Fesili Mai le ʻAufaitau

Po o le faatonuga a le Atua lea e faamauina i le Ieremia 7:16 e uiga faapea e lē tatau ona faatoga pe tatalo Kerisiano mo se tasi ua faateʻaina mai le faapotopotoga Kerisiano, talu ai o ia o se tagata agasala ae lē salamō?

Ina ua uma ona faailoa mai lana sala tau faamasinoga i le nuu lē faamaoni o Iuta, ona fetalai mai lea o Ieova iā Ieremia: “O oe na foi, aua e te faatoga mai mo lenei nuu, aua foi e te faia se auega, po o se faatoga mo i latou, aua e te fautua mai ia te au; auā ou te le faalogo lava ia te oe.”—Ieremia 7:16.

Aiseā na fetalai atu ai Ieova iā Ieremia ina ia aua neʻi faatoga pe tatalo mo le fanauga a Isaraelu? E manino lava, talu ai sa latou solia ma le loto i ai lana Tulafono. I le leai o se matataʻu ma se mamā, na latou ‘gaoi, ma fasioti tagata, ma mulilua, ma tauto pepelo, ma faamu mea manogi ia Paala, ma mulimuli atu i atua ese.’ O le iʻuga, na fetalai mai Ieova i tagata Iutaia lē faamaoni: “Ou te lafoai foi ia te outou i oʻu luma, e pei ona ou lafoaiina o outou uso uma, o le fanauga uma a Efaraima.” E mautinoa lava, o le a lē fetaui mo Ieremia, po o se isi lava tagata, ona tatalo atu iā Ieova ina ia toe suia Lana faamasinoga.—Ieremia 7:9, 15.

I le ōgatusa ma lenei manatu, na tusi mai ai le aposetolo o Ioane e faatatau i tatalo e talafeagai ona faatoga atu ai i le Atua. Muamua, na ia faamautinoa mai i Kerisiano: “Pe afai tatou te ole atu ai se mea e tusa ma lona finagalo, e faafofoga mai o ia ia te i tatou.” (1 Ioane 5:14) Ae tusa ai o le tatalo mo isi, na faapea mai atili Ioane: “Afai ua iloa e se tasi lona uso ua na fai se agasala e le iu i le oti, ia faatoga o ia mo ia, ona foaiina mai lea o le ola ia te ia mo e agasala e le iu i le oti. O i ai le agasala e iu i le oti; ou te le fai atu ia outou faatoga atu mo lea agasala.” (1 Ioane 5:16) Sa taʻua foʻi e Iesu le agasala “e le faamagaloina,” o lona uiga, o le agasala lea i le agaga paia.—Mataio 12:31, 32.

 Po o lona uiga ea la, o tagata uma lava ua faateʻaina mai le faapotopotoga Kerisiano ona o le faia o agasala ma le lē salamō, ua latou faia ni agasala “e iu i le oti” ma ua lē tatau ai ona faatoga mo na tagata? E lē talafeagai lenā mea, auā i nisi tulaga, o na agasala e lē o ni agasala e iʻu i le oti. O le mea moni, e faigatā ona iloa pe faamata o na agasala e iʻu i le oti. O se faaaʻoaʻoga fetaui lava, o Manase le tupu o le nuu o Iuta. Sa ia faia fata faitaulaga i atua sesē, na ofoina atu ona lava atalii e osi ai taulaga, sa ia faia mea faataulāitu, ma tuu se tupua ua tā i le malumalu o Ieova. O le mea moni, ua faapea mai le Tusi Paia, na faia e Manase ma tagata “le amio leaga e sili i le amio na faia e nuu na faaumatia e Ieova i luma o le fanauga a Isaraelu.” Ona o nei mea uma, na faasalaina ai Manase e Ieova, e ala i le noanoa iā te ia i faamau, ma ave faatagataotauaina i Papelonia.—2 Tupu 21:1-9; 2 Nofoaiga a Tupu 33:1-11.

Pe iʻu ea i le oti agasala ia sa faia e Manase, auā o ni agasala na matuā matuiā? E foliga mai e leai, auā o loo faapea mai atili le tala e uiga iā te ia: “Sa puapuagatia o ia, ona matuā faatoga atu ai lea o ia ia Ieova lona Atua, ma ua matuā faamaulalo o ia i luma o le Atua o ona tamā, na ia tatalo foi ia te ia; ona faafofoga mai ai lea o ia ia te ia, ma na talia lana aioi, ma ua faafoi mai ia te ia i Ierusalema i lona malo. Ona iloa ai lea e Manase, o Ieova o le Atua lava ia.”—2 Nofoaiga a Tupu 33:12, 13.

O lea la, e lē tatau ona tatou vavevave e fai se faaiʻuga faapea, ona o lea ua faateʻaina le tagata mai le faapotopotoga, o lona uiga ua ia faia se agasala e iʻu ai i le oti. Atonu e alu se taimi ona faatoʻā aliali mai lea o le tulaga moni o le loto o se tasi. O le mea moni, e masani ona taʻua faapea, o se tasi o fuafuaga mo le faateʻaina, ina ia toe atamai ai le tagata ua agasala ma e faamoemoe o le a salamō ma toe foʻi mai.

Talu ai ua lē o toe avea le tagata ma sui o le faapotopotoga, atonu la o ni suiga i lona loto ma lana amio e muamua lava iloa e tagata o loo sili ona vavalalata iā te ia, e pei o se paaga faaipoipo po o tagata foʻi o le aiga. O i latou e mātauina na suiga e latou te ono faia se faaiʻuga e faapea, sa leʻi faia e le tagata faimea sesē se agasala e iʻu ai i le oti. E ono uunaʻia i latou e faatoga pe tatalo ina ia mafai e lenā tagata ona toe maua le malosi mai le Afioga faagaeeina a le Atua, ma liuliualo mai Ieova i le tagata agasala e tusa ai ma Lona lava finagalo.—Salamo 44:21; Failauga 12:14.

E ui atonu e iai nisi o loo matuā lava faamaoniga e latou te talitonu ai ua salamō le tagata na agasala, ae atonu e lē o le vaaiga lea a le faapotopotoga lautele. O le a latou lē mautonu, o le a lē lelei o latou faalogona, pe oo lava foʻi ina faatausuai pe a latou faalogo atu ua tatalo i luma o le lautele se tasi e faatatau i se tagata o loo faateʻaina. Ona o lenā māfuaaga, e ao ai iā i latou ua lagona le tatau ona tatalo mo le tagata agasala, ona latou faia faapea i a latou lava tatalo totino, ae tuu pea nisi tulaga auiluma atili o le mataupu i le faautautaga a toeaina o le faapotopotoga, o i latou ua iai le tomai.

[Ata i le itulau 31]

Na faamagaloina agasala matuiā a Manase ina ua ia faamaulalo i luma o Ieova

[Faamatalaga i Ata i le itulau 30]

Na toe kopiina mai le Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s