Le Tulafono Faaauro o se Aʻoaʻoga ua Lauiloa

“O mea uma foi tou te loto i ai ia faia e tagata ia te outou, ia faapea lava ona outou faia ia te i latou.”—Mataio 7:12.

O UPU na sa fetalai ai Iesu Keriso i le toeitiiti lava lua afe tausaga ua tuanaʻi i lana Lauga taʻutaʻua i luga o le Mauga. I senituri talu mai lenā taimi, e tele mea ua talanoaina ma tusitusia e faatatau i le na faamatalaga faigofie. Mo se faataʻitaʻiga, na matuā viiviia faapea o “le aano moni lea o le Tusi Paia,” “o se aotelega o le tiute o se Kerisiano mo ona tuaoi,” ma “o se mataupu silisili faavae tau i amioga tatau.” Ona o lona lauiloa ua oo ina faasino atu i ai faapea o le Tulafono Faaauro.

Peitaʻi, e lē na o tagata Kerisiano o loo iloaina le manatu e faatatau i le Tulafono Faaauro. O filosofia a lotu Iutaia, lotu Puta, ma Eleni, o loo faamatalaina auʻiliʻili ai faamaoniga o amioga tatau i le tele o auala. Ua lauiloa, aemaise lava i tagata i atunuu i Sasaʻe Mamao, ia se faamatalaga na faia e Confucius, o lē e aloaʻia i atunuu i Sasaʻe e avea o se aʻoaʻo e silisili ona atamai ma o se faiaʻoga sili. I le Analects, o le tusi lona tolu a Confucius i ana Four Books, ua tatou mauaina ai le manatu o loo taʻua faatolu i inā. I le taliina o fesili a ana tagata aʻoga e faalua ona taʻua ai e Confucious e faapea: “O le mea e te lē manaʻo e faia mai iā te oe, aua neʻi faia i isi.” I se tasi taimi, ina ua gugutu mai lana tagata aʻoga o Zigong “O le mea ou te lē manaʻo e faia mai e isi iā te aʻu, ou te lē manaʻo foʻi e faia iā i latou,” na tali malamalama ane i ai le faiaʻoga faapenei, “Ioe, ae peitaʻi e te lē o faia lenei mea.”

O le faitauina o nei upu, e iloaina ai e se tasi e faapea o faamatalaga a Confucius, e foliga e ese lona faaupuina o le mea lea na fetalai i ai Iesu mulimuli ane ai. O le eseesega manino, o le Tulafono Faaauro na taʻua e Iesu e manaʻomia ai ni gaoioiga lelei e faia mo isi. Seʻi faapea la o lea ua gaoioi tagata e tusa ma faamatalaga manino a Iesu, i le tausia ma le faia o gaoioiga e fesoasoani ai i isi, ma ola e tusa ai ma lenei faatulagaga i aso uma. Pe e te manatu ea o le a avea ai le lalolagi i aso nei ma nofoaga e sili atu? E mautinoa lava o le tulaga lenā.

Pe na taʻua le tulafono i se auala e uunaʻia ai galuega lelei, pe e leai foʻi, po o se isi lava ituaiga o auala, ae o le mea e sili ona mataʻina, o tagata na soifua i vaitaimi ma nofoaga eseese ma talaaga eseese ua latou maufaatuatuaina fautuaga a le Tulafono Faaauro. Ua faaalia ai faapea o upu na fetalai i ai Iesu i lana Lauga i luga o le Mauga o se aʻoaʻoga mo tagata uma, lea na aafia ai olaga o tagata i so o se mea ma so o se vaitaimi o le talafaasolopito.

 Fesili ifo oe iā te oe: ‘Pe ou te manaʻo e faia aʻu i se auala faaaloalo, lē faaituʻau, ma le faamaoni? Pe ou te manaʻo e ola i se lalolagi e aunoa ma le faailogalanu, solitulafono, ma taua? Pe ou te manaʻo e iai i se aiga lea e faaalia ai e le ʻauaiga uma le manatu mamafa mo faalogona ma le lelei o isi?’ O le mea moni, o ai o le a na teena na tulaga? O le mea mautinoa lava ia, e lē toʻatele nisi o loo olioli i nei tulaga. Mo le toʻatele o tagata, e latou te lē o faamoemoe i se na tulaga.

Ua Faaleagaina le Tulafono Faaauro

I le faagasologa o le talafaasolopito, na iai soligatulafono faasaga i tagata ia na matuā lē amanaʻiaina ai lava aiā tatau o tagata. Na aofia ai i nei soligatulafono le faatauina o pologa mai Aferika, o nofoaga o faasalaga oti a le ʻau Nasi, le faamalosia ona faafaigaluegaina o tamaiti, ma faatamaʻiaga faasaunoa e nisi ituaiga o isi ituaiga i le tele o nofoaga. E mafai ona faaauau pea le lisi umī o nei tulaga mataʻutia.

I aso nei, ua iai i tagata ia metotia lavelave ma mea faigaluega faaonapōnei, ma o ia mea o loo iai le manatu faapito. E toʻaitiiti lava tagata e manatu mo isi pe a oo ina faalētonu mea mo lo latou lava lelei pe faapea o loo aafia ai lo latou aiā tatau. (2 Timoteo 3:1-5) Aiseā ua toʻatele ai tagata ua oo ina manatu faapito, sauā, agaleaga, ma manatu ifo tau o ia lava? Pe lē ona e ui lava ina lauiloa pea le Tulafono Faaauro, ae ua lē faaaogāina ona e faapea ua lē o toe aogā? E faanoanoa ona o le tulaga lenā o loo iai e oo lava i le toʻatele o loo faapea mai e talitonu i le Atua. Ma pe a fua atu i le auala o loo iai faanaunauga o tagata, o le a oo ina sili atu ona manatu ifo le tagata tau o ia lava.

O lea, o fesili tāua e ao ona mafaufau i ai e faapea: O le ā o loo aofia ai i le ola i le Tulafono Faaauro? Po o ola ai ea se tasi? Ma po o le a iai ea se taimi o le a ola uma ai tagata e ōgatusa ma le Tulafono Faaauro? Mo ni tali e saʻo lelei mo nei fesili, faamolemole faitau le mataupu o loo sosoo ai.

[Ata i le itulau 3]

Na aʻoaʻoina e Confucius ma isi ia tulaga e ese o le Tulafono Faaauro