Le Mea o Loo Faaumatiaina Laau

I TAIMI o le Tusi Paia, sa manatu ai i laau o ni oloa tāua. Mo se faaaʻoaʻoga, ina ua faatau e Aperaamo se fanua e tanu ai lana avā pele o Sara, sa aofia ai ma laau i le maliega mo le fanua lea o le a faatau atu.—Kenese 23:15-18.

E faapena foʻi i aso nei, e matuā tāua tele lava laau, ma ua tele le uaʻi atu i ai o manatu o atunuu i le faasaoina o vaomatua. Ua faapea mai le tusi, State of the World 1998: “E ui lava o loo vaavaai atu ma le popole le toʻatele o tagata o atunuu i mātū i vaomatua o atunuu o le teropika, ae atonu e latou te lē o iloaina le tulaga e sili ona lamatia ma le ono faaumatiaina o vaomatua uma i o latou lava atunuu pe a faatusatusa atu i isi vaomatua.” O le ā ua lamatia ai le tulaga olaola lelei o vaomatua i na atunuu i le itu i mātū o Europa ma Amerika i Mātū? E toʻatele tagata ua manatu i le tatuuina i lalo o laau o vaomatua, ae o loo iai isi aafiaga iloagatā o loo faaleagaina ai laau, po o laulaau taʻitasi. O ā na aafiaga? Le faapolusioneina o le ʻea ma le timu aseta. O nei faapolusioneina e mafai ona faasolo malie ina ola faalautagitagi ai laau, ma faigofie ai ona faatamaʻia e manu ninii ma faamaʻi.

Mo le faitau sefulu o tausaga, na lapataʻia ai e i latou o loo galulue e puipuia le siʻosiʻomaga ma isi tagata o loo manatu mamafa i ai e uiga i le manaʻomia ona puipuia le ekositema o le lalolagi. I le 1980 e oo i le 1989, na suʻesuʻeina ai e saienitisi i Siamani aafiaga o le faapolusioneina o le ʻea ma le timu aseta i le siʻosiʻomaga, na latou faia ai se faaiʻuga e faapea: ‘Afai e leai se mea e faia, e oo atu i le tausaga e 2000, o le a na o ata tifaga ma ata na puʻeina i aso anamua o le a mafai ona viiviia ai e tagata ia vaomatua.’ O le mea e fiafia ai, ona o loo iai pea i le laueleele lona malosi e toe faaolaola ai lea e oo mai lava i le taimi nei, o loo mafai ona tatalia le tele o mea e faaleagaina ai e pei ona valoia.

Ae ui i lea, i le faagasologa umi, o le Atua o le a faia le tele o mea ina ia faasaoina ai lo tatou ekositema. “O lē faasūsū mauga mai ona afeafe aupitoaluga” ma “faatupu . . mutia mo manu vaefa, atoa ma mea totō e aogā i tagata.” Ma ua ia folafola mai “e fano ai . . . i latou o e na fano ai le lalolagi.” (Salamo 104:13, 14; Faaaliga 11:18) Maʻeu le matagofie o le a iai pe a mafai e tagata o le a aināina le lalolagi ona olioli e faavavau i se lalolagi e aunoa ma le faapolusioneina!—Salamo 37:9-11.