“Le Vaimata e Nini Aʻi Ou Mata”

O LENĀ talavai, na ofoina atu e Iesu Keriso i le faapotopotoga Kerisiano o le uluaʻi senituri sa i Laotikaia, i Asia Itiiti.

Na fetalai Iesu: “Ia e faatau mai . . . le vaimata e nini aʻi ou mata, ina ia e pupula ai.” Sa lē o se faamaʻi mata masani, ae o le tauaso faaleagaga lea sa manaʻomia ai se togafitiga. Sa taaʻina Kerisiano i Laotikaia e le agaga o le aai mauʻoa faaletino lea sa latou nonofo ai, ma oo ai ina lē manatu mamafa e uiga i o latou manaʻoga moni faaleagaga.

I le faia o se faamatalaga e tusa ai ma lenei mea i le pogai ua faaleagaina ai la latou vaai, na fetalai Iesu: “Ua e fai mai, Ou te se mauoa, ua faatamaoaigaina aʻu, ou te le mativa foi i se mea e tasi; a ua e le iloa o oe o le malaia, ma le pagatia, ma le mativa, ma le tauaso, ma le le lavalavā.” E ui lava sa latou leʻi iloa lenei mea, ae sa manaʻomia lava e sui o le faapotopotoga se “vaimata” e faamālōlō ai o latou mata, lea sa mafai ona maua i le na o le gauaʻi atu i aʻoaʻoga ma aʻoaʻiga a Iesu Keriso. Na fetalai Iesu e faapea: “Ia e faatau atu ia te au.”—Faaaliga 3:17, 18.

I le pei o tagata i Laotikaia, e manaʻomia foʻi e Kerisiano moni i aso nei ona leoleo faasaga i le taaʻina ma le lē tatau, atonu ma le lē iloa foʻi i tuʻinanauga manaʻo tele i ʻoa faitino ma faafiafiaga a le siʻomaga lea o loo latou ola ai. O le talavai mo le tausia o se vaaiga mālōlōina faaleagaga, o loo faaalia i le apoapoaʻiga e faapea: “Ia e faatau mai ia [Iesu] . . . le vaimata e nini aʻi ou mata, ina ia e pupula ai.”

E lelei ona mātauina le mea moni e faapea, o lenei “vaimata” e tatau ona faatau mai. E iai se tau o loo aafia ai. E tatau ona faaalu se taimi e suʻesuʻe ma mafaufau loloto ai i le Afioga a le Atua. Ua faamautinoa mai e le faisalamo iā i tatou lenei Afioga e faapea, ‘e mamā, e malamalama ai mata faaleagaga.’—Salamo 19:8.