Pe e Mafai Ona E Faaleleia le Lalolagi?

PLAY

Pe e Mafai Ona E Faaleleia le Lalolagi?

“Ua lē o mafai e le ʻaufaipolotiki ona toe faaleleia le tulaga faavae o tagata. Ua leai se tomai e toe faatulagaina ai amioga tatau na iai muamua. Ua lē mafaia e tulafono e sili ona lelei ona faaleleia le tulaga i tuugātala ma faaipoipoga, pe toe faamalosia tamā ina ia tauaveina o latou tiute tauave agaʻi i a latou fanau, pe toe aumaia ai le matuā ʻinoʻino i mea leaga po o lagona masiasi e pei ona sa masani ona lagona ai tagata i aso ua mavae . . . O le tele o faafitauli i amioga tatau o loo āfaina ai i tatou, ua lē mafai ona tafiesea e ni tulafono.”

PO O tauau ina e talitonu atu i na upu a le faatonu na iai muamua a le malo o le Iunaite Setete? Afai o lea, o le ā la le vaifofō i le tele o faafitauli o loo iai i aso nei ia e mapuna mai i le matapeʻapeʻa, le leai o se alofa e masani ai i totonu o aiga, amioga lē mamā, le lē malamalama, ma isi lava vala ua faaleagaina ai le tulaga faavae o tagata? Ua manatu nisi tagata faapea ua leai se vaifofō, o lea ua tau ai lava ina latou ola i le olaga masani i le auala e sili latou te mafaia. O nisi e faamoemoe faapea e iai se aso o le a sau ai se taʻitaʻi atamai ua iai ona uiga faatosina, atonu o se taʻitaʻi lotu, ma taʻitaʻia i latou i le auala saʻo.

O le mea moni, o le lua afe tausaga ua mavae, na mananaʻo ai tagata e fai Iesu Keriso ma o latou tupu ona na latou iloa na auina mai o ia e le Atua ma o le a avea o ia ma pule e aupito sili ona agavaa. E ui i lea, ina ua silafia e Iesu o latou faanaunauga, na vave lava ona afio ese ai. (Ioane 6:14, 15) “E le mai le lalolagi nei loʻu malo,” lea na ia faamatalaina mulimuli ane i se kovana Roma. (Ioane 18:36) Peitaʻi, i aso nei, e itiiti lava nai tagata o loo faia le mea e pei ona sa faia e Iesu—e oo lava i taʻitaʻi lotu o ē ua faapea mai o ona soo. O nisi o i latou nei ua taumafai e faaleleia lenei lalolagi, a lē o le taumafai e taaʻina taʻitaʻi o malo o loo iai, po o lo latou umia foʻi o tulaga faapolotiki. E tatou te iloa lenei tulaga pe a tatou vaai i mea na tutupu mai i vaitausaga e amata mai i le 1960 seʻia oo atu 1979.

Taumafaiga Faalotu Ina ia Faaleleia le Lalolagi

I tausaga faaiʻuiʻu o vaitausaga mai le 1960, o ni ʻaufailotu i atunuu o Amerika Latina na latou faia se tauiviga mo le lelei o tagata matitiva ma tagata o loo mafatia i puapuaga. Ina ia faataunuu lenei mea, na latou faia ai ni gaoioiga faalotu mo le saolotoga o ē matitiva, ma na faamatalaina ai Keriso faapea e avea o ia ma faaola e lē gata i se uiga faale-Tusi Paia ae i se tulaga foʻi faapolotiki ma le tamaoaiga. I le Iunaite Setete, o se vaega o taʻitaʻi lotu na matuā popole lava e faatatau i le fāi atu o le tāua o amioga tatau na latou faatūina se faalapotopotoga e taʻua o le Moral Majority (Faalapotopotoga mo le Manuia o Aiga). O le sini o lenei faalapotopotoga o le taumafai lea e faaofi atu i tulaga faapolotiki tagata e faia tulafono i le atiina aʻe o le tāua o tulaga manuia o aiga. I se tulaga tutusa, i le tele o atunuu Musalimi, ua taumafai ai vaega o tagata e taofia le lē faamaoni ma amioga lē pulea e ala i le faaauilumaina o le pipii atu ma le faamaoni i le Korana.

Pe e te talitonu ua faaleleia le lalolagi ona o na taumafaiga? Ua faamaonia e mea moni faapea, i le tulaga aoao tetele, ua faaauau pea ona paʻū le tāua o tulaga o amioga tatau ma o le eseesega i le tagata mauʻoa ma le tagata mativa o loo faateleina pea, e aofia ai ma atunuu ia na malosi ai gaoioiga faalotu mo le faasaʻolotoina o ē matitiva.

Ona o le lē taulau o le Moral Majority i ona sini faatutū i le Iunaite Setete, na faalēaogāina ai loa e Jerry Falwell i le 1989 le faalapotopotoga lea na ia faavaeina. Ua suia nei e isi faalapotopotoga lenā faalapotopotoga. E ui i lea, o Paul Weyrich, o ia lea na muaʻi faaaogāina le faaupuga “moral majority,” na ia tusi i le mekasini o le Christianity Today e faapea: “E ui lava ina ua manumalo i le filifilia o tatou sui faapolotiki, ae o o tatou manumalo e lē iʻu atu ai i le ituaiga o tulafono lea e tatou te manatu i ai e tāua.” Na ia tusi foʻi e faapea: “Ua oo ina avea tū ma aga ma mea ua matuā leaga lava. Ua tatou maua se faiga faaleaganuu ua matuā paʻū maulalo i lo le mea e tatau ai, o se matuā paʻu telē ua lofitūina ai faiga faapolotiki.”

Na faaalia e Cal Thomas o se tagata fainusipepa ma o ia foʻi o se tusitala, le māfuaaga e sesē ai taumafaiga e siitia le tulaga o tagata e ala i faiga faapolotiki i lona faapea mai: “O suiga moni e sau mai i tagata taʻitoʻatasi, ae lē o le manumalo mai lea palota ma lea palota, ona o o tatou faafitauli autū e lē o le tamaoaiga ma le tulaga faapolotiki ae o amioga tatau ma mea tāua faaleagaga.”

Ae faapefea ona tatou faaleleia faafitauli tau i amioga tatau ma le faaleagaga i se lalolagi e lē o iai ni tapulaa, ia e filifili ai e tagata le mea e saʻo ma le mea e sesē mo i latou lava? Afai la e lē o mafai ona faaleleia e tagata taʻutaʻua ma lelei o latou faanaunauga—pe lolotu pe leai—lenei lalolagi, o ai la e na te mafaia? E pei ona o le a tatou iloaina i le mataupu o loo sosoo mai ai, e iai le tali. O le mea moni, o le tali e fesootaʻi ma le māfuaaga autū na ala ai ona fetalai Iesu e lē mai le lalolagi nei lona Malo.

[Faamatalaga i Ata i le itulau 2]

[Faamatalaga i Ata i le itulau 3]

LE OLOMATAMATA—LOMIGA MO SU‘ESU‘EGA