nei le fanau uma e toʻatolu o ni auauna papatisoina a Ieova.

19. E mafai faapefea ona faataʻitaʻi mātua iā Ieova pe a faia le suʻesuʻega a le aiga?

¹⁹ Peitaʻi ane, e lē lava le na ona talanoaina o ni mataupu faale-Tusi Paia i le taimi o le suʻesuʻega. Na aʻoaʻoina e Ieova le fanauga a Isaraelu lea na toe foʻi i lo latou nuu, e ala mai i ositaulaga, o ē sa ‘folafolaina atu ma faamatala le uiga’ o le Tulafono, “ma faamatalaina atu ia te i latou le mea ua faitauina.” (Neemia 8:8) O se tasi tamā o lē na taulau manuia i le fesoasoani atu i lana fanau uma e toʻafitu ina ia alolofa iā Ieova, sa fai ma ana masani le alu na o ia i lona potu a o leʻi faia le suʻesuʻega a le aiga, ina ia sauniuni, e ala i le fetuutuunaʻi o le mataupu ia fetaui ma manaʻoga o tamaiti taʻitoʻatasi. Sa ia faia le suʻesuʻega i se auala e fiafia ai lana fanau. E manatua lava e se tasi o ona atalii nei ua matutua e faapea: “Sa avea le suʻesuʻega o se mea e mālie lava i taimi uma. Pe afai o lea sa kikikiki  la matou polo i fafo ae valaau atu o le a fai le suʻesuʻega a le aiga, o le taimi lava lenā e tuu ai loa la matou taaloga ae sau le tuli i totonu o le fale mo le suʻesuʻega. O se tasi lenā o afiafi o le vaiaso e sili ona matou fiafia i ai.”

20. O le ā se faafitauli e mafai ona tulaʻi mai i le tausia aʻe o le fanau, lea o le a talanoaina?

²⁰ Na folafola mai e le faisalamo: “Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia.” (Salamo 127:3) O le toleniina o a tatou fanau e alu ai se taimi ma ni taumafaiga, ae o le faia faapea i se tulaga lelei e mafai ona iʻu i le ola e faavavau mo a tatou fanau. Maʻeu se taui matagofie! O lea, tau ina ia tatou filigā e faataʻitaʻi atu iā Ieova a o toleniina a tatou fanau. Peitaʻi ane, a o tuuina mai i mātua le tiute tauave o le “tausi atu i [fanau] i aoaiga ma apoapoaiga a [Ieova],” e lē o faamautinoaina mai ai se taulau manuia. (Efeso 6:4) E tusa lava po o se tausiga e sili ona lelei, ae mafai lava ona fouvale se tasi o le fanau ma lē toe fia auauna atu ai iā Ieova. O le ā la se mea e tatau ona fai i ai? O le ʻauʻau lenā mo le mataupu o sosoo mai.

[Faamatalaga pito i lalo]

O le ā Lau Tali?

• E mafai faapefea e mātua ona faataʻitaʻi atu i le alofa o Ieova lea e faamatalaina i le Teuteronome 32:11, 12?

• O le ā se mea ua e aʻoaʻoina mai le auala sa fesootaʻi mai ai Ieova i le fanauga a Isaraelu?

• O le ā ua aʻoaʻoina ai i tatou, i le finagalo malie o Ieova e faafofoga mai i le augani atu a Lota?

• O le ā se lesona i le faasaʻoina o fanau ua e aʻoaʻoina mai le Isaia 28:24-29?

[Fesili mo le Suʻesuʻega]

[Ata i le itulau 9]

Sa faatusatusa e Mose le toleniina e Ieova o ona tagata, i le auala e toleni ai e se aeto lana tama

[Ata i le itulau 10]

E manaʻomia e mātua ona faaavanoa se taimi mo a latou fanau

[Ata i le itulau 12]

“O se tasi lenā o afiafi o le vaiaso e sili ona matou fiafia i ai”