O Faafitauli o le Faaeseese o Vaega o Tagata

“O LE FAATUTUSA O TAGATA ATONU O SE AIĀ, AE E LEAI SE PULE I LE LALOLAGI E MAFAI ONA FAATAUNUUINA AI.”

O le faamatalaga lea a Honoré de Balzac, o le tusitala Falani i le senituri lona 19. Pe e te ioe i lona manatu? O lagona masani o le toʻatele e faapea e lē saʻo le faaeseese o vaega o tagata. Peitaʻi, e oo lava i lenei senituri lona 21, o loo faavasegaina ai lava le sosaiete o tagata i le mau vaega o tagata e tusa o o latou tulaga.

SA MANATU mamafa Calvin Coolidge, o le peresitene o le Iunaite Setete mai le 1923 i le 1929, i le faafitauli o le faaeseese o vaega o tagata e tusa o lo latou tulaga ma na ia taʻua ai e faapea “o le a oo ina lē toe iai ni vaega maualuluga uma.” E ui i lea, pe ā ma le 40 tausaga talu mai le taimi na iai Coolidge i le tulaga peresitene, na tofia ai le Vaega Faufautua a Kerner e suʻesuʻeina faiā o ituaiga o tagata, ma na faaalia ai le popolega faapea o le a lē mafai ona taofia le avea o le Iunaite Setete ma sosaiete se lua: “o le tasi o tagata uli, a o le isi o tagata papaʻe—e vavae ese ma e lē tutusa.” Ua faapea mai nisi o lenei folafolaga ua oo ina taunuu o loo “tupu aʻe pea le eseesega i le itu tau tamaoaiga ma le eseesega o ituaiga” i lenā atunuu.

Aiseā ua faigatā tele ai ona ausia lenā uiga o le faatutusa o tagata? O se vala autū lava o uiga faaletagata. O le sui o le fono na iai muamua o le Iunaite Setete o William Randolph Hearst na iai se taimi na ia faapea mai ai: “O tagata uma lava na foafoaina e tutusa i se itu se tasi, o lo latou faanaunauga lea ia lē tutusa ma isi.” O le ā na ia uiga atu i ai? Atonu na sili atu ona faamatalaina ma le manino lenā tulaga e Henry Becque o se tagata e tusia tala i le senituri lona 19 e faapea: “O le mea na sili ona faigatā ai ona ausia le faatutusa o tagata ona e tatou te mananaʻo e faatutusa atu na o i latou o loo maualuluga aʻe iā i tatou.” I nisi faaupuga, e mananaʻo tagata e faatutusa atu iā i latou o loo maualuluga aʻe i tulaga faaleolaga nei; ae e lē toʻatele nisi e lotomalilie e faaitiitia o latou faaeaga ma o latou lelei e ala i le faatutusa atu o i latou i ē e latou te mafaufau e maulalo ifo iā i latou.

I aso ua mavae, na soifua mai ai tagata a lē o ni tagatānuu e pei ona iai le toʻatele, o ni vaega o tagata aupito maualuluga, po o ni tagata o aiga tautupu. O loo faamaonia pea lenā tulaga i nisi o vaipanoa. Peitaʻi, i le tele lava o atunuu i aso nei, o le tupe—po o le leai o ni tupe—lea e fuafua ai po o se tasi e i le vaega maulalo, feoloolo, po o le vaega maualuga. Peitaʻi, o loo iai foʻi isi vala e iloa ai le eseesega o vaega, e pei o ituaiga, tulaga tau aʻoaʻoga, ma le iloa ona faitau ma tusitusi. Ae i nisi o vaipanoa, o le avea ai o se tane po o se fafine o se vala autū lea e faavae ai le faailoga tagata ma vaai ai i fafine o se vaega e sili ona maulalo.

 Po o Tau Ataata Mai Sina Faamoemoe?

O tulafono ua uma ona faia e tusa ai o aiā a tagata na fesoasoani e aveesea nisi o vala ua taofia ai le faaeseesea o tagata. Na pāsia i le Iunaite Setete tulafono e taofia ai le faaeseeseina o tagata. I Aferika i Saute na faasāina ai e le tulafono le faaeseese o ituaiga o tagata. E ui lava o loo iai pea tagata o loo avea ma pologa, ae o lenā tulaga o loo avea ma solitulafono i le tele o vaega o le lalolagi. Ua faamalosia e faaiʻuga tau faamasinoga le amanaʻiaina o le aiā e faatatau i fanua a tagata e ona le laueleele, ma o tulafono e tetee ai i le faaeseesea o tagata ua aumaia ai se mapusaga mo nisi o loo iai le manaʻomia.

Po ua faailoa mai ai ea i inei le iʻuga o le faaeseesega o vaega o tagata? O le mea moni lava e leai. E ui lava ina faasolo ina leai atu le faia o faaeseesega i vaega o tagata, ae ua amata ona tutupu aʻe ni vaega fou. Ua faapea mai le tusi Class Warfare in the Information Age: “O vaega o tagata maumea ma ē e lē taualoa ua foliga mai ua lē o toe talafeagai ona faaeseese i aso nei, ae o le tulaga lenā ua iai ona o nei vaega toʻatele o tagata ua vaevaeina i nisi o tamaʻi vaega o tagata e lē malilie i le tulaga ua iai mea.”

Po o le faaeseesea o vaega o tagata o le a faavavau ona vaevaeina ai tagata? O le a faailoa mai e le mataupu o loo sosoo ai, o lea tulaga e lē faapea ua leai se faamoemoe.