O Kerisiano Moni Uma o ni Faievagelia
O Kerisiano Moni Uma o ni Faievagelia
“Pepese atu ia Ieova, ia outou faafetaia lona suafa; ia outou talaʻi atu lana faaolataga i lea aso ma lea aso.”—SALAMO 96:2.
1. O ā tala lelei o loo manaʻomia ona faalogo i ai tagata, ma ua faapefea ona avea Molimau a Ieova ma faataʻitaʻiga lelei i le faasalalauina atu o na tala?
I SE lalolagi o loo tutupu ai e lē aunoa mala, ua faamāfanafanaina moni lava le iloa faapea o loo folafola mai e le Tusi Paia le lata tele mai o le iʻuga o taua, solitulafono, le fia taumafa ma faiga sauā. (Salamo 46:9; 72:3, 7, 8, 12, 16) O le mea moni lava, pe e lē o tala lelei ea nei o loo manaʻomia e tagata uma taʻitoʻatasi ona faalogo i ai? O le manatu lenā o Molimau a Ieova. Ua lauiloa i latou i so o se nofoaga o ni ē e “tala mai le tala lelei.” (Isaia 52:7) E moni, e toʻatele Molimau ua puapuagatia i sauāga ona o lo latou maumauaʻi e taʻu atu le tala lelei. Ae o loo mamafa iā i latou le lelei o tagata. Ae maʻeu se talaaga o le maelega ma le maumauaʻi ua atiina aʻe e Molimau!
2. O le ā se tasi o māfuaaga mo le maelega o Molimau a Ieova?
2 O le maelega o Molimau a Ieova i aso nei e tutusa ma Kerisiano i le uluaʻi senituri. Ua taʻua ma le saʻo i latou e le nusipepa a le Katoliko Roma o le L’Osservatore Romano e faapea: “O uluaʻi Kerisiano, o le taimi lava e papatisoina ai, e latou te lagonaina ai lo latou tiute i le faasalalauina atu o le Tala Lelei. E ala i le tuugutu atu, sa taʻuina atu ai e auauna le Tala Lelei.” Aiseā ua matuā maelega ai Molimau a Ieova, e pei o uluaʻi Kerisiano? Muamua, ona o le tala lelei o loo latou faasalalauina e mai iā Ieova le Atua. Po o iai ea la se isi māfuaaga e sili atu mo le maelega? O la latou talaʻiga o se tali atu lea i upu a le faisalamo e faapea: “Ia outou pepese atu ia Ieova, ia outou faafetaia lona suafa; ia outou talaʻi atu lana faaolataga i lea aso ma lea aso.”—Salamo 96:2.
3. (a) O le ā le māfuaaga lona lua mo le maelega o Molimau a Ieova? (e) O le ā o loo aofia ai i ‘le faaolataga a le Atua’?
3 O upu a le faisalamo ua faamanatu mai ai iā i tatou le māfuaaga lona lua mo le maelega o Molimau a Ieova. O la latou feʻau o se feʻau o le faaolataga. O nisi o tagata o loo galulue i itu tau i le soifua mālōlōina, le vafealoaʻi, tamāoaiga po o isi matātā ina ia faaleleia atili ai le tulaga o uso ā tagata, ma e faamālō ai mo ia taumafaiga lelei. Peitaʻi e so o se mea lava e mafai ona faia e se tasi tagata mo se isi, e matuā tapulaa lava pe a faatusatusa atu i ‘le faaolataga a le Atua.” E ala iā Iesu Keriso, o le a faasaoina ai e Ieova o ē agamalu mai le agasala, maʻi, ma le oti. O i latou e mauaina aogā o le a ola e faavavau! (Ioane 3:16, 36; Faaaliga 21:3, 4) I aso nei, e avea le faaolataga o se tasi o “galuega matagofie” o le a toe taʻutaʻua e Kerisiano pe a latou tali atu i upu nei: “Ia outou taʻutaʻu atu lona [Atua] mamalu i nuu ese, ma ona vavega [“galuega matagofie,” NW] i nuu uma lava. Auā e silisili Ieova, e tusa foi ona matuā viia o ia; e sili ona matautia o ia i atua uma.”—Salamo 96:3, 4.
Le Faaaʻoaʻoga a le Matai
4-6. (a) O le ā le māfuaaga lona tolu mo le maelega o Molimau a Ieova? (e) Na faapefea ona faaalia e Iesu le maelega mo le galuega o le talaʻia o le tala lelei?
4 O le māfuaaga lona tolu ua maelega ai Molimau a Ieova. Ua latou mulimuli atu i le faaaʻoaʻoga a Iesu Keriso. (1 Peteru 2:21) O lenā tagata lelei atoatoa na taliaina ma le loto atoa le tofiga e “talaʻi le tala lelei i e ua tigaina.” (Isaia 61:1; Luka 4:17-21) O lea, na avea ai o ia o se faievagelia, o sē e taʻutaʻuina atu le tala lelei. Na ia femaliuaʻi mai le tasi itu seʻia oo i le isi itu o Kalilaia ma Iutaia ma “talaʻi atu foi le tala lelei o le malo.” (Mataio 4:23) Ae ona sa ia silafia faapea o le a toʻatele tagata o le a tali mai i lenā tala lelei, na ia fetalai atu ai i ona soo e faapea: “E tele le saito e seleseleina, a o le au fai galuega e toaitiiti ia; o lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.”—Mataio 9:37, 38.
5 Ina ia ōgatusa ma lana lava tatalo, na toleniina ai e Iesu isi e avea o ni faievagelia. Mulimuli ane, na ia aauina atu ai na o ona aposetolo ma taʻu atu iā i latou e faapea: “A outou o, ia outou talaʻi atu, ia faapea atu, Ua latalata mai le malo o le lagi.” Pe na lē sili ea ona talafeagai mo i latou le faatulagaina o ni polokalame e foʻia ai faafitauli tau i le vafealoaʻi i lenā taimi? Pe na tatau ea ona latou aafia i faiga faapolotiki ina ia taofia le salalau atu o amioga piʻopiʻo i lenā taimi? E leai. Na i lo lenā, na faataatia e Iesu se faatulagaga mo faievagelia Kerisiano uma ina ua ia fetalai atu i ona soo e faapea: “A outou o, ia outou talaʻi atu.”—Mataio 10:5-7.
6 Mulimuli ane, ona aauina atu lea e Iesu o le isi vaega o soo e folafola atu faapea: ‘Ua latalata le malo o le Atua.’ Ina ua latou toe foʻi atu e lipotia le taulau manuia o la latou malaga taamilo faaevagelia, na matuā fiafia le finagalo o Iesu. Na ia tatalo e faapea: “Ou te faafetai ia te oe loʻu Tamā e, o le Alii o le lagi ma le lalolagi, ina ua e nanā ia mea i e popoto ma e atamamai, a ua faaalia atu ia mea i tama valevale.” (Luka 10:1, 8, 9, 21) O soo o Iesu, o ni tagata sa galulue mamafa muamua i le avea ma faifaiva, faifaatoʻaga, ma isi lava ituaiga o galuega, sa pei o ni tama valevale pe a faatusatusa atu i tulaga maualuluga na aʻoaʻoina ai ia taʻitaʻi lotu o le atunuu. Ae na aʻoaʻoina soo e folafola atu le tala lelei silisili i tala lelei uma.
7. Ina ua mavae le afio aʻe o Iesu i le lagi, o ai na muamua talaʻi i ai e ona soo le tala lelei?
7 Ina ua mavae le afio aʻe o Iesu i le lagi, na faaauau ona folafola atu e ona soo le tala lelei o le faaolataga. (Galuega 2:21, 38-40) O ai na latou talaʻi muamua i ai? Pe na latou ō atu i nuu sa leʻi iloa le Atua? E leai, o la latou oganuu muamua lava o Isaraelu, o tagata na latou iloa lelei Ieova mo le sili atu i le 1,500 tausaga. Pe na iai sa latou aiā e talaʻi ai i se oganuu ua leva ona tapuaʻia ai Ieova? Ioe. Na taʻu atu e Iesu iā i latou e faapea: “E fai foi outou ma molimau ia te au i Ierusalema, ma Iutaia uma lava, ma Samaria, e oo lava i le tuluʻiga o le lalolagi.” (Galuega 1:8) Na manaʻomia ona faalogo Isaraelu i le tala lelei e pei foʻi o isi nuu.
8. E faapefea e Molimau a Ieova i aso nei ona faataʻitaʻi atu i soo o Iesu i le uluaʻi senituri?
8 I se tulaga talitutusa, o loo talaʻi atu Molimau a Ieova i aso nei i le lalolagi atoa. E latou te galulue faatasi ma le agelu lea na vaaia e Ioane o lē “ua ia te ia le tala lelei e faavavau e folafola atu i e nonofo i le lalolagi, i atu nuu uma, ma ituaiga, ma gagana eseese, ma nuu.” (Faaaliga 14:6, LF) I le tausaga e 2001, na latou galulue ai ma le tiotio i atunuu ma oganuu e 235, o loo aofia ai ma nisi atunuu o loo faapea mai o atunuu Kerisiano. Pe e sesē ea ona talaʻi atu Molimau a Ieova i vaipanoa ia ua uma ona faamautūina ai e Kerisinetoma ana lotu? Ua faapea mai nisi e sesē, ma e oo lava ina manatu i na faiga faaevagelia o le “gaoia o mamoe a isi.” Peitaʻi, e manatua e Molimau a Ieova lagona o Iesu na iai mo tagata Iutaia lotomaulalo o ona aso. E ui lava ua uma ona iai a latou faitaulaga, ae e leʻi faatalatū Iesu e taʻu atu iā i latou le tala lelei. Ona “mutimuti vale ai lea o lona alofa ia te i latou, ona ua lailoa i latou ma tuulafoaiina, e pei o mamoe e leai so latou leoleo.” (Mataio 9:36) Pe a maua e Molimau a Ieova tagata lotomaulalo o ē e leai se iloa e faatatau iā Ieova ma lona Malo, pe e tatau ea ona latou taofia le tala lelei mai na tagata ona e faapea o loo pulea i latou e se lotu? O le mulimuli i le faaaʻoaʻoga a aposetolo o Iesu, e tatou te tali atu ai e leai. E tatau ona talaʻia le tala lelei “i nuu uma lava,” o le mea e ao ona fai.—Mareko 13:10.
O Uluaʻi Kerisiano Uma o ni Faievagelia
9. I le uluaʻi senituri, o ai i le faapotopotoga Kerisiano na auai i le galuega talaʻi?
9 O ai i le uluaʻi senituri na auai i le galuega talaʻi? Ua faaalia e mea moni faapea o Kerisiano uma lava o ni faievagelia. Na mātauina e le tusitala o W. S. Williams e faapea: “O le talitonuga taatele e faapea o Kerisiano uma na iai i le uluaʻi Lotu . . . na latou talaʻia le tala lelei.” E tusa ai ma mea na tutupu i le aso Penetekoso o le 33 T.A., ua faapea mai le Tusi Paia: “Ua faatutumuina foi i latou [tane ma fafine] uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.” Sa avea ma faievagelia ia tane ma fafine, talavou ma ē matutua, o pologa ma ē saʻoloto. (Galuega 1:14; 2:1, 4, 17, 18; Ioelu 2:28, 29; Kalatia 3:28) Ina ua faamalosia le toʻatele o Kerisiano e sosola ese mai Ierusalema ona o sauaga, o ‘e na faasalalauina, na ō solo ma latou folafola atu le tala lelei o le upu.’ (Galuega 8:4) O i latou uma “na faasalalauina,” sa lē faapea sa na o ni nai tagata tofia, na fai ma faievagelia.
10. O le ā le tofiga vala lua na faataunuuina a o leʻi faaumatia le faiga o mea faa-Iutaia?
10 Na faamaonia le moni o lenei mea i le faagasologa o uluaʻi tausaga. Na valoia e Iesu e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) O le faataunuuina o na upu i le uluaʻi senituri, sa matuā lautele ai le mea na oo atu i ai le talaʻiga, a o leʻi faaumatia e ʻautau a Roma le faiga o mea faalotu ma faalemalo a Iutaia. (Kolose 1:23) E lē gata i lea, na usitaia e soo uma o Iesu le faatonuga: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia; ia outou aʻoaʻo atu ia te i latou ia tausi i mea uma ua ou fai atu ai ia te outou.” (Mataio 28:19, 20) Sa leʻi timaʻi e uluaʻi Kerisiano i latou na agamalu e talitonu iā Iesu ona tuu lea o i latou e auauna atu i le Atua i la latou lava auala e aunoa ma se taʻitaʻiga e pei ona faia e nisi o tagata talaʻi i aso nei. Na i lo lenā, na latou aʻoaʻoina i latou ia avea ma soo o Iesu, faamaopoopoina i faapotopotoga ma toleniina i latou ina ia mafai foʻi ona talaʻi atu le tala lelei ma faia soo. (Galuega 14:21-23) O loo mulimuli Molimau a Ieova i lenā lava faatulagaga.
11. O ai i aso nei o loo auai i le folafolaina atu o le tala lelei sili i tagata?
11 I le mulimuli atu i faaaʻoaʻoga i le uluaʻi senituri a Paulo, Panapa ma isi, ua toʻatele ai Molimau a Ieova, ua ō atu o ni misionare i atunuu ese. Ua aogā moni lava la latou galuega, talu ai latou te lē aafia i faiga faapolotiki po o le see ese i nisi auala mai le poloaʻiga o le talaʻia o le tala lelei. Na latou usitaia lava le faatonuga a Iesu: “A outou o, ia outou talaʻi atu.” Peitaʻi, o le toʻatele o Molimau a Ieova e lē o ni misionare i atunuu mamao. O le toʻatele lava o loo tausia i latou e ala i le faia o galuega totogi, ma o isi o loo iai pea i aʻoga. O nisi o loo tausia aʻe ni fanau. Ae o Molimau uma lava, o loo tufaina atu i isi le tala lelei ua latou aʻoaʻoina. O talavou ma ē matutua, tane ma fafine, ua latou tali atu ma le olioli i timaʻiga a le Tusi Paia e faapea: “Ia e talaʻi atu le upu, ia e faamalosi i ona aso e taugalemu ai, ma ona aso e le taugalemu ai.” (2 Timoteo 4:2) I le pei o ē na muamua atu iā i latou, sa latou leʻi ‘mapu i aso uma ona aʻoaʻo atu, ma talaʻi atu le tala lelei ia Iesu Keriso.’ (Galuega 5:42) Ua latou folafola atu le tala lelei sili i tagata.
Faaliulotuina po o le Faaevagelia?
12. Ua faapefea ona vaai i le faaliulotu?
12 I aso nei, ua faapea mai nisi o le faaliulotu o se mea e mataʻutia. Sa taʻua foʻi i se pepa faamaonia na lomiaina e le Faalapotopotoga Aoao a Lotu a le Lalolagi e faapea o “le agasala le faia o le faaliulotu.” Aiseā? Ua taʻua e le Catholic World Report e faapea: “O le faia pea lava pea o faitioga a le lotu Orthodox, ua manatu ai loa faapea o le ‘faaliulotu’ ua avea o se faiga e fai faamalosi.”
13. O ā nisi o faaaʻoaʻoga o le mataʻutia o le faaliulotu?
13 Pe e mataʻutia ea le faaliulotu? E mafai ona mataʻutia. Sa taʻua e Iesu faapea o le faaliulotu lea sa faia e tusiupu ma Faresaio na mataʻutia mo ē na latou faaliliuina. (Mataio 23:15) O le mea moni, e sesē le ‘liulotu e faia faamalosi.’ O se faaaʻoaʻoga e tusa ai ma le tagata tusitala o talafaasolopito o Josephus, ina ua faatoʻilaloina e le Makapaio o John Hyrcanus ia tagata Itumaia, na ia “faataga i latou e nonofo ai pea i lo latou atunuu pe afai e peritomeina i latou ma lotomalilie e tausia tulafono a tagata Iutaia.” Pe afai o le a ola tagata Itumaia i lalo o le pulega a tagata Iutaia, e tatau la ona latou faia ia tū a le lotu Iutaia. Ua taʻu mai e tagata tusitala o talafaasolopito iā i tatou faapea o le senituri lona valu T.A., na faatoʻilaloina ai e Charlemagne ia tagata Saxon faapaupau i le itu i mātū o Europa ma faamalosia ma le sauā i latou e liulotu. * E lē o se mea la e faateʻia ai faapea o le faaliulotuina o tagata Saxon ma tagata Itumaia sa leʻi saʻo le auala na faia ai, ma o le tupu Itumaia o Herota—o lē na taumafai e fasiotia le tamameamea o Iesu—sa leʻi pipii atu i le Tulafono faagaeeina a Mose.—Mataio 2:1-18.
14. O faapefea e nisi o misionare a Kerisinetoma ona faamalosia tagata ina ia liulotu?
14 Po o fai faamalosi ea le faaliulotu i aso nei? I sona uiga, ioe o loo faia e nisi. O nisi o misionare a Kerisinetoma na lipotia mai faapea na latou ofoina atu iā i latou na ono faaliulotuina, ia ni sikolasipi e malaga atu ai i fafo. Pe e latou te faamalosia se tagata sulufaʻi o loo matelāina ina ia faalogologo i se lauga ona faatoʻā maua lea o se taumafataga. E tusa ai ma se faamatalaga na tuuina mai i le 1992 e le fonotaga a Akiepikopō a le Orthodox na faapea mai, “o le faaliulotu e tupu mai i nisi taimi e ala i le faatosinaina i mea faitino, ma o nisi taimi e ala i ituaiga sauāga eseese.”
15. Po o faaliulotuina e Molimau a Ieova tagata e tusa ai o le uiga faaonapōnei o le upu? Faamatala.
15 E sesē le faamalosia o tagata e suia a latou lotu. E mautinoa e lē o gaoioi Molimau a Ieova i lenā auala. * O lea la, e latou te lē o faaliulotuina tagata e tusa ai o le uiga faaonapōnei o le upu. Ae i le pei o Kerisiano o le uluaʻi senituri, e latou te talaʻia le tala lelei i tagata uma. O so o se tasi lava e tali mai ma le fiafia, e valaaulia e faaauau ona ave i fale le poto e ala i le faia o se suʻesuʻega faale-Tusi Paia. O na tagata fiafia ua latou aʻoaʻoina e tuu atu lo latou faatuatua, lea o loo faavae mausalī aʻe i le poto o le Tusi Paia, i le Atua ma ana fuafuaga. O le iʻuga, ua latou valaau atu ai i le suafa o le Atua, o Ieova, mo le faaolataga. (Roma 10:13, 14, 17) Pe e latou te taliaina le tala lelei pe leai, o le filifiliga totino lea a le tagata lava ia. E lē faamalosia lea tulaga. Afai e fai faapea, o le a lē uigā le faaliliuga. Ina ia taliaina e le Atua, e tatau ona tapuaʻi mai le loto.—Teuteronome 6:4, 5; 10:12.
Le Faaevagelia i Aso Nei
16. Ua faapefea ona faateleina le galuega faaevagelia a Molimau a Ieova i aso nei?
16 I le faagasologa o aso nei, ua talaʻia ai e Molimau a Ieova le tala lelei o le Malo i se faataunuuga e sili atu o le Mataio 24:14. O le meafaigaluega autū i la latou galuega faaevagelia, o le mekasini o Le Olomatamata. * I le 1879, ina ua lomia uluaʻi lomiga o Le Olomatamata, na tufaina atu ai kopi pe tusa o le 6,000 i le gagana e tasi. I le tausaga e 2001, ua silia ma le 122 tausaga mulimuli ane ai, na oo atu le numera o kopi na lomia i le 23,042,000 i gagana e 141. Na ōgatusa lenā faatelega ma le tuputupu aʻe o le galuega faaevagelia a Molimau a Ieova. Seʻi faatusatusa nai afe o itula na faaaluina i tausaga taʻitasi i le galuega faaevagelia i le senituri lona 19, ma itula e 1,169,082,225 na tuutoina atu mo le galuega talaʻi i le tausaga e 2001. Manatunatu i le fua faatatau o le 4,921,702 o suʻesuʻega faale-Tusi Paia na faia i aiga, e aunoa ma se totogi i masina taʻitasi. Maʻeu le tele o galuega lelei na faataunuuina! O nei galuega na faia e le 6,117,666 o tagata talaʻi tiotio o le Malo.
17. (a) O ā ituaiga o atua sesē o loo tapuaʻia i aso nei? (e) Po o le ā lava lana gagana, le atunuu, po o le tulaga faaletagata, o le ā e manaʻomia ona iloa e tagata uma?
17 Ua faapea mai le faisalamo: “Auā o atua uma o nuu o tupua lava ia; a o Ieova, na ia faia le lagi.” (Salamo 96:5) I le lalolagi lautele i aso nei, o le lotonuu, faailoga faaleatunuu, tagata taualoa, mea faitino, e oo lava i le tamāoaiga ua avea ma mea e tapuaʻi i ai. (Mataio 6:24; Efeso 5:5; Kolose 3:5) Na iai se taimi na faapea mai ai Mohandas K. Gandhi: “O loʻu manatu maumaututū e faapea . . . o Europa i aso nei ua na o ni Kerisiano i se taʻu. Ua matuā tapuaʻi lava i Mamone [ʻoa].” O le mea moni lava, e manaʻomia ona faalogo tagata i so o se nofoaga i le tala lelei. Po o le ā lava lana gagana, le atunuu, po o le tulaga faaletagata, e manaʻomia e tagata uma lava ona iloa e faatatau iā Ieova ma ana fuafuaga. O lo tatou faanaunauga ia tali uma atu tagata i upu a le faisalamo e faapea: “Ia outou avatua ia Ieova le viiga ma le malosi. Ia outou avatua ia Ieova le viiga o lona suafa”! (Salamo 96:7, 8) Ua fesoasoani Molimau a Ieova i isi e aʻoaʻoina e faatatau iā Ieova ina ia mafai ai ona latou avatua ma le tonu le viiga iā te ia. Ua matuā aogā nei aʻoaʻoga iā i latou o loo tali mai i ai. O ā aogā ua latou olioli ai? O le a talanoaina nei aogā i le mataupu o loo sosoo mai.
[Faamatalaga pito i lalo]
^ pala. 13 E tusa ai ma le faamatalaga a le Catholic Encyclopedia, a o faagasolo le Toe Fuataʻiina, o le soona faamalosia o manaʻoga o se lotu i tagata na faailoaina i se matua tauave e faapea: Cuius regio, illius et religio (O le uiga moni o lenei mea: “Po o ai lava e pulea le atunuu e na te filifilia foʻi le lotu a lea atunuu.”)
^ pala. 15 I se fono a le Komisi mo le Saʻolotoga Faavaomalo o Lotu i le Iunaite Setete iā Novema 16, 2000, na faia ai e se tasi na auai se faaeseesega o ē na taumafai e faamalosia le faaliliuga ma le galuega a Molimau a Ieova. Na taʻua e faapea pe a talaʻi atu Molimau a Ieova i isi, e latou te faia i se auala e mafai ai e se tagata ona faapea atu “Ou te lē fiafia” ma tapuni mai le faitotoʻa.
^ pala. 16 O le ulutala atoa o le mekasini o Le Olomatamata Faasilasilaina le Malo o Ieova.
Pe Mafai Ona E Faamatala?
• Aiseā ua avea ai Molimau a Ieova o ni faievagelia maelega?
• Aiseā ua talaʻi ai Molimau a Ieova e oo lava i nofoaga ua uma ona faavaeina ai lotu e Kerisinetoma?
• Aiseā ua lē avea ai Molimau a Ieova o ni ē e faaliulotuina tagata e tusa ai o le uiga faaonapōnei o le upu?
• Ua faapefea ona tuputupu aʻe le galuega faaevagelia a Molimau a Ieova i aso nei?
[Fesili mo le Suʻesuʻega]
[Ata i le itulau 9]
Sa avea Iesu ma faievagelia maelega ma na ia toleniina isi e faia lea lava galuega
[Ata i le itulau 10]
Sa auai uma tagata o le faapotopotoga i le uluaʻi senituri i le faaevagelia
[Ata i le itulau 11]
E sesē le faamalosia o tagata e suia a latou lotu