Toeaina e, Ia Toleni Isi e Tauaveina le Avega

I FAAPOTOPOTOGA a Molimau a Ieova i le lalolagi aoao, o loo iai se manaʻoga faanatinati mo tane o ē e mafai ona auauna i tulaga tau i le vaavaaiga o le faapotopotoga. E tolu ni māfuaaga autū ua tulaʻi mai ai lenei manaʻoga.

Muamua, o loo faataunuuina e Ieova lana folafolaga o le avea lea o “le ua faatauvaa e fai ma nuu malosi.” (Isaia 60:22) E ala i lona alofa tunoa, na toetoe lava miliona soo fou sa papatisoina e avea ma Molimau a Ieova i tausaga e tolu ua mavae. Ua manaʻomia ni tane faatuatuaina e fesoasoani i nei tagata papatiso fou ina ia agaʻigaʻi i luma i le taʻumatuaina faa-Kerisiano.—Eperu 6:1.

O lona lua, o nisi o loo auauna o ni toeaina mo le faitau sefulu o tausaga, ua tatau ona tuuitiitia galuega o loo latou tauaveina i le faapotopotoga ona o le tulaga matua ma faafitauli tau i le soifua mālōlōina.

O lona tolu, ua auauna nei se aofaʻiga tele o toeaina Kerisiano maelega o ni sui o Komiti o Fesootaʻiga Faafomaʻi, Komiti o Faugāfale, po o Komiti o Maota mo Fonotaga. I nisi o tulaga, e tatau ai ona latou mauaina le paleni i o latou tiute tauave eseese e ala i le faamatuu atu o nisi o a latou matāfaioi i a latou faapotopotoga.

E mafai faapefea ona faafetaiaʻia le manaʻoga faanatinati mo nisi tane agavaa? O le ki, o toleniga. Ua faalaeiauina e le Tusi Paia ovasia Kerisiano ina ia toleniina “tagata faamaoni, o e ua mafaia ona aʻoaʻoina atu i nisi.” (2 Timoteo 2:2) E tusa ai o se lomifefiloi, o le veape “ia toleni” o lona uiga ia aʻoaʻo ina ia fetaui, agavaa, pe tomai. Seʻi o tatou tilofaʻia auala e mafai ai e toeaina ona toleniina isi tane agavaa.

Ia Mulimuli i le Faaaʻoaʻoga a Ieova

Na mautinoa le fetaui, agavaa, ma le tomai o Iesu Keriso i lana galuega—ma e lē o se mea e faateʻia ai! Sa toleniina o ia e Ieova le Atua lava ia. O ā vala na matuā uigā ai lenei polokalame o toleniga? Na taʻua e Iesu vala e tolu, e pei ona faamauina i le Ioane 5:20: “[1] O loo alofa le Tamā i le Atalii, ua [2] faaali mai foi ia te ia mea uma lava e faia e ia; e faaali mai foi e ia ia te ia [3] galuega silisili i ia galuega.” O se vaʻiliʻiliga o nei vala taʻitasi o le a mauaina ai se malamalamaga i le mataupu tau i toleniga.

Ia mātau na muamua faapea mai Iesu: “O loo alofa le Tamā i le Atalii.” Mai lava i le amataga o le foafoaga, na iai se faiā māfana i le va o Ieova ma lona Alo. Ua aumaia e le Faataoto 8:30 se faamatalaga e uiga i lenā faiā e faapea: “Na ou [Iesu] i ai ma ia [Ieova le Atua], o aʻu o le tufuga; na fai foi aʻu mona fiafia [“faapitoa,” NW] i lea aso ma lea aso; sa ou olioli i ona luma i aso uma lava.” Na lē masalomia le silafia e Iesu o le “fiafia faapitoa” o Ieova iā te ia. Ma sa leʻi natia e Iesu le olioli sa iā te ia a o galulue faatasi ma lona Tamā. Maʻeu le lelei o le iai o se faiā māfana ma le saʻoloto i le va o Kerisiano toeaina ma i latou o loo latou toleniina!

O le vala lona lua lea na taʻua e Iesu, o le Tamā e “faaali mai foi ia te ia mea uma lava e faia e ia.” O nei upu ua faamautinoa mai ai mea o loo taʻua i le Faataoto 8:30, e faapea o Iesu na “i ai” faatasi ma Ieova a o foafoaina le lalolagi. (Kenese 1:26) E mafai e toeaina ona mulimuli i lenā faaaʻoaʻoga sili ona lelei e ala i le galulue vavalalata ma auauna o le faiva, e faailoa atu iā i latou le auala e faataunuuina atoatoa ai o latou tiute. Peitaʻi, o auauna o le faiva ia faatoʻā tofiaina, ua lē na o i latou e manaʻomia se toleniga auiluma. Ae faapefea uso faamaoni ua leva ona aapa atu i le tulaga o ni ovasia ae e leʻi tofiaina lava? (1 Timoteo 3:1) E tatau i toeaina ona ofoina atu ni fautuaga patino i na tane ina ia latou iloaina ai vala e manaʻomia ona faaleleia.

 Mo se faaaʻoaʻoga, atonu e iai se auauna o le faiva e maufaatuatuaina, tausi taimi, ma faamaoni i le taulimaina o ona tiute. Atonu foʻi o sē e lelei lana aʻoaʻo atu. I le tele o itu, atonu na te faia ai galuega sili ona lelei i le faapotopotoga. Peitaʻi, atonu na te lē o iloaina lona feagai ai ma isi uso Kerisiano i se auala ʻinaʻinā. E manaʻomia e toeaina ona faaalia “le agamalu o i ai le poto.” (Iakopo 3:13) Pe e lē o se faiga agalelei ea la mo se toeaina le talanoa atu i lenā auauna o le faiva, taʻu manino atu i ai le faafitauli, avatu ni faaaʻoaʻoga patino, ma faia ni fautuaga aogā e faaleleia ai? Pe afai e ‘faamāi e le toeaina lana fautuaga i le masima,’ atonu la o le a talia lelei ana fautuaga. (Kolose 4:6) O le mea moni, o le a fesoasoani le auauna o le faiva e faafaigofie atili le galuega a toeaina e ala i le gauaʻi atu ma taliaina so o se fautuaga na te mauaina.—Salamo 141:5.

I nisi faapotopotoga, ua saunia ai e toeaina mo auauna o le faiva se toleniga aogā faifai pea. Mo se faaaʻoaʻoga, e latou te ō ma ave ni auauna o le faiva agavaa pe a latou asiasi atu i tagata mamaʻi po o ē e matutua. I lenei auala e mauaina ai e auauna o le faiva se poto masani i le auala e faia ai le galuega faaleoleo mamoe. Ae, e tele atu foʻi nisi mea e mafai ona faia e se auauna o le faiva e faaleleia ai lona agaʻigaʻi i luma faaleagaga.—Tagaʻi i le pusa o loo i lalo ua faaulutalaina faapea, “O Mea e Mafai Ona Faia e Auauna o le Faiva.”

O le vala lona tolu na matuā uigā ai le toleniga a Iesu, ona sa toleniina e Ieova o ia faatasi ai ma le manatu i se faatelega i le lumanaʻi. Na fetalai Iesu e faapea o le a faaalia e le Tamā i le Alo “galuega silisili i ia galuega.” O le poto masani na maua e Iesu a o iai i le lalolagi, ua mafai ai ona ia atiina aʻe uiga o le a ia manaʻomia mo le faataunuuina o ni tofiga i le lumanaʻi. (Eperu 4:15; 5:8, 9) Mo se faaaʻoaʻoga, maʻeu se tofiga mamafa o le a lē pine ae maua e Iesu—o le faatutūina aʻe ma le faamasinoina o le faitau piliona o tagata ua maliliu nei!—Ioane 5:21, 22.

Pe a toleniina auauna o le faiva, e tatau ona mafaufau toeaina i manaʻoga mo le lumanaʻi. A o foliga mai o loo lava toeaina ma auauna o le faiva o loo tausia manaʻoga mo le taimi nei, pe o le a tumau pea lenei tulaga pe a faavaeina se isi faapotopotoga fou? Ae ā pe afai e faavaeina ni faapotopotoga se tele? A o faagasolo tausaga e tolu ua mavae, sa silia ma le 6,000 faapotopotoga fou i le lalolagi aoao. Maʻeu se aofaʻiga tele o toeaina ma auauna o le faiva o loo manaʻomia mo le tausiaina o na faapotopotoga fou!

Toeaina e, po o tou mulimuli i le faaaʻoaʻoga a Ieova o le faatupuina aʻe o se faiā totino ma le māfana ma tane o loo outou toleniina? Po o tou faasinoina atu le auala e faataunuu ai a latou galuega? Pe o outou mataalia i manaʻoga mo le lumanaʻi? O le mulimuli atu i le faaaʻoaʻoga a Ieova i lona toleniina o Iesu o le a iʻu ai i faamanuiaga faaʻoaina mo le toʻatele.

 Aua le Fefe e Faasafua Atu

O toeaina agavaa o ē e masani ona tauaveina le tele o tiute tauave mamafa e ono faatalatū i le faasafuaina atu o le tulaga pule i isi. Atonu ona sa latou taumafai e faia faapea i le taimi ua mavae ae leai ni iʻuga faamalieloto na maua mai ai. O lea atonu latou te manatu ai e faapea: ‘Afai e te manaʻo i se galuega ina ia lelei ona fai, e tatau ona e faia e oe lava.’ Ae pe e ōgatusa lenei manatu ma le finagalo o Ieova, e pei ona faailoaina mai i le Tusi Paia faapea e mauaina e tane e itiiti lo latou poto masani le toleniga mai iā i latou e tele atu lo latou poto masani?—2 Timoteo 2:2.

Na faagaulēmalie le aposetolo o Paulo ina ua tuua e se tasi o ana aumea femalagaaʻi, o Ioane Mareko, lona tofiga i Pafulia ma toe foʻi i lona aiga. (Galuega 15:38, 39) Peitaʻi, sa leʻi faatagaina e Paulo lenā faalavelave na tupu ma mea e faavaivai ai o ia mai le toleniina o isi. Na ia filifilia se isi uso talavou, o Timoteo, ma toleniina o ia i le galuega faamisionare. * (Galuega 16:1-3) Talu ai le faafesagaʻia e misionare o teteega malolosi i Perea, sa lē talafeagai ona nofo ai pea Paulo i inā. O lea na ia tuuina atu ai le vaavaaiga o le faapotopotoga fou iā Sila, o se uso matua taʻumatuaina, ma Timoteo. (Galuega 17:13-15) E lē taumatea na aʻoaʻoina e Timoteo le tele o mea mai iā Sila. Mulimuli ane, ina ua saunia Timoteo e tauaveina nisi tiute tauave faaopoopo, na auina atu e Paulo o ia i Tesalonia e faalaeiau le faapotopotoga i inā.—1 Tesalonia 3:1-3.

Sa leʻi pei le faiā a Paulo ma Timoteo o se faiā faapisinisi, e lē māfana, pe e lē faaleuō. Sa iai se sootaga māfana i lo la va. Ina ua tusi atu i le faapotopotoga i Korinito, na faapea atu Paulo e uiga iā Timoteo, o lē na ia fuafua e auina atu i inā, o sona “atalii pele lea ma le faamaoni i le Alii.” Na ia faapea mai atili: “O [Timoteo] na te faamanatu ia te outou o laʻu amio i le galuega a Keriso.” (1 Korinito 4:17) Na tali atu Timoteo i le toleniga na ia maua mai iā Paulo, i le avea o sē e agavaa i le faataunuuina o ona tofiga. E toʻatele uso talavou ua avea ma auauna o le faiva agavaa, se toeaina, po o se ovasia femalagaaʻi ona ua ia mauaina aogā mai toleniga a toeaina alolofa o ē na faaalia le naunau moni iā te ia, e pei ona sa faia e Paulo iā Timoteo.

Toeaina e, Ia Toleni Isi!

Ua manino le faataunuuina i aso nei o le valoaga i le Isaia 60:22. Ua faia e Ieova “le ua faatauvaa e fai ma nuu malosi.” Ina ia faatumauina pea le “malosi” o le nuu, e tatau ona faamaopoopoina lelei. Toeaina e, aiseā e lē tilofaʻia ai auala e mafai ona tuuina atu ai toleniga faaopoopo i tane tuuina atu o ē ua agavaa ona mauaina? Ia faamautinoa ua malamalama lelei auauna o le faiva taʻitoʻatasi i so o se faaleleiga o loo manaʻomia ona ia faia e agaʻigaʻi ai i luma. Ma o outou uso papatiso, ia faaaogā tatau so o se fautuaga patino e tuuina atu iā te outou. Ia faaaogā lelei avanoa e faateleina ai lou tomai, le poto, ma le poto masani. E mautinoa o le a faamanuiaina e Ieova lenā polokalame ua avea ma fesoasoani agaalofa.—Isaia 61:5.

[Faamatalaga pito i lalo]

[Pusa i le itulau 30]

O Mea e Mafai Ona Faia e Auauna o le Faiva

A o tatau i toeaina ona tuuina atu toleniga mo auauna o le faiva, e tele atu mea e mafai ona faia e auauna o le faiva e faaleleia ai lo latou agaʻigaʻi i luma faaleagaga.

—E tatau i auauna o le faiva ona filigā ma maufaatuatuaina i le taulimaina o o latou tofiga. E tatau foʻi ona latou atiina aʻe ni masaniga lelei o suʻesuʻega. O le agaʻigaʻi i luma, e tele ina faalagolago atu i suʻesuʻega ma le faatatauina o mea ua aʻoaʻoina.

—Pe a sauniuni se auauna o le faiva e faia se lauga i se sauniga faa-Kerisiano, e lē tatau ona ia faatalatū e talosaga atu i se toeaina agavaa mo ni fautuaga i le auala e taulima ai le mataupu.

—E ono talosagaina foʻi e se auauna o le faiva se toeaina ina ia vaavaaia ma le faaeteete le auala o loo ia faia ai se lauga faale-Tusi Paia ma ia ofoina atu se fautuaga mo se faaleleiga.

E tatau i auauna o le faiva ona saʻilia, taliaina, ma faatatauina fautuaga mai toeaina. I lenei auala, o le a “iloa ai e tagata uma” lo latou agaʻigaʻi i luma.—1 Timoteo 4:15.