E Faaolaina e Iesu—E Faapefea?

“E faaolaina e Iesu!” “O Iesu o lo tatou Faaola!” I le tele o atunuu i le lalolagi aoao, ua faapipii solo ai na feʻau i puipui o fale ma i isi nofoaga faitele. E faitau miliona tagata e talitonu moni lava o Iesu o lo latou Faaola. Pe afai e te fesili atu iā i latou, “E faapefea ona faaolaina i tatou e Iesu?” atonu o le a latou tali mai, “na maliu Iesu mo i tatou” pe, “na maliu Iesu mo a tatou agasala.” Ioe, o le maliu o Iesu ua mafai ai ona faaolaina i tatou. Ae mafai faapefea e le maliu o se tagata e toʻatasi ona totogiina ai agasala a tagata e toʻatele? Pe afai e fesiligia oe, “E mafai faapefea e le maliu o Iesu ona faaolaina ai i tatou?” o le ā sau tali o le a fai atu?

E FAIGOFIE lava le tali a le Tusi Paia i lenei fesili, peitaʻi e manino ma telē sona tāua. Ae ina ia malamalama i lona tāua, e manaʻomia ona tatou iloa muamua faapea o le soifuaga o Iesu ma lona maliu, o le vaifofō lea i se faafitauli e sili ona faigatā. E na o le pau lenā o le auala e mafai ona tatou malamalama lelei ai i le telē o le aogā o le maliu o Iesu.

I le foaʻiina atu e Iesu o lona soifua, na taulimaina ai e le Atua le tulaga na aliaʻi mai ina ua agasala Atamu. Pagā se mataʻutia o lenā agasala! Sa lelei atoatoa le uluaʻi tamāloa ma lana avā, o Eva. Sa avea le faatoʻaga matagofie o Etena ma o la aiga. Na foaʻiina atu e le Atua iā i laʻua le galuega aogā o le tausia o le faatoʻaga sa fai mo la aiga. Sa tatau ona iai i la laʻua vaavaaiga isi foafoaga o loo iai i le lalolagi. Ma a o fanafanau mai tagata ma faatumulia ai le lalolagi i  le faitau miliona o i latou, sa tatau ona latou faalauteleina atu le parataiso i tuluʻiga uma o le lalolagi. (Kenese 1:28) Maʻeu se galuega matagofie ma le faafiafia loto na tuu atu iā i laʻua! E lē gata i lea, sa māfana la laʻua lava mafutaga. (Kenese 2:18) E leai se mea la te leʻi mauaina. Sa avea ma o la lumanaʻi le ola e faavavau.

E faigatā lava ona malamalama pe na faapefea ona agasala Atamu po o Eva. Peitaʻi na fouvale le uluaʻi ulugalii i lē na foafoaina i laʻua—o Ieova le Atua. I le faaaogāina o se gata, na faasesēina ai Eva e le foafoaga agaga o Satani le Tiapolo, ina ia lē usiusitai atu iā Ieova, ma sa mulimuli atu ai foʻi ma Atamu iā te ia.—Kenese 3:1-6.

Sa leʻi tau fesiligia le mea o le a faia e Lē na Foafoaina Mea, iā Atamu ma Eva. Na uma lelei ona ia faamanino mai āuga o le lē usiusitai, i le fetalai mai: “O laau uma o i le faatoaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:16, 17) Ua manaʻomia nei ona taliina se fesili e sili ona tāua.

Ua Fesagaʻi Tagata ma se Faafitauli Faigatā

Sa tupu mai i le uluaʻi agasala se faafitauli matuiā mo tagata. Na amata e Atamu lona olaga o se tagata lelei atoatoa. O lona uiga, sa ono mafai ona maua e lana fanau le ola lelei atoatoa e faavavau. Peitaʻi ane, sa agasala Atamu a o ia leʻi fanauina mai ni fanau. Sa iā te ia pea le malosi e fanauina ai ni fanau, lea na tupuga mai ai le fanau uma a tagata, i le taimi na faasilasila atu ai lona faasalaga: “E te ʻai foi au mea e ʻai ma le afu o ou mata, seia e toe foi atu i le eleele; auā na faiina aʻi lava oe; auā o le efuefu oe, e te toe foi atu lava i le efuefu.” (Kenese 3:19) O lona uiga, ina ua agasala Atamu ma amata ona oti e pei ona fetalai le Atua o le a oo iā te ia, sa faapena foʻi ona faasalaina ai i le oti tagata uma faatasi ma ia.

Ua talafeagai ai le tusi mai mulimuli ane a le aposetolo o Paulo: “[Na] oo mai o le agasala i le lalolagi i le tagata e toʻatasi [Atamu], o le oti foi ona o le agasala, ona oo mai ai lea o le oti i tagata uma lava, auā ua agasala uma lava.” (Roma 5:12) Ioe, ona o le uluaʻi agasala, na māfua ai ona fananau mai ma le maʻi, le soifuaga matua, ma le oti, se fanau o ē sa tatau ona fananau mai o ni tagata lelei atoatoa, ma avea le ola e faavavau ma o latou lumanaʻi.

E ono faapea mai se tasi: “E lē fetaui lenā mea. E tatou te leʻi filifili ina ia lē usiusitai i le Atua—o Atamu na faia le filifiliga. Aiseā o le a leiloa atu ai fua lo tatou faamoemoe mo le ola e faavavau ma le fiafiaga?” Ua tatou iloa, afai e faafalepuipui e le faamasinoga se atalii ona sa gaoia e lona tamā se taavale, e mafai e le atalii ona faitio mai ma le saʻo: “E lē o se faamasinotonu lenā mea! Ou te leʻi faia se mea sesē.”—Teuteronome 24:16.

E ala i le maileia e Satani o le uluaʻi tane ma le fafine ina ia faia le agasala, atonu sa ia manatu ifo ai e mafai ona ia tuuina le Atua i se tulaga faigatā lava. Na vave lava ona osofaʻi mai le Tiapolo a o faatoʻā tau amata le talaaga o le fanau a tagata—a o leʻi iai ma se tasi ua fanau mai. O le taimi lava na agasala ai Atamu, na lāgā ai loa se fesili tāua, O le ā se mea o le a fai e Ieova i le fanau lea o le a fanauina mai e Atamu ma Eva?

Na faia e Ieova le Atua le mea sa tonu ma talafeagai. Na faalauiloa mai e le tagata amiotonu o Eliu: “E mamao ma le Atua ona ia amio leaga, ma Le e ona le malosi uma lava ona ia amioletonu.” (Iopu 34:10) Na tusi le perofeta o Mose e faatatau iā Ieova: “O le Papa, e sao lava lana galuega; auā e tonu ona ala uma lava; o le Atua faamaoni, e le o ia te ia se amioletonu, o le amiotonu ma le amio saʻo lava ia.” (Teuteronome 32:4) O le vaifofō na saunia e le Atua moni mo le faafitauli na faapogaia e le agasala a Atamu, e lē o aveesea ai lo tatou avanoa mo le mauaina o le ola e faavavau i se lalolagi parataiso.

 Ua Saunia e le Atua se Vaifofō e Atoatoa Ona Lelei

Seʻi manatu i le vaifofō na faataatia mai e le Atua i le faasalaga na ia fofogaina mai iā Satani le Tiapolo. Na fetalai mai Ieova iā Satani: “Ou te faatupuina le feitagai ia te oulua ma le fafine [faalapotopotoga faalelagi a le Atua], o lau fanau [le lalolagi o loo pulea e Satani] foi ma lana fanau [Iesu Keriso]; na te tuʻimomomoina [oe Satani i] lou ulu, a o oe e te tuʻimomomoina lona mulivae [maliu o Iesu].” (Kenese 3:15) I lenei uluaʻi valoaga a le Tusi Paia, na faaataata mai ai e Ieova lana fuafuaga ina ia auina mai lona Alo agaga faalelagi i le lalolagi ina ia ola e avea o Iesu le tagata lelei atoatoa, ona maliu lea—ia tuʻimomomoina le mulivae—i lenā tino e aunoa ma se agasala.

Aiseā na manaʻomia ai e le Atua ona maliu se tagata lelei atoatoa? O le ā foʻi le faasalaga a Ieova le Atua mo Atamu pe afai e agasala? Pe e lē o le oti ea? (Kenese 2:16, 17) Na tusi mai le aposetolo o Paulo: “O le oti, o le totogi lea o le agasala.” (Roma 6:23) Na totogia e Atamu lana agasala e ala i lona lava oti. Na foaʻiina atu iā te ia le ola, ae sa ia filifili e agasala ma sa oti ai, o le faasalaga lea mo lana agasala. (Kenese 3:19) Ae faapefea le tulaga malaia o le fanau uma a tagata talu ai lenā agasala? Sa manaʻomia se maliu ina ia totogia ai a latou agasala. Ae o le maliu o ai e mafai ona ufiufia ai faaletulafono agasala a tagata uma?

I le Tulafono a le Atua i le nuu anamua o Isaraelu sa manaʻomia ai ona “sui atu le oti i le oti [po o le ola i le ola].” (Esoto 21:23) Pe a fua atu i lenei mataupu faavae faaletulafono, e tatau i le maliu lea e ufiufia agasala a tagata, ona tutusa lona aogā ma le mea na leiloa iā Atamu. E na o le oti o se isi tagata lelei atoatoa e mafai ona totogia ai le tau o le agasala. O Iesu la le tagata na faia lenā mea. O le mea moni, na avea Iesu ma “togiola” mo le faaolaina o tagata uma na tupuga mai iā Atamu, o ē ua mafai ona togiolaina.—1 Timoteo 2:6; Roma 5:16, 17.

Ua Aogā Tele le Maliu o Iesu

Sa leai se aogā o le oti o Atamu; sa tatau lava ona oti o ia i lana agasala. Ae peitaʻi, o le maliu o Iesu, sa telē lona aogā auā na maliu o ia o sē e leai se agasala. Sa mafai e Ieova le Atua ona ia talia le aogā o le soifua lelei atoatoa o Iesu e fai ma togiola mo tagata usiusitai e fananau mai iā Atamu le tagata agasala. Ma e lē o gata mai le aogā o le taulaga a Iesu i le totogia o a tatou agasala ua tuanaʻi. Pe ana faapea o le tulaga lenā, semanū e leai so tatou lumanaʻi. Talu ai ua tatou fananau mai ma le agasala, e mafai foʻi la ona tatou toe faia mea sesē. (Salamo 51:5) Maʻeu so tatou lotofaafetai talu ai ona o le maliu o Iesu ua aumaia ai iā i tatou se avanoa mo le mauaina o le tulaga lelei atoatoa lea na muaʻi fuafuaina e Ieova mo le fanau a Atamu ma Eva!

E mafai ona faatusaina Atamu i se tamā o lē ua maliu ae tuua ai i tatou ma se anoanoaʻi o aitalafu (agasala) ua leai se mea e mafai ona tatou totogia ai na aitalafu. I le isi itu, ua pei Iesu o se tamā lelei o lē na maliu ae tuua i tatou ma se tofi e sili ona tele, lea ua lē gata ina faasaʻolotoina ai i tatou mai le telē o le aitalafu na faatiʻetiʻe mai e Atamu iā i tatou, ae ua lava ma totoe foʻi mea ua saunia mai mo i tatou ina ia ola ai e faavavau. O le maliu o Iesu sa lē na ona soloia ai o agasala ua tuanaʻi; o se sauniuniga matagofie foʻi mo lo tatou lumanaʻi.

E faaolaina e Iesu auā na maliu o ia mo i tatou. Maʻeu se sauniuniga tāua ua faia e lona maliu! Pe a tatou manatu i ai o se vaega o le vaifofō a le Atua i le faafitauli lavelave o le agasala a Atamu, ona faamalosia ai lea o lo tatou faatuatua iā Ieova ma i le auala o loo ia faia ai mea. Ioe, o le maliu o Iesu o le auala lea e laveaʻiina ai so o “se tasi e faatuatua” iā te ia mai le agasala, o faamaʻi, le soifuaga matua ma le oti. (Ioane 3:16) Po o e lotofaafetai ea i le Atua ona o lenei fuafuaga alofa mo lo tatou faaolataga?

[Ata i le itulau 5]

Na aumaia e Atamu le agasala ma le oti i le fanau a tagata

[Ata i le itulau 6]

Na saunia e Ieova se vaifofō e atoatoa ona lelei