Le Iesu Moni

INA ua uma ona iloa mai i ona aposetolo po o ā manatu o tagata e uiga iā te ia, ona fesili atu lea o Iesu iā i latou: “A o outou, pe se a la outou upu ia te au, po o ai?” Ua faamauina i le Evagelia a Mataio le tali a le aposetolo o Peteru e faapea: “O oe o le Keriso, o le Alo o le Atua soifua.” (Mataio 16:15, 16) Sa faapena foʻi manatu o isi. O Natanielu, o lē na avea mulimuli ane o se tasi o aposetolo, na ia fai atu iā Iesu: “Rapi e, o oe lava o le Alo o le Atua, o oe lava le Tupu o Isaraelu.” (Ioane 1:49) Sa talanoa Iesu lava ia e uiga i le tāua o lana vaega: “O aʻu nei le ala, ma le upu moni, ma le ola; e le alu atu lava se tasi i le Tamā, pe a le ui mai ia te au.” (Ioane 14:6) I taimi eseese, sa talanoa ai Iesu e uiga iā te ia lava e faapea, “o le Atalii o le Atua.” (Ioane 5:24, 25; 11:4) Ma sa ia faamaonia nei upu e ala i lona faia o vavega, ma e oo lava i le faatutūina o ē ua oti.

Masalosaloga ua Fetaui Lelei?

Ae pe e mafai ona tatou talitonu moni i faamatalaga a Evagelia e uiga iā Iesu? Po o faaatagia mai ai i na faamatalaga le Iesu moni lava? Na taʻua e lē ua maliu o Frederick F. Bruce, o se polofesa fai tofā ma poto e faamatala le Tusi Paia sa i le Iunivesite o Manchester i Egelani e faapea: “E lē o se mea e masani ai ma talafeagai ona faaalia le moni o auʻiliʻiliga uma o se tusitusiga anamua e ala i manatu mai le talafaasolopito, e tusa lava pe faale-Tusi Paia pe leai. E lava ma totoe le mautinoa lelei o le maufaatuatuaina o le tusitala; afai ua faamaonia lenā mea, ua iai se faamaoniga aʻiaʻi faapea atonu e moni ana faamatalaga. . . . E faapena foʻi ona lē faaitiiti le maufaatuatuaina o le talasolopito o le Feagaiga Fou auā ua taliaina e Kerisiano e avea o ni tusitusiga ‘paia’.”

Ina ua uma ona iloiloina ia masalosaloga e uiga iā Iesu e pei ona faaata mai ai i Evagelia, ona tusi mai lea o James R. Edwards, o se polofesa faalelotu i le Kolisi o Jamestown, i North Dakota, i le Iunaite Setete o Amerika e faapea: “E mafai ona tatou faamautūina ma le mautinoa e faapea, ua faamauina i Evagelia le anoanoaʻi o faamaoniga tāua eseese o le upu moni e uiga iā Iesu. . . . O le tali aupito sili ona saʻo i le fesili i le māfuaaga ua faailoa mai ai e Evagelia Iesu e pei ona latou faamatala mai, talu ai o le faamatalaga saʻo lava lenā e uiga iā Iesu po o ai o ia. Ua faamatalaina moni mai lava e Evagelia le mafaufau saʻo na ia tuu i ona soo e faapea, o ia na auina moni mai e le Atua ma faamalosia ai o ia e avea ma Alo ma Auauna a le Atua.” *

Le Saʻiliga e Uiga iā Iesu

Ae faapefea ia faamatalaga e lē mai le Tusi Paia e uiga iā Iesu Keriso? E faapeʻī ona iloiloina na faamatalaga? I tusitusiga a Tacitus, Suetonius, Josephus, Pliny the Younger, ma nai isi tusitala  anamua, o loo faaaofia ai le tele o faamatalaga e uiga iā Iesu. Ua faapea mai le New Encyclopædia Britannica (1995) e uiga iā i latou: “O faamatalaga e ese mai le Tusi Paia a nei tagata taʻitoʻatasi ua faamaonia ai e faapea, i aso anamua e oo lava i tagata sa tetee i le Faa-Kerisiano, e latou te leʻi masalomia le talafaasolopito moni o Iesu. Sa faatoʻā finauina le talafaasolopito moni o Iesu mo le uluaʻi taimi e aunoa ma se faavae lelei i le faaiʻuga o le senituri lona 18, ma le faagasologa o le 19, ma le amataga o le lona 20 o senituri.”

O le mea e faanoanoa ai, ona o le naunau o tagata suʻesuʻe i aso nei i le fia iloa o le Iesu “moni” po o le Iesu o loo maua i le “talafaasolopito,” ua foliga mai ai ua natia lona talaaga moni i lalo o le anoanoaʻi o manatu lē faavaea, ma masalosaloga e lē aogā, ma le tele o mafaufauga eseese e lē talafeagai. I se uiga, ua tuuaʻia ai i latou i le fatuina o ni tala faafagogo, ia ua latou faitioina sesē ai le ʻautusitala o Evagelia. Ua matuā naunau lava isi e faia so latou lava talaaga ma taʻutaʻua ai o latou igoa i le fesootaʻi atu i aʻoaʻoga fou e ofo ai, ae latou te leʻi suʻesuʻeina lelei ia faamaoniga e uiga iā Iesu. I le faia faapea, ua latou fafau aʻe ai se “Iesu” e tusa ma mafaufauga lē moni o tagata popoto.

Mo i latou o ē o fia maua o ia, e mafai ona maua le Iesu moni i le Tusi Paia. Ua finau mai ia Luke Johnson, o se polofesa o le Feagaiga Fou ma le amataga o Kerisiano i le Aʻoga Faafaifeʻau o Candler i le Iunivesite o Emory e faapea, ua lē amanaʻiaina le tele o saʻiliʻiliga e uiga i le Iesu o le talafaasolopito lea ua avea ma sini autū faale-Tusi Paia. Fai mai a ia, atonu o se mea e faaoso naunau le iloiloina o le tulaga tau faiā a tagata lautele, tulaga faapolotiki, tulaga tau i amioga a tagata, ma tulaga tau i le aganuu sa taatele a o soifua Iesu ma mulimuli ane ai. Ae peitaʻi, ua ia faaopoopo mai e faapea, o le iloaina o le mea ua taʻua e tagata popoto e faapea, o le Iesu o le talafaasolopito, “e lē o avea ma sini autū o le Tusi Paia,” lea e “sili atu  ona manatu mamafa i le faamatalaina o uiga moni o Iesu,” lana feʻau, ma lana vaega i le avea o se Togisala. O lea, o le ā le uiga moni o Iesu ma lana feʻau?

Le Iesu Moni

O Evagelia—o tusi faale-Tusi Paia e fā o loo faamatala ai le soifuaga o Iesu—ua faamatala mai ai se tagata na faaalia ni lagona alofa loloto. O le tigāalofa ma le matuā ootia i le alofa na uunaʻia ai Iesu e fesoasoani atu i tagata o ē na mafatia i maʻi, tauaso, ma isi toʻatugā. (Mataio 9:36; 14:14; 20:34) O le maliu o lana uō o Lasalo ma le faavauvau na oo i tuafāfine o Lasalo ona o lenei mea, na ‘tiga tele ai Iesu ma tagi o ia.’ (Ioane 11:32-36) O le mea moni, ua faaalia i tala a Evagelia le tulaga lautele na oo i ai faalogona o Iesu—sa mutimutivale lona alofa i se tagata na lepela, sa matuā fiafia ona o le taulau manuia o ona soo, sa tigā i tagata lē alolofa o ē sa maumauaʻi i le tausisia ma le lē tonu o le tulafono, ma lona faanoanoa ona o le teena e Ierusalema o le Mesia.

Pe a faia e Iesu se vavega, e masani lava ona ia uaʻi atu i le vaega e ao ona fai e lē o loo faia i ai le vavega: “O lou faatuatua ua e malolo ai.” (Mataio 9:22, LF ) Sa ia viiviia Natanielu ‘o se Isaraelu moni,’ i lona faapea atu, “E leai sona pepelo.” (Ioane 1:47) Ina ua manatu nisi e faapea, sa matuā taugatā tele le meaalofa na foaʻi atu e se fafine lotofaafetai, na puipui o ia e Iesu ma fetalai atu, o le a manatua pea le tala e uiga i lona agalelei. (Mataio 26:6-13) Sa ia faamaonia o ia lava o se uō moni ma o se aumea e tigāalofa i ona soo, ‘ua alofa iā i latou e oo lava i le gataaga.’—Ioane 13:1; 15:11-15.

Ua faaalia foʻi i Evagelia e faapea, sa vave lava ona silafia e Iesu manaʻoga o le toʻatele o tagata na ia feiloaʻi i ai. Po o le talanoa atu i se fafine i le vaieli, po o se aʻoaʻo faalelotu i se togālaau, po o se faifaiva i tala ane o se vaituloto, sa ia pāʻia vave lava o latou loto. Ina ua uma upu tomua a Iesu, na faaalia ai e le toʻatele o nei tagata lo latou manatu loloto iā te ia. Sa ia faapogaia lo latou agaga talileleia. E ui atonu sa matuā faamamao ese lava tagata o ona aso mai tagata maualuluga, ae i le tulaga o Iesu, sa fetuleni atu tagata iā te ia. Sa latou fiafia e faatasitasi ma Iesu; sa latou lagona le toʻafilemu i lona aufaatasi ai ma i latou. Sa fiafia tamaiti iā te ia, ma ina ua ia faaaogāina se tamaitiiti e fai ai se faaaʻoaʻoga, e na te leʻi na ona faatū le tamaitiiti i luma o lona ʻausoo ae sa ia “siitia o ia i ona lima.” (Mareko 9:36; 10:13-16) O le mea moni, sa faaata e Evagelia Iesu o se tagata sa iai sea mana, o lea na nonofo ai tagata mo aso e tolu i le tau lava ina faalogologo i ana upu faamalieloto.—Mataio 15:32.

O le lelei atoatoa o Iesu, sa leʻi avea ai o ia o se tagata soona faitio pe faasausili ma soona pule  sauā i tagata agasala lē lelei atoatoa ia sa latou nonofo ma talaʻi atu i ai. (Mataio 9:10-13; 21:31, 32; Luka 7:36-48; 15:1-32; 18:9-14) Sa leʻi tāpā e Iesu ni mea se tele mai isi tagata. E na te leʻi faamamafa atu avega a tagata. Na i lo o lea na ia fetalai atu: “Ia outou o mai ia te au, o outou uma o e tigaina . . . o aʻu foi e malolo ai outou.” Sa iloa e ona soo o ia “lē agamalu ma le loto maulalo”; o lana amo e avegofie, ma lana avega e māmā ia.—Mataio 11:28-30.

O uiga o Iesu, ua mafai ona faaalia mai i tala a Evagelia faatasi ma le matuā mautinoa o le faamatalaga moni. O le a lē faigofie mo ni tagata eseese se toʻafā ona faamaopoopoina ni faamatalaga e uiga i se tagata uigaese e lē pei o isi tagata uma, ma aumaia ai se faamatalaga tutusa e uiga iā te ia mai nei tala eseese e fā. E toetoe lava a lē mafai e tusitala eseese e toʻafā ona faamatalaina le tagata lava lea e tasi ma aumaia ai ni faamatalaga tutusa e uiga iā te ia, pe afai sa leʻi soifua moni lenā tagata.

Ua fesiligia e le tusitala o talafaasolopito o Michael Grant se fesili faatupu manatu e faapea: “E mafai faapefea i faamatalaga atoa a Evagelia, ona aumaia ai se ata mataʻiina tutasi e uiga i se tauleʻaleʻa aulelei sa auaufaatasi ma fafine eseese, e aofia ai tagata patino e lē lelei o latou talaaga, e aunoa ma le faaalia o faalogona ootia e lē talafeagai, ni uiga e lē masani ai, po o le faafiaamiotonu, ae i na tulaga uma lava, sa tausisia pea lona tulaga mamā ma le faamaoni?” O le tali mautinoa lava e faapea, sa iai moni lava se tagata faapena ma sa gaoioi e tusa ma mea o loo fai mai ai le Tusi Paia.

Le Iesu Moni ma Lou Lumanaʻi

E lē gata i le aumaia o faamatalaga moni e uiga iā Iesu a o iai i le lalolagi, ua faaalia i le Tusi Paia e faapea, sa soifua muamua o ia e avea ma Atalii pele e toʻatasi o le Atua, “le ulumatua o mea uma lava ua faia.” (Kolose 1:15) I le 2,000 tausaga ua mavae, na faaliliuina mai ai e le Atua le soifua o lona Alo faalelagi i le manava o se taupou Iutaia ina ia fanau mai ai o se tagata. (Mataio 1:18) I le taimi o lana faiva i le lalolagi, na folafola atu ai e Iesu le Malo o le Atua e na o lea le faamoemoe mo tagata mafatia, ma sa ia aʻoaʻo ona soo ina ia faaauau ona faia lenei galuega talaʻi.—Mataio 4:17; 10:5-7; 28:19, 20.

Iā Nisani 14 (e tusa o Aperila 1), 33 T.A., na puʻeina faapagota ai Iesu, faamasinoina, ma faia le faaiʻuga, ma sa faasalaina ai i le oti ona o moliaga sesē e faapea e fouvale i le malo. (Mataio 26:18-20, 26:48–27:50) O le maliu o Iesu e avea ma togiola, ua tatalaina ai le fanau a tagata talitonu mai lo latou tulaga agasala, ma i lea ua faaavanoa ai le auala i le ola e faavavau mo i latou uma o ē faaalia le faatuatua iā te ia. (Roma 3:23, 24; 1 Ioane 2:2) Iā Nisani 16, na toe faatūina ai Iesu, ma i se taimi puupuu lava mulimuli ane, na toe afio atu ai o ia i le lagi. (Mareko 16:1-8; Luka 24:50-53; Galuega 1:6-9) Ona o le Tupu tofia a Ieova, ua maua ai e Iesu ua toe faatūina le pule atoatoa e faatinoina ai le uluaʻi fuafuaga a le Atua mo tagata. (Isaia 9:6, 7; Luka 1:32, 33) Ioe, ua faailoa mai e le Tusi Paia Iesu e faapea, o lē e autū i ai le faataunuuina o fuafuaga a le Atua.

I le uluaʻi senituri, na talia ai e le toʻatele o tagata Iesu e tusa ai ma lona tulaga—le Mesia folafolaina, po o Keriso, lea na auina mai i le lalolagi ina ia taʻutonuina ai le pule silisili ese a Ieova ma ia maliu o se togiola mo le fanau a tagata. (Mataio 20:28; Luka 2:25-32; Ioane 17:25, 26; 18:37) I le feagai ai ma sauāga ogaoga, atonu o le a faigatā ona uunaʻia tagata e avea ma soo o Iesu pe ana latou lē mautinoa po o ai o ia. Ua latou faatinoina ai ma le lototetele ma le maelega le tofiga na ia tuuina atu iā i latou, ina ia ō atu “e fai nuu uma lava ma soo.”—Mataio 28:19.

I aso nei, ua iloa ai e le faitau miliona o Kerisiano lotofaamaoni ma malamalama e faapea, o Iesu e lē o se tagata faafagogo. Ua latou talia o ia o le Tupu faanofotupuina o le Malo o le Atua ua faavaeina i le lagi, o lē ua toeitiiti nei ona ia pulea atoatoa lea o le lalolagi ma ona mataupufai. O lenei pulega tauatua, o se tala fiafia auā ua folafola mai e lenei malo le mapusaga mai faafitauli o le lalolagi. Ua faaalia e Kerisiano moni lo latou lagolagoina faamaoni o le Tupu filifilia a Ieova e ala i le folafolaina atu “o lenei tala lelei o le malo” i isi.—Mataio 24:14.

O i latou o loo lagolagoina lenei faatulagaga a le Malo e ala iā Keriso, le Alo o le Atua soifua, o le a ola pea ina ia olioli i faamanuiaga e faavavau. E mafai foʻi ona e maua nei faamanuiaga! O le a fiafia i latou o loo lomia lenei mekasini e fesoasoani iā te oe ina ia iloa le Iesu moni.

[Faamatalaga pito i lalo]

[Pusa i le itulau 6]

O Tala a Isi

“Ou te manatu iā Iesu le Nasareta o se tasi o faiaʻoga sili ona malosi na iai i le lalolagi. . . . Ou te fai atu i tagata Hinitū e faapea, o le a lē atoatoa o outou olaga seʻiloga e tou te suʻesuʻeina ma le faamaoni aʻoaʻoga a Iesu.”​—Mohandas K. Gandhi, The Message of Jesus Christ.

“O se tagata sa matuā fou ana aʻoaʻoga, matuā atoatoa, e matuā tutusa, e lē femoumouaʻi, e matuā lelei atoatoa, e ui o ia o se tagata, ae peitaʻi, e sili lava ona maualuga o ia i lo o tagata sili uma, e lē o se taufaasesē e lē o se tala fatu foʻi. . . . E manaʻomia se tagata e sili atu ona maualuga i lo o Iesu e fatuina se Iesu.”​—Philip Schaff, History of the Christian Church.

“Afai na fatuina e ni nai tagata faatauvaa i se tupulaga e tasi se tagata e sili ona malosi ma tausaafia ona uiga, e matuā maualuluga ana mataupu silisili o amioga tatau, ma avea o se vaaiga faagaeeina i le ʻauuso faaletagata, o le a avea lea o se vavega e matuā sili atu ona talitonu gatā na i lo o so o se tala ua faamauina e Evagelia.”​—Will Durant, Caesar and Christ.

“E ono foliga mai e faigatā ona talitonuina e faapea, o se gaoioiga faalotu lea ua salalau atu i le lalolagi atoa, na amataina e se tagata sa leʻi iai, sa fatuina i mafaufauga e pei o faiga faatosina o fefaatauaʻiga anamua, sa toʻatele ni tagata moni lava na manatu i ai o ē na taumafai e faavaeina ni lotu ae na lē taulau.”​—Gregg Easterbrook, Beside Still Waters.

‘I le avea o se tusitala o le talafaasolopito, ou te matuā talitonu ai e faapea, po o ā lava tala o i Evagelia, e lē o ni tala faafagogo. E lē o ni tala mananaia tele e mafai ai ona faapea o ni tala faafagogo. E lē o mafai ona tatou iloa le tele o vala o le soifuaga o Iesu, ma e leai ni tagata o fatuina ni tala faafagogo e mafai ona ioe mai e faapena Iesu.’​—C. S. Lewis, God in the Dock.

[Ata i le itulau 7]

Ua faaalia i tala a Evagelia le tulaga lautele na oo i ai faalogona o Iesu