O Ai o le a Faateʻaeseina i Tatou Mai le Alofa o le Atua?

“O i tatou, ua tatou alolofa, auā na ia muai alofa mai ia te i tatou.”—1 IOANE 4:19, LF.

1, 2. (a) Aiseā e tāua ai mo i tatou le iloaina o loo alofagia i tatou? (e) O le alofa o ai e sili ona tatou manaʻomia?

O LE Ā se tāua iā te oe o lou iloa o loo alofagia oe? Mai lava i le tamameamea seʻia oo ina tagata matua, e ola fiafia le tagata pe afai e alofagia. Po ua e mātauina pe a opoina ma le alofa se pepe i lima o lona tinā? O le tulaga masani, po o ā lava mea o loo tutupu i ona autafa, peitaʻi a o faataupupula aʻe le pepe i foliga ʻataʻata o lona tinā, e lē fiti vale, ma na te lagonaina le toʻafilemu a o opoina e se tinā e alofa iā te ia. Pe e te manatua ea le tulaga sa e iai i nisi o taimi sa fesagaʻi ai lou soifuaga o se tagata talavou ma ni toʻatugā? (1 Tesalonia 2:7) I nisi taimi, atonu e te lē iloa po o ā mea sa e manaʻo ai pe e te lē malamalama foʻi po o ā ni ou faalogona na iai, peitaʻi, e maʻeu lava le tāua o lou iloaina, o loo alolofa lou tamā ma lou tinā iā te oe! Pe sa leʻi fesoasoani ea lou iloaina faapea, sa mafai ona e liliu atu iā i laʻua i so o sou faafitauli po o sau fesili? O le mea moni, i le gasologa atoa o le olaga, o se tasi o o tatou manaʻoga sili, o le manaʻo lea ia alofagia. O lenā alofa e faamautinoa mai ai iā i tatou e iai so tatou aogā.

² O le tumau o le alofa o mātua o se tasi, e mautinoa le telē o sana vaega e fai i le lelei ma le paleni o lona tuputupu aʻe. Peitaʻi, o le iai o le faalogona mautinoa e faapea o loo alofa mai lo tatou Tamā faalelagi, o Ieova, iā i tatou, e sili atu ona tāua lenā mo lo tatou lelei faaleagaga ma tau i faalogona. E iai nisi o le ʻaufaitau o lenei mekasini atonu sa leʻi iai ni o latou mātua na alolofa moni iā i latou. Pe afai o le tulaga lenā o loo e iai, ia e lototele. E tusa lava pe e te leʻi mauaina se alofa mai ou mātua, pe sa leʻi atoatoa foʻi ona faaali atu, peitaʻi o loo alofa faamaoni mai le Atua iā te oe.

3. Ua faapefea ona faamautinoa mai e Ieova i ona tagata lona alofa mo i latou?

³ E ala mai i lana perofeta o Isaia, na taʻua ai e Ieova le mafai ona “galo” i se tinā o sana tama o loo susu, peitaʻi e lē mafai ona galo iā te Ia ona tagata. (Isaia 49:15) Na faapena foʻi ona taʻua ma le mautinoa e Tavita faapea: “E ui lava ina tuua aʻu e loʻu tamā ma loʻu tinā, a e talia aʻu e Ieova.” (Salamo 27:10) Maʻeu se faamautinoaga! Po o ā lava ou tulaga o loo iai, ae afai ua iai sa oulua faiā vavalalata ma Ieova le Atua, e ao ona e manatua e lē aunoa le silisili atu o lona alofa mo oe na i lo le alofa o se isi lava tagata!

Ia E Tumau Pea i le Alofa o le Atua

4. Na faapefea ona faamautinoa i Kerisiano o le uluaʻi senituri le alofa o le Atua?

⁴ O anafea na e muaʻi iloa ai le alofa o Ieova? E foliga mai, e tai pei le mea ua e oo i ai o le mea na oo i Kerisiano i le uluaʻi senituri. I le mataupu e 5 o le tusi a Paulo i Kerisiano i Roma, o loo matagofie ona faamatalaina ai le auala na mafai ai e tagata agasala, o ē na muaʻi vavae ese mai le Atua, ona oo ina latou masani i le alofa o Ieova. I le fuaiupu e 5, tatou te faitau ai: “Ua faamaligi mai le alofa o le Atua i o tatou loto e le Agaga Paia ua foaiina mai ia te i tatou.” I le fuaiupu e 8, ua toe faapea mai atili Paulo: “Ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.”

5. Na faapefea ona oo ina e talisapaia le tele o le alofa o le Atua?

⁵ I se tulaga tutusa, ina ua faailoa atu iā te oe le Afioga a le Atua ma amata ona e faaalia le faatuatua, sa amata loa ona gaoioi le agaga paia o Ieova i lou loto. I lenei auala na amata ai ona e talisapaia le telē o le mea na faia e Ieova i le auina mai o lona Alo pele ina ia maliu mo oe. O inā na faailoa atu ai e Ieova iā te oe le tele o lona alofa mo le fanau a tagata. Ina ua e iloaina e faapea, e ui lava sa e soifua mai o se tagata agasala ua vavae ese mai iā te ia, ae na tatala mai e Ieova le auala mo tagata ina ia taʻuamiotonuina ai i latou faatasi ma le faamoemoe o le ola e faavavau, pe sa leʻi pāʻia ai ea lou loto? Pe e te leʻi lagona ai ea le alofa iā Ieova?—Roma 5:10.

6. Aiseā e tatou te ono lagonaina ai i nisi taimi e peiseaʻī ua tatou mamao ese mai iā Ieova?

 ⁶ I lou tosina atu i le alofa o lou Tamā faalelagi ma fetuunaʻi atu lou olaga ina ia taliaina e ia, sa e tuuina atu ai lou ola i le Atua. O lenei la ua e maua ai se filemu ma le Atua. Peitaʻi, pe iai ea ni taimi e te lagona ai e peiseaʻī ua e mamao ese mai iā Ieova? E mafai ona tupu lenā mea i so o se tasi o i tatou. Ae ia manatua e lē mafai ona liliu le Atua. E tumau pea ma mausalī lona alofa e pei o le lā, lea e lē taitai muta le faasusuluina mai o ona ave o le malamalama i le lalolagi. (Malaki 3:6; Iakopo 1:17) Ae peitaʻi, e mafai ona suia i tatou—e tusa lava pe na o sina taimi lē tumau. A o feliuliuaʻi le lalolagi, e oo ina lilofia le ʻafa o le paneta i le pouliuli. E faapena foʻi pe a tatou liliu ese mai le Atua, e tusa lava pe na o sina liliu itiiti, e tatou te ono lagonaina lava sina faalētonu i la tatou faiā ma ia. O le ā e mafai ona tatou faia e faasaʻo ai lenā tulaga?

7. E mafai faapefea ona aogā se iloiloga a le tagata iā te ia lava ina ia tatou tumau ai i le alofa o le Atua?

⁷ Pe afai tatou te lagona ua tatou see ese mai le alofa o le Atua, e tatau ona tatou fesili ifo iā i tatou lava: ‘Po ua ou manatu māmā ea i le alofa o le Atua? Po ua faifai mālie ea ona ou liliu ese mai le Atua soifua o lē e alofa, ma faaalia ai i ni auala eseese se tulaga o le vaivai o loʻu faatuatua? Po ua uaʻi atu ea loʻu mafaufau i “mea a le tino,” na i lo le uaʻi atu i “mea a le Agaga”?’ (Roma 8:5-8; Eperu 3:12) Pe afai ua tatou faamamaoeseina i tatou lava mai iā Ieova, e mafai ona tatou faia ni taumafaiga ina ia faasaʻo ai mataupu, ia toe foʻi ai i se faiā vavalalata ma le māfana ma ia. Ua ʻaiʻoi mai Iakopo iā i tatou: “Ia outou faalatalata atu i le Atua, ona faalatalata mai lea o ia ia te outou.” (Iakopo 4:8) Ia teuloto upu a Iuta: “Le au pele e, ia outou ati ae ia te outou i lo outou faatuatua e silisili ona paia, o le Agaga Paia tou te tatalo ai; ia outou faatumau ia te outou i le alofa o le Atua.”—Iuta 20, 21.

E Lē Āfaina le Alofa o le Atua i Tulaga ua Suia

8. O ā suiga e mafai ona tutupu faafuaseʻi i o tatou olaga?

⁸ E tele suiga e fesagaʻi ma lo tatou olaga i lenei faiga o mea. Na taʻua e le tupu o Solomona e faapea “o le tausaga ma le mea e tupu ai e oo ia te i [tatou] uma.” (Failauga 9:11) E ono faafuaseʻi lava ona suia atoatoa lo tatou olaga. E tatou te ola mālōlōina i le isi aso, ae oo ane i le aso e sosoo ai ua tatou matuā mamaʻi tigāina. O le isi aso o loo foliga mautū sa tatou galuega totogi, ae oo ane i le aso e sosoo ai, ua leai sa tatou galuega. E  mafai ona maliu faafuaseʻi sē pele iā i tatou. E iai nisi vaipanoa atonu o loo maua ai e Kerisiano ni tulaga filemu mo sina taimi, ae teʻi ua faafuaseʻi ona tulaʻi mai ni sauāga mataʻutia. Pe atonu ua tuuaʻia sesē i tatou, ma ona o lenei mea, ua oo mai ai iā i tatou ni faiga lē tonu. Ioe, e lē o matuā mautū lelei pe mautinoa le olaga.—Iakopo 4:13-15.

9. Aiseā e lelei ai pe a manatunatu i se vaega o le Roma mataupu e 8?

⁹ Pe a tutupu ni mea e faanoanoa ai iā i tatou, e mafai ona oo iā i tatou ni lagona o le tuulafoaʻiina, e oo lava ina oso aʻe se lagona e peiseaʻī ua tau mou atu le alofa o le Atua mo i tatou. Talu ai e tutupu uma lava iā i tatou na mea, e lelei ai pe a tatou manatunatu ma le faaeteete i upu sili ona faamāfanafanaloto a le aposetolo o Paulo ua faamauina i le Roma mataupu e 8. Sa faasino atu na upu i Kerisiano faauuagagaina. Peitaʻi, o lona mataupu silisili e mafai foʻi ona faatatau atu i isi mamoe, o ē ua taʻuamiotonuina i le avea o ni uō a le Atua, e pei ona sa iai Aperaamo i aso anamua a o leʻi oo mai i taimi o uluaʻi Kerisiano.—Roma 4:20-22; Iakopo 2:21-23.

10, 11. (a) O ā tuuaʻiga e faia e fili i nisi taimi i tagata o le Atua? (e) Aiseā e lē tāua tele ai na tuuaʻiga i Kerisiano?

¹⁰ Faitau le Roma 8:31-34. Ua fesili Paulo: “Afai ua ʻau ma i tatou le Atua, o ai sē faasaga tau mai ia i tatou?” E moni, o loo faasagatau mai Satani ma lana lalolagi amioleaga iā i tatou. Atonu e tuuaʻisesēina i tatou e o tatou fili, e oo lava i faamasinoga a atunuu o loo tatou nonofo ai. Ua tuuaʻia nisi mātua Kerisiano faapea e feita i a latou fanau talu ai lo latou lē faatagaina o i latou e talia togafitiga faafomaʻi na e solia ai le tulafono a le Atua, po o le lē faatagaina e auai i ni faamanatuga faapaupau. (Galuega 15:28, 29; 2 Korinito 6:14-16) Ua tuuaʻia sesē isi Kerisiano faamaoni e faapea o ni tagata e tetee i faigāmalo talu ai lo latou lē fasiotia o isi o latou uso a tagata i faigātaua pe auai i faiga faapolotiki. (Ioane 17:16) Ua faasalalau e nisi tagata tetee ni pepelo taufaaleaga i auala o faasalalauga, ua oo lava ina latou tuuaʻia sesē Molimau a Ieova e faapea o se lotu taufaasesē e mataʻutia.

¹¹ Ae aua neʻi galo i aso o le ʻauaposetolo, sa taʻua faapea: “Ua iloa e i matou ua talaeseina lena lotu i nuu uma lava.” (Galuega 28:22) Pe iai ea se tāua tele o tuuaʻiga sesē? O le Atua na te taʻuamiotonuina Kerisiano moni, e tusa ai o lo latou faatuatua i le taulaga a Keriso. Aiseā o le a taofia ai e Ieova lona alofa mai i ona tagata tapuaʻi ae o lea ua uma ona ia foaʻiina mai iā i latou le meaalofa e sili ona tautele—o lona lava Alo pele? (1 Ioane 4:10) Ae talu ai o lea ua toe faatūina aʻe Keriso mai le oti ma nofo ai i le itu taumatau o le Atua, ua ia matuā ʻaiʻoi atu ai mo Kerisiano. O ai na te mafaia ona tetee ma le tonu i le molimau atu ma le malosi a Keriso mo ona soo, pe taulau manuia foʻi i le luʻia o le finagalo malie o le Atua i ana auauna faamaoni? E leai se isi!—Isaia 50:8, 9; Eperu 4:15, 16.

12, 13. (a) O ā tulaga po o mea tutupu e lē mafai ona faateʻaeseina i tatou mai le alofa o le Atua? (e) O le ā le sini o le Tiapolo i le faapogaia o faigatā mo i tatou? (i) Aiseā ua matuā manumalo aʻiaʻi ai Kerisiano?

¹² Faitau le Roma 8:35-37. E ese mai iā i tatou lava, pe iai ea se tasi po o se isi lava mea e mafai ona faateʻaeseina i tatou mai le alofa o Ieova ma lona Alo, o Keriso Iesu? E ono faaaogā e Satani ana ʻau faalelalolagi e faapogaia le tele o faalavelave i Kerisiano. A o faagasolo le senituri ua mavae atu, e toʻatele o tatou uso ma tuafāfine Kerisiano na avea ma taulaʻiga o sauāga matuitui i le tele o atunuu. I nisi o atunuu i aso nei, o loo fesagaʻi ai o tatou uso ma mafatiaga tau i le tamaoaiga i aso taʻitasi. Ua oo i nisi le tigā o le fia taumafa ma le lē lava o lavalava. O le ā le sini o le Tiapolo i le faapogaia o nei tulaga faigatā? O se tasi o ana fuafuaga, ina ia faavaivaia le tapuaʻiga moni iā Ieova. E manaʻo Satani ina ia tatou talitonu faapea ua lē o toe alofa mai le Atua. Ae pe o le tulaga moni ea lenā?

¹³ I le pei o Paulo, o lē na toe sii maia upu o le Salamo 44:22, ua faapena foʻi ona tatou suʻesuʻeina le Afioga tusitusia a le Atua. Ua tatou malamalama, ua avea le suafa o le Atua ma pogai o le tutupu o nei mea iā i tatou, o ana “mamoe.” O loo aafia ai le faapaiaina o le suafa o le Atua ma le faasilisilia o lana pule silisili ese aoao. Ona o na luʻi tetele, ua faatagaina ai e le Atua puapuaga, ae e lē faapea ai ua lē o toe alofa mai o ia iā i tatou. E tusa lava po o ā tulaga mafatia atonu o iai, ae ua tatou mautinoa, e lē o suia lava le alofa o le Atua mo ona tagata, e aofia ai i tatou taʻitoʻatasi. So o  se tulaga o iai i le taimi nei e foliga mai o loo tatou toʻilalo ai o le a iʻu ina avea ma manumalo pe afai tatou te tausia lo tatou faamaoni. Ua faamalosia ma faatumauina i tatou e ala i le mautinoa o le alofa e lē mavae o le Atua.

14. Aiseā na talitonu maumauaʻi ai Paulo i le alofa o le Atua e ui lava i mea faigatā e ono mafatia ai Kerisiano?

¹⁴ Faitau le Roma 8:38, 39. O le ā na mautinoa ai e Paulo faapea, e leai se mea e mafai ona faateʻaeseina Kerisiano mai le alofa o le Atua? E lē taumatea o mea na oo iā Paulo a o iai i lana faiva, na faamalosia ai lona talitonuga maumauaʻi e faapea, e lē mafai e mea faigatā ona āfaina ai le alofa o le Atua mo i tatou. (2 Korinito 11:23-27; Filipi 4:13) Na iloa foʻi e Paulo le fuafuaga e faavavau a Ieova ma ana feutagaʻiga ma Ona tagata i aso ua tuanaʻi. Pe mafai ea e le oti lava ia ona manumalo mai le alofa o le Atua mo i latou o ē auauna ma le faamaoni iā te ia? E matuā leai lava! O na tagata faamaoni o ē ua maliliu o le a feola pea i latou i le finagalo lelei atoatoa o le Atua lea na te manatuaina ai mea, ma o le a ia toe faatutūina aʻe i latou i lana taimi atofaina.—Luka 20:37, 38; 1 Korinito 15:22-26.

15, 16. Seʻi toe taʻu mai nisi o mea e lē taitai mafaia ona taofia ai le alofa o le Atua i ana auauna faamaoni.

¹⁵ Po o ā lava faalētonu e ono aumaia e le olaga i aso nei iā i tatou—pe o se faalavelave faafuaseʻi e faaleagaina ai le malosi, se maʻi e oo ai i le oti, po o se pagatia tau i le tamaoaiga—e leai se mea e mafaia ona faamutaina le alofa o le Atua mo ona tagata. E lē mafai e agelu malolosi, e pei o le agelu lē usiusitai lea na avea ma Satani, ona faapogaia Ieova ina ia taofia ai lona alofa mai i ana auauna faamaoni. (Iopu 2:3) E mafai e faigāmalo ona latou faasā, faafalepuipui, ma faileagaina auauna a le Atua pe faaigoaina foʻi i latou o “tagata e lē manaʻomia.” (1 Korinito 4:13) O lenā ʻinoʻino lē tonu mai malo e ono uunaʻia ai tagata ina ia faasagatau mai iā i tatou, peitaʻi e lē avea lenā ma itu o le a lafoaʻia ai i tatou e le Pule Silisili Ese aoao.

¹⁶ Ona o i tatou o ni Kerisiano, e lē manaʻomia ai la ona tatou matataʻu i so o se mea na taʻua e Paulo faapea “o mea i nei ona po”—o mea tutupu, o tulaga, ma siʻomaga o mea i lenei faiga o mea—po o “mea atali” o le a oo mai i le lumanaʻi, e lē mafaia e na mea ona aveesea le alofa māfana o le Atua i ona tagata. E ui ina siitau mai ē malolosi o i le lalolagi ma malosi o agaga leaga iā i tatou, ae o loo iai pea le alofa o le Atua e faatumauina i tatou. E lē mafai e “le maualuga, po o le loloto” ona taofia le alofa o le Atua, e pei ona sa faamamafa mai e Paulo. Ioe, e lē mafai e se mea o tau fuafua e faalotovaivaia i tatou, po o so o se mea lava o loo taumafai e faia ni uunaʻiga malolosi iā i tatou, ona faateʻaeseina i tatou mai le alofa o le Atua; e lē mafai lava e se isi foafoaga ona faaleagaina le faiā a Lē na Foafoaina Mea ma ana auauna faamaoni. E lē taitai ona uma le alofa o le Atua; e faavavau lava.—1 Korinito 13:8.

Ia Faavavau Ona Faapelepele i le Alofa Agalelei o le Atua

17. (a) Aiseā ua ‘sili ai ona lelei [le alofa o le Atua] na i lo le ola’? (e) E faapefea ona tatou faaali atu o loo tatou faapelepele i le alofa agalelei o le Atua?

¹⁷ E faapeʻī le tāua iā te oe o le alofa o le Atua? Pe o iā te oe ea lagona sa iā Tavita, o lē na tusi mai: “Auā o lou alofa e sili ona lelei lea i le ola; ou te vivii atu lava ia te oe i oʻu laugutu. O lea ou te faamanū atu ai ia te oe a o ou ola; ou te sii oʻu lima i lou suafa”? (Salamo 63:3, 4) Pe iai moni ea se mea e ofoina mai e lenei lalolagi e sili atu ona lelei na i  lo le mauaina o le alofa o le Atua ma lana faauōga faamaoni? Mo se faaaʻoaʻoga, pe sili atu ea ona lelei le saʻilia o se galuega e matuā lelei le totogi, na i lo le iai o le filemu o le mafaufau ma le fiafiaga lea e maua mai se faiā māfana ma le Atua? (Luka 12:15) Ua fesagaʻi nisi Kerisiano ma le filifiliga pe latou te faafitia Ieova pe oo i ai le oti. Sa tupu lenā mea i le toʻatele o Molimau a Ieova i nofoaga o faasalaga mamafa a Nasi i le vaitaimi o le Taua Lona Lua a le Lalolagi. E toʻaitiiti lava ni uso na lē taulau, ae sa filifili le toʻatele o o tatou uso Kerisiano e tumau i le alofa o le Atua, ma lotomalilie e oo iā i latou le oti pe a talafeagai. E mafai e i latou o loo tumau faamaoni i lona alofa ona latou mautinoa le mauaina o se lumanaʻi e faavavau mai le Atua, o se mea e lē mafai ona aumaia e le lalolagi iā i tatou. (Mareko 8:34-36) Peitaʻi e iai ma nisi mea e aofia ai na i lo le na o le ola e faavavau.

18. Aiseā e naunau ai i le ola e faavavau?

¹⁸ E ui ina e lē mafai ona ola e faavavau e aunoa ma Ieova, ae seʻi taumafai e faaata i lou mafaufau pe faapeʻī se olaga matuā umi o le a iai pe a aunoa ma Lē na Foafoaina i tatou. O le a avea o se olaga e gaogao, e leai se fuafuaga moni. Ua foaʻi mai e Ieova i ona tagata se galuega faamalieloto e latou te faia i nei aso e gata ai. E mafai la ona tatou faatuatua faapea, pe a aumaia e Ieova, le Fai Fuafuaga Sili, le ola e faavavau, o le a faatumulia lenā olaga i mea mananaia ma aogā mo i tatou e aʻoaʻoina ma faatinoina. (Failauga 3:11) E tusa lava po o le ā le tele o mea o le a tatou aʻoaʻoina i le faitau meleniuma o i le lumanaʻi, ae o le a lē taitai lava ona tatou malamalama atoatoa i “le loloto o le tamaoaiga o le poto atoa ma le silafaga a le Atua.”—Roma 11:33.

E Alofa le Tamā iā te Oe

19. O ā faamautinoaga faamavae na avatu e Iesu Keriso i ona soo?

¹⁹ Iā Nisani 14, 33 T.A., i lona toe pō mulimuli ma ona aposetolo faamaoni e toʻa sefulutasi, e tele mea na fetalai i ai Iesu e faamalosiau ai i latou e tusa o mea o loo i le lumanaʻi. Sa latou tumau atu pea iā Iesu i taimi o ona puapuaga, ma na latou lagona moni lava lona alofa mo i latou. (Luka 22:28, 30; Ioane 1:16; 13:1) Ona toe faamautinoa atu lea e Iesu iā i latou: “E alofa mai lava le Tamā ia te outou.” (Ioane 16:27) Maʻeu le fesoasoani o na upu i le ʻausoo ina ia latou iloa ai lagona māfana o lo latou Tamā faalelagi mo i latou!

20. O le ā se mea ua e maumauaʻi e faia, ma o le ā e mafai ona e mautinoa i ai?

²⁰ E toʻatele tagata o loo soifua i aso nei, ua faitau sefulu tausaga o auauna ma le faamaoni iā Ieova. E mautinoa lava, a o leʻi oo mai le iʻuga o lenei faiga amioleaga o mea, o le a tatou fesagaʻi ai ma nisi foʻi puapuaga e tele. Aua lava neʻi faatagaina na puapuaga po o mafatiaga e faaluafesasi ai lou mautinoa i le alofa faamaoni o le Atua iā te oe. E matuā faamamafaina lava lenei mea moni: E alofa Ieova iā te oe. (Iakopo 5:11) Seʻi tatou taʻitoʻatasi ma fai la tatou vaega, e ala i le usiusitai atu ma le faamaoni i poloaʻiga a le Atua. (Ioane 15:8-10) Tau ina ia tatou faaaogā avanoa uma e vivii atu ai i lona suafa. E tatau ona tatou faamausalīina la tatou filifiliga ina ia mafuta vavalalata iā Ieova i le tatalo ma suʻesuʻeina lana Afioga. Po o ā lava mea e ono tutupu taeao, ae afai o loo tatou faia le mea e silisili tatou te mafaia e faafiafia ai le finagalo o Ieova, o le a tumau lo tatou filemu, ma mautinoa atoatoa i lona alofa e lē mavae.—2 Peteru 3:14.

O le a Faapefea Ona E Tali?

• Ina ia tumau pea ona paleni lo tatou itu faaleagaga ma o tatou faalogona, o le alofa o ai e silisili lava ona tatou manaʻomia?

• O ā mea e lē taitai faapogaia ai Ieova e taofia lona alofa mai i ana auauna?

• Aiseā ua ‘sili ai ona lelei le alofa o Ieova na i lo le ola’?

[Fesili mo le Suʻesuʻega]

[Ata i le itulau 13]

Pe afai ua tatou lagona le teʻa ese mai le alofa o le Atua, e mafai ona tatou taumafai ina ia toe faasaʻoina mataupu

[Ata i le itulau 15]

Sa malamalama Paulo i le pogai na sauāina ai o ia