“O Lou Malamalama Matou te Iloa ai le Malamalama”

E MASANI lava ona tatou manatu māmā i le malamalama seʻiloga lava ua pē le eletise lea e maua mai ai le malamalama, ma ua matuā pouliuli atoa ai o tatou tuaoi. E fiafia lava, ona o lo tatou “faleeletise”—le lā—e matuā maufaatuatuaina. Ma ana leai le malamalama mai le lā, semanū e lē mafai ona tatou vāai, taumafa, mānava ma ola.

Talu ai le manaʻomia tele o le malamalama mo le ola, e lē tatau ai la ona faateʻia i tatou i le faitau atu i le Kenese e faapea, o le uluaʻi aso lava o le foafoaga na aliali mai ai le malamalama. “Ua fetalai mai le Atua, Ia malamalama; ona malamalama ai lea.” (Kenese 1:3) O tagata o ē matataʻu i le Atua e pei o le tupu o Tavita sa latou iloa lava i taimi uma, o Ieova le puna o le ola ma le malamalama. Na tusia Tavita e faapea: “O loo ia te oe le puna o le ola; o lou malamalama matou te iloa ai le malamalama.”—Salamo 36:9.

E iai le faatatauga moni ma le faatatauga faafaatusa o upu a Tavita. Ua taʻu mai e le Encyclopædia Britannica: “E mautinoa lava le telē o le sao a le malamalama mo le faagaoioia o le silasila.” Ona toe faapea mai lea: “E sili atu ona tele faamatalaga e oo i le faiʻai o le tagata e ala atu i mata, na i lo le ala atu i se isi lava itutino lea e faapogaia ai faalogona.” Talu ai e faalagolago le tele o mea tatou te aʻoaʻoina i le meaalofa o le vaai—lea e manaʻomia ai le malamalama ina ia lelei ona faagaoioia—ua faapena ai foʻi ona faaaogāina le malamalama i se auala faafaatusa i le Tusi Paia.

O lea, na fetalai atu ai Iesu i ona soo: “O aʻu nei o le malamalama o le lalolagi; o lē mulimuli mai ia te au, e le savali o ia i le pouliuli, a e ia te ia le malamalama o le ola.” (Ioane 8:12) O le malamalama faafaatusa lea na faasino i ai Iesu, o le feʻau o le upu moni sa ia talaʻia, lea e mafai ona faamalamalamaina ai mafaufau ma loto o lana ʻaufaalogologo. Ina ua mavae ni tausaga i le pouliuli faaleagaga, na iʻu ina malamalama soo o Iesu i le fuafuaga a le Atua mo le fanau a tagata ma le faamoemoe o le Malo. Sa avea moni lenā mea o se “malamalama o le ola,” talu ai sa mafai e lenā poto ona taʻitaʻia atu i le ola e faavavau. Na taʻua i le tatalo a Iesu i lona Tamā faalelagi: “O le uiga lenei o le ola e faavavau, ia latou mauaina pea le poto e uiga iā te oe, le Atua moni e toʻatasi, ma lē ua e auina mai, o Iesu Keriso lea.” (Ioane 17:3, NW) Seʻi aua lava neʻi o tatou manatu māmā i lenei malamalama faaleagaga!