Se Lesona Mai le Laau o le Pama

“E MATUĀ uigaese le matagofie o le tino mai o le laau.” O le auala lenā na faamatalaina ai e se tasi lomifefiloi o le Tusi Paia le laau o le pama (date palm). I taimi o le Tusi Paia ma aso nei, o loo faamatagofieina ai e pama le vanu o loo tafe ai le vaitafe o le Naila i Aikupito, ma o loo saunia e na laau se faapaologa e mālōlō ai i vaipuna o le toafa o le Negeb.

I le pei o le tele o ituaiga o laau o le pama, o le date palm e matuā tū saʻo lelei lava. O nisi pama e oo atu lo latou maualuluga i le 100 futu [30 mita] ma faaauau pea ona fuaina mai ni fua mo le 150 tausaga. Ioe, o le pama lea e matuā manaia lava i le vaai ae e matuā fua tele mai foʻi. I tausaga taʻitasi, e fuaina mai ai e lea pama le tele o fua taufuifui. E na o le tasi le taufui ae e sili atu ma le 1,000 fua e maua ai. Na tusi se tasi tagata tusitala e uiga i fua o lea pama e faapea: “O i latou o ē . . . e na o le pau lava lo latou iloa e uiga i fua ia ua faamamago na o loo i totonu o pepa ia e faaali mai i faamalama o faleoloa, e faigatā ona latou iloa le susua o fua o le pama pe a taumafaina i le taimi e faatoʻā tau mai ai.”

Ua talafeagai ai ona faatusaina e le Tusi Paia nisi o tagata i laau o pama. Ina ia fiafia mai i ai le Atua, e pei o se pama fuatele, e tatau i se tagata ona amio saʻo ma faaauau ona fua mai i galuega lelei. (Mataio 7:17-20) O le māfuaaga lenā, na faaaogāina ai ia ata o laau o pama na vaneina e teuteu ai le malumalu o Solomona ma le malumalu o le faaaliga iā Esekielu. (1 Tupu 6:29, 32, 35; Esekielu 40:14-16, 20, 22) I lea, ina ia talileleia e le Atua le tapuaʻiga a se tasi, e tatau ona iai i se tagata ia uiga matagofie e pei o le laau o le pama. Ua faamatala mai i le Afioga a le Atua e faapea: “E tupu olaola le tagata amiotonu e pei o le pama.”—Salamo 92:12.