Le Tulafono Faaauro—O Loo Aogā Pea

A o toʻatele pea tagata e manatu i le Tulafono Faaauro o se aʻoaʻoga tau amio na folafolaina mai e Iesu, ae na ia taʻua e faapea: “O laʻu aʻoaʻoga e le o saʻu lava, a o lana na auina mai aʻu.”—Ioane 7:16.

IOE, o Lē na Amata mai ai mea ia na aʻoaʻoina atu e Iesu, e aofia ai ma aʻoaʻoga ia ua iloa o le Tulafono Faaauro, o ia lea na auina mai Iesu, o lona uiga la, o Lē na Foafoaina Mea, o Ieova le Atua.

Na uluaʻi fuafuaina e le Atua faapea ia faia uma e tagata i isi e pei ona latou mananaʻo e faia ai i latou. Na ia faataatia se faataʻitaʻiga e sili ona lelei i le faaalia o le manatu mamafa mo le lelei o isi i le auala na ia foafoaina ai le tagata: “Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine.” (Kenese 1:27) O lona uiga o lenei mea e faapea na tuuina ma le alofa e le Atua i tagata sina vaega o ona lava uiga iloga ina ia mafai ai ona latou olioli i se olaga e filemu, fiafia, ma autasi —e mafai ona iai e faavavau. A lelei ona toleniina o latou lotofuatiaifo mai le Atua, o le a taʻitaʻiina ai i latou e faia isi i le auala e latou te mananaʻo e faia ai foʻi i latou.

Ua Mālō le Manatu Faapito

Ona sa iai se amataga manaia i le tagata, o le ā la na tupu? I se faamatalaga tuusaʻo, na oo ina amata ona faaalia mai e tagata le manatu faapito. O le toʻatele o tagata ua masani i le faamatalaga a le Tusi Paia i le mea na faia e le uluaʻi ulugalii, e pei ona faamauina i le mataupu e 3 o le Kenese. Ona o uunaʻiga a Satani, o sē e tetee i faatulagaga uma amiotonu a le Atua, na teena ai ma le manatu faapito e Atamu ma Eva le pule a le Atua ae ua sili iā i laʻua le tutoʻatasi ma le faia o filifiliga totino. O a la gaoioiga manatu faapito ma le fouvale, na lē gata ina telē se aafiaga na oo ai iā i laʻua ae faapena foʻi ma āuga malaia o le a iai mo a la fanau uma i le lumanaʻi. O se faataʻitaʻiga manino lenā o āuga mataʻutia o le lē utagiaina o le aʻoaʻoga lea ua lauiloa o le Tulafono Faaauro. O lea la, “faapei ona oo mai o le agasala i le lalolagi i le tagata e toatasi, o le oti foi ona o le agasala, ona oo mai ai lea o le oti i tagata uma lava, auā ua agasala uma lava.”—Roma 5:12.

E ui i se tulaga tele o le toʻatele o tagata ua liliu ese mai ala alofa o Ieova le Atua, ae e na te leʻi tuulafoaʻia ai i latou. Mo se faataʻitaʻiga, na tuuina atu e Ieova i le nuu o Isaraelu lana Tulafono e taʻitaʻia ai i latou. Na aʻoaʻoina ai i latou e faia isi e pei foʻi ona latou mananaʻo e faia mai iā i latou. Na tuuina atu e le Tulafono ia taʻiala i le auala e fai ai pologa, o ē e mātua oti, ma fafine ua oti a latou tane. Ua faatulaga mai ai le auala e taulimaina ai le tagata e faaoolima, le aveina faamalosi o se tasi, ma le gaoi. O tulafono e faatatau i le tumamā na faaalia ai le manatu mamafa mo le soifua mālōlōina o isi. Sa iai foʻi tulafono e faatatau i mataupu tau i faiga faaleituaiga. Na taaofaʻia e Ieova lana Tulafono e ala i le taʻu atu i tagata: “E te alofa atu i lē lua te tuaoi ia pei o oe lava ia te oe,” o se faamatalaga na siiina mulimuli ane e Iesu. (Levitiko 19:18; Mataio 22:39, 40) Sa iai  foʻi i le Tulafono le auala e feagai ai ma tagata ese o loo iai i tagata Isaraelu. Ua poloaʻia e le Tulafono e faapea: “Aua foi e te faasaua i se tagata ese, auā ua outou iloa lava le loto o le tagata ese, auā sa fai outou ma tagata ese i le nuu o Aikupito.” I nisi faaupuga, na tatau ona faaalia e tagata Isaraelu lagona alofa i tagata e lē taualoa.—Esoto 23:9; Levitiko 19:34; Teuteronome 10:19.

O le umi lava na mulimuli atu ai ma le faamaoni tagata Isaraelu i le Tulafono, na iai foʻi ma le faamanuia a Ieova i le nuu. I lalo o pulega a Tavita ma Solomona, na manuia le nuu ma sa fiafia ma faamalieina tagata. O se faamaumauga faatalafaasolopito ua taʻu mai ai iā i tatou e faapea: “Ua toatele Iuta ma Isaraelu, e pei o le oneone i le matafaga ona toatele, o loo aai, ma feinu, ma olioli. Sa nonofo ma le filemu o Iuta ma Isaraelu; e taitasi ma nofo i lalo o lona vine, ma lalo o lona mati.”—1 Tupu 4:20, 25.

Ae faanoanoa ona, sa leʻi umi ona filemu ma saogalemu le nuu. E ui lava ina iai Tulafono a le Atua, ae na leʻi tausia e tagata Isaraelu; na latou faatagaina le manatu faapito e taofia ai lo latou manatu mamafa mo isi. O lenā mea, faatasi ai ma le aposetasi, na oo ai ni tulaga faigatā iā i latou taʻitoʻatasi faapea foʻi i le avea ai o se nuu. Mulimuli ane, i le tausaga e 607 T.L.M., na faatagaina ai e Ieova tagata Papelonia e faaumatia le malo o Iuta, le aai o Ierusalema, e oo lava i lona malumalu matagofie na iai i inā. Mo le ā le māfuaaga? “Ua outou le faalogo mai i aʻu upu, o loo fetalai mai ai Ieova, faauta, o le mea lea ou te avatu ai le feau, ma aami atu i aiga uma o i le itu i matu, ma Nepukanesa le tupu o Papelonia laʻu auauna, ou te aumaia foi i latou e tau ma lenei nuu, ma e o nonofo ai, ma ia nuu uma ua vagavagai, e faaumatia lava i latou, ma faia i latou ma mea faatafunaina, ma mea e uisa ai, ma mea gaogao e faavavau.” (Ieremia 25:8, 9) Pagā se tau inā faigatā mo le lafoaʻia o le tapuaʻiga mamā iā Ieova!

Se Faataʻitaʻiga e Faataʻitaʻi i Ai

O Iesu Keriso, i le isi itu, e lē gata na ia aʻoaʻoina le Tulafono Faaauro ae na ia faataatia foʻi se faataʻitaʻiga e sili ona lelei e mulimuli ai. Na ia manatu mamafa moni mo le lelei o isi. (Mataio 9:36; 14:14; Luka 5:12, 13) I se tasi taimi, e latalata i le aai o Naina, na silasila atu ai Iesu i se fafine ua oti lana tane o loo matuā lotomafatia i se solo o le maliu o lana tama tane e toʻatasi. Ua faapea mai le faamatalaga a le Tusi Paia: “Ua silasila atu le Alii ia te ia, ona mutimuti alofa lea o ia ia te ia.” (Luka 7:11-15) O le faaupuga “mutimuti alofa,” e tusa ai ma le Vine’s Expository Dictionary of Old and New Testament Words, o loo faaalia ai “faalogona o le matuā ootia.” Na lagonaina e Iesu le mafatia o faalogona o le fafine, ma sa uunaʻia ai o ia e faia ni gaoioiga lelei e aveesea ai le mafatia o le fafine. Maʻeu se olioli na avatua ai i lenā fafine ua oti lana tane ina ua toe faatūina e Iesu le tama ma ‘tuuina atu o ia i lona tinā’!

Mulimuli ane, ina ia ōgatusa ma le fuafuaga a le Atua, na finagalo malie Iesu e puapuagatia ma tuuina atu lona ola e fai ma togiola ina ia mafai ai ona saʻoloto tagata mai le pologa o le agasala ma le oti. O le faataʻitaʻiga maoaʻe lenei o le ola i le Tulafono Faaauro.—Mataio 20:28; Ioane 15:13; Eperu 4:15.

Tagata o Loo Faatatauina le Tulafono Faaauro

Po o iai ea ni tagata i o tatou aso o loo ola moni lava i le Tulafono Faaauro? Ioe, ma e lē seʻiloga e fetaui ona faatoʻā o latou faia ai lea faapea. Mo se faataʻitaʻiga, a o faagasolo le Taua Lona Lua a le Lalolagi i le vaitaimi o le pulega a le ʻau Nasi i Siamani, na tausia ai pea e Molimau a Ieova lo latou faatuatua i le Atua ma le alofa i tuaoi ma teena le faagutugutulua i le Tulafono Faaauro. A o faamalosia e le Malo le ita ma le faailoga tagata agaʻi i tagata Siū uma, na faaauau ai pea ona mulimuli atu Molimau a Ieova i le Tulafono Faaauro. E oo lava i nofoaga o faasalaga, sa faaauau ona latou tausia o latou uso a tagata, tufa atu a latou meaʻai mā tagata Siū faapea ma ē e lē o ni Siū o loo galala i le fia aai, e ui lava ina utiuti. E lē gata i lea, e ui ina faatonuina e le Malo e auai i faiga taua ina ia fasiotia isi, na latou mumusu e faia faapea, e pei lava ona latou lē mananaʻo e fasiotia e isi i latou. E faapefea ona latou fasiotia i latou e tatau ona latou alolofa i ai e pei lava o i latou? Ona o lo latou mumusu, o le toʻatele o i latou na auina atu e lē gata i nofoaga o faasalaga ae i le faasalaina foʻi i le oti.—Mataio 5:43-48.

 A o e faitauina lenei mataupu, ua e mauaina ai aogā mai le isi faataʻitaʻiga o le Tulafono Faaauro o loo faagaoioia nei. Ua iloaina e Molimau a Ieova e faapea i aso nei o loo toʻatele tagata o loo mafatia ma le leai o se faamoemoe ma ua lē mafesoasoania. Ona o lenei tulaga, ua malilie Molimau e faia ni gaoioiga lelei e fesoasoani ai i isi e aʻoaʻoina e faatatau i le faamoemoe ma taʻiala aogā o loo maua i le Tusi Paia. O vaega uma ia o le galuega tauaʻoaʻoga i le lalolagi aoao o loo faia nei i se tulaga e leʻi faapea ona iai muamua. O le ā le iʻuga? E pei ona valoia i le Isaia 2:2-4, o “nuu e tele,” o le mea moni e silia ma le ono miliona tagata taʻitoʻatasi i le lalolagi aoao, ua ‘aʻoaʻoina ala o Ieova, ma savavali ai i ona ala.’ I se tulaga faafaatusa, ua latou aʻoaʻoina e ‘tuʻi a latou pelu e fai ma uamea o suotosina, o latou tao foi e fai ma polo e teu aʻi vine.’ Ua latou mauaina le filemu ma le saogalemu i nei aso faigatā.

Ae Faapefea Oe?

Seʻi manatunatu mo se taimi i tigā ma puapuaga ia ua aumaia i tagata ona o le lē amanaʻiaina o le Tulafono Faaauro talu mai le fouvalega i Etena, lea na uunaʻia e Satani le Tiapolo. Ua fuafuaina e Ieova e toe vave suia le tulaga. E faapefea? “O le mea lava lea na faaalia mai ai le Alo o le Atua, ina ia faaumatia e ia galuega a le tiapolo.” (1 Ioane 3:8) O le a tupu lenei mea i lalo o le pulega o le Malo o le Atua, i aao atamai ma le tomai o Iesu Keriso, o lē na aʻoaʻo ma soifua ai i le Tulafono Faaauro.—Salamo 37:9-11; Tanielu 2:44.

Na mātauina e le tupu o Tavita o Isaraelu anamua e faapea: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaiisi i latou. Ua amio alofa ia i aso uma lava; ua avatu e ia ana mea i e nono mai; ua manuia foi ana fanau.” (Salamo 37:25, 26) Pe e te lē ioe ea faapea o le toʻatele o tagata i aso nei ua na ona latou ave ma faoa mea na i lo le ʻalofa ma avatu a latou mea i e nono mai’? E manino lava, o le mulimuli atu i le Tulafono Faaauro e mafai ona taʻitaʻiina atu ai i le filemu moni ma le saogalemu ona o le a mauaina ai e se tasi le olioli i le taimi nei ma le lumanaʻi i lalo o le Malo o le Atua. O le a aveesea uma e le Malo o le Atua le manatu faapito ma le amioleaga i le lalolagi ma toe suia le faiga o mea o loo iai nei o pulega leaga a tagata i se faiga fou o le a faia e le Atua. I lenā taimi, o le a olioli ai tagata uma e ola i le Tulafono Faaauro.—Salamo 29:11; 2 Peteru 3:13.

[Ata i le itulau 5]

Sa lē gata ina aʻoaʻoina e Iesu le Tulafono Faaauro ae na ia faataatia foʻi se faataʻitaʻiga e sili ona lelei i le faatinoina o lenā tulafono

[Ata i le itulau 7]

O le mulimuli atu i le Tulafono Faaauro e mafai ona taʻitaʻiina atu ai i le filemu moni ma le saogalemu