O Ieova lo Tatou Malu

“Auā o oe, Ieova e, o loʻu malu oe, . . . e le oo ia te oe se mea leaga.”—SALAMO 91:9, 10.

1. Aiseā e mafai ai ona tatou faapea atu o Ieova lo tatou malu?

O IEOVA o le malu moni mo ona tagata. Pe afai tatou te tuutoina atu atoatoa iā te ia, e ui atonu tatou te ‘puapuaga i mea uma, a e le faaatuatuvaleina; e fememeai, a e le matuā fememeai; e sauaina, a e le tuulafoaiina; e lafotuina i lalo, a e le fano.’ Aiseā? Talu ai e foaʻiina mai e Ieova “le matuā tele o le mana” iā i tatou. (2 Korinito 4:7-9) Ioe, e fesoasoani mai lo tatou Tamā faalelagi ina ia tatou ola i se olaga faale-Atua, ma e mafai ona tatou ave i fale upu nei a le faisalamo: “Auā o oe, Ieova e, o loʻu malu oe, na e faia lē Silisili ese ma mea e te nofo ai; e le oo ia te oe se mea leaga.”—Salamo 91:9, 10.

2. O le ā e mafai ona taʻua e faatatau i le Salamo 91, ma o le ā o loo folafola mai ai?

² Atonu o Mose na tusiaina upu na o le Salamo 91. O loo taʻua lona igoa i le ulutala, o lē na fatuina le Salamo lona 90, ma sosoo mai ai ma le Salamo 91 e aunoa ma le toe faaofi ane o se faamatalaga e taʻua ai le igoa o se isi fatupese. E foliga mai na usu fetaliaʻi le Salamo e 91; o lona uiga e toʻatasi le tagata o loo usu muamua (91:1, 2), ona tali atu lea i ai o le ʻaufaipese (91:3-8). Atonu e toe pese  le tagata e toʻatasi (91:9a) ae tali atu i ai se vaega o tagata (91:9e-13). Ona usu loa lea e le tagata e toʻatasi o upu faaiʻu (91:14-16). Po o le ā lava le auala na usuina ai, ae o loo folafola mai e le Salamo lona 91 le saogalemu faaleagaga i le vasega o Kerisiano faauuina, ma saunia foʻi se faamautinoaga faapena mo a latou aumea tuuina atu. * Seʻi o tatou talanoa i lenei salamo mai se vaaiga a auauna uma nei a Ieova.

Saogalemu i Totonu o le ‘Mea Lilo o i ai le Atua’

3. (a) O le ā “le mea lilo o i ai lē Silisili ese”? (e) O le ā ua tatou maua e ala i le ‘mau i le paolo o Le e ona le malosi uma lava’?

³ Ua pese le faisalamo: “O le nofo i le mea lilo o i ai lē Silisili ese, e mau o ia i le paolo o Le e ona le malosi uma lava. Ou te faapea atu ia Ieova, O loʻu malu o ia ma loʻu ʻolo; o loʻu Atua ou te faatuatua ia te ia.” (Salamo 91:1, 2) O “le mea lilo o i ai lē Silisili ese” o se nofoaga faafaatusa mo lo tatou puipuiga, aemaise i ē faauuina, o i latou nei o loo taulaʻi faapitoa mai i ai osofaʻiga a le Tiapolo. (Faaaliga 12:15-17) Na semanū na te faaumatiaina i tatou uma, pe ana lē seanoa le puipuiga lea tatou te maua i lo tatou nonofo faatasi ai ma le Atua, o i tatou o ni ana mālō faaleagaga. E ala i le ‘mau i le paolo o Le e ona le malosi uma lava,’ ua tatou maua ai le paolo malupuipuia a le Atua. (Salamo 15:1, 2; 121:5) E leai se malu e sili atu ona saogalemu, po o se ʻolo e sili atu ona mausalī, na i lo o lo tatou Alii Pule Silisili Ese, o Ieova.—Faataoto 18:10.

4. O ā togafiti e faaaogā e le “seumanu” o Satani, ae faapefea ona tatou sosola ese ai?

⁴ Ua toe faapea mai le faisalamo: “O ia [Ieova] na te laveaiina oe i le mailei a lē fai manu [seumanu], ma le faamai e oti ai [“faapogaia ai mala,” NW].” (Salamo 91:3) Sa masani i se seumanu i Isaraelu anamua, ona ia puʻeina manufelelei e ala i le faaaogā o ni mailei po o ni matāsele. O nisi o togafiti a le “seumanu,” o Satani lea, o lana faalapotopotoga leaga ma “gaoioiga taufaaʻoleʻole.” (Efeso 6:11, faaopoopoga i le pito i lalo, NW) Ua faataatitia matāsele lilo i o tatou ala, ina ia tataʻi atu ai i tatou e faia le amioleaga ma faaleagaina ai lo tatou tulaga faaleagaga. (Salamo 142:3) Ae peitaʻi, ona o lo tatou teena o le amiolētonu, ‘ua tatou sosola ai e pei o le manu nai le matāsele.’ (Salamo 124:7, 8) Maʻeu so tatou lotofaafetai ona ua laveaʻia i tatou e Ieova mai le “seumanu” amioleaga!—Mataio 6:13.

5, 6. O le ā le “faamai” ua faapogaia ai “mala,” ae aiseā e lē o aafia ai tagata o Ieova?

⁵ O loo taʻua e le faisalamo “le faamai e faapogaia ai mala.” E pei o se faamaʻi pipisi, o loo iai se mea e faapogaia ai “mala” mo le aiga faaletagata ma i latou o loo lagolagoina le pule silisili ese a Ieova. I lenei itu, na tusi mai ai le tusitala o talafaasolopito, o Arnold Toynbee e faapea: “Talu mai le iʻuga o le Taua Lona Lua a le Lalolagi, ua avea le lotonuu ma pogai o le faaluaina o le aofaʻiga o setete ua fai a latou lava pulega tumaʻoti . . . Ua matuā mataʻutia le fevaevaeaʻi o uiga o tagata i aso nei.”

⁶ I le gasologa mai o senituri, ua matuā faapogaia ai e nisi taʻitaʻi fevaevaeaʻiga i le va o atunuu. Ua latou mananaʻo foʻi e faamamaluina i latou lava pe faamamalu tupua po o faatusa eseese. Peitaʻi e leʻi faatagaina lava e Ieova ona tagata faamaoni e aafia i se “faamai” faapena. (Tanielu 3:1, 2, 20-27; 6:7-10, 16-22) Ona o i tatou o se ʻauuso fealofani faavaomalo, ua tatou tuutoina atoatoa atu ai iā Ieova, ua tatou tausisia le solitū faale-Tusi Paia, ma taʻutino atu ma le lē faailogatagata, “o le mataʻu [i le Atua] i nuu uma lava, ma fai le amiotonu, ua talia i latou e ia.” (Galuega 10:34, 35; Esoto 20:4-6; Ioane 13:34, 35; 17:16; 1 Peteru 5:8, 9) E ui ina tatou mafatia i “mala” e ala i sauāga ona o ni Kerisiano, ae o loo tatou saogalemu ma le olioli i le itu faaleagaga “i le mea lilo o i ai lē Silisili ese.”

7. E faapefea ona puipuia i tatou e Ieova “i ona apaau”?

⁷ I le avea o Ieova ma o tatou malu, ua faamāfanafanaina ai i tatou i upu nei: “E ufiufi ifo o ia ia te oe i ona apaau, e te sulufai foi i lalo o ona apaau; e faia lona faamaoni māu talipupuni ma mea e puipuiina ai oe.” (Salamo 91:4) E puipuia i tatou e le Atua, e pei ona faapepepepe o se  manulele i luga o lana toloaʻi ina ia malupuipuia i latou. (Isaia 31:5) ‘E ufiufi ifo o ia ia te i tatou i ona apaau.’ E faapulou e se manulele lana toloaʻi i ona “apaau,” e puipuia ai i latou mai ni manu e osofaʻi ane. I le pei o ni tamaʻi manulele e leʻi malolosi, ua tatou saogalemu ai i lalo o apaʻau faafaatusa o Ieova, auā ua tatou maua le malu po o le lafitaga i totonu o lana faalapotopotoga moni faa-Kerisiano.—Ruta 2:12, NW; Salamo 5:1, 11, faatusatusa i le NW.

8. Ua avea faapefea le “faamaoni” o Ieova o se talipupuni tele ma o se puipui malosi?

⁸ E tatou te faatuatuaina le “faamaoni.” Ua pei o se talipupuni tele i taimi anamua, lea e masani ona pei lona foliga o se faitotoʻa, ma e lava lona telē e ufiufi uma ai le tino atoa o se tagata. (Salamo 5:12) O le mautinoa i se puipuiga faapena e tatou te lē toe matataʻu ai. (Kenese 15:1; Salamo 84:11) I le pei o lo tatou faatuatua, ua avea le faamaoni o le Atua o se talipupuni tele e malupuipuia ai, lea e teteeina ū fanafana mū a Satani ma aveesea atu mala mai fili. (Efeso 6:16) Ua avea foʻi o se puipui malosi, o se mauga malosi e lafi ai, o loo tatou tutū mausalī ai i ona tua.

‘O le a Tatou Le Matataʻu’

9. Aiseā e mafai ai ona avea le pō o se taimi taufaafefe, ae aiseā e tatou te lē matataʻu ai?

⁹ Pe a fua atu i le puipuiga a le Atua, ua faapea mai le faisalamo: “E te le mataʻu i le mea matautia i le po, ma le u fanafana e lele i le ao, o le faamai e fealuai i le pogisa, ma le mala e fano ai i le aoatea.” (Salamo 91:5, 6) Talu ai o le tele o gaoioiga leaga e faatino i le pogisa, ua avea ai le pō o se taimi taufaafefe. I le mafiafia o le pogisa faaleagaga o loo ufitia ai nei le lalolagi, ua masani ona faia e o tatou fili ni gaoioiga faatogafiti e taumafai ai ina ia faaleagaina lo tatou tulaga faaleagaga ma taofia la tatou galuega talaʻi. Peitaʻi, ‘e tatou te le matataʻu i se mea matautia i le po’ auā e leoleomaluina i tatou e Ieova.—Salamo 64:1, 2; 121:4; Isaia 60:2.

10. (a) O le ā le mea lea e foliga o loo faasino atu i ai “le u fanafana e lele i le ao,” ma ua faapefea ona tatou tali atu i ai? (e) O le ā le uiga o “le faamai e fealuai i le pogisa,” ma aiseā e lē avea ai o se mea e tatou te matataʻu ai?

¹⁰ O “le u fanafana e lele i le ao” e foliga o loo faasino atu i osofaʻiga e ala i upu. (Salamo 64:3-5; 94:20) O le faaauau ona tatou tuuina atu o faamatalaga moni, e oo ai ina lē taulau na teteega matilatila o loo faia mai i la tatou auaunaga paia. E lē gata i lea, tatou te lē matataʻu i “le faamai e fealuai i le pogisa.” O se faamaʻi faafaatusa lenei ua pipisi solo i le pogisa o lenei lalolagi o loo nofo toʻilalo i le mana o Satani, lea ua faamaʻia ana amioga tatau ma lona tulaga faaletapuaʻiga. (1 Ioane 5:19) Ua faapogaia ai se tulaga e ono oti ai i le mafaufau ma le loto, ma tuua ai tagata i le pogisa e faatatau iā Ieova, i ana fuafuaga, ma ana sauniuniga alofa. (1 Timoteo 6:4) E ui i lenei pogisa, ae tatou te lē matataʻu, ona ua tele le  malamalama faaleagaga ua tatou maua.—Salamo 43:3.

11. O le ā e tupu iā i latou e oo i ai le ‘mala i le aoatea’?

¹¹ E tatou te lē matataʻu foʻi i “le mala e fano ai i le aoatea.” Atonu e faasino atu le “aoatea” i le mea ua taʻua o le faamalamalamaina o le lalolagi. O i latou e lolo atu i ona manatu matapeʻapeʻa i meafaitino e mafatia i le fanoga faaleagaga. (1 Timoteo 6:20, 21, LT) A o tatou folafola atu ma le lototele le feʻau o le Malo, e tatou te lē matataʻu i so o se tasi o o tatou fili, auā o Ieova o Lē e Puipuia i tatou.—Salamo 64:1; Faataoto 3:25, 26.

12. O le itu a ai o loo “pauu” atu i ai le mano o tagata, ma i le ā le auala ua latou paʻūʻū ai?

¹² Ua faaauau mai atili le faisalamo: “E pauu se toaafe i ou tafatafa, ma le mano i lou itu taumatau; a e le tāitāi ane ia te oe. Na ona vaai i ai ou mata, e te iloa atu foi le taui o e amio leaga.” (Salamo 91:7, 8) E toʻatele ua “pauu” i le oti faaleagaga i o ‘tatou autafa’ talu ai ua latou lē faia Ieova ma o latou malu. O le iʻuga, e “mano” i latou ua paʻūʻū atu i le “itu taumatau” o le Isaraelu faaleagaga i aso nei. (Kalatia 6:16) Ae tusa lava po o tatou o ni Kerisiano faauuina po o a latou aumea tuuina atu, ae ua tatou saogalemu i totonu o le nofoaga po o le “mea lilo” o iai le Atua. Ua na ona tatou ‘vaavaai ma iloa atu le taui o e amio leaga,’ o ē o loo seleseleina faalavelave i tulaga tau pisinisi, o lotu, ma isi auala.—Kalatia 6:7.

 ‘E Le Oo ia te i Tatou se Mea Leaga’

13. O ā mea leaga e lē oo iā i tatou, ma aiseā?

¹³ E ui ua leai se saogalemu i lenei lalolagi, ae tatou te faamuamuaina le Atua ma faamalosia i tatou i upu a le faisalamo e faapea: “Auā o oe, Ieova e, o loʻu malu oe, na e faia lē Silisili ese ma mea e te nofo ai; e le oo ia te oe se mea leaga, e le tāitāi ane foi se mala i lou fale ie.” (Salamo 91:9, 10) Ioe, o Ieova o lo tatou malu lea. Ae peitaʻi, ua tatou avea foʻi le Atua e Silisili Ona Maualuga e fai ma ‘mea tatou te nonofo ai,’ o inā tatou te maua ai le saogalemu. Ia tatou vivii atu iā Ieova o le Pule Silisili Ese Aoao, ia ‘mau’ ma ia e avea ma o tatou Puna o le saogalemu, ma folafola atu le tala lelei o lona Malo. (Mataio 24:14) O lea la, ‘e le oo ia te i tatou se mea leaga’—e augapiu ma se mala lea na muaʻi faamatalaina i lenei salamo. E tusa lava pe tatou te aafia faatasi ma isi i mea leaga e pei o mafuiʻe, afā, lologa, oge, ma le aasa o faiga taua, ae e lē faaleagaina e nei mea lo tatou faatuatua po o lo tatou saogalemu faaleagaga.

14. I le avea ma auauna a Ieova, aiseā ua tatou lē aafia ai i mala mataʻutia?

¹⁴ Ua pei Kerisiano faauuina o ni tagata aumau o loo nonofo i faleʻie e ese mai lenei faiga o mea. (1 Peteru 2:11) ‘E le tāitāi ane se mala i o latou fale ie.’ E tusa lava pe o le lagi po o le lalolagi lo tatou faamoemoe, ae lē o i tatou lava o se vaega o le lalolagi, ma ua tatou lē aafia foʻi i na mala mataʻutia faaleagaga e pei o ana amioga lē mamā, le matapeʻapeʻa i meafaitino, o lotu sesē, ma le tapuaʻiga i “le manu feai” ma lona “faatagata,” o Malo Aufaatasi.—Faaaliga 9:20, 21; 13:1-18; Ioane 17:16.

15. O ā vala o loo tatou maua ai le fesoasoani faaagelu?

¹⁵ Na faapea mai atili le faisalamo e tusa ai o le puipuiga o loo tatou maua: “E poloai atu [Ieova] i ana agelu ia te oe, e tausi ia te oe i ou ala uma. Latou te ave ia te oe i o latou lima, neʻi tūʻia lou vae i se maa.” (Salamo 91:11, 12) Ua foaʻiina atu i agelu le malosi e latou te puipuia ai i tatou. (2 Tupu 6:17; Salamo 34:7-9; 104:4; Mataio 26:53; Luka 1:19) E latou te puipuia i tatou ‘i o tatou ala uma.’ (Mataio 18:10) Ua tatou maua le taʻitaʻiga ma le tausiga faaagelu i le avea o i tatou o ni ē e folafola atu le Malo, ma ua tatou lē tūʻia ai faaleagaga. (Faaaliga 14:6, 7) E oo lava i “maa” e pei o faasāsāga i la tatou galuega, ua tatou lē tūʻia ai ma faapogaia ai lo tatou lē mauaina o le finagalo malie o le Atua.

16. Ua faapefea ona eseese osofaʻiga e faia e se “tamaʻi leona” ma se “asipi,” ma o faapefea ona tatou tali atu i ai?

¹⁶ Ua faaauau mai le faisalamo: “E te solia le [“tamaʻi,” NW] leona ma le asipi; e te solia lava le [tamaʻi] leona taanoa ma le tanimo.” (Salamo 91:13) E pei lava ona matilatila le iloa atu o le osofaʻi mai a se tamaʻi leona, e faapena foʻi i nisi o o tatou fili ona faaalialia i lumāmea a latou teteega e ala i le sainia o ni tulafono ua fuafua e taofia ai la tatou galuega talaʻi. Peitaʻi ua tatou fetaiaʻi foʻi ma osofaʻiga faafuaseʻi e pei ona osofaʻi mai ai se asipi i se nofoaga lilo. I nisi taimi, ua faapena le lalafi mai tua o le ʻaufailotu, ae osofaʻia i tatou e auala mai i tagata o loo faia tulafono, o faamasino, ma isi. Peitaʻi o le lagolagosua a Ieova, ua tatou saʻili atu ai ma le fifilemu i faamasinoga mo se mapusaga mai nei mafatiaga, ma ua faapena ai ona ‘puipuia ma faamautūina faaletulafono le tala lelei.’—Filipi 1:7, NW; Salamo 94:14, 20-22.

17. E faapefea ona tatou solia “le tamaʻi leona taanoa”?

¹⁷ O loo tautala le faisalamo i le solia i lalo o “le tamaʻi leona taanoa ma le tanimo.” E mafai ona matuā feʻai lava se tamaʻi leona taanoa, ma se tanimo po o se gata lapoʻa, e mafai ona avea o se manu e sosolo i le manava e matuā telē lona foliga mai. (Isaia 31:4) Ae tusa lava po o le ā le feʻai o se tamaʻi leona taanoa pe a faaalialia lona osofaʻi mai, ae mafai lava ona tatou solia i se uiga faafaatusa, e ala i lo tatou usiusitai i le Atua na i lo le usiusitai atu i tagata ma faalapotopotoga e pei o ni leona. (Galuega 5:29) O lona uiga la, e lē mafai ona faaleagaina lo tatou itu faaleagaga e se “leona” o loo taufaamataʻu mai.

18. O ai tatou te ono manatuaina pe a taʻua “le tanimo,” ma o le ā e manaʻomia ona tatou fai pe a osofaʻia i tatou?

¹⁸ I le Tusi Paia faa-Eleni o le Septuagint, o loo taʻua ai “le tanimo” o “se tarako.” Atonu ua matuā faamanatu mai ai e lenei taʻu iā i tatou “le tarako tele, o le gata tuai lea, ua igoa i le tiapolo, i le ma Satani.” (Faaaliga 12:7-9; Kenese 3:15) Ua pei o ia o se manu mataʻutia e sosolo i le manava,  lea e mafai ona olopala ma foloina manu na te mauaina. (Ieremia 51:34) A o taumafai Satani e maileia i tatou, e olopalaina i tatou i omiga o lenei lalolagi, ma foloina i tatou, seʻi o tatou faamamulu ese ma soli i lalo lenei “tanimo.” (1 Peteru 5:8) E tatau ona faia e le vaega totoe faauuina lenei mea pe afai latou te fia auai i le faataunuuga o le Roma 16:20.

Ieova—Le Puna o lo Tatou Faaolataga

19. Aiseā tatou te sulu atu ai iā Ieova mo se malu?

¹⁹ E tusa ai o le tagata tapuaʻi moni, ua faapea mai le faisalamo i lona fai ma sui o le Atua: “Ona ua naunau mai o ia ia te au, o le mea lea ou te faaolaina ai o ia; ou te faamamalu ia te ia ona ua iloa e ia loʻu igoa.” (Salamo 91:14) O le fuaitau “ou te faamamalu ia te ia” o lona faauigaga moni lava, “ou te tuua o ia i le mea maualuga,” o lona uiga, e lē mafai e se tasi ona oo atu i ai. E tatou te sulu atu iā Ieova mo se malu i le avea o ni ona tagata tapuaʻi, aemaise lava ona ‘ua tatou naunau atu ia te ia.’ (Mareko 12:29, 30; 1 Ioane 4:19) O le iʻuga, ‘e faaolaina i tatou’ e le Atua mai o tatou fili. O le a lē taitai ona faaumatia i tatou. Na i lo lea, o le a faasaoina i tatou auā ua tatou iloa le suafa tauatua ma valaau atu i ai i le faatuatua. (Roma 10:11-13) Ma ua tatou maumauaʻi e ‘savavali i le suafa o Ieova e faavavau.’—Mika 4:5; Isaia 43:10-12.

20. E pei ona faaiʻu mai le Salamo 91, o le ā ua folafola mai e Ieova i lana auauna faamaoni?

²⁰ E pei ona faaiʻu mai le Salamo 91, ua fetalai Ieova e faatatau i lana auauna faamaoni: “E valaau mai o ia ia te au, ona ou tali atu ai lea ia te ia; o aʻu, ou te ia te ia i le puapuaga; ou te laveaiina o ia, ma ou faatupuina lona mamalu. O le olaga faafualoa e malie ai o ia ia te au; ou te faaali atu foi ia te ia laʻu faaolataga.” (Salamo 91:15, 16) Pe a tatou valaau i le Atua i le tatalo e tusa ma lona finagalo, e tali mai o ia iā i tatou. (1 Ioane 5:13-15) Ua uma ona tatou sao mai le tele o mafatiaga ona o teteega o loo faapogaia malosi e Satani. Peitaʻi o fetalaiga e faapea “ou te ia te ia i le puapuaga” ua sauniunia ai i tatou mo tofotofoga i le lumanaʻi, ma tatou mautinoa ai, o le a tausia i tatou e le Atua pe a oo ina faaumatia lenei faiga amioleaga o mea.

21. Ua māeʻa faapefea ona faamamaluina le ʻaufaauuina?

²¹ E ui lava i teteega malolosi a Satani, ae o i latou e faaatoa ai le aofaʻiga o ē faauuina, lea o loo tatou iai faatasi pea, o le a faamamaluina i le lagi i le taimi atofaina a Ieova—pe a mavae le “olaga faafualoa” i le lalolagi. Peitaʻi, o laveaʻiga mataʻina a le Atua, ua aumaia ai le mamalu faaleagaga i le ʻaufaauuina. Ma e maʻeu se faaeaina o i latou ina ia taʻimua ai o ni Molimau a Ieova i le lalolagi i nei aso e gata ai! (Isaia 43:10-12) O le laveaʻiga silisili a Ieova mo ona tagata o le a faia a o faagasolo lana taua tele o Amaketo, pe a ia faaeaeaina lana pule silisili ese ma faapaia lona suafa paia.—Salamo 83:18; Esekielu 38:23; Faaaliga 16:14, 16.

22. O ai o le a ‘faaali mai i ai le faaolataga mai iā Ieova’?

²² E tusa pe o i tatou o ni Kerisiano faauuina pe o a latou aumea tuuina atu, ae ua tatou nofo tatali atu i le Atua mo le faaolataga. A o faagasolo “le aso tele ma le silisili o Ieova,” o le a faasaoina i latou o ē auauna ma le faamaoni i le Atua. (Ioelu 2:30-32) O i tatou o le a faia aʻe ai le “motu o tagata e toatele” o ē faasaoina atu i le lalolagi fou a le Atua, ma tumau pea i le faamaoni a o faagasolo le tofotofoga faaiʻu, o le a ‘faamalieina e ia i le olaga faafualoa’—le olaga e aunoa ma se mutaaga. O le a ia toe faatutūina aʻe foʻi le vao o tagata e toʻatele. (Faaaliga 7:9; 20:7-15) O le a matuā fiafia lava Ieova e ‘faaali ia i tatou lana faaolataga’ e auala mai iā Iesu Keriso. (Salamo 3:8) A o faatalitalia na faamoemoega sili, seʻi o tatou taulaʻi atu pea i le Atua mo lana fesoasoani i le faitauina o o tatou aso ina ia maua ai sona viiga. Tau ina ia tatou faaauau pea, e ala i a tatou upu ma gaoioiga, ona faamaonia atu ai, o Ieova lo tatou malu.

[Faamatalaga pito i lalo]

O le a Faapefea Ona E Tali?

• O le ā “le mea lilo o i ai lē Silisili ese”?

• Aiseā tatou te lē fefefe ai?

• E faapefea ona ‘le oo ia te i tatou se mea leaga’?

• Aiseā e mafai ai ona tatou faapea atu, o Ieova o le puna o lo tatou faaolataga?

[Fesili mo le Suʻesuʻega]

[Ata i le itulau 17]

Pe e te silafia po ua faapefea ona avea le faamaoni o Ieova o se talipupuni telē mo i tatou?

[Ata i le itulau 18]

E fesoasoani Ieova i ana auauna ina ia faatinoina la latou faiva e ui lava i osofaʻiga faafuaseʻi ma teteega matilatila

[Faamatalaga i Ata]

Gata: A. N. Jagannatha Rao, Trustee, Madras Snake Park Trust