O le Faatuatua o Noa na Faasalaina ai le Lalolagi

PO UA e faalogo i le tala iā Noa, o se tagata e mataʻu i le Atua o lē na fausiaina se vaa mo le faasaoina o ola i le taimi o le lolo i le lalolagi? E ui lava o se mea na tupu i aso anamua, ae e faitau miliona tagata e masani i lenei tala. Ae peitaʻi, o le mea e lē o malamalama i ai le toʻatele e faapea, e iai se uiga o le soifuaga o Noa mo i tatou uma.

Aiseā e tatou te naunau ai i se tala ua faitau afe tausaga lona leva? Po o iai ea se uiga e tutusa ai le tulaga o Noa ma lo tatou tulaga? Afai e iai, e faapefea la ona tatou maua aogā mai lana faaaʻoaʻoga?

Le Lalolagi i Aso o Noa

Ua faatulaga e le faasologa o mea tutupu i le Tusi Paia le aso na soifua mai ai Noa e faapea, o le 2970 T.L.M.—i le 126 o tausaga talu ona oti Atamu. I aso o Noa, sa tumu le lalolagi i le sauā, ma o le toʻatele o tagata na tupuga mai iā Atamu, sa latou filifili e mulimuli atu i le faaaʻoaʻoga lē lelei a lo latou augātamā. I lea, “ua silafia e Ieova ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava.”—Kenese 6:5, 11, 12.

Sa lē na o le fouvale o tagata le pogai na lē fiafia ai Ieova. Ua faamalamalama mai i le faamatalaga a le Kenese e faapea: “Ona vaavaai lea o atalii o le Atua i afafine o tagata, ua lalelei lava i latou; ona fai avā ai lea o i latou i fafine uma ua latou loto i ai. . . . Sa i le lalolagi i ia ona aso o tagata maualuluga [Nefilimi]; e faapea foi i ona tua mai, ina ua o ane o atalii o le Atua i afafine o tagata, ma ua fananau ai ia te i latou, o tagata malolosi ia ma le taʻua anamua.” (Kenese 6:2-4) O le faatusatusaina o nei fuaiupu ma faamatalaga o loo faamauina e le aposetolo o Peteru, ua faaalia ai e faapea “o atalii o le Atua” o agelu lē usiusitai. O Nefilimi, o fanau itulua na maua i ni feusuaʻiga e lē faalenatura i le va o fafine ma agelu fouvale na liutino tagata.—1 Peteru 3:19, 20.

O le uiga o le upu “Nefilimi,” o “Tagata fasi tagata,” e faaalia ai tagata o ē e māfua ai ona paʻūʻū isi. O i latou o ni tagata e pule sauā, ma o le agasala a o latou tamā tuʻinanau i mea leaga ua faatusaina e pei o amioga sili ona leaga a Sotoma ma Komoro. (Iuta 6, 7) Sa latou auaufaatasi e faagaee amioga leaga lē pulea i le lalolagi.

 E “Sao i E Tupulaga ma Ia”

Sa matuā olaola le amioleaga o lea na finagalo ai le Atua e faaumatia tagata. Ae ua taʻua i le tala faagaeeina e faapea: “O Noa, ua alofagia o ia e Ieova. . . . o Noa o le tagata amiotonu ia ma le sao i e tupulaga ma ia; sa la feooai o le Atua ma Noa.” (Kenese 6:8, 9) Na mafai faapefea ona ‘feooai ma le Atua’ i se lalolagi lē amioatua e na o le faaumatiaga ua tatau i ai?

E lē taumatea sa tele ni mea na aʻoaʻoina e Noa mai lona tamā, o Lameko, o se tagata faatuatua ma e tupulaga ma Atamu. Ina ua faaigoaina lona atalii iā Noa (ua manatu i ai faapea o lona uiga o le “Mālōlōga,” po o le “Faamaisega”), na valoia ai e Lameko e faapea: “E faamafanafanaina i tatou e ia i la tatou galuega ma le tiga o tatou lima, ona o le laueleele ua malaia ia Ieova.” Na faataunuuina lenā valoaga ina ua aveesea e le Atua lana faamalaiaga mai le laueleele.—Kenese 5:29; 8:21.

O le iai o ni mātua e matataʻu i le Atua, e lē faamautinoaina ai le avea o fanau o ni tagata faaleagaga, auā e tatau i tagata taʻitoʻatasi ona faavaeina sana lava faiā ma Ieova. Sa ‘feooai le Atua’ ma Noa e ala i le mulimuli atu i se auala na faamaonia e le Atua. O mea na aʻoaʻoina e Noa e uiga i le Atua na uunaʻia ai o ia e auauna iā te Ia. E leʻi maluelue le faatuatua o Noa ina ua faailoa atu iā te ia e uiga i le fuafuaga a le Atua ina ia ‘faaumatia mea ola uma ua i ai le mānava o le ola i le lolo.’—Kenese 6:13, 17.

I le mautinoa o le a oo mai lenei mala e leʻi tupu muamua lava, na usiusitai ai Noa i le poloaʻiga a Ieova e faapea: “Ia e faia se vaa mo oe i le laau o le kofa; e te faia ni ana i le vaa, e te puluti ai foi i le liu ma tua i pulu.” (Kenese 6:14) Sa lē faigofie le faatinoina o vala patino ia na faatonu mai e le Atua mo le vaa. Ae peitaʻi, “na faia foi e Noa e faapei ona poloai atu ai le Atua ia te ia i mea uma.” O le mea moni, “sa faapea lava ona fai e ia.” (Kenese 6:22) Sa faia e Noa lenei mea faatasi ma le fesoasoani a lana avā ma o la atalii o Semu, Hamo, ma Iafeta ma a latou avā. Sa faamanuia e Ieova lenā faatuatua. Maʻeu ni faaaʻoaʻoga sili ona lelei mo aiga i aso nei!

O le ā o le a aofia i le fauina o le vaa? Na faatonu e Ieova ia Noa ina ia fau se pusa laupapa telē fogāfale tolu e lē sao i ai se vai, ia 437 futu (133 mita) le umi, 73 futu (22 mita) le lautele ma ia 44 futu (13 mita) le maualuga. (Kenese 6:15, 16) O se vaa faapena, sa tutusa lona telē ma le tele o vaa laʻuoloa i aso nei.

Maʻeu se galuega tele na faia! E foliga mai, e faitau afe ni laau na tātuʻuina i lalo, ma tatoso atu i le nofoaga na fau ai le vaa, ma tatipi ai laufono po o lagolago o le vaa. O lona uiga o le fausia lea o fatāmanu, le faia o pine faamau e soo ai vaega o le vaa, le suʻeina o le ta e puluti ai le vaa ina ia lē sao i ai le vai, le faia o pusa e teu ai mea i le vaa ma meafaigaluega, ma isi lava mea faapena. I le galuega, atonu sa manaʻomia foʻi ona faia ni feutagaʻiga ma tagata faatauʻoa ma totogi atu ia oloa ma le galuega. E aliali mai sa manaʻomia ai se tomai faakamuta ina ia mafai ona faafetaui lelei laufono ma lagolago ma le fauina o se fausaga e matuā malosi lava. Ma seʻi manatu ane lava—o le fauina o le vaa atonu na faaaluina ai se 50 po o le 60 o tausaga!

 Ona sosoo ai lea ma le sagaʻi atu o Noa i le sauniunia ia lava meaʻai mo tagata ma manu. (Kenese 6:21) E tatau foʻi ona ia faatulaga ma pulea le anoanoaʻi o manu e avatu i le vaa. Na faia e Noa mea uma na poloaʻi mai ai le Atua, ma faauma ai le galuega. (Kenese 6:22) O le faamanuia a Ieova na faamautinoa ai le faamāeʻaina lelei o le fauina o le vaa.

O “Lē Talaʻi le Amiotonu”

E lē gata i le fauina o le vaa, ae sa faaleo atu foʻi e Noa se lapataʻiga ma auauna faamaoni i le Atua i le avea o “lē talaʻi le amiotonu.” Ae o tagata “na le iloa foi e i latou ina seia oo le lolo, ma aveesea i latou uma.”—2 Peteru 2:5; Mataio 24:38, 39.

I le manatu atu i le mativa faaleagaga ma amioga leaga a tagata i na aso, e faigofie lava ona mātauina le ono avea o le aiga o Noa ma mea e taliē i ai tuaoi lē talitonu, ma avea ma autū o faiga leaga ma tauemuga. Atonu sa manatu tagata iā i latou e faapea ua vālea. Ae peitaʻi, sa taulau Noa i le avatua o faalaeiauga ma le lagolagosua faaleagaga i lona ʻauaiga, auā e latou te leʻi faataʻitaʻi atu lava i ala sauā, lē mamā ma le fouvale a o latou tupulaga lē amioatua. E ala i ana upu ma gaoioiga ia na faaalia ai lona faatuatua, na faasala ai e Noa le lalolagi i lenā vaitaimi.—Eperu 11:7.

Faasaoina i le Lolo

I se taimi puupuu lava a o leʻi totō ifo timuga, na taʻu atu ai e le Atua iā Noa ina ia ulu atu i le vaa lea ua māeʻa ona fausia. Ina ua ō atu le aiga o Noa ma manu i totonu, “ona pupuni ai lea e Ieova [“le faitotoʻa,” NW ],” ua pupuni atu ai ma so o se tauemuga. Ina ua oo mai le Lolo, atonu na toe faamataa ai e agelu lē usiusitai o latou tino faaletagata ma sosola ese ai mai le faaumatiaga. Ae faapefea isi? Ioe, o meaola uma i le laueleele mātūtū i fafo atu o le vaa, e aofia ai ma le ʻau Nefilimi, na faaumatia! E na o Noa lava ma lona aiga na faasaoina.—Kenese 7:1-23.

Sa nonofo Noa ma lona ʻauaiga i le vaa mo le tausaga e tasi ma aso e sefulu. Sa tele a latou galuega na fai i le fafagaina ma le faafeinuina o manu, faamamā ese otaotavale, ma taumafai foʻi e mātau lelei le taimi. Ua faamauina saʻo e le Kenese aso o vala eseese uma o le Lolo, e pei o faamaumauga a se vaa, ua atagia mai ai le saʻo  aʻiaʻi o le faamatalaga.—Kenese 7:11, 17, 24; 8:3-14.

A o iai i le vaa, e lē taumatea sa taʻitaʻia e Noa lona aiga i ni talanoaga faaleagaga ma faafetai atu i le Atua. E foliga mai, sa faasaoina e Noa ma lona aiga le talafaasolopito i le taimi ina ua mavae le Lolo. O ni upu tuugutu maufaatuatuaina po o ni talafaasolopito tusitusia na iā i latou sa mafai ai ona latou maua ni faamatalaga saʻo mo ni a latou talanoaga aogā sa fai i le taimi a o tafe pea le Lolo.

Maʻeu le fiafia atonu na iā Noa ma lona aiga ina ua toe ulufafo atu i le laueleele mātūtū! O le mea muamua lava na ia faia, o le faatūina lea o se fata faitaulaga ma gaoioi ai o se faitaulaga mo lona aiga, i le ofoina atu o taulaga i Lē na faasaoina i latou.—Kenese 8:18-20.

“E Pei o Ona Po o Noa”

Na fetalai Iesu Keriso: “E pei o ona po o Noa, e faapea foi pe a sau le Atalii o le tagata.” (Mataio 24:37) E faapena foʻi Kerisiano i aso nei ona avea ma ē e talaʻi le amiotonu, i le uunaʻia o tagata ina ia salamō. (2 Peteru 3:5-9) I le manatu i lenā faatusatusaga, tatou te tau manatu ai po o le ā le mea sa i le mafaufau o Noa a o leʻi oo mai le Lolo. Pe na oo iā te ia se lagona e faapea sa lē aogā lana talaʻiga? Pe na vaivai o ia i nisi taimi? E lē o fai mai ai le Tusi Paia. O loo na ona taʻu mai lava iā i tatou e faapea, sa usiusitai Noa i le Atua.

Po ua e iloa le aogā o le faatatauina o le tulaga o Noa i o tatou tulaga? Sa ia usiusitai iā Ieova e ui lava i teteega ma faigatā. O le māfuaaga lenā na faatulaga ai o ia e Ieova o se tagata amiotonu. Sa leʻi iloa tonu e le aiga o Noa le taimi o le a aumaia ai e le Atua le Lolo, ae na latou iloa o le a oo mai lava. O le faatuatua i le afioga a le Atua na faatumauina ai Noa i le faagasologa o tausaga o galuega fitā, ma le talaʻiga lea sa foliga e lē fua mai. E moni, ua taʻu mai iā i tatou e faapea: “O le faatuatua na fausia ai e Noa le vaa ina ua mataʻu, e ola ai lona aiga, ina ua aʻoaʻoina e le Atua i mea e lei vaaia i ia ona po, na ia faasalaina ai le lalolagi, ua na maua ai foi le amiotonu, o le amiotonu lea e i le faatuatua.”—Eperu 11:7.

Na faapefea ona maua e Noa sea faatuatua? E foliga mai, sa ia faaalu se taimi e mafaufau loloto ai i mea uma na ia iloa e uiga iā Ieova ma tuu atu o ia e taʻitaʻia e lenā poto. E mautinoa lava, sa talanoa atu Noa iā Ieova i le tatalo. O le mea moni, sa oo ina matuā masani lelei atu o ia iā Ieova o lea na la ‘feooai ai ma le Atua.’ Ona o le ulu o le aiga, na tuutoina atu ai ma le fiafia e Noa lona taimi ma uaʻi atu ma le alofa i lona ʻauaiga. Na aofia ai i lenei mea le tausia o manaʻoga faaleagaga o lana avā, o ona atalii e toʻatolu, ma avā a ona atalii.

I le pei o Noa, ua iloa e Kerisiano moni i aso nei ua lē o toe mamao se taimi ona aumai lea e Ieova o le iʻuga i lenei faiga o mea lē amioatua. E tatou te lē iloa lenā aso ma le itula, ae ua tatou iloa, o le faaaʻoaʻo atu i le faatuatua ma le usiusitai o lenei tagata o lē na ‘talaʻia le amiotonu’ o le a iʻu ‘i le ola ai o le agaga.’—Eperu 10:36-39.

[Pusa i le itulau 29]

Pe na Tupu Moni Lenā Mea?

Ua aoaoina e tagata suʻesuʻe tau i le soifuaga o tagata, le tusa ma le 270 tala faaanamua e faatatau i le lolo mai le toetoe lava o ituaiga uma ma atunuu. Fai mai le tagata poto o Claus Westermann: “O le tala i le lolo o loo maua i le lalolagi atoa. E pei foʻi o le tala i le foafoaga, o se vaega lea o le faavae o a tatou tū masani tuufaasolo mai. E matuā maofa ai lava: i so o se mea o le lalolagi, e tatou te maua i ai faamatalaga e uiga i se lolo tele i aso anamua.” O le ā le faamatalaga? Fai mai le tagata faitofā o Enrico Galbiati: “O le iai pea o le talitonuga maumaututū lea ua salalau atu i le toʻatele o tagata eseese e uiga i le iai o se lolo, o se faailoga lea o le mea moni i le talafaasolopito e faapea, sa iai moni lenā mea.” Ae peitaʻi, e sili atu ona tāua i Kerisiano na i lo o manatu o tagata popoto, le mea moni e faapea, sa fetalai Iesu lava ia e uiga i le Lolo e faapea o se mea moni na tupu i le talafaasolopito o le tagata.—Luka 17:26.

[Pusa i le itulau 30]

O Nefilimi i Tala Faafagogo?

O tala e faatatau i fesootaʻiga a atua ma tagata—ma “tagata malolosi” po o “tagata itulua” na fananau mai i nei fesootaʻiga—sa taatele i talitonuga faalotu a Eleni, Aikupito, Ugaritic, Hurrian, ma Mesopotamia. O Atua i tala faafagogo a Eleni, sa iai tino faaletagata ma sa sili ona aulelei. Sa latou aai, sa feinu, sa momoe, sa faia feusuaʻiga, sa tauaʻimisa, sa fetauaʻi, sa faia faiga taufaasesē, ma le faia faamalosi o feusuaʻiga faaleituaiga. E ui sa manatu iā i latou e tatau ona paia, ae sa mafai ona latou faia faiga taufaasesē ma le solitulafono. O tagata malolosi e pei o Achilles, na faapea mai e iai se tupuaga e tauatua ma faaletagata, ma sa tuuina atu iā i latou se tomai e sili atu na i lo le malosi o le tagata, ae e leʻi tuuina atu i ai se tomai e lē mafai ai ona oti. O lea, o le mea o fai mai ai le Kenese e uiga i Nefilimi, ua tatou malamalama ai i le ono iai po o le mafai ona iai o na tala faafagogo.