Fesili Mai le ʻAufaitau

Pe na faia e Ieova lana feagaiga ma Aperaamo i Uro po o i Karana?

O le uluaʻi faamatalaga i le feagaiga a Ieova ma Aperaamo, o loo maua i le Kenese 12:1-3, lea e faapea mai: “Ua fetalai mai Ieova ia Aperamo, Ia tuua e oe o lou nuu, ma tagata o lou nuu, ma le aiga o lou tamā, a e alu atu i se nuu ou te faasino atu ai ia te oe. Ou te faia oe ma nuu tele, . . . e manuia foi ia te oe o aiga uma o le lalolagi.” * Atonu sa faia e Ieova lenei feagaiga ma Aperaamo a o iai Aperaamo i Uro, ona toe faamautinoa atu lea o le feagaiga a o iai Aperaamo i Karana.

I le uluaʻi senituri, na taʻua ai e Setefano le poloaʻiga a Ieova faapea, e tatau ona alu atu Aperaamo i Kanana. I le talanoa atu i le ʻau Saniterini, na ia faapea atu ai: “Na faaali le Atua e ona le mamalu i lo tatou tama o Aperaamo, ina o i Mesopotamia o ia, a o lei oo i lona nofo i Karana, ua na fetalai mai foi ia te ia, Ina tuua ia o lou nuu ma lou aiga, a e alu atu i le nuu ou te faasino atu ai ia te oe.” (Galuega 7:2, 3) O Aperaamo sa tupuga mai i Uro, ma e pei ona faaalia e Setefano, o inā na muaʻi faalogo ai Aperaamo i le poloaʻiga ina ia alu i Kanana. (Kenese 15:7; Neemia 9:7) E leʻi taʻua e Setefano le feagaiga a le Atua ma Aperaamo, ae i le Kenese 12:1-3, o loo faafesootaʻi atu ai lenā feagaiga i le poloaʻiga ina ia alu atu i Kanana.Ua talafeagai ai la ona talitonu e faapea, na faia e Ieova le feagaiga ma Aperaamo i Uro.

Ae peitaʻi, o le faitauina ma le faaeteete o le faamatalaga i le Kenese ua faaalia ai e faapea, na toe taʻua e Ieova lana feagaiga iā Aperaamo i Karana, e pei lava foʻi ona sa ia toe taʻua ma auʻiliʻili atili atu nisi vala o feagaiga i nisi taimi a o iai i Kanana. (Kenese 15:5; 17:1-5; 18:18; 22:16-18) E tusa ai ma le faamatalaga i le Kenese 11:31, 32, na tuua e Tara, le tamā o Aperaamo, ia Uro ae alu atu i Kanana, na ō faatasi ma Aperaamo, o Sara, ma Lota. Na latou taunuu i Karana ma nonofo ai i inā seʻia oo ina maliu Tara. Sa umi se taimi na iai Aperaamo i Karana o lea na ia maua ai se tamaoaiga tele. (Kenese 12:5) Ma i se taimi mulimuli ane, na alu atu ai foʻi ma Nakori, le uso o Aperaamo i inā.

Ina ua uma ona faamauina le maliu o Tara, ona faamatala mai lea e le Tusi Paia fetalaiga a Ieova iā Aperaamo ma faaauau mai e faapea: “Ona alu ai lea o Aperamo e faapei ona fetalai mai o Ieova ia te ia.” (Kenese 12:4) O lea, i le Kenese 11:31–12:4 ua aumaia ai se faamaoniga malosi e iloa ai o Ieova na fetalaia upu o loo faamauina i le Kenese 12:1-3 ina ua mavae le maliu o Tara. Afai o le tulaga lenā, o lona uiga na tuua e Aperaamo Karana ma alu atu i le nuu na faailoa atu e Ieova, ona o lona usiusitai i le poloaʻiga na ia seʻi faatoʻā faalogo i ai, faapea ma le poloaʻiga lea na ia faalogo i ai i ni tausaga muamua atu i Uro.

E tusa ai ma le Kenese 12:1, na poloaʻiina e Ieova Aperaamo: “Ia tuua e oe o lou nuu, ma tagata o lou nuu, ma le aiga o lou tama.” I se tasi taimi, na avea ai Uro ma “nuu” o Aperaamo, ma sa iai i inā le “aiga” o lona tamā. Ae peitaʻi, na siitia atu e le tamā o Aperaamo lona aiga i Karana, ma na oo ai ina taʻua e Aperaamo lenā laueleele o lona nuu. Ina ua mavae le tele o tausaga o iai i Kanana, sa ia aauina atu lana auauna tausimea i ‘lona nuu ma lona aiga’ e saʻili mai ai se avā mo Isaako, ona alu atu ai lea o le auauna i “le aai o Nakori” (po o Karana po o se nuu e latalata ane). (Kenese 24:4, 10) O inā na maua ai e le auauna Repeka mai i tauaiga o Aperaamo, i le aiga toʻatele o Nakori.—Kenese 22:20-24; 24:15, 24, 29; 27:42, 43.

I lana lauga i le ʻau Saniterini, na faapea atu ai Setefano e uiga iā Aperaamo: “Ua oti lona tama, ona ia [le Atua] aumaia lea o ia nai lea mea e nofo i le nuu nei, ua outou nonofo ai.” (Galuega 7:4) Ua faaalia i lenei mea, na talanoa Ieova ma Aperaamo a o iai i Karana. E talafeagai ai la ona talitonu e faapea, i lenā taimi na toe taʻua ai foʻi e Ieova lana feagaiga ma Aperaamo e pei ona faamatalaina mai i le Kenese 12:1-3, talu ai na amata ona aogā le feagaiga ina ua siitia atu Aperaamo i Kanana. O lea, o se iloiloga o mea moni uma e taʻitaʻiina atu ai i se faaiʻuga e faapea, atonu sa faia e Ieova lana feagaiga ma Aperaamo i Uro ae na toe faamautinoa atu i ai i Karana.

[Faamatalaga pito i lalo]