Mapusaga Mai Mafatiaga—Se Vaifofō Aogā
Mapusaga Mai Mafatiaga—Se Vaifofō Aogā
“Ia outou o mai ia te au, o outou uma o e tigaina ma mafatia i avega, o aʻu foi e malolo ai outou.”—MATAIO 11:28.
1, 2. (a) O ā mea o iai i le Tusi Paia e mafai ona fesoasoani e faaitiitia ai le tele naʻuā o mafatiaga? (e) O le ā le uigā sa iai aʻoaʻoga a Iesu?
E MAUTINOA e te ioe mai e leaga le tele naʻuā o mafatiaga; e tutusa lava ma faanoanoaga. O loo faasino mai e le Tusi Paia e faapea ua matuā omia le fanau uma a tagata i avega mamafa, lea ua oo ai ina lē manofo le toʻatele i le faatalitalia o se saʻolotoga mai le soifuaga mafatia i aso nei. (Roma 8:20-22) Ae o loo faaalia foʻi e le Tusi Paia le auala e mafai ona tatou maua ai se mapusaga tele mai faanoanoaga i le taimi nei lava. E maua mai lenā i le usitaia o le fautuaga ma le faaaʻoaʻoga a se alii talavou na soifua i le 20 senituri (2,000 tausaga) ua mavae. O ia o se kamuta, peitaʻi sa sili atu ona naunau ma alofa i tagata. Sa pāʻia loto o tagata i ana fetalaiga, sa ia faamalieina o latou manaʻoga, sa fesoasoani i ē vaivai ma faamaise atu i ē lotofaanoanoa. Ae sili atu ai, sa ia fesoasoani i le toʻatele o tagata ina ia ausia o latou faamoemoega faaleagaga. Sa faapena ona latou mauaina ai se mapusaga mai le tele naʻuā o mafatiaga, ma e oo foʻi iā te oe, e te mafaia.—Luka 4:16-21; 19:47, 48; Ioane 7:46.
2 O lenei tagata, o Iesu le Nasareta, sa leʻi taʻitaʻia i ni aʻoaʻoga o le poto o lenei lalolagi, lea sa saʻilia e nisi i Roma anamua, i Atenai, pe i Alesania. Ae e ui i lea, ua taʻutaʻua ana aʻoaʻoga. O le matua o ana aʻoaʻoga: o le malo o le a faaaogā e le Atua e pulea ai ma le manuia lo tatou lalolagi. Na faamatalaina foʻi e Iesu mataupu silisili autū mo le auala e soifua ai—mataupu silisili o loo tāua moni i aso nei. O i latou e aʻoaʻoina ma faatatauina mea sa aʻoaʻoina mai e Iesu, ua latou olioli i ni manuia i le taimi nei lava, e aofia ai le mapusaga mai le tele naʻuā o mafatiaga. Pe e te lē fiafia ea i lenā mea?
3. O le ā le valaaulia sili na faaoo mai e Iesu?
3 Atonu o iai ni ou masalosaloga. ‘Pe mafai ea e se tasi o lē ua leva ona mavae atu aso na soifua ai, ona uigā moni sona aafiaga i loʻu olaga i aso nei?’ Ia, seʻi faalogologo atu foʻi i le fetalaiga logomālie a Iesu: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.” (Mataio 11:28-30) O le ā le uiga o ana fetalaiga? Seʻi o tatou matuā auʻiliʻilia nei fetalaiga ma vaai pe faapefea ona maua ai se mapusaga mai mafatiaga o loo omia ai.
4. O ai na fetalai atu i ai Iesu, ma atonu o le ā le pogai sa faafaigatā ai i lana ʻaufaalogologo ona faia mea na tāpā ai i latou e fai?
4 Na fetalai atu Iesu i le toʻatele o ē sa taumafai malosi e fai mea e tusa ai ma le tulafono peitaʻi sa “mafatia i avega” talu ai sa faia e taʻitaʻi Iutaia le lotu o se mea e mamafatū. (Mataio 23:4) E toetoe lava o tāfa uma o le soifuaga sa latou sagaʻi atu e fai i ai tulafono e tele. Faamata e te lē maua le mafatia i le faalogo atu pea i le faaupuga “aua e te” faia le mea lenei po o le mea lenā? I le isi itu, o le valaaulia a Iesu sa tataʻi atu ai tagata i le upu moni, i le amiotonu, i se soifuaga e sili atu ona lelei, e ala i le faalogo atu iā te ia. Ioe, o le auala e iloa ai le Atua moni sa aofia ai le uaʻi atu iā Iesu Keriso, auā o ia, e ono mafai—ma e mafai—ai e tagata ona iloa pe faapeʻī Ieova. Na fetalai Iesu: “O le ua vaai mai ia te au, ua vaai o ia i le Tamā.”—Ioane 14:9.
Po ua Mafatia Naʻuā Lou Olaga?
5, 6. E faapefea ona faatusatusa mai tulaga ma totogi sa galulue ai tagata i aso o Iesu, i tulaga ma totogi i o tatou aso?
5 Atonu o loo popole lou mafaufau i lenei mataupu ona atonu o loo fai ma au avega mamafa lau galuega po o le tulaga o lou aiga. Pe atonu foʻi o loo foliga mai ua fai sina mamafatū o isi tiute tauave. Pe afai o le tulaga lenā, ua pei la oe o i latou faamaoni na sa feiloaʻi atu i ai Iesu ma fesoasoani atu i ai. Mo se faaaʻoaʻoga, seʻi manatu i le faafitauli o le saʻilia o mea e ola ai. E toʻatele o loo tauivi ma na tulaga i aso nei, ma sa faapena foʻi le toʻatele i taimi o Iesu.
6 I tuā i inā, sa masani ona galue mamafa se tagata mo le 12 itula i le aso, i le 6 aso o le vaiaso, mo le na o le tasi le tenari mo le aso atoa. (Mataio 20:2-10) E faapeʻī pe a faatusatusa atu lenā tulaga i lou totogi po o totogi o au uō? E fai lava si faigatā o le faatusatusaga o totogi o aso anamua i totogi o aso nei. Ina ia faatusatusa, seʻi manatu i mea e mafai ona faatauina mai i se vaegātupe. E taʻua e se tagata poto faapitoa e faapea, i aso o Iesu, o se potoi areto sa maua mai le paluina o ipu falaoamata e fā (e tusa ma le lita e tasi) e fai mai le saito, sa tutusa lona tau ma le totogi o le itula e tasi. Ua faapea mai se isi tagata poto faapitoa, o se ipu o se uaina manaia e tutusa lona tau ma le totogi o ni itula se lua. E mafai ona e mātauina mai na faamatalaga, sa matuā galulue mamafa tagata i na taimi mo le tele o itula ina ia maua mea e ola ai. Sa latou manaʻomia se mapusaga ma se mālōlōga, e pei foʻi ona tatou manaʻomia. Pe afai o loo e faigaluega, atonu o loo omia foʻi oe i le taumafai ina ia fua atili mai au galuega. E masani lava ona tatou lē maua se taimi e mafaufauina lelei ai ni filifiliga. E te ono ioe mai o loo e moomoo mo se mapusaga.
7. O le ā le tali atu i le feʻau a Iesu?
7 E manino lava, o le valaaulia a Iesu i tagata uma o ē “tigaina ma mafatia i avega” atonu sa matuā faafiafiaina ai le toʻatele o le ʻaufaalogologo i tuā i inā. (Mataio 4:25; Mareko 3:7, 8) Ma ia manatua sa toe faaopoopo atu e Iesu le folafolaga, “O aʻu foi e malolo ai outou.” O loo aogā pea lenā folafolaga i aso nei. E mafai ona faatatau mai iā i tatou pe afai o loo tatou “tigāina ma mafatia i avega.” Ma e mafai ona faatatau atu i ē pele iā i tatou, o ē o loo iai i tulaga faapena.
8. Ua faapefea ona faaopoopo atu i mafatiaga, le tausia aʻe o se fanau ma le soifuaga matua?
8 E iai isi mea o loo fai ma avega mamafa i tagata. O se luʻi tele le tausia aʻe o fanau. E oo lava foʻi i le avea ma tamaitiiti e mafai ona fai ma luʻi. Ua faateleina le aofaʻi o tagata e eseese le matutua ua fesagaʻi ma faafitauli tau i le mafaufau ma le tino. Ma a o mafai ona uumi atu taimi e ola ai tagata, ae ua fesagaʻi i latou ua pulapula lāgoto le soifua ma ni faafitauli faapitoa, e ui lava i le agaʻigaʻi i luma ua iai le tomai faafomaʻi.—Failauga 12:1.
Le Amoina o le Amo
9, 10. I taimi anamua, sa avea le amo ma faailoga o le ā, ma aiseā na valaaulia ai e Iesu tagata ina ia latou amoina lana amo?
9 Pe sa e mātauina i upu na sii mai le Mataio 11:28, 29, na fetalai ai Iesu: “Ia outou amoina laʻu amo, ma ia outou faaaʻoaʻo ia te au.” I tuā i inā, atonu sa lagona e se tagata e lē taualoa ni lagona e peiseaʻī sa ia amoina se amo. I taimi anamua, sa avea le amo e faataʻitaʻia mai ai le pologa po o le auauna. (Kenese 27:40; Levitiko 26:13; Teuteronome 28:48) E toʻatele tagata sa galulue i galuega mamafa o ē na feiloaʻi atu i ai Iesu, sa latou amoina moni lava ni amo i o latou tauʻau, e tauave ai ni amoga mamafa. Sa faalagolago i le auala e tāina ai se amo, le ono faigofie ai ona amo i le ūa ma tauʻau, po o le oo foʻi ina mafoʻefoʻe ai le tauʻau ma le ūa. Ona o Iesu o se kamuta, atonu sa ia tāina ni amo, ma atonu sa ia silafia foʻi le auala e tā ai le amo lea sa “avegofie.” Atonu o le vaega o le amo lea e faataatia i le ūa ma tauʻau, sa ia saisaiina i ni paʻumanu po o se ie, ina ia faigofie ai ma sologalelei le taatia a le amo.
10 Ina ua fetalai Iesu, “Ia outou amoina laʻu amo,” atonu sa ia faatusaina o ia i se tasi na sauniaina ni amo sa lelei ona tā, ma “avegofie” i le ūa ma le tauʻau o se tagata galue. O le ala lea o le toe fetalai o Iesu: “O laʻu avega foi e māmā ia.” Ua faailoa mai ai e faapea, e lē o se mea faigatā le faaaogāina o se amo, ma sa lē avea foʻi le galuega o se mea e pologa ai. O le mea moni, ina ua valaauliaina lana ʻaufaalogologo e talia lana amo, e leʻi ofoina atu e Iesu se mapusaga vave mai tulaga mafatia uma na iai i lenā taimi. Peitaʻi, o le ese o manatu sa ia faatulaʻi atu o le a aumaia ai se mālōlōga tele. O fetuunaʻiga i o latou olaga ma le auala e faia ai mea, o le a mapu ai foʻi i latou. Ae sili atu ona tāua, o se faamoemoe manino ma le mausalī o le a fesoasoani iā i latou e faaitiitia ai mafatiaga o le soifuaga.
E Mafai Ona E Maua le Mālōlōga
11. Aiseā sa leʻi taʻua ai e Iesu le na ona faafesuiaʻia o amo?
11 Ia mātau mai, e leʻi fetalai Iesu faapea e faafesuiaʻi e tagata a latou amo, i le lafoaʻi o le isi ae tauave le isi. Sa pulea pea e Roma le lalolagi i lenā taimi, e pei foʻi ona pule pea faigāmalo i aso nei i vaipanoa o loo nonofo ai Kerisiano. Sa leʻi soloia le faatulagaga a le malo o Roma lea sa totogia ai lafoga i le uluaʻi senituri. O le a tumau pea ona iai faafitauli i le soifua mālōlōina ma le tamaoaiga. O le a faaauau pea ona aafia tagata i le lē lelei atoatoa ma le agasala. Peitaʻi, e mafai ona latou maua le mālōlōga e ala i le taliaina o aʻoaʻoga a Iesu, e pei foʻi ona tatou maua ai le mālōlōga i aso nei.
12, 13. O le ā na faamatilatila e Iesu o le a aumaia ai se mālōlōga, ma na faapefea ona tali mai i ai nisi?
12 Sa oo ina manino mai le faatatauga tāua o le tala faatusa a Iesu, e tusa ai o le galuega o le saʻilia mai o soo. E mautinoa lava o le galuega autū a Iesu o le aʻoaʻoina o isi, ma le faamamafa sa iai i le Malo o le Atua. (Mataio 4:23) O lea, ina ua ia faapea mai, “Ia outou amoina laʻu amo,” e mautinoa le aofia ai i lenā mea o le mulimuli atu iā te ia i le faia o lenā lava galuega. Ua faaalia i le tala a Evagelia e faapea, na faagaeeina e Iesu loto o tagata faamaoni ina ia suia a latou galuega, o se mea na faaautū i ai popolega o olaga o le toʻatele. Seʻi manatu i lana valaaulia iā Peteru, Aneterea, Iakopo, ma Ioane: “Ina mulimuli mai ia ia te au, ou te faia [outou] ma fai faiva i tagata.” (Mareko 1:16-20) Sa ia faaalia atu i na tagata faifaiva le telē o le a faamalieina ai pe afai latou te faia le galuega sa ia faamuamuaina i lona soifuaga, i le faia lea e ala i lana taʻitaʻiga ma lana fesoasoani.
13 Sa malamalama nisi o lana ʻaufaalogologo Iutaia i le manatu autū ma usiusitai loa. Seʻi faaata i lou manatu le vaaiga i le matafaga a o tatou faitau i ai i le Luka 5:1-11. E toʻafā ni tagata faifaiva ua alu le pō atoa o fagogota ae aunoa ma se iʻa na maua. Ae ua faafuaseʻi lava ona tutumu a latou upega! E leʻi tupu fua lenei mea; na māfua ona o Iesu. A o latou autilo mai i le matafaga, sa latou vaaia ai se motu o tagata o loo naunautaʻi atu i aʻoaʻoga a Iesu. Ua fesoasoani lenā e faamalamalamaina ai le uiga o le fetalaiga a Iesu i na tane e toʻafā: “E amata i nei ona po ona [outou] maua tagata.” O le ā la latou tali mai? “Ua tūta o latou vaa, ona latou tuu ai lea o mea uma, a e mulimuli atu ia te ia.”
14. (a) E mafai faapefea ona tatou maua le mālōlōga i aso nei? (e) O le ā le tala lelei e mālōlōina ai sa folafola atu e Iesu?
14 E mautinoa lava, e mafai foʻi ona e tali atu i se auala faapena. O loo faaauau pea le galuega o le aʻoaʻoina o tagata i upu moni o le Tusi Paia. E tusa ma le ono miliona Molimau a Ieova i le lalolagi aoao ua latou taliaina le valaaulia a Iesu ina ia “amoina [lana] amo”; ua avea i latou ma “fai faiva i tagata.” (Mataio 4:19) O nisi ua avea ma a latou galuega faataimi atoa; o isi ua latou galulue ai faavaitaimi i se tele latou te mafaia. Ua maua ai e tagata uma le mālōlōga, ma faaitiitia ai lo latou mafatia. E aofia ai le faia o le mea o loo latou olioli ai, o le taʻuina atu i isi o le tala lelei—“le tala lelei o le malo.” (Mataio 4:23) O se fiafiaga i taimi uma le talanoa e uiga i se tala lelei, aemaise lava la i lenei tala lelei. O loo iai i le Tusi Paia mataupu autū e manaʻomia ona tatou faatalitonuina ai le toʻatele e faapea, e mafai ona latou soifua i se soifuaga e itiiti mafatiaga.—2 Timoteo 3:16, 17.
15. E mafai faapefea ona e maua aogā mai aʻoaʻoga a Iesu e faatatau i le soifuaga?
15 E oo lava i tagata ua faatoʻā amata ona latou iloa e uiga i le Malo o le Atua, ua latou maua aogā mai ni aʻoaʻoga a Iesu i le auala e soifua ai. E toʻatele ua mafai ona faapea mai ma le faamaoni, ua latou maua le mālōlōina mai aʻoaʻoga a Iesu, ma ua fesoasoani iā i latou e matuā suia ai o latou olaga. E mafai ona e faia lenā mea mo oe e ala i le iloiloina o nisi o mataupu silisili o le olaga lea ua faatulaga mai i tala o le soifuaga ma le faiva a Iesu, aemaise i Evagelia na tusia e Mataio, Mareko, ma Luka.
Le Auala e Maua ai le Mālōlōga
16, 17. (a) O fea e mafai ona e maua ai nisi o aʻoaʻoga autū a Iesu? (e) O le ā e manaʻomia ina ia maua ai le mālōlōga e ala i le faatatauina o aʻoaʻoga a Iesu?
16 I le tau e totogo ai laau i le 31 T.A., na faia ai e Iesu se lauga lea ua lauiloa i le lalolagi i aso nei. E masani lava ona taʻua o le Lauga i luga o le Mauga. O loo faamauina i le Mataio mataupu e 5 e oo i le mataupu e 7, ma le Luka mataupu e 6, ma o loo aotele mai ai le tele o ana aʻoaʻoga. E iai foʻi isi vaega o Evagelia e mafai ona e maua i ai isi aʻoaʻoga a Iesu. O le tele o ana fetalaiga e mafai ona malamalama i ai le tagata lava ia, e ui o se luʻi le taumafai e faatinoina na mea. Aiseā e lē faitauina ai ma le faaeteete na mataupu, ma mafaufau loloto i ai? Ia avea le malosi o i tua o ona manatu e taaʻina ai ou mafaufauga ma ou uiga.
17 E manino lava, e eseese auala e mafai ona faatulaga ai aʻoaʻoga a Iesu. Seʻi o tatou faavasegaina aʻoaʻoga autū, ina ia mafai ona tofu aso taʻitasi o le masina ma se aʻoaʻoga, faatasi ai ma le sini o le faatinoina o na aʻoaʻoga i lou olaga. E faapefea? Aua le tau ina tilofaʻia vave na aʻoaʻoga. Toe manatu i le alii mauʻoa o lē na fesili atu iā Iesu Keriso: “Se a le mea ou te faia, ou te maua ai le ola faavavau?” Ina ua toe faamanatu i ai e Iesu manaʻoga e sili ona tāua o le Tulafono a le Atua, sa tali mai le tamāloa faapea ua uma ona ia tausia nei mea. Peitaʻi, sa ia iloa e manaʻomia ona ia faia nisi mea e sili atu. Sa faatonuina o ia e Iesu ina ia faia ni taumafaiga e sili atu e faatatauina ai mataupu silisili faale-Atua i ni auala e aogā, ina ia avea ai o se soo e maelega. E foliga mai, e lē o le tele lenā sa manaʻo lenei tamāloa e fai ai. (Luka 18:18-23) O lea la, o se tasi e na te fia iloa aʻoaʻoga a Iesu i aso nei, e manaʻomia ona ia manatua e iai le eseesega o le ioeina o na aʻoaʻoga, ma le talitonu i ai ma faatino, lea e faaitiitia ai le mafatia.
18. Ia faataʻitaʻi mai pe mafai faapefea ona e faaaogā le pusa o loo iai i inei ina ia maua ai ni aogā.
18 Ina ia amata ona iloilo ma faatatau aʻoaʻoga a Iesu, tagaʻi atu i le manatu muamua i le pusa o loo iai i inei. E faasino atu i le Mataio 5:3-9. O le mea moni lava, e mafai e so o se tasi o i tatou ona faaalu se taimi tele e mafaufau loloto ai i le fautuaga matagofie ua aumaia i na fuaiupu. Peitaʻi, a tagaʻi atoa i ai i le uiga, o le ā sau faaiʻuga i ai e tusa o uiga faaalia? Pe afai e te manaʻo moni lava e manumalo mai aafiaga o le tele naʻuā o mafatiaga i lou olaga, o le ā o le a maua ai le fesoasoani? E mafai faapefea ona aafia oe i se tulaga lelei pe afai e te faateleina lou uaʻi atu i mataupu faaleagaga, ma faataga na mea e te mafaufau atili i ai? Po o iai ni popolega i lou olaga e lē manaʻomia ona e soona faatāuaina, ae maua ai se taimi e te uaʻi atili atu ai i mataupu faaleagaga? Pe afai e te faia faapea, o le a faaopoopo lenā i lou fiafiaga i le taimi nei.
19. O le ā e mafai ona e faia ina ia mau ai le atamai ma se malamalamaga faaopoopo?
19 E iai ma se isi mea e mafai ona e faia. Aiseā e te lua lē talanoaina ai na fuaiupu ma se isi auauna a le Atua, po o lau paaga faaipoipo, sou tauaiga vavalalata, po o se uō? (Faataoto 18:24; 20:5) Ia manatua na fesiligia e le alii mauʻoa se isi tagata—o Iesu—e uiga i se mataupu aogā. Sa tatau i le tali na avatu ona atili faateleina ai lona faamoemoega i se fiafiaga ma le ola e faavavau. O lou uso tapuaʻi lea e te lua talanoaina na fuaiupu, o le a lē tutusa o ia ma Iesu; peitaʻi, o le a aogā pea iā te oulua uma aʻoaʻoga a Iesu. Taumafai ia vave ona fai.
20, 21. O le ā le polokalame e mafai ona e mulimuli ai ina ia e aʻoaʻoina aʻoaʻoga a Iesu, ma e mafai faapefea ona e fuaina lou agaʻigaʻi i luma?
20 Toe tagaʻi atu i le pusa o loo iai i inei, “Aʻoaʻoga e Fesoasoani iā te Oe.” Ua faavasegaina nei aʻoaʻoga ina ia iai se aʻoaʻoga e tasi e mafai ona e manatunatu i ai i le aso. E mafai ona e faitauina muamua le fetalaiga a Iesu o loo i fuaiupu ua taʻua. Ona mafaufau lea i ana fetalaiga. Ia mafaufau i le auala e mafai ona e faatatauina ai na fetalaiga i lou olaga. Pe afai e te manatu ua uma ona e faia na mea, ia mafaufau po o ā ma nisi mea e mafai ona e faia ina ia e soifua ai e tusa ma aʻoaʻoga tauatua. Taumafai e faatatauina le aʻoaʻoga a o faagasolo lenā aso. Pe afai o loo faafaigatā ona e malamalama i le aʻoaʻoga pe e faapefea foʻi ona faatatauina, ia toe faaalu ma se isi aso e mafaufau i ai. Peitaʻi, ia manatua, e lē tau manaʻomia ona e matuā lelei ai ona e faatoʻā see atu lea i le isi aʻoaʻoga. I le aso e sosoo ai, e mafai ona e manatunatu i le isi aʻoaʻoga. A oo i le iʻuga o se vaiaso, ona toe autalu lea po o faapeʻī lou taulau manuia o loo iai i le faatatauina o le fā, po o le lima foʻi, o aʻoaʻoga a Iesu. Ia toe faaopoopo nisi aʻoaʻoga i le vaiaso lona lua, e faasolosolo mai lava i lea aso ma lea aso. Afai e te iloa ua e tau lapelapea foʻi i le faatatauina o nisi o aʻoaʻoga, aua e te lotovaivai ai. O le a oo uma lava i Kerisiano taʻitoʻatasi lenā mea. (2 Nofoaiga a Tupu 6:36; Salamo 130:3; Failauga 7:20; Iakopo 3:8) Ona faaauau ai lava lea faapena i le vaiaso lona tolu ma lona fā.
21 E uma ane se masina pe ā, ua mafai ona e manatunatu i vala uma e 31. Po o le ā lava le tulaga, ae o ā ni ou lagona o le a iai? Po o le a lē sili atu ea lou fiafia, ma atonu ua sili atu foʻi ona toʻafilemu lou mafaufau? E tusa lava pe itiiti sina faaleleiga na mafai ona e faia, e mautinoa lava o le a faaitiitia ou lagona mafatia, pe atonu foʻi o le a sili atu ona lelei le auala e te faafoeina ai ou mafatiaga, ma o le a iai sau auala e taulimaina ai. Aua neʻi galo e tele isi manatu lelei o aʻoaʻoga a Iesu e lē o iai i le lisi. Aiseā e lē saʻilia ai na aʻoaʻoga ma taumafai e faatino?—Filipi 3:16.
22. O ā mea e ono iʻu i ai le mulimuli atu i aʻoaʻoga a Iesu, ae o le ā le isi vala faaopoopo e lelei foʻi ona suʻesuʻeina?
22 Ua e malamalama la, o le amo a Iesu e matuā agalelei lava, ae e lē mamafa. O le avega o ana aʻoaʻoga, ma le tulaga o le avea ma soo, e māmā ia. Ina ua mavae le silia ma le 60 tausaga o mea na oo totino iā te ia, na ioeina e Ioane, o le uō pele a Iesu, lenā mea: “O lenei lava le alofa i le Atua, ia tatou tausi i ana poloaiga; e le mamafa foi ana poloaiga.” (1 Ioane 5:3) E mafai foʻi ona iā te oe lenā lava mautinoa. O le umi lava e te faatatauina ai aʻoaʻoga a Iesu, o le tele foʻi lenā e te iloa ai, o mea o loo matuā mafatia ai olaga o le toʻatele o tagata i aso nei, o le a e lē mafatia ai faapena. O le a e iloa ai ua e mauaina se mapusaga tele. (Salamo 34:8) Peitaʻi, e iai se isi vala o le amo agalelei a Iesu e manaʻomia ona e manatunatu i ai. Na taʻua foʻi e Iesu lona “agamalu ma le loto maulalo.” E faapefea ona ofi mai lenā manatu i lo tatou aʻoaʻo mai ma faataʻitaʻi atu iā Iesu? I le mataupu o sosoo mai, o le a tatou talanoaina ai lenei mea.—Mataio 11:29.
O le ā Lau Tali?
• Aiseā e tatau ai ona tatou vaai atu iā Iesu pe a tatou saʻilia se mapusaga mai le tele naʻuā o mafatiaga?
• Sa avea le amo ma faailoga o le ā, ma aiseā?
• Aiseā na valaaulia ai e Iesu tagata ina ia latou amoina lana amo?
• E mafai faapefea ona e maua le mālōlōina faaleagaga?
[Fesili mo le Suʻesuʻega]
[Faamatalaga faaopoopo i le itulau 14]
O le mau o le tausaga mo Molimau a Ieova a o faagasolo le 2002 o lenei: “Ia outou o mai ia te au . . . o aʻu foi e malolo ai outou.”—Mataio 11:28.
[Pusa i le itulau 12]
Aʻoaʻoga e Fesoasoani iā te Oe
O ā ni mea lelei e mafai ona e maua i le Mataio mataupu e 5 e oo i le mataupu e 7? O loo iai i nei mataupu aʻoaʻoga na tauaaoina mai e le Aʻoaʻo Sili, o Iesu, i se mea maupuʻepuʻe i Kalilaia. Seʻi e faitau i fuaiupu o loo siiina atu i lalo, e ala i le faaaogā o lau lava Tusi Paia, ma e fesiligia oe lava i fesili ua taʻua.
1. 5:3-9 O le ā o loo taʻu mai e lenei mea iā te aʻu e tusa ai o oʻu uiga masani? E mafai faapefea ona ou taumafai ina ia maua se fiafiaga e sili atu? E mafai faapefea ona ou uaʻi atili atu i oʻu manaʻoga faaleagaga?
2. 5:25, 26 O le ā e sili atu ona lelei na i lo le faataʻitaʻi fua i le agaga fulufululele o loo pisia ai le toʻatele?—Luka 12:58, 59.
3. 5:27-30 O le ā ua faamamafa mai i fetalaiga a Iesu e tusa ai o mafaufauga faivavale i faalogona faaleituaiga? O le a faapefea i loʻu ʻalofiaina o na mafaufauga ona faateleina ai loʻu fiafia ma le filemu o loʻu mafaufau?
4. 5:38-42 Aiseā e tatau ai ona ou taumafai e ʻalofia le uiga fia malosi ma le faafiapoto lea ua faamamafa e le lalolagi i ona pō nei?
5. 5:43-48 O le a faapefea ona aogā iā te aʻu loʻu faamasani lelei atu i aumea o ē atonu ou te manatu i ai o ni fili? O le ā e ono faia e lenei mea ina ia faaitiitia pe aveesea ai faalogona o le popole?
6. 6:14, 15 Pe afai i nisi taimi e foliga mai ua ou lē lotofaamagalo, pe e lē o le māfuaaga moni ea ona o loʻu fuā pe ita faamoemoe? E mafai faapefea ona ou suia lenā mea?
7. 6:16-18 Po o oʻu mātele ea e soona manatu mamafa i oʻu foliga atu i fafo i lo loʻu tagata moni i le loto? O ā mea e tatau ona ou atili mataala i ai?
8. 6:19-32 O ā āuga e oo i ai pe afai ou te soona faamamafa le manatu i tupe ma meatotino? O le mafaufau i ā mea o le a fesoasoani iā te aʻu e tausia ai le paleni i lenei itu?
9. 7:1-5 E faapeʻī oʻu lagona pe a ou faatasitasi ma ni tagata e faamasinosino ma faitio, e vaavaai masei i taimi uma? Aiseā e tāua ai mo aʻu ona ʻalofia le iai o na uiga?
10. 7:7-11 Afai o se mea lelei le faaauau pea ona ou talosaga atu i le Atua i ni mea ou te manaʻo ai, ae faapefea la i isi tāfa o le olaga?—Luka 11:5-13.
11. 7:12 E ui lava ua ou iloa le Tulafono Faaauro, ae o faafia ona ou faatatauina lenei fautuaga i feutagaʻiga ma isi?
12. 7:24-27 Talu ai e paʻū lava iā te aʻu le faatautaia o loʻu lava olaga, e mafai faapefea ona ou sauniuni lelei mo afā o faigatā ma lologa o faafitauli? Aiseā e tatau ai ona ou manatunatu i lenei mea i le taimi nei?—Luka 6:46-49.
Aʻoaʻoga faaopoopo e mafai ona ou manatunatu i ai:
13. 8:2, 3 E mafai faapefea ona ou faaalia le agaalofa i ē ua pagatia, e pei ona sa masani ona faia e Iesu?
14. 9:9-38 O le ā le vaega a le faaalia o le alofa mutimutivale o faia i loʻu olaga, ma e mafai faapefea ona ou faaalia atu atili lenā uiga?
15. 12:19 I le aʻoaʻoina mai le valoaga e faatatau iā Iesu, po o oʻu taumafai malosi ea e ʻalofia finauga fevaevaeaʻi?
16. 12:20, 21 O le ā se lelei e mafai ona ou faia e ala i loʻu lē faamamafatū i isi o aʻu upu po o aʻu gaoioiga?
17. 12:34-37 O ā mea e tele ina ou talanoa ai? Ou te iloa pe afai ou te tatauina se moli, e tafe mai ai le sua o le moli, aiseā la e tatau ai ona ou manatunatu i mea o loo i totonu o aʻu, i totonu o loʻu loto?—Mareko 7:20-23.
18. 15:4-6 E tusa ai o manatu na faaalia e Iesu, o le ā o oʻu mātauina i le tausiga alofa o ē matutua?
19. 19:13-15 O ā mea e manaʻomia ona ou faaaluina se taimi e faia ai?
20. 20:25-28 Aiseā e lē talafeagai ai ona faaaogā le pule ona o se fiasili? E mafai faapefea ona ou faataʻitaʻi iā Iesu i lenei itu?
Manatu faaopoopo na faamauina e Mareko:
21. 4:24, 25 O le ā le uiga e faaalia i le auala ou te feutagaʻi ai ma isi?
22. 9:50 Pe afai e lelei mea o loo oʻu fai atu ai ma faia, o ā ni iʻuga lelei e mautinoa o le a maua mai ai?
Ma le vaega mulimuli lava, o nisi o aʻoaʻoga na faamauina e Luka:
23. 8:11, 14 Pe afai ou te faataga le popole, le tamaoaiga, ma fiafiaga e puleaina loʻu olaga, o le ā se mea e mafai ona iʻu i ai?
24. 9:1-6 E ui sa iā Iesu le mana e faamālōlō ai i ē mamaʻi, ae o le ā sa ia faamuamuaina i lo o lenā?
25. 9:52-56 Po o vave ea ona ou ita i se mea e faia mai iā te aʻu? Po o oʻu ʻalofia le agaga o le fia tauimasui?
26. 9:62 O le ā le vaaiga e tatau ona ou vaai ai i loʻu tiute tauave o le tautala atu e faatatau i le Malo o le Atua?
27. 10:29-37 E mafai faapefea ona ou faamaonia o aʻu o se tuaoi lelei, ae lē o se tagata e lē fiafia i isi?
28. 11:33-36 O ā suiga ou te ono faia ina ia mafai ai ona sili atu le faigofie o loʻu olaga?
29. 12:15 O le ā le faiā a le ola ma meatotino?
30. 14:28-30 Pe afai ou te faaaluina se taimi e iloilo lelei ai aʻu filifiliga, o ā mea ou te ono ʻalofia, faatasi ai ma ā aogā?
31. 16:10-12 O ā aogā ou te ono maua mai se olaga faamaoni?
[Ata i le itulau 10]
O le galuega faasaoola e ala i le amo a Iesu e mālōlō ai