E Mafai Ona E ʻAlofia le Pē Faafuaseʻi o le Fatu Faaleagaga

O se tagata taalo e taʻutaʻua, e matuā maoaʻe lona tomai ma le silisili ona malosi o lona tino, na faafuaseʻi lava ona paʻū ma matapogia a o faagasolo toleniga ma maliu ai lava. O le tagata taalo lea, o Sergei Grinkov, o lē na faalua ona pine auro i le Olimepeka i le taaloga o le faasee i luga o le aisa, ae na faapuupuuina lana taumafai a o faatoʻā amata ona aʻe mai i lana taleni—i le na o le 28 o ona tausaga. Pagā se mala mataʻutia! O le ā le māfuaaga? Na pē faafuaseʻi le fatu. Na taʻua faapea, sa matuā leai se manatu o le a maliu o ia i lea taimi auā e leʻi iai lava ni faailoilo e iloa ai faapea sa aafia o ia i se maʻi fatu. Peitaʻi, na maua e le ʻausuʻesuʻe faapea, sa fefete lona fatu ma na matuā poloka ai alātoto e tau atu i le fatu.

E UI e ono foliga mai e tele ni fatu e pepē faafuaseʻi e aunoa ma ni faailoilo, ae ua taʻua e fomaʻi faapea e seāseā lava tupu lenā mea. O le mea moni lava, o faailoilo ma vala e māfua ai na e mafai ona iloa atu e pei o le tau puni o le mānava, le soona lapoʻa o le tino ma le tigā o le fatafata, ua masani lava ona lē amanaʻia. O le iʻuga, e tusa lava pe lē maliliu ai i le taimi lea e pepē faafuaseʻi ai o latou fatu, ae toʻatele ua oo ai lava ina matuā lē toe atoatoa lo latou malosi i taimi o totoe o o latou olaga.

E taufai ioe uma manatu o fomaʻi i aso nei e faapea, o le puipuiga mo le pē faafuaseʻi o le fatu e manaʻomia ai le faaauau pea ona mataala le tagata i ana taumafa ma le ituaiga o olaga o loo soifua ai, faapea le faia e lē aunoa o ni ana siaki faafomaʻi. * O na puipuiga, faatasi ai ma se lotomalie moni e faia ni suiga pe a talafeagai, o le a umi sona aogā i le faasaoina o se tasi mai aafiaga mataʻutia o le pē faafuaseʻi o le fatu.

Peitaʻi ane, e iai le isi vaega o o tatou fatu e lelei pe a matuā uaʻi atili atu i ai. Ua lapataʻia i tatou e le Tusi Paia: “Ia sili ona leoleoina o lou loto i le leoleoina o mea uma; auā e tupu mai ai le amio [“ola,” NW].” (Faataoto 4:23) O le mea moni, o loo faatatau tonu atu lava lenei mau i le fatu faafaatusa. E manaʻomia le mataala e leoleoina o tatou fatu faaletino, ae sili atu ai ona tāua le tumau pea ona mataala pe afai tatou te mananaʻo e puipuia o tatou loto po o fatu faafaatusa ina ia tetee atu i faamaʻi e mafai ona oo atu ai i le oti faaleagaga.

 Vala Eseese e Māfua ai le Pē Faafuaseʻi o le Fatu Faafaatusa

E pei lava o le maʻi fatu faaletino, o se tasi o auala e matuā mautinoa le taofia ai o le pē faafuaseʻi o le fatu pe a tautala i le itu faaleagaga, o le iloa lea o mea e māfua ai, ma uia loa laasaga e foʻia ai na mea. O lea, seʻi o tatou talanoaina nisi o vala autū e māfua ai le faafitauli o le fatu—le fatu moni faaletino ma le fatu faafaatusa po o le loto.

Taumafa. Ua taatele ona taliaina le manatu faapea, o meaʻai e leai se malosi o le tino e maua mai ai (junk food), e ui ina susua lo latou tofo, ae itiiti pe matuā leai lava se soifua mālōlōina e maua mai ai. E faapena i meaʻai na e leai se malosi faalemafaufau e maua mai ai, e ui ina faigofie ona maua ma faagaeeina ai faalogona, ae e faaleagaina ai le soifua mālōlōina faaleagaga o se tasi. Ua faaalialia mai ma le poto i auala o faasalalauga, ata ma faamatalaga o loo faamatilatila ai feusuaʻiga lē mamā ma fualaau faasāina, o faiga sauā ma faiga faataulāitu. O le fafagaina e se tasi o lona mafaufau i na meaʻai e matuā mataʻutia lava mo le fatu faafaatusa. Ua lapataʻi mai le Afioga a le Atua: “O mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e le mai le Tamā ia, a e mai le lalolagi. E mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:16, 17.

O meaʻai e aogā mo le soifua mālōlōina, e pei o fualaau ʻaina suamalie ma fualaau faisua, e tau lē tosina tele i ai le manaʻo o le tagata lea e matuā fiafia lava i meaʻai e leai se malosi e maua mai ai. I se tulaga tutusa, o meaʻai aogā ma ʻanoa faaleagaga atonu e tau lē tosina tele i ai se tagata ua fai ma ana masani le fafaga o lona mafaufau ma le loto i mea faalelalolagi. Atonu ua fai sina umi o loo susu pea o ia i le “suāsusu” o le Afioga a le Atua. (Eperu 5:13) E umi se taimi e lē tuputupu aʻe ai o ia i le matua faaleagaga lea e na te manaʻomia mo le tauaveina o ni tiute tauave faaleagaga i le faapotopotoga Kerisiano ma i le faiva. (Mataio 24:14; 28:19; Eperu 10:24, 25) Ua faatagaina e nisi o loo i lenā tulaga, le paʻū atu o lo latou malosi faaleagaga i se tulaga e oo ai ina avea o ni Molimau ua lē o toe talaʻi, po ua lē o toe gaoioi!

O le isi lamatiaga ona e mafai ona taufaasee le foliga atu i fafo. O le faapaʻole o le faatinoina o tiute faa-Kerisiano e ono punitia ai le faasolo ifo lava ina maʻi le loto po o le fatu faafaatusa, lea ua vaivai ona o le faanaunau atu faalilolilo i mafaufauga matapeʻapeʻa i meafaitino pe i faafiafiaga o loo faamatilatila mai ai amioga lē mamā, o faiga sauā, po o faiga faataulāitu. O na meaʻai lē lelei faaleagaga atonu e foliga mai e itiiti se aafiaga leaga i le itu faaleagaga o se tasi, ae mafai ona lē toe gaoioi ai le loto po o le fatu faafaatusa, e pei ona faapogaia e le lē lelei o taumafa tatau faaletino ona poloka ai alātoto ma faaleagaina ai le fatu moni faaletino. Na lapataʻi mai Iesu e faatatau i le faatagaina e se tasi o faanaunauga lē talafeagai e oo i lona loto. Na ia fetalai: “Ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:28) Ioe, o le lē lelei o taumafa faaleagaga e mafai ona taʻitaʻia atu ai i le pē faafuaseʻi o le fatu faaleagaga. Peitaʻi, e iai ma isi vala ia iloiloina.

 Faamalositino. Ua iloa lelei lava, o le ituaiga o olaga e na o le nofonofo e lē gaoioi le tino, e mafai ona faapogaia ai le pē faafuaseʻi o le fatu. I se tulaga tutusa, o se ituaiga o olaga e leai ni galuega faaleagaga o faia, e mafai ona matuiā ona āuga e oo i ai. Mo se faaaʻoaʻoga, atonu e fai e se tasi sona sao i le faiva faa-Kerisiano ae e faatapulaa mai lava i le mea e ono taʻua o le sone sololelei, e ala i le itiiti po o le matuā leai lava o ni ana taumafaiga e avea ai ‘o lē faigaluega e leai se mea e mā ai, na te talaʻitonuina le upu moni.’ (2 Timoteo 2:15, LF) Pe atonu foʻi e auai atu se tasi i nisi o sauniga faa-Kerisiano ae itiiti lava ni ana tapenapenaga e fai ma itiiti foʻi sona sao e faia i na sauniga. Atonu e lē o iai ni sini faaleagaga pe leai foʻi se naunau po o se maelega mo mea faaleagaga. O le leai o ni faamalositino faaleagaga e iʻu ina vaivai pe oo ai lava ina pē, se faatuatua atonu sa iai iā te ia. (Iakopo 2:26) Na mātauina e le aposetolo o Paulo lenei lamatiaga ina ua tusi atu i Kerisiano Eperu, o nisi o i latou e foliga na maileia i lenā ituaiga o olaga e leai ni galuega faaleagaga o faia. Seʻi mātau le auala na ia lapataʻi mai ai e faatatau i se aafiaga maaa pe lē lelei e ono faapogaia e lenei mea i lo latou itu faaleagaga. “Le au uso e, ia outou, neʻi ai i so outou le loto leaga ma le le faatuatua, tou te o ese ai i le Atua soifua. A ia outou fefaamafanafanai i lea aso ma lea aso, manū o taʻua o le aso nei, ina neʻi loto maaa so outou i le pepelo o le agasala.”—Eperu 3:12, 13, LF.

Mafatiaga. Peitaʻi, o le isi pogai sili o le pē faafuaseʻi o le fatu moni faaletino, o le tele o mafatiaga. E mafai foʻi faapena i mafatiaga po o ‘popolega o le olaga,’ ona faigofie le lamatia ai o le fatu faafaatusa, pe oo lava ina faapogaia ai le tagata o loo aafia, ina ia taofia mai lona auauna atoatoa atu i le Atua. Ua fetaui tonu ai le lapataʻiga a Iesu i lenei itu: “Ia outou, neʻi mafatia o outou loto i le soona ulavale, ma le onā, ma le popole i mea a le olaga nei, neʻi faafuasei mai lea aso ia te outou e pei o se mailei.” (Luka 21:34, 35, LF) E mafai foʻi e mafatiaga ona matuā āfaina ai lo tatou fatu faafaatusa pe afai o loo tatou logo tigā pea mo se taimi faaumiumi ona o se agasala lilo o loo tatou faia. Na malamalama le tupu o Tavita mai mea na oo totino i ai, i le tigā o na mafatiaga lē lelei, ina ua ia faapea mai: “E leai se filemu i oʻu ivi ona o aʻu agasala. Auā ua oo lava aʻu agasala i luga o loʻu ulu; e pei o se avega mamafa, ua mafatia ai lava aʻu.”—Salamo 38:3, 4.

Soona mautinoa naʻuā. O le toʻatele o tagata na aafia i le pē faafuaseʻi o le fatu, sa matuā mautinoa i le lelei o lo latou soifua mālōlōina, peitaʻi e leʻi leva lava ae taia loa i le pē faafuaseʻi o le  fatu. Sa masani ona lē ō i le fomaʻi e siaki i latou pe oo lava foʻi ina faifai tala i ai faapea, e matuā lē manaʻomia lava na mea. Ua faapena foʻi ona manatu nisi faapea, talu ai ua leva ona avea i latou ma Kerisiano, e leai la se mea e mafai ona toe tupu iā i latou. Atonu e latou te lafoaʻia le siakiina o i latou faaleagaga pe iloiloina e le tagata o ia lava, seʻia oo ina tupu faafuaseʻi se mea. E matuā tāua ona teu i mafaufau le fautuaga lelei e faatatau i le soona mautinoa naʻuā, e pei ona tuuina mai e le aposetolo o Paulo: “O lē manatu o loo o tu ia, ina faaeteete ia neʻi paū.” O se gaoioiga atamai pe a tatou amanaʻiaina lo tatou tulaga lē lelei atoatoa, ma ia faia se iloiloga faaleagaga o i tatou lava mai lea taimi i lea taimi.—1 Korinito 10:12; Faataoto 28:14.

Ia Aua Neʻi Manatu Māmā i Faailoilo Lapataʻi

O se māfuaaga lelei ua matuā faasilisilia ai e le Tusi Paia le tulaga o le loto po o le fatu faafaatusa. I le Ieremia 17:9, 10, e tatou te faitau ai e faapea: “E sili le faaʻoleʻole o le loto i mea uma, ma ua matuā leaga lava; po o ai na te mafaia ona iloa? O aʻu o Ieova o lē suesue i le loto, o lē tofotofo i manatu, ina ia tuuina atu i tagata taitasi e tusa ma ona ala, e tusa foi ma le fua o ana amioga.” Peitaʻi e ese mai le iloiloina o o tatou loto, ae ua faia foʻi e Ieova se sauniuniga alofa e fesoasoani ai iā i tatou ina ia faia e le tagata lava ia ana iloiloga manaʻomia.

Ua tatou maua faamanatuga talafeagai e ala mai i “le auauna faamaoni ma le mafaufau.” (Mataio 24:45) Mo se faaaʻoaʻoga, o se tasi o auala autū e mafai ona faasesēina ai i tatou e o tatou loto, o le faapogaia lea o i tatou ia matuā alu uma o tatou mafaufau i moomooga faivavale i mea faalelalolagi. O nei mea ua na o ni mafaufauga lē moni o loo faaata i o tatou mafaufau, o ni moomooga, o mea e leai ni aogā o loo faaaluvale ai fua le mafaufau. E mafai ona matuā mataʻutia na tulaga, aemaise pe a mapuna aʻe ai ni mafaufauga lē mamā. O lea la, e tatau ona tatou teena atoatoa na mea. Pe afai tatou te ʻinoʻino i le solitulafono e pei ona sa ʻinoʻino i ai Iesu, o le a leoleoina ai o tatou loto mai le alu uma o o tatou mafaufau i moomooga faivavale i mea faalelalolagi.—Eperu 1:8, 9.

E lē gata i lea, ua iā i tatou le fesoasoani a toeaina alolofa o le faapotopotoga Kerisiano. E ui ina matuā talisapaia le manatu mamafa mai o isi, ae o le tiute tauave i le tausiaina o o tatou loto po o fatu faafaatusa e paʻū tonu mai lava iā i tatou taʻitoʻatasi. E faalagolago mai lava iā i tatou taʻitoʻatasi ina ia “tofotofo [“faamautinoa,” NW] i mea uma lava” ma ia ‘tofotofo pe o tatou iai i le faatuatua.’—1 Tesalonia 5:21; 2 Korinito 13:5.

Ia Leoleoina le Loto

O le mataupu silisili a le Tusi Paia e faapea “o le mea e luluina e le tagata, o le mea lava lea e seleseleina mai ai e ia,” e faatatau atu foʻi i le soifua mālōlōina o o tatou loto po o fatu faafaatusa. (Kalatia 6:7) E masani lava, o mea e foliga mai o se mala faaleagaga e tupu faafuaseʻi, e toe iloa mulimuli ane, o le iʻuga o se uiga lilo ua leva lava ona iai, o le fiafia pea lea e faia mea e faaleagaina ai le itu faaleagaga e pei o le matamata i ata o amioga lē mamā, le soona naunau i meafaitino, po o le taumafai malosi i le fia taʻutaʻua po o le pule.

O lea la, ina ia puipuia le loto, e matuā manaʻomia ai ona mātaʻitūina lelei e se tasi ana taumafa tatau faaleagaga. Ia faafouina le mafaufau ma le loto e ala i le fafagaina i le Afioga a le Atua. Ia teena meaʻai e leai se malosi o le mafaufau e maua mai ai, lea e faigofie ona maua ma matuā faatosina i le tino, ae o meaʻai na e iʻu ai ina lē toe gaoioi le loto po o le fatu faafaatusa, lea na te iiteina ni mea e ono faaleagaina ai. Ua lapataʻi mai le faisalamo i se faatusatusaga fetaui—ma e moni foʻi i le tulaga faafomaʻi—e faapea: “Ua lololo o latou loto e pei o le gaʻo.”—Salamo 119:70.

Pe afai o iai ni mea sesē faalilolilo ua leva ona fai, ia taumafai malosi e liaʻi ese na mea a o leʻi poloka ai ou alātoto faafaatusa. Pe afai e amata  ona faatosina mai le lalolagi, ma foliga ua tele ni mea ua ofoina mai i faafiafiaga ma tafaoga, ia taumafai e mafaufau loloto i le fautuaga atamai a le aposetolo o Paulo. Na ia tusi mai e faapea: “O laʻu lenei e fai atu ai, le au uso e, ua itiiti ona aso ua totoe; o lenei, o e . . . fetagofi i mea a le lalolagi nei, ia peiseai ua le fetagofi i ai; auā o le a mavae atu le tu o le lalolagi nei.” (1 Korinito 7:29-31) Ma, afai ua amata ona faaosooso mai ʻoa faaletino, ia teuloto upu a Iopu: “Afai ua ou fai auro ma mea ou te faalagolago i ai, po ua ou fai atu i auro, O loʻu faatuatuaga oe; o le agasala lava lea e faasalaina e faamasino; auā o le tuua lea e aʻu o le Atua o i lugā.”—Iopu 31:24, 28; Salamo 62:10; 1 Timoteo 6:9, 10.

I le taʻua o le matuiā o le fai ma masani le lē amanaʻiaina o fautuaga a le Tusi Paia, ua fautua mai ai le Tusi Paia: “O le tagata ua aoaiina soo, a e faamaaa lona ua, e faafuasei ona nutimomoia o ia, a e leai se fofo.” (Faataoto 29:1) Ae i le isi itu, o le tausia lelei o o tatou loto po o fatu faafaatusa, e mafai ai ona tatou maua le fiafia ma le filemu o le mafaufau lea e maua mai le ola i se olaga faigofie, ma le maopoopo. O le olaga lava lenei e masani pea ona fautuaina mo le Faa-Kerisiano moni. Na faagaeeina le aposetolo o Paulo e tusi mai e faapea: “A o le amio Atua ma le loto mālie, o le oloa tele lava lea. Auā tatou te lei au mai lava se mea e tasi i le lalolagi, ua mautinoa foi tatou te le mafai ona ave ese ai o se mea. Afai ua maua e i tatou o mea e aai ai ma mea e oofu ai, ia gata ai o tatou manao.”—1 Timoteo 6:6-8.

Ioe, o le toleniina ma le faia o a tatou faamalositino i le auala o le tuutoina faale-Atua o le a mautinoa lo tatou mauaina ai o se loto po o se fatu faafaatusa e mālōlōina ma malosi. E ala i le faaeteete i a tatou taumafa tatau faaleagaga, o le a tatou lē faatagaina ai se avanoa mo gaoioiga ma mafaufauga leaga a lenei lalolagi, e faapogaia ai le āfaina pe faaleagaina o lo tatou tulaga faaleagaga. Aemaise ai, e ala i le taliaina o sauniuniga a Ieova e ala mai i lana faalapotopotoga, tau ina ia lē aunoa ona tatou siakiina o tatou loto po o fatu faafaatusa. O le faia ma le filigā o lenā mea, o le a umi sona aogā i le ʻalofiaina o ni iʻuga faanoanoa e oo i ai ona o le pē faafuaseʻi o se fatu faaleagaga.

[Faamatalaga pito i lalo]

[Faamatalaga faaopoopo i le itulau 10]

O LE LĒ LELEI O TAUMAFA FAALEAGAGA E MAFAI ONA LĒ TOE GAOIOI AI LE FATU FAAFAATUSA, E PEI ONA FAAPOGAIA E LE LĒ LELEI O TAUMAFA TATAU FAALETINO ONA POLOKA AI ALĀTOTO MA FAALEAGAINA AI LE FATU MONI FAALETINO

[Faamatalaga faaopoopo i le itulau 10]

O SE ITUAIGA O OLAGA E LEAI NI GALUEGA FAALEAGAGA O FAIA, E MAFAI ONA MATUIĀ ONA ĀUGA E OO I AI

[Faamatalaga faaopoopo i le itulau 11]

E FAIGOFIE LAVA I ‘POPOLEGA O LE OLAGA’ ONA MATUĀ LAMATIA AI LE FATU FAAFAATUSA

[Ata i le itulau 11]

O le faatalalē i lo tatou soifua mālōlōina faaleagaga e ono iʻu atu ai i tigā e tele

[Ata i le itulau 13]

O le atiina aʻe o masaniga lelei faaleagaga e leoleoina ai le loto po o le fatu faafaatusa

[Faamatalaga i Ata i le itulau 9]

AP Photo/David Longstreath