E Faapefea Ona E Faafoeina le Faafiaamiotonu?

I LE faatoʻaga o Ketesemane, na alu atu ai Iuta le Sekara iā Iesu ma “sogi ai lea o ia ia te ia.” O lenei faiga, o se faaaliga masani lea o le alofa māfana. Ae o le gaoioiga a Iuta, sa na o se gaoioiga faatagāfai ina ia faailoa atu ai Iesu iā i latou na ō mai i le pō e puʻe iā te ia. (Mataio 26:48, 49) O Iuta, o se tagata faafiaamiotonu—o sē na faafoliga i se ituaiga o tagata e lē o lona uiga moni lenā, o se tasi e na te nanāina ona faanaunauga leaga i tua o ni foliga faamaoni. O le upu Eleni ua faaaogāina i le “faafiaamiotonu” o lona uiga, “o se tasi e tali mai” ma e faailoa ai foʻi se tagata e na te faatinoina ni gaoioiga o ni tala i luga o le pulelaa. I lenā taimi, sa faasino atu le upu i so o se tagata o lē sa na ona faia ni gaoioiga ina ia faasesē ai isi.

O ā ou uiga faaalia i tagata faafiaamiotonu? Mo se faaaʻoaʻoga, pe e te ita pe a e vaai atu i tagata o loo gaosia sikaleti o faalaeiauina ia le ulaula e ui lava ua faamaonia e fomaʻi o mea o latou faia e āfaina ai? Pe e te ita ona o le faafiaamiotonu o i latou e tausia tagata, o ē o faileagaina i latou ua tuuina atu i la latou tausiga? Pe e oo iā te oe le lototigā pe a avea se uō na e manatu e moni ma se uō pepelo? O faapefea ona aafia oe i le faafiaamiotonu o lotu?

“Oi Talofa ia te Outou . . . Tagata Faafiaamiotonu!”

Seʻi manatu i le siʻomaga faalotu na iai i le taimi a o iai Iesu i le lalolagi. Sa faatagā faafoliga atu le ʻautusiupu ma Faresaio o ni faiaʻoga faamaoni o le Tulafono a le Atua, ae o le mea moni, sa latou faatumuina mafaufau o tagata i aʻoaʻoga faaletagata ia sa tosina ese ai mafaufau mai le Atua. Sa tausisi ma le maumauaʻi le ʻautusiupu ma Faresaio i le tusi o le tulafono, ae latou te lē amanaʻiaina ia mataupu silisili faavae sa atagia ai le alofa ma le tigāalofa. I luma o le lautele, sa latou faafoliga atu e tuutoina i le Atua, ae pe a na o i latou, sa tutumu i le amioleaga. Sa lē taitai lava ona ōgatusa a latou upu ma a latou galuega. O lo latou sini na faia ai mea, “ina ia iloa ai e tagata.” Ua tusa i latou ma “tuugamau ua faasinasinaina, o loo matagofie i fafo, a o totonu ua tutumu i ivi o tagata oti, ma mea leaga uma.” I le faaalialia ma le lē fefe o lo latou faafiaamiotonu, sa fai atu pea lava Iesu iā te i latou e faapea: “Oi talofa ia te outou tusiupu ma faresaio, tagata faafiaamiotonu!”—Mataio 23:5, 13-31.

Pe ana faapea na e ola ai i na aso, atonu e te lagona moni le ʻinoʻino e pei o isi tagata amiotonu ona o le faafiaamiotonu faalotu. (Roma 2:21-24; 2 Peteru 2:1-3) Ae po o le a e faatagaina ai ea le faafiaamiotonu o tusiupu ma Faresaio e oo ai ina e ʻinoʻino ma teena lotu uma, e aofia ai ma le lotu na aʻoaʻoina ma faatinoina e Iesu Keriso ma ona soo? Po o le a lē iʻu ai ea lea tulaga i se lē lelei mo oe?

O le faafiaamiotonu o tagata lotu e ono faaliliueseina ai ma le ʻinoʻino i tatou mai lotu. Ae peitaʻi, o lenei uiga, o le a taofia ai foʻi i tatou mai le iloaina o le faamaoni o tagata o le tapuaʻiga moni. O papupuni ia ua tatou faia mo le puipuia o i tatou faasaga i le faafiaamiotonu, e iai aafiaga, e mafai ona faaliliueseina ai i tatou mai uō moni. O la tatou tali atu la i le faafiaamiotonu, e tatau ona saʻo ma ia paleni.

“Ia Outou Mataala”

Muamua lava, e tatau ona tatou aʻoaʻoina ina ia mafai ona iloa ē faafiaamiotonu. E lē faigofie lenei mea i taimi uma. Na aʻoaʻoina e se tasi aiga lenei mea i se tulaga faigatā na oo iā i latou. Na oo le tinā i se tulaga na lē mafai ona toe iloa  se mea mo se taimi umi. Ina ua molia e le aiga i le tulafono le falemaʻi lea na tupu ai lenei mea ona o le faatamala i le faia o togafitiga, na totogi ai e le aiga se lōia, o ia foʻi o se failauga i le lotu a lo latou vaipanoa. E ui lava sa totogi atu e le falemaʻi le $3.4 miliona Amerika, ae na sili atu ona faateteleina ai le pagatia o le aiga. Na maliu le tinā ua matuā mativa lava, ma sa leai se tupe e totogi ai lona falelauasiga. Aiseā? Talu ai na fafao uma i le taga a le lōia le tele o le tupe. E faatatau i lenei lōia, na taʻua ai i se tusi tau tulafono e faapea: “Afai e na te talaʻia le ituaiga o amioga lea o loo ia faia . . . , e faapenei la lana feʻau: seʻi o tatou faia faiga taufaasesē.” E mafai faapefea ona puipuia i tatou mai tagata faapena?

“Ia outou mataala,” o le fautuaga lea na avatu e Iesu iā i latou o ona aso o ē na fesagaʻi ma le faafiaamiotonu o lotu. (Mataio 16:6; Luka 12:1) Ioe, e tatau ona tatou faaeteete. E ono faapea mai tagata o loo latou tausisia ni sini maualuluga ma le matuā faamaoni, ae e manaʻomia ona tatou matuā faaeteete ma aua le vave taliaina tagata uma e faafoliga mai e amio saʻo. Po o le a tatou lē siakiina lelei ea a tatou tupe pepa mai le faletupe pe afai e tatou te iloa o loo iai tupe taufaavalea ia o loo salalau atu?

O loo aliaʻi mai foʻi tagata faafiaamiotonu e oo lava i totonu o le faapotopotoga Kerisiano moni. Na lapataʻi mai le soo o Iuta e faatatau iā i latou na, i le faapea mai: “O papa i latou i o outou faigaai alofa, pe a latou aai faatasi ma outou ma le le mataʻu, ua na ona aai lava i latou; o ao i latou e le o i ai se vai, ua feleleaiina i matagi; o laau ua malili o latou lau, ua le fua.”—Iuta 12.

Ina ia ʻtatou mataala’ o lona uiga, ia aua neʻi faasesēina i tatou e se tasi, o sē e faafoliga mai e alofa, ae o le mea moni e manatu faapito iā te ia lava ma faaali mai manatu e lē faavaea i le Afioga a le Atua. I le pei o se papa maamaʻai o loo taatia i lalo o se vaitafe lemū, o se tagata faapena e mafai ona faapogaia ai se faaleagaina faaleagaga iā i latou e lē o mataala. (1 Timoteo 1:19) E ono folafola mai e tagata faafiaamiotonu le tele o mea e faafouina ai faaleagaga, ae e iʻu ina ʻpei o se ao e le o iai se vai’—e leai se vai e maua mai ai. E pei o se laau e leai ni fua, o se tagata taufaasesē e na te lē fuaina mai ni fua faa-Kerisiano moni. (Mataio 7:15-20; Kalatia 5:19-21) Ioe, e manaʻomia ona leoleomaluina i tatou mai na tagata taufaasesē. Peitaʻi, e tatau ona tatou faia faapea e aunoa ma le masalosalo i gaoioiga a tagata uma.

“Aua Tou te Faamasino Atu”

Pagā le faigofie mo tagata lē lelei atoatoa ona faasinosino atu i masei o isi, ae galo ai o latou lava masei! O lea, o nei manatu, e mafai ona tatou aafia ai i le faafiaamiotonu. Na fetalai Iesu: “O oe na le tagata faafiaamiotonu, ia e muai tiai le utupoto i lou lava mata, ona e iloa lelei ai lea e eueseina atu le fasi laau i le mata o lou uso.” E lelei mo i tatou ona utagia lana fautuaga e faapea: “Aua tou te faamasino atu, ina neʻi faamasinoina outou. Aua o le faamasinoga tou te faamasinoina atu ai, e faamasinoina ai outou; . . . Se a le mea e te vaai atu ai i si fasi laau i le mata o lou uso, a e te le iloa e oe le utupoto i lou lava mata?”—Mataio 7:1-5.

Pe a fai e isi i nisi taimi ni mea e foliga mai e faafiaamiotonu, e tatau ona tatou faaeteete ina ia le vave faavasegaina i latou o ni tagata faafiaamiotonu. Mo se faaaʻoaʻoga, o le aposetolo o Peteru, “ona ʻalo lea o ia, ma vavae ese o ia” mai tagata talitonu o Nuu Ese sa i Anetioka ina  ia fiafia atu ai tagata Iutaia mai Ierusalema. O Panapa, ‘na oo ina tosina faatasi ma Peteru ma isi i lo latou pepelo.’ Sa faia e Peteru lenei mea e ui lava i le mea moni e faapea, na ia maua le faaeaga e tatala ai le ala mo tagata o Nuu Ese e talia ai i latou i le faapotopotoga Kerisiano. (Kalatia 2:11-14; Galuega 10:24-28, 34, 35) Ae o lenei sasi o Panapa ma Peteru e mautinoa, e leʻi faavasegaina ai i laʻua faapea, sa tutusa ma le tulaga o tusiupu ma Faresaio po o Iuta le Sekara.

“Aua Neʻi Faatagā Alofa”

Na apoapoaʻi mai Iesu: “A e avatu ai ni mea alofa, aua neʻi e ilia le pu i ou luma, pei ona faia e tagata faafiaamiotonu i sunako ma ala, ina ia viia o i latou e tagata.” (Mataio 6:2, Phillips) Na tusi mai le aposetolo o Paulo e faapea: “Aua neʻi faatagā alofa.” (Roma 12:9) Sa ia faalaeiau atu i le talavou o Timoteo ina ia iā te ia “le alofa lea ai le loto mamā . . . ma le faatuatua faamaoni.” (1 Timoteo 1:5) Afai e moni lo tatou alofa ma le faatuatua—e lē pisipisia i le manatu faapito ma le taufaasesē—o le a faatuatuaina i tatou e isi. O le a avea i tatou ma puna moni o le malosi ma faalaeiauga iā i latou o loo tatou faatasi. (Filipi 2:4; 1 Ioane 3:17, 18; 4:20, 21) Aemaise lava, o le a tatou maua ai le faamaoniga a Ieova.

I le isi itu, o le faafiaamiotonu, e iʻu ai i le oti o i latou o ē o loo faia lenā mea. I se taimi mulimuli ane, o le a matuā faaalialia lava le faafiaamiotonu. “E leai se mea o loo ufiufitia e le faaalia,” na fetalai ai Iesu Keriso, “e leai foi se mea lilo e le faailoaina.” (Mataio 10:26; Luka 12:2) Na faailoa mai e le tupu poto o Solomona: “E faamasinoina e le Atua galuega uma, atoa ma mea lilo uma lava, o mea lelei atoa ma mea leaga.”—Failauga 12:14.

I le taimi nei, aiseā tatou te faataga ai le faafiaamiotonu o isi e faaaafia ai i tatou ma oo ai i le tulaga ua tatou lē maua ai le alofa moni o a tatou uō moni? E mafai ona tatou mataala e aunoa ma le soona masalosalo naʻuā. Ma, seʻi o tatou faia ni taumafaiga ina ia lē avea ai lo tatou lava alofa ma le faatuatua o se faafiaamiotonu.—Iakopo 3:17; 1 Peteru 1:22.

[Ata i le itulau 22]

Po o le a e faatagaina le faafiaamiotonu o le ʻautusiupu ma Faresaio e faaliliueseina ai oe mai iā Iesu Keriso ma ona soo?