Faatuatua iā Ieova le Atua e Moni

Pe na e vaavaai atu i le vanimonimo i se pō maninoa ma vaaia ai le faitau selau o fetu? Pe e mafai ona e faamatala mai le auala ua māfua ai ona iai na mea?

I LE taaligoligoa o le pō, na peiseaʻī ai na alalaga atu fetu i le tupu o Isaraelu anamua o Tavita, ua uunaʻia ai o ia e tusia e faapea: “Ua tala mai e le lagi le mamalu o le Atua; ua faaalia foi e le va nimonimo le galuega a ona aao.” (Salamo 19:1) Ioe, o Lē na Foafoaina Mea ae lē o le foafoaga e tatau ona ʻtuuina atu i ai le viiga, ma le faaneeneega, ma le mana.’—Faaaliga 4:11; Roma 1:25.

Ua faapea mai le Tusi Paia: “O le na te saunia mea uma lava o le Atua lea.” (Eperu 3:4) Ioe, o le Atua moni, ʻo lē e ou le suafa o Ieova, o le Silisili ese i le lalolagi uma.’ (Salamo 83:18) Ma e lē o ia o se atua taufaasesē—se atua e lē moni. Na fetalai Iesu Keriso e faatatau i lona Tamā faalelagi, o Ieova: “Ua moni lava o ia ua auina mai aʻu.”—Ioane 7:28.

O Ieova—O Lē Faataunuuina Ana Fuafuaga

O le suafa tutasi o le Atua, o Ieova, o loo aliali mai e toetoe lava 7,000 taimi i na o Tusitusiga Eperu. O lenā lava suafa, ua faasino atu i le mea moni e faapea, e iai moni lava o ia. O le uiga moni o le suafa o le Atua “O Ia Lava ua Māfua ai Ona Iai.” O le mea lea ua faailoa mai ai e Ieova le Atua o ia lava e faapea, o Lē e Faataunuuina ana fuafuaga. Ina ua fesiligia e Mose le Atua po o ai lona suafa, na faamatala faalauaʻitele atu faapenei e Ieova lona uiga: “O aʻu o lē ola, o loo ola lava.” (Esoto 3: 14) Ua taʻua tuusaʻo lava i le faaliliuga a Rotherham e faapea: “O le a Avea Aʻu lava ma so o se mea ou te loto i ai.” Sa avea Ieova, pe na filifili Ieova e avea o ia lava ma so o se mea sa manaʻomia ina ia faataunuuina moni ai ana fuafuaga ma folafolaga amiotonu. I lea, ua ia tauaveina ai le tele o ni tofiga mataʻina, e pei o Lē na Foafoaina Mea, le Tamā, le Alii Pule Silisili ese, le Leoleomamoe, Ieova o ʻau, Le Faafofoga tatalo, Faamasino, Le Aʻoaʻo Sili, o Lē na Faatauina.—Faamasino 11:27; Salamo 23:1; 65:2; 73:28; 89:26; Isaia 8:13; 30:20; 40:28; 41:14.

E na o le Atua moni lava ua tonu ona tauaveina le suafa o Ieova, auā e lē mafai e tagata ona mautinoa po o le a faataunuuina a latou fuafuaga. (Iakopo 4:13, 14) E na o Ieova lava e mafai ona faapea mai: “E pei ona totō ifo o le ua ma le kiona mai le lagi, a e le toe foi atu i ai, a e peitai e faasūsūina ai le laueleele, ma fua mai ai, ma totogo mai ai, e tupu mai ai saito i lē lulu saito ma mea e ʻai i le ua ʻai; e faapea foi laʻu upu e alu atu ai loʻu gutu, e le foi mai fua ia te au; a e peitai e faia le mea ou te loto i ai, e manuia foi i le mea ou te auina atu ai.”—Isaia 55:10, 11.

E faia e Ieova lana fuafuaga ma le mautinoa ma o lea e oo lava i mea e foliga mai e lē moni i tagata, ae i lana silafaga, e faataunuuina moni lava. Ina ua mavae se taimi umi talu ona maliliu ia Aperaamo, Isaako, ma Iakopo, na taʻua i latou e Iesu i lona fetalai mai: “E le o [Ieova] le Atua  ia o e ua oti, a o e ola; auā ua ola uma ia te ia.” (Luka 20:37, 38) Ua maliliu uma nei augatamā faatuatua e toʻatolu, ae o le fuafuaga a le Atua ina ia toe faatutūina i latou e matuā mautinoa lava le faataunuuina, auā i lana silafaga, e pei lava o loo soifua mai i latou uma. O le toe faafoʻisia o nei auauna faamaoni o aso ua mavae i le ola, e lē faigatā iā Ieova, e pei o le taimi na ia foafoaina ai le uluaʻi tagata mai le efuefu o le eleele.—Kenese 2:7.

Ua saunia e le aposetolo o Paulo se isi faaaʻoaʻoga o le mea moni e faapea, o le Atua ua māfua ai ona faataunuuina ana fuafuaga. I le Tusi Paia, o loo taʻua ai Aperaamo o le “tamā o nuu e tele.” (Roma 4:16, 17) A o leʻi iai se fanau a Aperamo, na suia ai e Ieova lona igoa iā Aperaamo, o lona uiga o le “Tamā o le Motu o Tagata (Toʻatele).” Na faapogaia e Ieova le uiga o lenā igoa ina ia avea o se mea moni e ala i lona faafoʻisia faavavega o le malosi fanautama o Aperaamo ua toeaina ma lana avā o Sara ua loomatua.—Eperu 11:11, 12.

I le tuuina atu i ai o le tele o le mana ma le pule, na talanoa ai Iesu Keriso e uiga i mea moni mai se vaaiga e sili ona maualuga na i lo o le vaaiga a tagata. E ui lava ina ua maliu lana uō mamae o Lasalo, ae na taʻu atu e Iesu i ona soo: “O loo moe la tatou uo o Lasalo; a e ou te alu e fafagu ia te ia.” (Ioane 11:11) Aiseā na fetalai ai Iesu e uiga i se tagata ua maliu e faapea, o loo na ona moe o ia?

Ina ua taunuu atu Iesu i Petania le nuu o Lasalo, sa maliu atu o ia i le tuugamau ma poloaʻi ina ia fuli ese le maa lea sa pupuni ai le gutu o le tuugamau. Ina ua uma ona tatalo leotele, ona ia poloaʻi atu lea: “Lasalo e, ina sau ia i fafo.” Ma a o taulaʻi atu le vaai a tagata o loo matamata atu i le tuugamau, “ona alu ai lea i fafo o le na oti, ua fusifusia ona vae ma ona lima i fusi, ua fusi foi ona mata i le solosolo.” Ona fetalai atu lea o Iesu: “Tatala ia ia te ia, ina tuu atu ia e alu.” (Ioane 11:43, 44) Na toe faatūina e Iesu Lasalo—ma toe faafoʻisia le ola i se tagata o lē na maliu mo aso e fā! Sa leʻi faauiga sesē e Keriso le upu moni ina ua ia fetalai atu e faapea, o loo moe lana uō. I le silafaga a Ieova ma Iesu, o Lasalo lea ua maliu, sa pei lava o loo na ona moe. Ioe, sa manatu mamafa Iesu ma lona Tamā faalelagi i le faia o mea moni.

E Mafai e Ieova Ona Faaliliuina o Tatou Faamoemoega i Mea Moni

Maʻeu se eseesega o loo iai i le va o atua pepelo ma le Atua moni! O tagata e tapuaʻi i tupua, ua latou manatu sesē i mea o loo latou tapuaʻia e faapea ua sili atu lo latou malosi na i lo tagata. Ae peitaʻi, e lē mafai e na faiga faaaloalo ona avatu ai se tomai faivavega i nei tupua. I le isi itu, e mafai e Ieova le Atua ona faasino atu ma le tonu i ana auauna ua leva ona maliliu e pei lava o loo soifua mai i latou, talu ai e mafai ona ia toe faafoʻisia le ola iā i latou. “O Ieova o le Atua moni ia,” ma e lē mafai ona ia faasesēina ona tagata.—Ieremia 10:10.

Maʻeu le faamāfanafanaina ai i le iloa e faapea, i le taimi atofaina a Ieova, o le a toe faatutūina mai ai i latou ua maliliu, o i lona finagalo—toe faafoʻisia i le ola! (Galu 24:15) Ioe, o le toetū, e aofia ai le toe faafoʻisia o uiga o le tagata a o ola. I le manatuaina o uiga o tagata ua maliliu ma le toe faatutūina mai o i latou, e lē o se mea faigatā lea i Lē na Foafoaina Mea, o lē e matuā tele le atamai ma le mana. (Iopu 12:13; Isaia 40:26) Talu ai o Ieova e tele lona alofa, o le a ia faaaogā ai lona mafaufau lelei atoatoa ina ia toe aumaia i latou ua maliliu i le ola i se lalolagi  parataiso, faatasi ma o latou uiga na iai a o leʻi maliliu.—1 Ioane 4:8.

A o lalata mai le iʻuga o le lalolagi a Satani, e mautinoa lava le vavala mai o ata o le lumanaʻi pupula mo i latou o ē e faatuatua atu i le Atua moni. (Faataoto 2:21, 22; Tanielu 2:44; 1 Ioane 5:19) Ua faamautinoaina i tatou e le faisalamo e faapea: “E toe itiiti, ona leai lea o le tagata amio leaga; . . . A o e agamalu, e fai mo latou le nuu; e faafiafia foi i latou ia te i latou ona o le manuia e tele.” (Salamo 37:10, 11) O le a mavae atu le solitulafono ma faiga sauā. O le a lauolaola le faamasinoga tonu, ma o le a mavae atu foʻi tulaga faigatā tau i le tamaoaiga. (Salamo 37:6; 72:12, 13; Isaia 65:21-23) O le a soloiesea uma aafiaga o le faailoga tagata i le vafealoaʻi, i va o lanu ma le va o ituaiga o tagata. (Galuega 10:34, 35) O le a lē toe iai ni taua ma ni auupega e fai ai taua. (Salamo 46:9) I lenā taimi “e le fai mai foi se tasi ua mau ai, Ou te maʻi.” (Isaia 33:24) O le a olioli tagata uma i le soifua mālōlōina olaola ma lelei atoatoa. (Faaaliga 21:3, 4) Ua le pine ona avea lea o le Parataiso i le lalolagi ma mea moni. Ua uma ona fuafuaina e Ieova lenā mea!

Ioe, o faamoemoega uma e faavae i le Tusi Paia ua lē o toe umi lava se taimi ona faataunuuina lea. Aiseā e faataga ai i tatou lava e faasesēina i mea ua fai ma atua o lenei lalolagi, pe afai o lea e mafai ona tuu atu lo tatou mautinoa atoatoa iā Ieova? O lona finagalo ina ia “faaolaina o tagata uma lava, ma ia oo ina iloa lelei le upu moni.” (1 Timoteo 2:3, 4) Na i lo o le tuutoina atu o o tatou taimi ma alāʻoa i mea taufaasesē, po o mea lē moni o lenei faiga o mea ma ona atua, seʻi o tatou tutupu aʻe ia i le poto e uiga i le Atua o lē e moni ma faatuatua atu iā te ia ma o tatou loto atoa.—Faataoto 3:1-6; Ioane 17:3.

[Ata i le itulau 6]

I le silafaga a Ieova ma Iesu, na pei lava sa na ona moe Lasalo

[Ata i le itulau 7]

Ua le pine ona avea lea o le Parataiso i le lalolagi ma mea moni