E Matou te Faia le Mea Aupito Sili Matou te Mafaia!

“FAI le mea aupito sili e te mafaia.” O lenā fautuaga aogā, na tuuina atu e se sui o le Vaega Pule o Molimau a Ieova i se tasi taimi i se misionare. Ae aiseā ua avatu ai sea fautuaga masani i se faifeʻau e iai se poto masani? Pe e lē o le toʻatele ea o misionare o ni tagata lototetele o ē e fesagaʻi i aso faisoo ma manu ninii, o gata, o le vevela, o faamaʻi, ma faigatā eseese?

O le mea moni, o misionare a Molimau a Ieova o tane ma fafine e pei o i tatou, o Kerisiano o ē o lo latou alofa loloto mo Ieova faapea ma o latou uso a tagata, ua uunaʻia ai i latou e ō atu e auauna i isi atunuu. O loo latou tauivi e auauna iā Ieova i le mea e aupito sili ua mafaia e lo latou tomai, e vaavaai atu iā te ia mo le malosi.—Efeso 6:10.

Ina ia aʻoaʻoina atili e uiga i le galuega faamisionare, seʻi faapea o loo tatou faaalu se aso e asiasi atu ai i se aiga misionare i Aferika i Sisifo.

Se Aso i le Galuega Faamisionare

Ua toeitiiti lava tā le fitu i le taeao. Ua tatou taunuu atu i le aiga o misionare i le taimi tonu lava e auai ai i le talanoaina o le mau o le aso mai le Tusi Paia. Ua faafeiloaʻia ma le māfana i tatou e misionare e toʻasefulu ma faaavanoa mai nofoa i le laulau mo le taumafataga o le taeao. A o tatou faamasani atu iā i latou, ona amata loa lea ona faamatala mai e se tasi o misionare ua tele tausaga o galue i lona tofiga, se tala fiafia i se mea na tupu i lana faiva. Peitaʻi na faamuta le talanoaga ina ua faapea mai le taʻitaʻifono o le talanoaga mo lea aso i lenei vaega fiafia ua oo i le taimi e talanoaina ai le mau o le asō. O le talanoaga o le a faia i le gagana Falani. E ui lava tatou te lē iloa tautala i lenā gagana, ae e manino mai i le auala o loo faamatalaina ai o latou manatu e faapea, o loo matuā lelei lava ia misionare mai isi atunuu i le faaaogāina o le gagana.

Ua uma le talanoaga faale-Tusi Paia, ona faia ai lea o se tatalo uigā, ma sosoo ai ma le mālū o le taeao. A o tatou fiafia i le taumafaina o le cereal, ua tauanauina i tatou e le misionare lea o loo nofo latalata mai ina ia tuu i luga o le cereal ia faʻipula ua tipi ninii. Ua taʻu atu i ai e tatou te lē fiafia tele i faʻi, ae na ia folafola mai, o le a matuā fiafia lava i ai pe a tofo i faʻi e totō i totonu lava o le atunuu. O lea ua tuu ai ni nai tipiga o faʻipula i luga o le cereal. Oka, e saʻo lelei lana tala! Ua matuā susua ia faʻi—e pei lava o le suamalie o le aisakulimi! Ma ua faamautinoa mai foʻi o le falaoa faa-Falani lea e fai ai le taumafataga, sa saunia i le taeao nei lava i se tamaʻi faleoloa lea e faafesagaʻi ma le aiga o misionare i le isi itu o le auala.

Pe a uma le taumafataga o le taeao, o le a tatou faaaluina le aso atoa ma se ulugalii misionare, o le a faaigoaina iā Ben ma Karen. Sa tatou faalogo e uiga i le fuatele o le oganuu i lenei atunuu i Aferika i Sisifo, ma ua tatou naunau ai lava e fia faamaonia nei tala.

Ua taunuu i le nofoaga e faatali ai pasi, ua tatou iloa ai e tusa ma le 12 ni tagata o loo faatalitali ai. E leʻi umi lava ae faia loa e le ulugalii misionare se talanoaga uigā ma se fafine ma sana tama tama e  uiga i se mataupu faale-Tusi Paia. I le lē malamalama i le faa-Falani, o loo tatou tutū lava ma ʻataʻata! Ma a o taliaina e le fafine ia kopi o Le Olomatamata ma le Ala Mai!, ae taunuu mai loa ma le pasi, ma ua taumafai tagata e ō faatasi uma lava i totonu o le pasi i le taimi e tasi! A o tatou tau ō atu i totonu o le pasi, ae tulei mai i tatou e le toʻatele o tagata sa i le pito i tua. Ua faigatā ona e savali lelei a o taumafai e ō atu i le pito i tua o le pasi. O le taimi lava ua amata ai ona faaola e le avepasi le pasi, ua tatou fepiiti faatasi ai ina ia aua neʻi paʻuū. E mai lea taimi i lea taimi, e solosolo mālie ai le pasi ma tū, ma toe faaopoopo mai ai foʻi ma le toʻatele o isi tagata. E tatou te ʻataʻata atu i isi o le pasese ma e latou te ʻataʻata mai foʻi. O o tatou moomooga, maʻimau pe ana mafai ona tatou talanoa atu iā i latou!

A o alu saosaoa atu le pasi, o loo tatou autilo atu i fafo mai le faamalama i tagata o loo fegasoloaʻi i le auala. E toʻalua ni fafine o loo savavali faatasi ma a la avega mamafa i luga o o la ulu. O le tasi o i laʻua o loo tau faapaleni se tapu vai telē i luga o lona ulu. O loo fofola e se tamāloa e faatau atu ana oloa se palanikeke i tafatafa o le ala ma fola lelei ai i luga ni nai oloa ua faamoemoe e faatau atu. I so o se mea lava, e iai tagata o ē o loo faatau mai ma faatau atu e toetoe lava so o se mea e mafai ona faatau mai ma faatau atu.

O Ben lea e tū i oʻu tafatafa, ua faafuaseʻi lava ona ia iloa se mea o loo togitogia lona vae. Po o le ā lea mea? E matuā tumu lava le pasi, ae o lea foʻi ua toe togi mai lona vae. Ua mafai ona ia tepa ifo i lalo. I se taga o loo i tafatafa o ona vae, o loo iai i totonu se pato ola, i nisi taimi e tuu mai ai lona ulu i fafo ma togi lona vae! Fai mai Ben, e foliga mai o loo avatu le pato e lē e ana ina ia faatau atu i le maketi.

Ua tatou taunuu i le oganuu, ua fiafia ona o le a tatou asiasi atu i se nuu i Aferika. A o latalata atu i le fale muamua, ua matuā leotele le patipati o lima o Ben ina ia iloa ai e lē ona le fale. O le auala lenā e “tuʻituʻi ai le faitotoʻa” e tagata i lenei vaega o le lalolagi. Ua sau se tamāloa talavou ma faamatala mai e faapea, o ia o loo pisi, ae ua talosaga mai ina ia tatou toe foʻi atu i se taimi mulimuli ane i lenā taeao.

I le isi fale, ua tatou feiloaʻi atu ai i se fafine e tautala i se gagana e lē malamalama i ai Ben. Ua valaau le fafine i lana tama tama ma fai atu i ai e na te faaliliuina mea ia e fai atu ai Ben. Ina ua uma ona talanoa Ben, ona talia lea e le fafine ia se polosiua e uiga i mataupu faale-Tusi Paia, ma na folafola ane e lana tama tane o le a ia faamatalaina atu le polosiua i lona tinā. I le fale lona tolu, o loo iai ni tagata talavou o loo nofonofo i lumāfale. Ua vave lava ona faaavanoa mai e le toʻalua o i latou ia o la nofoa e nonofo ai le ʻauasiasi. Ona sosoo ai lea ma le faia o se talanoaga uigā e faatatau i le faaaogāina o le koluse i tapuaʻiga. Ua faia fuafuaga ina ia faaauau atili ni talanoaga i le vaiaso e sosoo ai. Ua oo i le taimi e toe asia ai le tamāloa pisi lea na tatou tau i ai i le fale muamua. E foliga mai ua ia iloa la tatou talanoaga ma tagata talavou lea faatoʻā uma ona fai i le isi pitonuu. E tele ni ana fesili faale-Tusi Paia o loo iai ma ua talosaga mai ina ia faia sana suʻesuʻega faale-Tusi Paia. Ina ua uma ona siaki lana faasologa, ona malie loa lea o Ben e toe foʻi atu i le taimi lava lenā i le isi vaiaso e sosoo ai. I le foʻi atu i le aiga o misionare mo se taumafataga o le aoauli, ua faamatala mai ai e Ben ma Karen e faapea, e tatau ona faaeteete lelei i le fuafuaina o a la suʻesuʻega faale-Tusi Paia, auā e faigofie lava ona amata nisi suʻesuʻega e sili atu i le mea e mafai ona la taulimaina.

Ua tatou faamālō atu ia i laʻua ona o le sologa lelei o le la tautala i le gagana Falani. Ua faamatala mai e Ben e faapea, ua ono tausaga o la auauna ma Karen e avea o ni misionare, ma ua amata ona la masani i le gagana Falani. Ua la faamautinoa mai e faapea, e leʻi faigofie le aʻoaʻoina o se gagana fou, ae o le finafinau e tauia.

I le 12:30 i le aoauli, e faapotopoto ai misionare uma i le laulau mo le taumafataga o le aoauli. Ua tatou iloa ai o aso taʻitasi, e tofia ai misionare eseese e saunia ia taumafataga o le taeao ma le aoauli ma faamamā ipu pe a uma. I le asō, ua saunia ai e se misionare se taumafataga  susua o moa falai ma pateta e falai, faatasi ma se salati tamato—o se taumafa faapitoa ua mafai ona saunia e lenei tuafafine!

O ā fuafuaga a Ben ma Karen i le aoauli? Ua la faamatala mai e faapea, i le atunuu atoa, e amata mai i le 1:00 i le aoauli e oo i le 3:00 i le afiafi ona mālōlō tagata ona o le vevela o le lā, o lea, e masani lava ona faaaogā e misionare se vaega o lenā taimi e suʻesuʻe ai pe fai ai foʻi sina moe. E tatou te leʻi teteʻi ina ua taʻu mai e Karen e faapea, e lē umi lava se taimi e faamasani ai ni misionare fou i lenei tū!

Ina ua uma sina moe, ona tatou toe ō atu foʻi lea i le faiva i le fanua. O se tagata fiafia ua fai si umi o taumafai Ben e faafesootaʻi, e lē o iai foʻi i le fale, ae a o pati lima o Ben, e toʻalua tama talavou ua ō mai i le faitotoʻa. Ua la faailoa mai e faapea, na taʻua e lē ona le fale ia asiasiga a Ben ma ua matuā fautuaina i laʻua ia maua se kopi o le tusi faale-Tusi Paia o Le Poto e Taʻitaʻia ai i le Ola e Faavavau. Ua fiafia e tuu ai se kopi o lenā tusi iā i laʻua. Ona sosoo ai lea ma lo tatou ō atu e puʻe le pasi e ō atu ai i se vaipanoa o le a faia ai se suʻesuʻega faale-Tusi Paia a Karen ma se fafine fiafia.

A o tatou malaga atu i auala e tumutumu ai tagata, sa faamatala mai e Karen e faapea, na ia feiloaʻi atu i se fafine i se tasi aso a o la malaga i se tamaʻi taavale laʻupasese faatasi ma isi tagata. Na avatu e Karen se sāvali i le fafine e faitau ai a o alu le faigāmalaga. Na faitau e le fafine lenā sāvali ona toe tapa atu lea mo se isi. Sa ia faitau foʻi ma le matuā fiafia lenā sāvali. Ina ua taunuu le malaga, na fuafua ai e Karen e asiasi atu i le fafine i lona aiga ma amata ai se suʻesuʻega faale-Tusi Paia lea o loo sologa lelei pea i le polosiua, O le ā e Manaomia e le Atua Mai ia i Tatou? O le asō o le a talanoaina ai e Karen le lesona lona lima o lenā polosiua.

Ua matuā olioli i tatou uma i le aso i le auaunaga i le fanua, ae o loo iai pea ni a tatou fesili e uiga i le galuega faamisionare. Ua faamautinoa mai e i laʻua o loo talimālō e faapea, pe a foʻi atu i le fale, o le a la saunia se taumafataga māmā mo i tatou ma taliina a tatou fesili.

Le Auala ua Latou Faataunuu ai le Tele o Mea e Ao ona Fai

A o tatou aai i fuāmoa falai, falaoa faa-Falani, ma sisi, ua tatou iloa ai le tele o mea e uiga i le olaga faamisionare. O le Aso Gafua, e masani lava o le aso lea e mālōlō ai misionare po o le faia ai foʻi o mea tau iā i latou lava. O le toʻatele o misionare, e latou te faaaluina se taimi i lenā aso e tusi ai ni tusi i o latou aiga ma uō. E tāua tele iā i latou tala mai o latou aiga, ma e fiafia tele misionare e aauina atu ma maua mai ia meli.

Talu ai o misionare e galulue vavalalata, e tāua ai la ona tausia ni fesootaʻiga lelei e ala i le faifaimea faatasi ma uso ā misionare ma i le talanoaina o mea faaleagaga. O lea itu, e faaopoopo i le tausisia o se faasologa masani o suʻesuʻega totino faale-Tusi Paia, o pō o Aso Gafua uma, e suʻesuʻeina ai e misionare le Tusi Paia faatasi ma le mekasini o Le Olomatamata. Ua faamanino mai e Ben e faapea, afai e nonofo faatasi ni misionare e eseese le mea e ō mai ai, e lē maalofia le aliaʻi mai ai o ni nai feeseeseaʻiga o manatu, ae o le sauniuniga faaleagaga o le suʻesuʻega faale-aiga, ua fesoasoani iā i latou e tausia ai se siʻomaga filemu, ma le autasi. Ua ia faamamafa mai foʻi e faapea, e fesoasoani foʻi lenei mea ina ia aua neʻi manatu mamafa tele ai se tasi iā te ia lava.

 E tāua foʻi le lotomaulalo. Ua aauina atu misionare e lē ina ia auauna mai tagata iā i latou, ae ia latou auauna atu. Ua mātauina e misionare e faapea, o se tasi o mea e aupito sili ona faigatā ona faia i so o se gagana lava, o le faapea atu lea “e faamalie atu,” aemaise lava pe a faatoese atu se tagata ona o se tala po o se mea ua ia faia ma le leʻi fuafuaina. Ua faamanatu mai e Ben iā i tatou le faaaʻoaʻoga mai le Tusi Paia a Apikaila o lē na faatoese atu ona o le amioga lē mafaufau na faia e lana tane, ma i lea na faaleleia ai se tulaga na semanū e iʻu i se faalavelave matuiā. (1 Samuelu 25:23-28) O le mafaia ona nonofo “fifilemu” o se vala tāua lea i le avea o se misionare lelei.—2 Korinito 13:11.

E faatasi i le masina ona fono ia misionare ina ia talanoaina ai mataupu e aafia ai le aiga, faapea le suia o le faasologa i le tausiga o le aiga. Pe a uma lenā, ona fiafia faatasi lea o tagata uma i le taumafaina o se meataumafa suamalie faapitoa. O lenei mea e foliga mai iā i tatou o se fuafuaga— e matuā aogā—ma lelei.

Ina ua uma le taumafataga o le pō, ona fai loa lea o sa tatou matamataga puupuu i le fale o misionare. Ua tatou mātauina ai, e ui lava e lē o se fale e soona taugatā naʻuā, ae e felagolagomaʻi lava misionare i le tausiaina ina ia matuā mamā. E iai le pusa aisa, se masini tamea, ma se ogaumu. Ua faailoa mai e Karen e faapea, i atunuu o le teropika, e pei o le atunuu lenei i Aferika i Sisifo, e mafai foʻi ona maua ai masini o ʻea mālūlū. O fale talafeagai e nonofo ai, o taumafa lelei, ma ni tausiga lelei o le soifua mālōlōina, ua fesoasoani i misionare ina ia tumau ai pea ona mālōlōina ma fai le tele o mea.

Tepa Taulaʻi i Mea Lelei

Ua matuā faafiafiaina i tatou i mea uma na tatou vaai i ai. Pe faamata e fetaui mo i tatou le galuega faamisionare? E mafai faapefea ona tatou mautinoa? Ua faailoa mai e misionare ni nai mea e tatau ona manatunatu i ai.

Muamua, ua latou faamatala mai e faapea, o misionare Kerisiano, e lē o ni ē e tafafaovale. E latou te saʻilia tagata lotofaamaoni o ē mananaʻo e fia aʻoaʻo e uiga i folafolaga ofoofogia a le Atua. E tuuina atu e misionare pe a itiiti mai o le 140 itula i le masina i le auaunaga i le fanua, o lea, e lē mafai ona aveesea ai le naunau mo le faiva.

‘Ae,’ ua tatou taumanatu, ‘pe faapefea gata, pili, ma manu ninii?’ Ona o mea nei e mafai ona maua i le tele o tofiga faamisionare, ae ua faailoa mai e Ben ua faasolo lava ina masani ai misionare i na mea. Ua ia faaopoopo mai e faapea, e tofu lava tofiga faamisionare uma ma lona tulaga iloga e matagofie ai, ma mulimuli ane, e tepa taulaʻi atu ai misionare i mea mananaia o o latou tofiga. O tulaga sa manatu i ai muamua e faapea e “ese,” e lē umi lava ae oo ina masani ai, ma i nisi tulaga, e oo foʻi ina matuā fiafia i ai. O se tuafafine misionare o lē sa auauna i Aferika i Sisifo mo le tele o tausaga, a o leʻi tatau ona toe foʻi atu i le aiga ona o ona tiute tauave totino, na faapea mai, sa sili atu ona faigatā iā te ia ona tuua lona tofiga na i lo o le taimi muamua na ia tuua ai lona lava atunuu moni. Ua avea lona tofiga faamisionare ma ona aiga.

Po ua E Sauni?

E tele mea ua tuuina mai e Ben ma Karen e tatou te mafaufau i ai. Ae ā oe? Po o e mafaufau e auauna o se misionare i se isi atunuu? Afai o lea, atonu la ua e taulalata atu i lenā sini na i lo o le mea sa e manatu i ai. O se tasi o mea autū lava e manaʻomia, o le iai lea o le naunau po o le alofa mo le faiva faataimi atoa ma olioli i le galuega o le fesoasoani atu i tagata. Ia manatua, o misionare e lē o ni tagata e uiga ese so latou malosi, ae o ni tane ma ni fafine e pei o isi tagata uma. O loo latou faia le mea e aupito sili latou te mafaia ina ia faataunuuina ai se galuega e sili atu ona tāua.

[Ata i le itulau 27]

E amata aso taʻitasi i le talanoaina o le mau o le Tusi Paia

[Ata i le itulau 28, 29]

O le soifuaga i le avea o se misionare e mafai ona matuā faamalieina ai

[Ata i le itulau 29]

Vaaiga mai Aferika