Lipoti a Ē Faalauiloa le Malo

Oo Atu iā i Latou e Faigatā Ona Oo Atu i Ai

E TAUMAFAI Molimau a Ieova e faafeiloaʻia tagata uma e mafai ona latou oo atu i ai ma le feʻau o le Malo. I nisi taimi, e manaʻomia ai se taumafaiga faaopoopo ina ia oo atu ai iā i latou o ē e seāseā ona maua i aiga. (Mareko 13:10) E tusa ma lenei tulaga, ua faamatala mai e se faifeʻau e paeonia faapito i se atunuu i Amerika i Saute le mea na tupu lea o loo mulimuli mai.

“I se tasi aso, sa ou iloa ai o le a asiasi mai le kovana o le setete i le oganuu lea e tofia i ai i maʻua ma laʻu avā. Talu ai e mautinoa o ia o se tasi o tagata e seāseā ona iai i le fale, na ou tusia ai se tusi iā te ia ma fafao faatasi ai ma nisi o lomiga faale-Tusi Paia, e aofia ai ma le polosiua, O le ā e Manaomia e le Atua Mai ia i Tatou? ma tusi o le Mankind’s Search for God ma Le Poto e Taʻitaʻia ai i le Ola e Faavavau. I laʻu tusi, na faamatala atu ai le fuafuaga o nei lomiga taʻitasi.

“Talu ai loʻu naunau tele e fia iloa po o le ā sona uiga faaalia i lomiga, na ou talosaga atu ai mo se avanoa e feiloaʻi ai ma ia. I ni nai vaiaso mulimuli ane, na tatalaina mai ai le avanoa ma te feiloaʻi ai, ma na ou aveina ai se kopi o le vitiō, Jehovah’s Witnesses—The Organization Behind the Name. E tusa ma le lua itula le umi o la ma feiloaʻiga. Ina ua uma ona ma matamata ma le kovana i le vitiō, sa ou fesili atu i ai po o le ā sona manatu i le vitiō. Na ia tali mai: ‘E leai lava se isi faalapotopotoga i le lalolagi e pei o la outou faalapotopotoga. Maʻimau pe ana iai ni tagata e pei o outou e mafai ona fesoasoani i le faaumaina o aʻu mataupufai faalemalo!’ Ona ia fesili mai lea po ua ou oo i le ofisaulu i le lalolagi aoao o la matou faalapotopotoga. Sa ou fai atu i ai, e ui lava o loʻu sini lenā talu ona 14 oʻu tausaga, ae e leʻi iai lava se avanoa ou te asiasi atu ai i lo matou ofisaulu i Brooklyn, i Niu Ioka. O se tasi na o sini e faigatā lava ona ausia. Sa ia tilotilo totoʻa mai iā te aʻu mo sina taimi puupuu. Ona ia faapea mai lea, e manaʻo o ia ina ia ou maua lenā avanoa. Sa ia faia o maʻua pemita faaletulafono ma tuuina mai faameaalofa iā i maʻua ia ni pepa e malaga ai i le vaalele!

“O loo maua e lē aunoa e le kovana i le taimi nei ia mekasini o Le Olomatamata ma le Ala Mai! E ma te faamoemoe ua lē o toe umi se taimi ona mafai loa lea ona ma faia se suʻesuʻega faale-Tusi Paia ma ia.”