Lipoti a Ē Faalauiloa le Malo

“E Sesē Lau Numera na Vili”

I JOHANNESBURG, i Aferika i Saute, sa feauauaʻi ai Lisi ma Karoline i le telefoni, e molimau atu ai i tagata o loo nonofo i se vaipanoa mo tagata matutua ua litaea, lea e lē saʻoloto le oo atu i ai ona o puipuiga mo le saogalemu. E tau leai ni tagata na la mauaina i aiga, ma e itiiti sina naunau fiafia na faaalia i le la feʻau faa-Kerisiano, o lea na matuā faalaeiauina ai Karoline ina ua tali ane le leo o se fafine.

“O B—lea?” na fesili ai Karoline.

“Oi e leai,” o le fai ane lea a se leo faaleuō, “O aʻu o G—. E sesē lau numera na vili.”

I le mātauina e Karoline o le māfana mai o le leo o le fafine, na ia faapea atu ai: “Ia, seʻi faamatala atu pea le mea na ou manaʻo e taʻu iā B—.” Ona amata loa lea ona talanoa i faamanuiaga o le Malo o le Atua lea o loo fotuaʻi mai. Ina ua uma ona fai ni fuafuaga e momoli atu ai le polosiua O le ā e Manaomia e le Atua Mai ia i Tatou?, ona fesili mai lea o G—: “Seʻi oʻu fesili atu lava, o le ā lau lotu?”

“O maʻua o ni Molimau a Ieova,” o le tali lea a Karoline.

“Oi tafefe e, aua le taʻua maia lenā lotu! Ailoga la ou te fia feiloaʻi iā te oe.”

“Ae tagaʻi foʻi oe G—,” o le augani atu lea a Karoline, “i le 20 minute na faatoʻā mavae atu, sa ou faailoa ai iā te oe le faamoemoe sili ona ofoofogia, ma faailoa atu mai le Tusi Paia mea ua toe o se aga ona faia lea e le Malo o le Atua mo le fanau a tagata. Sa e fiafia e faalogologo i nei mea—na oo lava ina e matuā naunau i ai—ma e manaʻo e fia iloa atili. O le ā tonu lava se mea o e silafia e uiga i Molimau a Ieova? Pe afai e te gasegase, pe e te alu atu ea i se inisinia? Aiseā e te lē tuu mai ai se avanoa seʻi oʻu taʻu atu iā te oe mea e talitonu i ai Molimau a Ieova?”

Ina ua mavae sina taimi o sāō pea, ona tali mai lea: “Atonu e saʻo oe. E sili ai pe a e sau. Ae ia e mautinoa lelei, e lē taitai mafai ona e faaliliuina aʻu!”

“G—, e lē taitai mafai ona ou faaliliuina oe, e tusa lava po o le ā soʻu manaʻo i ai,” o le tali atu lea a Karoline. “E na o Ieova lava na te mafai ona fai lenā mea.”

Sa taulau manuia le asiasiga ina ia momoli le polosiua iā G— ma sa malie (Peti) e toe asi atu o ia. Ina ua toe foʻi atu i ai Karoline, na faapea ane Peti, na ia faamatala i isi tinā e latou te laulau faatasi i a latou taumafataga, ana talanoaga o loo fai ma Molimau a Ieova. Peitaʻi na latou matuā faaseā ma fesili ane ma le lē fiafia: “E mafai faapefea ona e faia o lenā mea? O tagata na e lē talitonu iā Iesu!”

Na vave ona faamanatu atu e Karoline iā Peti se manatu tāua mai le la talanoaga ua mavae e faatatau i le Malo o le Atua.

“O ai o le a avea ma Tupu?” o le fesili lea a Karoline.

“E leai lava se isi na o Iesu,” o le tali ane lea a Peti.

“Oi ioe,” na toe fai atu ai Karoline. Ona ia faamatala atu loa lea e faapea, e talitonu Molimau a Ieova, o Iesu o le Alo o le Atua, ae lē tutusa o ia i le Atua i le avea o le vaega o se Tasitolu.—Mareko 13:32; Luka 22:42; Ioane 14:28.

Ina ua mavae nisi asiasiga na toe faia, sa manino mai ai e ui i ona uiga mautinoa ma le fiafia, ae sa mafatia Peti ona o le faalētonu o lona soifua mālōlōina. Na aafia o ia i le kanesa, ma sa fefe i le oti. Na ia taʻutino ane: “Maʻimau pe ana ou faalogo i nei mea i la tausaga ua mavae ma ou talitonu ai i la outou talitonuga.” Sa faamāfanafana atu Karoline iā te ia e ala i le faaali i ai o mau o loo faamatalaina ai le oti e pei o se moegase, lea e mafai ona toe ala aʻe ai se tasi i le toetū. (Ioane 11:11, 25) Sa matuā tāua iā Peti lenei manatu, ma i le taimi nei ua fiafia o ia e faia e lē aunoa sana suʻesuʻega faale-Tusi Paia. Na pau lava le mea e taofia ai lona auai atu i sauniga i le Maota o le Malo, ona ua faasolo lava ina leaga lona soifua mālōlōina.

Ua faapea mai Karoline: “Ua matuā manino mai iā te aʻu o loo taʻitaʻia e le ʻauagelu lenei galuega. Na vili ‘sesē le numera’ lea na tau atu ai iā Peti, ae seʻi mātau foʻi, ua 89 tausaga o lona soifuaga!”—Faaaliga 14:6.