“O le Faamanuia a Ieova—O Lea e Faatamaoaiga Aʻi”

E TATOU te mananaʻo uma lava ina ia faamanuiaina. Ua faapea mai le lomifefiloi o le American Heritage College Dictionary, o faamanuiaga e faateleina ai le “fiafia, le soifua lelei, po o le taulau manuia.” Ona o Ieova o Lē Foaʻi maia “mea lelei uma e foaifuaina mai, atoa ma mea alofa uma e atoatoa ona lelei,” o faamanuiaga moni uma lava e faavavau, e aumai i Lē na Foafoaina i tatou e alofa. (Iakopo 1:17) E na te faatotōina ifo le anoanoaʻi o faamanuiaga i tagata uma, e oo lava iā i latou e lē iloa o ia. Na fetalai Iesu e uiga i lona Tamā e faapea: “Na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mataio 5:45) Ae peitaʻi, o loo faapitoa lava ona uaʻi mai Ieova iā i latou o ē alolofa iā te ia.—Teuteronome 28:1-14; Iopu 1:1; 42:12.

Na tusi mai le faisalamo: “E le taofia e [Ieova] se mea lelei i e ua sao lo latou savavali.” (Salamo 84:11) Ioe, o i latou o loo auauna iā Ieova, ua matuā faatamaoaigaina ma uigā o latou soifuaga. Ua latou iloa o “le faamanuia a Ieova, o lea e faatamaoaiga aʻi; na te le faaopoopo i ai se tiga.” Ua faapea mai foʻi le Tusi Paia: “O e ua faamanuia e [Ieova], e fai mo latou le nuu.” (Faataoto 10:22; Salamo 37:22, 29) Maʻeu se na faamanuiaga o le a iai!

E mafai faapefea ona tatou mauaina faamanuiaga a Ieova? O se tasi o auala, o le manaʻomia lea ona tatou atiina aʻe uiga e fiafia i ai o ia. (Teuteronome 30:16, 19, 20; Mika 6:8) Ua tatou iloa lenei mea i le faaaʻoaʻoga a nisi o auauna e toʻatolu a Ieova o aso anamua.

E Faamanuia e Ieova Ana Auauna

Sa avea Noa o se auauna mataʻina a le Atua. I le Kenese 6:8, ua tatou faitau ai: “O Noa, ua alofagia o ia e Ieova.” Aiseā? Auā sa usiusitai Noa. Ua faapea mai le faamatalaga: “Sa la feooai o le Atua ma Noa.” Sa tausisi Noa i mataupu silisili amiotonu a Ieova ma usiusitai i ana poloaʻiga. I lea vaitaimi o le matuā sauā ma le amioleaga o le lalolagi, sa uunaʻia Noa e “faia . . . e faapei ona poloai atu ai le Atua ia te ia i mea uma, sa faapea lava ona fai e ia.” (Kenese 6:9, 22) O le iʻuga, na faatonuina ai o ia e Ieova ina ia fausia ‘se vaa e ola ai le aiga [o Noa].’ (Eperu 11:7) I lenei gaoioiga, na mafai ai e Noa ma lona aiga—ma le fanau uma a tagata na tupuga mai iā i latou—ona faasaoina mai le faaumatiaga o lenā tupulaga. Ma na maliu Noa ma le faamoemoe e toe faatūina mai o ia i le ola e faavavau i se lalolagi parataiso. Maʻeu se tamaoaiga o faamanuiaga na ia maua!

Sa iai foʻi iā Aperaamo uiga ia sa faafiafiaina ai le finagalo o Ieova. Sa laualuga i nei uiga uma le faatuatua. (Eperu 11:8-10) Na tuua e Aperaamo se soifuaga sologa lelei ma le faamalieloto i Uro ma mulimuli ane i Karana, talu ai sa ia faatuatua i le folafolaga a Ieova, o le a faatoʻateleina lana fanau ma o le a manuia ai nuu uma. (Kenese 12:2, 3) E ui i le tele o tausaga o tofotofoga, ae na tauia lona faatuatua ina ua fanau mai lona atalii o Isaako. E ala mai iā te ia, na avea ai Aperaamo ma tupuaga o le nuu filifilia o le Atua, o Isaraelu, ma mulimuli ane tupuga mai ai le Mesia. (Roma 4:19-21) E lē gata i lea, o ia o le “tamā o e faatuatua uma lava,” ma na iʻu ina taʻua o ia “o le uo a le Atua.” (Roma 4:11; Iakopo 2:23; Kalatia 3:7, 29) Maʻeu se  soifuaga uigā na ia soifua ai, ma e maʻeu le tele o faamanuiaga sa ia maua!

Seʻi manatu foʻi i le tagata faatuatua o Mose. Sa matilatila lava i ona uiga, lona talisapaia lea o mea faaleagaga. Sa teena e Mose le tamaoaiga uma o Aikupito ma “faamalosi o ia pei o sē iloa atu i le le o vaaia.” (Eperu 11:27) Ina ua mavae le 40 tausaga i Mitiana, sa toe foʻi o ia i Aikupito o se tagata ua toeaina, ma faafesagaʻia ma le lototele le tupu aupito sili ona malosi i lenā taimi, o Farao, ina ia faasaʻolotoina mai ona uso. (Esoto 7:1-7) Sa ia vaaitino i mala e sefulu, le vaeluaina o le Sami Ulaula, ma le faaumatiaina o ʻautau a Farao. Sa faaaogā o ia e Ieova e avatuina le Tulafono iā Isaraelu ma avea ma puluvaga o Lana feagaiga ma le nuu fou. E 40 tausaga o taʻitaʻia e Mose le nuu o Isaraelu i le vao. Sa matuā uigā moni lava lona olaga, ma sa olioli o ia i le anoanoaʻi o faamanuiaga ofoofogia o le auaunaga.

O Faamanuiaga i Aso Nei

O nei faamatalaga ua faaalia ai e uigā moni soifuaga o i latou e auauna i le Atua. A o atiina aʻe e tagata o Ieova na uiga e pei o le usiusitai, faatuatua ma le talisapaia o mea faaleagaga, ua faatamaoaigaina ai i latou i faamanuiaga.

Ua faapefea ona faamanuiaina i tatou? Ia, a o pagatia le faitau miliona o tagata o i Kerisinetoma i le oge faaleagaga, ae mafai ona tatou “alalaga fiafia i le lelei o Ieova.” (Ieremia 31:12, NW ) E ala mai iā Iesu Keriso ma le “auauna faamaoni  ma le mafaufau,” ua saunia ai e Ieova le anoanoaʻi o taumafa faaleagaga ua fesoasoani iā i tatou ina ia tumau ai i “le ala e tau atu i le ola.” (Mataio 7:13, 14; 24:45; Ioane 17:3) O le aufaatasiga ma lo tatou ʻauuso Kerisiano o le isi lenā faamanuiaga tāua. I sauniga ma isi faatasiga, ua avea ai le auaufaatasi ma uso tapuaʻi o ē faaalia le alofa ma taumafai malosi e oofu “i le tagata fou,” o se puna o le fiafiaga tele. (Kolose 3:8-10; Salamo 133:1) Ae peitaʻi, o lo tatou faamanuiaga aupito sili lava o le faaeaga tautele lea o le mauaina o se faiā totino ma Ieova le Atua, ma le mulimulituʻi i tulagāaao o lona Alo, o Keriso Iesu.—Roma 5:1, 8; Filipi 3:8.

O le toe manatunatu i na faamanuiaga, e tatou te iloa ai le matuā tautele o la tatou auaunaga i le Atua. Atonu e tatou te mafaufau i le faataoto a Iesu e uiga i le tagata faatauʻoa lea sa saʻili mo penina tautele. Na fetalai Iesu e uiga i lenei tamāloa: “Ua iloa e ia le tasi penina tau tele, ona alu ai lea o ia, ua faatau atu ana mea uma, i le faatau aʻi mai.” (Mataio 13:46) E mautinoa lava, o lo tatou lagona lenā e uiga i la tatou faiā ma le Atua, lo tatou faaeaga o le auauna atu iā te ia, la tatou aufaatasiga faa-Kerisiano, lo tatou faamoemoe faa-Kerisiano, ma isi faamanuiaga uma e fesootaʻi ma lo tatou faatuatua. E leai se isi mea e sili atu ona tāua i o tatou olaga.

Ia Toe Foaʻi Atu iā Ieova

Talu ai ua tatou iloa o Ieova o Lē Foaʻi maia meaalofa uma e lelei, ua faagaeetia ai o tatou loto e faailoa atu lo tatou lotofaafetai mo faamanuiaga ua tatou maua. E mafai faapefea ona tatou faia lenā mea? O se tasi o auala, o le fesoasoani lea i isi ina ia latou olioli i nei lava faamanuiaga. (Mataio 28:19) I le sili atu i le 230 atunuu, o loo pisi ai Molimau a Ieova e asiasi atu  i o latou tuaoi ina ia faia foʻi lea lava galuega. A o latou faia faapea, e latou te faaaluina ai a latou lava alāmanuia faalēlava—le taimi, le malosi, ma meafaitino—e fesoasoani ai i isi ina “ia oo ina iloa lelei le upu moni.”—1 Timoteo 2:4.

Seʻi manatu i ni paeonia e nonofo i Glendale, i Kalifonia, i le Iunaite Setete o Amerika. O taeao uma lava o Aso Toonai, e la te faimalaga taamilo ai i le tusa ma le 65 maila [100 kilomita] e asiasi atu i se falepuipui o le malo. E ui sa na o sina taimi puupuu lava na mafai ona la asiasi atu ai i pagota, ae e leʻi lotovaivai ai i laʻua. Ua faapea mai se tasi o i laʻua: “E ese le faamanuiaina o le galulue i lenei oganuu tutasi. E ma te faia ma le matuā fiafia tele. E toʻatele naʻuā tagata lotofiafia ua ma mauaina ma ua faigatā ai foʻi ona tausia. I le taimi nei, o loo matou suʻesuʻe ma ni tagata se toʻalima, ae toʻafā isi o loo talosaga mai mo ni suʻesuʻega faale-Tusi Paia.”

E fiafia faifeʻau Kerisiano maelega e ofo atu la latou auaunaga e aunoa ma se totogi ina ia faatino ai lenei galuega faasaoola. Ua latou faaatagia atu uiga o Iesu, o lē na fetalai: “Ua maua fua e outou, ia outou foaifuaina atu.” (Mataio 10:8) E faitau miliona tagata i le lalolagi aoao o loo auai i se auaunaga faapena e lē manatu faapito, ma o le iʻuga, ua tali mai ai le motu o tagata lotofaamaoni ma ua oo ina avea ma soo. I le lima tausaga lea na seʻi faatoʻā mavae atu, na toeitiiti lava 1.7 miliona tagata na tuuina atu o latou ola iā Ieova. Mo le tausia o manaʻoga o lenei faatelega o loo faaauau pea, e manaʻomia ai ona saunia ni Tusi Paia ma lomiga faale-Tusi Paia faapea ma le fausiaina o Maota fou o le Malo ma isi nofoaga mo sauniga. O fea e aumai ai tupe o loo faatinoina ai nei manaʻoga? E aumai uma lava mai meaalofa tauofo.

Ona o tulaga leaga o le tamaoaiga i nisi itu o le lalolagi, ua tauivi ai le toʻatele ina ia aumai mea manaʻomia mo na o le tausiga o o latou aiga. E tusa ai o le faamatalaga i le mekasini o le New Scientist e faapea, e tusa ma le tasi le piliona tagata e latou te faaaluina, a itiiti mai o le 70 pasene o tupe maua a o latou aiga mo meaʻai. E toʻatele o tatou uso ma tuafāfine Kerisiano o loo iai i lenā tulaga. A aunoa ma le fesoasoani mai o latou uso talitonu, e lē mafai ona latou gafatia na mea, e pei o lomiga faa-Kerisiano po o le fauina o ni Maota talafeagai o le Malo.

O le mea moni, e lē o le uiga o lenā mea e faapea, ua tuu ai pea e na tagata e tauave e isi a latou avega. Ae e latou te manaʻomia se fesoasoani. Ina ua faalaeiauina e Mose tagata Isaraelu e fai ni meaalofa faaletino e faailoa atu ai lo latou faafetai iā Ieova mo faamanuiaga ua latou maua, sa ia faapea atu: “E taitasi le tagata e tusa ma mea ua ia te ia, e tusa ma le manuia ua foaiina mai e Ieova lou Atua ia te oe.” (Teuteronome 16:17) O lea la, ina ua vaaia e Iesu se fafine ua oti lana tane o ia faameaalofa atu ni “tupe iti e lua” i le malumalu, sa ia viiviia o ia i ona soo. Sa ia fai le mea na ia mafaia. (Luka 21:2, 3) E faapena Kerisiano o loo i tulaga matitiva, o loo latou faia le mea e latou te mafaia. Ma pe afai e lē lava, e mafai ona maua mea e ala i meaalofa tauofo mai uso Kerisiano o ē e lē o faapena lo latou matitiva i le itu faaletino.—2 Korinito 8:13-15.

Pe a tatou toe foaʻi atu i le Atua i ni auala faapena, e tāua lava ona iā i tatou le uunaʻiga saʻo. (2 Korinito 8:12) Na faapea mai Paulo: “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto mālie.” (2 Korinito 9:7) E ala i le lotomalie e foaʻi atu mai le loto, e lē gata ina tatou lagolagoina ai le faatelega faatiokarate lea o loo faagasolo i le taimi nei, ae faateleina ai foʻi lo tatou lava olioli.—Galuega 20:35.

O le faia o se sao i le galuega talaʻi ma le faia o ni foaʻi tauofo o nisi na o auala e lua e mafai ona tatou toe foaʻi atu ai iā Ieova e tusa o faamanuiaga ua ia foaʻi maia iā i tatou. Ma e maʻeu lava le faalaeiau o le iloaina e finagalo Ieova e liligi mai ana faamanuiaga i luga o le toʻatele o isi tagata lotofaamaoni, o ē atonu latou te lē o iloa ia i le taimi nei! (2 Peteru 3:9) O lea, seʻi o tatou faaauau ona faaaogā a tatou alāmanuia i le auaunaga i le Atua, ina ia tatou maua ai ē lotofaamaoni ma fesoasoani iā i latou ina ia faatupu aʻe na uiga e pei o le usiusitai, faatuatua, ma le talisapaia. O le faia faapea, o le a tatou maua ai le olioli e fesoasoani atu iā i latou ina ia ‘⁠tofotofo ma iloa e lelei Ieova.’—Salamo 34:8.

[Pusa i le itulau 28, 29]

Auala ua Filifili ai Nisi e Foaʻi Atu

MEAALOFA MO LE GALUEGA I LE LALOLAGI AOAO

E toʻatele tagata latou te tuuesea se vaega tupe, po o se vaega faaagaga, e lafo i pusa o loo faailogaina o “Meaalofa mo le Galuega i le Lalolagi Aoao—Mataio 24:14.”

E avatu e faapotopotoga i masina taʻitasi ni tupe i le ofisaulu i Brooklyn, Niu Ioka, po o le ofisa o le lālā o lea lava vaipanoa. O foaʻi tauofo o tupe e mafai ona auina saʻo atu lava i le Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, pe auina atu i le ofisa o le lālā o loo vaavaaia lou atunuu. E mafai foʻi ona foaʻi atu maatāua po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lenā foaʻi o se foaʻi e aunoa ma se tuutuuga.

FUAFUAGA O FOAʻI E IAI MA NI TUUTUUGA

E mafai ona faameaalofa atu se tupe e teuina i lalo o se faatulagaga faapitoa lea, afai e iai se manaʻoga totino o lē e ana le tupe, o le a toe faafoʻi atu iā te ia lenā foaʻi. Mo nisi faamatalaga atili, faamolemole faafesootaʻi le Treasurer’s Office (Ofisa o le Teutupe) i le tuatusi o loo taʻua i luga.

FUAFUAGA O FOAʻI FAAMEAALOFA

E lē gata i foaʻi tautupe e aunoa ma ni tuutuuga ma fuafuaga o foaʻi tautupe e iai ma ni tuutuuga, ae iai foʻi isi auala e foaʻi atu ai e fesoasoani mo le auaunaga o le Malo i le lalolagi aoao. Ua aofia ai mea nei:

Inisiua: E mafai ona avea le Watch Tower Society ma faalapotopotoga e faaui i ai le taui po o le polisia o le inisiua o le ola o le tagata po o taui e maua mai ona ua litaea po o le fuafuaga tau penisione.

Teuga Tupe: O teuga tupe, tusi o teuga tupe e tiposi, po o ni vaega tupe a le tagata pe a faamālōlō litaea, e mafai ona tuu faamavaega mo le Watch Tower Society, pe totogi atu i ai pe a maliu le tagata e ana ia mea, e tusa ai o le faatulagaga manaʻomia a le faletupe o le atunuu.

Tupe Faafaigaluega (Stocks) ma Pepa Faamaonia mo Tupe (Bonds): O tupe faafaigaluega ma pepa faamaonia mo tupe e mafai ona foaʻi atu i le Watch Tower Society, o se meaalofa e aunoa ma ni tuutuuga.

Fanua ma Fale: O fanua ma fale e mafai ona faatauina atu, e mafai ona foaʻi atu i le Watch Tower Society e ala i le faia o se meaalofa e aunoa ma ni tuutuuga po o le taofia lea ina ia faaauau ona nofo ai pea lē e ana, seʻia maliu. Ia faafesootaʻi le ofisa o le lālā o loo i lou atunuu a o leʻi faapepaina faaletulafono so o se fanua totino o le a foaʻi atu.

Meaalofa Tautupe e Iai ni Tuutuuga e Faia Faaletausaga (Gift Annuity): O lenei meaalofa o se faatulagaga lea e avatu ai e se tasi i le Watch Tower Society, ni tupe po o tupe faafaigaluega (stocks) ma pepa faamaonia mo tupe (bonds). Ae i se faafesuiaʻiga, o le a maua e lenā tagata o loo foaʻia le meaalofa, po o nisi ua ia tofia, se aofaʻiga patino o se tupe e avatu i ai i tausaga taʻitasi i le taimi atoa o loo soifua ai. Ma o le a faaitiitia le lafoga e totogi e le tagata na faia le foaʻi, i le tausaga tonu na faamautū ai le faiga o lana meaalofa.

Uili ma Teuga Tupe Tuu Faamavaega: E mafai ona faaui atu meatotino po o se vaega tupe i le Watch Tower Society e ala i se uili ua faia e tusa ai ma le tulafono, pe avea foʻi le Watch Tower Society ma lē e mauaina le taui o se feagaiga o se teuga tupe ua tuu faamavaega. O se teuga tupe ua tuu faamavaega e faia mo le manuia o se faalapotopotoga faalelotu e ono maua mai ai nisi fesoasoani tau lafoga.

E pei ona faailoa mai e le faaupuga “fuafuaga o foaʻi faameaalofa,” o nei ituaiga o foaʻi e manaʻomia ai ni fuafuaga lelei a lē e ana le foaʻi. Ina ia fesoasoani i tagata o loo mananaʻo e mauaina e le galuega i le lalolagi aoao a Molimau a Ieova aogā e ala i nisi o ituaiga o fuafuaga mo foaʻi faameaalofa, ua saunia ai nei e le Sosaiete se polosiua i le faa-Peretania ma le faa-Sepania ua faaulutalaina Charitable Planning to Benefit Kingdom Service Worldwide. Na tusia le polosiua e tali atu ai i le tele o fesili ua oo mai e tusa ai o meaalofa, uili, ma teuga tupe ua tuu faamavaega. O loo iai foʻi faamatalaga aogā faaopoopo e uiga i fuafuaga e faatatau i esetete, e faatatau foʻi i tupe, ma le fuafuaina o lafoga. Ma ua faatulagaina e fesoasoani i tagata o le Iunaite Setete o loo fuafua e faia se meaalofa faapitoa i le taimi nei, pe faia se foaʻi pe a maliu, ina ia filifili ai le mea e sili ona lelei ma se auala aogā pe a fuafua i ai i le tulaga o o latou aiga ma i latou lava. E mafai ona maua lenei polosiua e ala i le talosaga tuusaʻo atu mo se kopi mai le Charitable Planning Office.

Ina ua māeʻa ona faitauina le polosiua ma talanoaina faatasi ma i latou o loo galulue i le Charitable Planning Office, ua toʻatele i latou ua mafai ona fesoasoani i le Sosaiete ma i le taimi e tasi ua faateleina ai faamanuiaga tau lafoga i le faia faapea. E tatau ona faailoa atu i le Charitable Planning Office ma avatu se kopi o so o se faamatalaga o loo maua e faatatau i so o se tasi o nei faatulagaga. Pe afai e te manaʻo i se tasi o nei faatulagaga o fuafuaga mo foaʻi, e tatau ona e faafesootaʻia le Charitable Planning Office, i le tusi atu po o le telefoni atu, i le tuatusi o loo lisi mai lalo po o le ofisa o Molimau a Ieova o loo vaavaaia lou atunuu.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telefoni: (845) 306-0707