Le Auala e Maua ai se Lalolagi Fiafia

“O le tagata e toʻatasi e silisili i tagata uma—e lē gata i meleniuma e lua ua faatoʻā mavae atu ae i le talafaasolopito uma o tagata—o ia lea o Iesu le Nasareta,” o le faamatalaga lea a le mekasini o le Time. A o iai Iesu i le lalolagi, e faitau afe tagata lotofaamaoni na latou iloaina lelei, e lē na o lona tulaga silisili ae o lona manatu mamafa foʻi mo isi. O lea, e lē o se mea la e faateʻia ai lo latou mananaʻo e fai o ia ma o latou tupu. (Ioane 6:10, 14, 15) Peitaʻi, e pei ona taʻua i le mataupu muamua atu, sa leʻi manaʻo Iesu e aafia i faiga faapolotiki.

O LE tali atu a Iesu sa faavae aʻe e lē itiiti mai i ni vala se tolu: o le silasila a lona Tamā i faaaliga o filifiliga na faia e le tagata lava ia, lea o loo aofia ai ma pulega faaletagata; na silafia lelei e Iesu faapea o loo iai ni malosi e lē vaaia o loo galulue e faasagatau e oo lava i taumafaiga e aupito sili ona lelei a pulega faaletagata; ma fuafuaga a le Atua ina ia faavaeina se malo faalelagi e puleaina le lalolagi atoa. A o tatou iloiloina lelei nei manatu e tolu, o le a tatou vaaia ai le māfuaaga ua lē taulau ai taumafaiga faaletagata e faaleleia le lalolagi. O le a tatou iloaina ai foʻi le auala e mauaina ai le taulau manuia.

Pe Mafai e Tagata Ona Pulea i Latou Lava?

Ina ua foafoaina e le Atua tagata, na ia tuuina atu iā i latou le pule e pulea ai meaola. (Kenese 1:26) Peitaʻi o tagata sa i lalo o le pule silisili ese a le Atua. Sa tatau i le uluaʻi tamāloa ma le uluaʻi fafine ona faamautinoa atu lo la gauaʻi i le Atua e ala i lo la usiusitai e taumamao mai le fua o le laau patino e tasi, “le laau e iloa ai le lelei ma le leaga.” (Kenese 2:17) Ae pagā lea, na faaaogāsesē e Atamu ma Eva lo la saʻolotoga e fai ai filifiliga ma lē usiusitai ai i le Atua. O le avea o le fua o le laau faasāina sa lē na o se gaoioiga o le gaoi. E tutusa lava ma le fouvale faasaga i le silisili ese o le Atua. O le faaopoopoga  i le pito i lalo o le Kenese 2:17 i le New Jerusalem Bible ua taʻua ai mafaufauga o Atamu ma Eva e faapea “sa iā i laʻua le aiā atoatoa e faia ai filifiliga e tutoʻatasi, lea ua teea ai e le tagata le amanaʻiaina o lona tulaga e faapea o ia o se tagata ola na foafoaina . . . O le uluaʻi agasala la, o se osofaʻiga i le pule silisili ese a le Atua.”

Ona o le tāua o mataupu na aofia ai, sa faataga ai e le Atua ia Atamu ma Eva ma ē na tupuga mai iā i laʻua e filifilia o latou lava ala o le olaga, ma na latou faavaeina ai o latou lava tapulaa o le mea e saʻo ma le sesē. (Salamo 147:19, 20; Roma 2:14) O lona uiga, na amata ai ona oo atu le tagata i le faia o lana lava filifiliga. Pe na taulau manuia ea? I le mātauina o le faitau afe o tausaga o mea na tutupu, e mafai ona tatou faapea atu e leai! Ua taʻua i le Failauga 8:9 e faapea: ‘A pule le tasi tagata i le tasi, e leaga ai o ia lava.’ O lenei faamaumauga faanoanoa o le pulega a le tagata ua faamautinoa ai le moni o le Ieremia 10:23: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia.” Ua faamaonia e talafaasolopito e faapea e lē o i tagata le tomai e pule ai ma le manuia e aunoa ma Lē na Foafoaina i latou.

Na faamaonia atoatoa e Iesu lenā tulaga. O le tutoʻatasi ese mai le Atua o se mea e inosia e ia. “Ou te le fai fua foi se mea,” o lana fetalaiga lenā. “Ou te faia pea lava o mea e lelei ia te ia [le Atua].” (Ioane 4:34; 8:28, 29) O lea, o le leai o se faamaoniga mai le Atua e mauaina ai se tulaga tautupu mai tagata, sa leʻi manatu ai lava Iesu e taliaina. Peitaʻi, e lē o le uiga o lenei mea, faapea sa ia faatalatū e fesoasoani atu i tagata sa latou faatasi. I se faaeseesega, na ia faia mea uma i lona malosi e fesoasoani ai i tagata ina ia maua le fiafiaga sili i le taimi lenā faapea ai ma le lumanaʻi. Na oo lava ina ia tuuina atu lona soifua mo tagata. (Mataio 5:3-11; 7:24-27; Ioane 3:16) Ae peitaʻi, na silafia e Iesu e faapea, “o le mea ma lona tausaga i mea uma,” e aofia ai ma le taimi a le Atua e faaalia manino ai lana pule silisili ese i tagata. (Failauga 3:1; Mataio 24:14, 21, 22, 36-39) O lea, seʻi manatu foʻi i Etena lea na lolo atu ai o tatou uluaʻi mātua i le manaʻoga o se meafaiola agaga amioleaga lea na tautala atu e ala i se gata. Ua tatou oo mai ai nei i le māfuaaga lona lua na lē aafia ai Iesu i faiga faapolotiki.

Le Pule Lē Vaaia o le Lalolagi

Ua taʻu mai iā i tatou e le Tusi Paia na ofoina atu e Satani iā Iesu “malo uma o le lalolagi ma o latou matagofie” i le na ona tau lava o le faia o sina gaoioiga tau tapuaʻiga. (Mataio 4:8-10) O lona uiga la, sa ofoina atu iā Iesu le pule i le lalolagi aoao—ae peitaʻi e faia lea e tusa ai ma faatulagaga a le  Tiapolo. Sa leʻi lolo atu Iesu i lenei faaosoosoga. Po o se faaosoosoga moni ea la? Pe na mafai moni ea e Satani ona faia lenā ofo matuā telē? Ioe, ona na taʻua e Iesu lava ia le Tiapolo o “le alii o lenei lalolagi,” ma na faamatalaina o ia e le aposetolo o Paulo faapea o “le atua o le lalolagi nei.”—Ioane 14:30; 2 Korinito 4:4; Efeso 6:12.

O le mea moni, na silafia e Iesu faapea e lē naunau le Tiapolo mo le lelei o tagata. Na faamatalaina e Iesu Satani o “le fasioti tagata” ma o “le tamā o le pepelo ma mea uma e lē moni.” (Ioane 8:44, The Amplified Bible) Ua manino mai, o se lalolagi “o loo nofo toilalo” i lenā agaga leaga e lē mafai lava ona mauaina le fiafiaga moni. (1 Ioane 5:19) Ae o le a lē faavavau ai lava ona iai i le Tiapolo lenei pule. Ua avea nei Iesu ma foafoaga agaga e malosi tele, ma o le a lē pine ona tafiesea loa lea o Satani ma aveesea atoatoa ai ana taaʻiga.—Eperu 2:14; Faaaliga 20:1-3.

Ua iloa e Satani lava ia ua televave tele le oo mai o le mutaaga o ona aso e avea ai ma pule i le lalolagi. O lea, o loo faia e ia taumafaiga uma lava e mafai ai ona matuā faaleagaina tagata ina ia lē toe mafai ona liliuese mai le leaga, e pei lava ona sa ia faia a o leʻi oo i le Lolo i aso o Noa. (Kenese 6:1-5; Iuta 6) “Oi talofa ia te oulua le fanua ma le sami,” ua taʻua ai e le Faaaliga 12:12, (LF ) “auā ua alu ifo ia te oulua le tiapolo ua lotoa tele, aua ua na iloa ua saasaa ona po.” Ua faaalia e valoaga o le Tusi Paia ma mea o loo tutupu i le lalolagi faapea ua tatou ola nei e latalata i le faaiʻuga o lenei “saasaa ona po.” (2 Timoteo 3:1-5) Ua latalata mai lava le mapusaga.

Se Malo o le a Aumaia le Fiafia

O le māfuaaga lona tolu na lē auai ai Iesu i faiga faapolotiki ona sa ia silafiaina faapea i se taimi atofaina i le lumanaʻi, o le a faavaeina ai e le Atua se malo faalelagi e pulea le lalolagi atoa. Ua taʻua e le Tusi Paia lenei malo o le Malo o le Atua, ma o le matua autū lea o aʻoaʻoga a Iesu. (Luka 4:43; Faaaliga 11:15) Na aʻoaʻoina e Iesu ona soo e tatalo mo lenā Malo ia oo mai, auā na o le pau lenā o le pulega o le a ‘faia ai le finagalo o le Atua i le lalolagi e pei ona faia i le lagi.’ (Mataio 6:9, 10) Atonu e te tau mānatu, ‘Afai o lenei Malo o le a pulea le lalolagi atoa, o le ā o le a tupu i malo ua faia e tagata?’

Ua maua le tali i le Tanielu 2:44: “O ona po o ia tupu [o loo pule i le iʻuga o lenei faiga o mea] e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo [faia e tagata] uma lava, a o ia e tumau lava e faavavau.” Aiseā o le a “tuʻimomomoina” ai e le Malo o le Atua pulega faalelalolagi? Aua o nei malo o loo maumaututū e faatumauina le agaga tetee i le Atua o le faia lea o filifiliga e le tagata lava ia lea na faatulaʻi mai e Satani i tuā i le faatoʻaga i Etena. E faaopoopo atu i le lē faia o mea mo le lelei o tagata, o i latou o loo taumafai e faatumauina lenā agaga ua latou iai i se tulaga e feteenaʻi ai ma Lē na Foafoaina Mea. (Salamo 2:6-12; Faaaliga 16:14, 16) O lea, e tatau ona tatou fesili ifo iā i tatou lava, ‘Po o tatou usiusitai po o tatou tetee atu ea i le pule a le Atua?’

O le Pule Silisili Ese a Ai o le a E Filifilia?

Ina ia fesoasoani i tagata e faia ni filifiliga e faavae i le poto saʻo e faatatau i pulega, na faatonuina ai e Iesu ona soo e talaʻi le “tala lelei o le malo i le atu laulau uma, e fai ma molimau i nuu uma” a o leʻi oo i le iʻuga o lenei faiga o mea. (Mataio 24:14) O ai o loo lauiloa i aso nei mo le talaʻia o le Malo o le Atua? O Molimau a Ieova. O le mea moni, o lenei mekasini ua loa ona iai i luma o lona faavaa ia upu “Faasilasilaina le Malo o Ieova.” I aso nei, e tusa ma le ono miliona Molimau a Ieova i le silia ma le 230 atunuu o loo fesoasoani atu i tagata ina ia maua le poto saʻo e faatatau i lenā Malo. *

Faamanuiaga mo Tagata o le Malo

Sa faia e lē aunoa e Iesu mea i le auala a le Atua. O lea, na i lo le filifilia o se auala tutoʻatasi ma taumafai e lagolagoina pe faaleleia le faiga o mea  sa iai e ala i auala faapolotiki, na ia galue mamafa e faaauilumaina manaʻoga o le Malo o le Atua, le vaifofō e tasi i faafitauli o le lalolagi. O lona faamaoni na tauia ai o ia i le mauaina o se nofoalii mamalu i le lagi i le avea ai o le Tupu o lenā Malo. Maʻeu se taui matagofie ona o lona gauaʻi atu i le Atua!—Tanielu 7:13, 14.

E faitau miliona i aso nei o loo faataʻitaʻi atu iā Iesu i le faamuamuaina o le Malo o le Atua, ma gauaʻi atu i le finagalo o le Atua lea o le a latou olioli ai foʻi i le taui matagofie—le faaeaga o le avea ai ma tagatānuu faalelalolagi o le Malo o le Atua. (Mataio 6:33) I le pulega alofa a lenā malo, o le a siitia ai i latou i le lelei atoatoa faaletagata, ma le faamoemoe mo le ola e faavavau. (Faaaliga 21:3, 4) Ua faapea mai le 1 Ioane 2:17: “E mavae atu foi le lalolagi, atoa ma lona tuʻinanau, a o le fai le finagalo o le Atua, e tumau lea e faavavau.” I le tafiesea o Satani ma i latou ua mulimuli atu iā te ia atoa ai ma le suia o le lalolagi e avea ma parataiso e saʻoloto mai i fevaevaeaʻiga faalotonuu, faiga fefaatauaʻiga faapiʻopiʻo, ma lotu sesē, maʻeu se olioli tele o le nonofo pea i inei e faavavau!—Salamo 37:29; 72:16.

Ioe, o le Malo o le Atua o le auala moni lea i le mauaina o se lalolagi fiafia, ma o le feʻau o loo folafolaina atu ai lenā malo o loo saʻo ona faamatalaina faapea o le tala lelei. Afai e te leʻi faia faapea, o le isi taimi e asiasi atu ai Molimau a Ieova i lou aiga, aiseā e lē taliaina ai lenei tala lelei o loo momoli atu iā te oe?

[Faamatalaga pito i lalo]

[Ata i le itulau 5]

Ua faamaonia e le talafaasolopito e lē mafai e tagata ona pule ma le manuia e aunoa ma le Atua

[Ata i le itulau 5]

Ona o loo ia pulea le “faiga o mea,” o loo iai nei, sa mafai ai ona ofoina atu e Satani iā Iesu “malo uma o le lalolagi”

[Ata i le itulau 7]

Na aʻoaʻo atu e Iesu faapea i lalo o le faatulagaga o le Malo o le Atua, o le a avea ai le lalolagi o se nofoaga e matagofie