Fesili Mai le ʻAufaitau

E mafai faapefea e se avā Kerisiano ona faapaleni lona faamaoni i le Atua ma le gauaʻi atu i lana tane lē talitonu pe afai e auai lana tane i gaoioiga o aso mālōlō faalotu?

O lona faia faapea e manaʻomia ai le atamai ma le fetuutuunaʻi. Ae o loo ia faia le mea saʻo i le taumafai e faapaleni ana matafaioi e lua. Na tuuina mai e Iesu se fautuaga e faatatau i se tulaga talitutusa faapena: “O lenei, o mea a Kaisara, ia outou avatu ia Kaisara; a o mea a le Atua ia avatu ia i le Atua.” (Mataio 22:21) E moni, sa ia feagai ma tiute tauave agaʻi i malo, lea na taʻu atu i Kerisiano mulimuli ane ina ia usiusitai atu i ai. (Roma 13:1) E ui i lea, o lana fautuaga e mafai foʻi ona faatatauina i le faapaleniina e le avā o ona tiute tauave i le Atua ma lona usiusitai i lana tane e tusa ai ma le Tusi Paia, e tusa lava po o se tane lē talitonu.

E leai se tasi e masani lelei i le Tusi Paia e faafitia faapea o loo faamamafa mai ai le tiute tauave muamua o se Kerisiano o le usiusitai atu i le Atua Silisili ese, ma ia faamaoni atu iā te ia i taimi uma. (Galuega 5:29) Peitaʻi, i le tele o tulaga, o se tagata tapuaʻi moni e mafai lava ona fetuutuunaʻi i mea o loo talosagaina po o mea o loo matuā manaʻo mai i ai sē e lē talitonu o loo iai le pule ae lē auai i le solia o tulafono maualuluga a le Atua.

Ua tatou mauaina se faataʻitaʻiga aogā mai i tagata Eperu e toʻatolu, e pei ona faamatalaina i le mataupu e 3 o le Tanielu. Na faatonuina e le tagata e sili ona maualuga o le malo, o Nepukanesa, e latou te ō atu ma isi i le fanua laugatasi o Turu. I le iloaina faapea o loo faatulaga ai faiga tapuaʻiga sesē, sa ono mananaʻo la tagata Eperu e toʻatolu e ʻalofia lo latou iai i inā. Atonu na mafai se faanoi a Tanielu mo lona lē iai i inā, ae sa lē mafai e i latou ia e toʻatolu. * O lea o le  mamao e oo atu i ai lo latou usiusitai o le auai atu lea i ai, ae o le a latou lē—ma e leʻi mafai—ona auai i so o se gaoioiga sesē.—Tanielu 3:1-18.

I se tulaga tutusa, atonu e talosagaina pe e matuā manaʻo foʻi se tane lē talitonu e faia e lana avā Kerisiano se mea o loo manaʻo lana avā e ʻalofia i vaitaimi o aso mālōlō. Seʻi manatunatu i nisi o faataʻitaʻiga: Ua taʻu atu e le tane iā te ia e kuka se meaʻai faapitoa i le aso o le a latou faamanatuina ai ma isi se aso mālōlō. Po o le matuā manaʻo foʻi o le tane e asiasi atu le aiga (e aofia ai ma lana avā) i ona tauaiga i lenā aso mo se taumafataga pe e na o se asiasiga lava foʻi. Pe a o lumanaʻi foʻi se aso mālōlō, atonu e faapea atu o ia i lana avā a o alu atu e fai mai le faatauga, e tatau lava ona ia faatauina mai nisi o mea mo ia—meaʻai e faapitoa lava mo lea aso mālōlō, ni mea e fai ai meaalofa, po o pepa e afīfī ai meaalofa ma pepa e faia ai faamanuiaga e faaaogā mo ana meaalofa.

O lea foʻi, ua tatau ona maumaututū se avā Kerisiano ia aua nei auai i gaoioiga a lotu sesē, ae faapefea mea ia na talosagaina? O ia o le ulu o le aiga, ma ua faapea mai le Afioga a le Atua: “O outou fafine, ia outou usiusitai atu i a outou lava tane, pei ona tatau i le Alii.” (Kolose 3:18) I nei tulaga, po o le a ia faaalia ea le usiusitai ona o ia o se avā a o faamaoni atu pea i le Atua? E tatau ona ia filifili i le auala e faapaleniina ai le usiusitai atu i lana tane ma le usiusitai silisili iā Ieova.

I isi taimi e ese mai ai i aso mālōlō, atonu e fai atu ai lana tane iā te ia e kuka se ituaiga o meaʻai patino, pe ona o lana meaʻai e fiafia tele i ai pe ona e masani lana tane e faia lenā meaʻai i se vaitaimi faapitoa. O le a ia manaʻo e faaalia le alofa mo lana tane ma amanaʻia lona tulaga ulu. Ae po o le a ia faia ea faapea e tusa lava po o ia talosagaina i le taimi o aso mālōlō? Atonu e mafai ona faia e nisi o avā ma se lotofuatiaifo lelei, ona e manatu i ai o se galuega e masani ai i le sauniunia o meaʻai mo aso taʻitasi. E mautinoa, e leai se Kerisiano faamaoni o le a ia faatāuaina se aso mālōlō o loo fetaui atu i ai, e tusa lava po o faia faapena e lana tane. I se tulaga tutusa, atonu e manaʻomia e le tane le avā ina ia iai ma ia pe a asiasi atu i ona tauaiga i taimi eseese i masina taʻitasi po o le tausaga foʻi. Po o le a ia faia ea faapea e tusa lava po o se aso mālōlō? Pe e masani ea ona ia lotomalie e faatauina mea o loo talosagaina e lana tane, e aunoa ma le faamasinoina po o le ā le mea o loo mafaufau lana tane e fai i mea na ia faatauina mai mo ia i lana faatauga?

O le mea moni, e tatau ona mafaufau le avā Kerisiano i isi—le aafiaga o le a iai iā i latou. (Filipi 2:4) O le a ia manaʻo e ʻalofia le auala o loo foliga atu ai faapea o loo faia sana vaega i se aso mālōlō, e pei lava ona foliga mai ai i tagata Eperu e toʻatolu na leʻi mananaʻo e vaai isi iā i latou o faimalaga atu i le fanua laugatasi o Turu. O lea atonu o le a ia taumafai ai ma le faautauta e talanoa ma lana tane ina ia iloa ai, pe afai e amanaʻiaina e lana tane ia ona faalogona, atonu o le a faia ai e lana tane mea o loo fesootaʻi atu i aso mālōlō mo ia lava ina ia fetuutuunaʻi atu ai i le avā o loo alofa ma faaaloalo iā te ia. Atonu o le a malamalama le tane i le atamai o le lē faia o se tulaga e la te taufai masiasi uma ai pe afai o le a teena e lana avā le auai i gaoioiga a lotu sesē. Ioe, o se talanoaga filemu e faia muamua atonu o le a oo atu ai i se vaifofō filemu.—Faataoto 22:3.

O le iloiloga mulimuli, e tatau ona fuafua e le Kerisiano faamaoni mea moni o loo aofia ai ona filifili lea po o le ā le mea e tatau ona fai. E tatau ona faamuamua le usiusitai i le Atua, e pei lava ona faia e tagata Eperu e toʻatolu. (1 Korinito 10:31) Ae o le iloaina o lenā mea, e tatau i Kerisiano taʻitoʻatasi ona filifili po o ā mea e lē tofotofoina ai lona faatuatua e mafai ona ia faia e tusa ai o le manaʻoga o se tasi o loo iai le pule i le aiga po o totonu foʻi o le nuu.

[Faamatalaga pito i lalo]