Ia Faaalia Pea le Agalelei
Ia Faaalia Pea le Agalelei
“O le fua o le malamalama, o le agalelei uma lava lea, ma le amiotonu, ma le faamaoni.”—EFESO 5:9, LF.
1. Ua faaalia faapefea e le faitau miliona o tagata i aso nei e latou te ioe i le Salamo 31:19?
O LE mea lelei silisili e mafai ona faia e so o se tagata, o le tuuina atu lea o le viiga iā Ieova. I aso nei, e faitau miliona tagata o loo latou faia lenei mea e ala i le viiaina o le Atua mo lona agalelei. I le avea ai ma Molimau faamaoni a Ieova, e tatou te ioe ma le loto atoa faatasi ma le faisalamo o lē na pese e faapea: “Ua tele lava lou agalelei ua teua e oe mo e ua matatau ia te oe.”—Salamo 31:19.
2, 3. O le ā e ono tupu pe afai e lē o lagolagoina e amioga lelei la tatou galuega o le faia o soo?
2 O le mataʻu ma le migao iā Ieova e uunaʻia ai i tatou e viia o ia mo lona agalelei. E uunaʻia ai foʻi i tatou e ‘vivii iā Ieova, faafetai atu iā te ia, ma tautalatala atu i le mamalu o lona malo.’ (Salamo 145:10-13) O le māfuaaga lenā e tatou te auai ai ma le maelega i le galuega o le talaʻia o le Malo ma le faia o soo. (Mataio 24:14; 28:19, 20) O le mea moni, o la tatou galuega talaʻi e tatau ona lagolagoina e amioga lelei. Afai e lē faia lenā mea, e mafai ona tatou aumaia ai le faalumaina i le suafa paia o Ieova.
3 E toʻatele tagata e latou te faapea mai o loo tapuaʻi i le Atua, ae o a latou amio e lē o ōgatusa ma faatulagaga ua faataatia i lana Afioga faagaeeina. E faatatau atu i nisi o ē e leʻi ola e ōgatusa ma lo latou manatu i le faia o mea lelei, na tusi ai le aposetolo o Paulo e faapea: “O oe lē aʻoaʻo atu i le tasi tagata, e te le aʻoaʻo ea oe ia te oe? o oe lē lauga atu, Aua le gaoi, e te gaoi ea oe? o oe lē fai ane, Aua le mulilua, e te mulilua ea oe? . . . ua upuleagaina le suafa o le Atua talu outou i nuu ese, faapei ona tusia.”—Roma 2:21, 22, 24.
4. O le ā le aafiaga o a tatou amioga lelei?
4 Na i lo le aumaia ai o le faalumaina i le suafa o Ieova, e tatou te taumafai e faamamaluina lona suafa e ala i a tatou amioga lelei. E iai se aafiaga lelei o a tatou amio iā i latou i fafo atu o le faapotopotoga Kerisiano. E mautinoa, e mafai ona fesoasoani iā i tatou e faafilemu i latou e tetee mai iā i tatou. (1 Peteru 2:15) Ae e sili atu ona tāua, o a tatou amioga lelei e tosina mai ai tagata i le faalapotopotoga a Ieova, ma tatala ai le auala mo i latou e tuuina atu ai le viiga iā te ia ma maua ai le ola e faavavau.—Galuega 13:48.
5. O ā fesili e tatau ona tatou iloiloina nei?
5 Talu ai lo tatou lē lelei atoatoa, e mafai faapefea ona tatou ʻalofia amioga e ono lē faaaloalo ai iā Ieova ma tautevateva ai ē o loo saʻilia le upu moni? Ioe, e mafai faapefea ona tatou taulau manuia i le faaalia o le agalelei?
Se Fua o le Malamalama
6. O ā nisi o “galuega le aoga a le pouliuli,” ae o ā fua e tatau ona iloa gofie i Kerisiano?
6 I le avea o ni Kerisiano tuuina atu, e tatou te maua ai se mea o loo fesoasoani iā i tatou e ʻalofia ai “galuega le aoga a le pouliuli.” E aofia ai i na galuega mea e lē faamamaluina ai le Atua e pei o le pepelo, gaoi, upu leaga, talanoaga lē mamā e faatatau i feusuaʻiga faaleituaiga, le anovale, le faaulaula, ma le onā. (Efeso 4:25, 28, 31; 5:3, 4, 11, 12, 18) Na i lo le faaaofia ai o i tatou i na galuega, e tatou te “savavali ia pei o e ua malamalama.” Ua faapea mai le aposetolo o Paulo “o le fua o le malamalama, o le agalelei uma lava lea, ma le amiotonu, ma le faamaoni.” (Efeso 5:8, 9, LF) O lea e ala i le savavali i le malamalama e mafai ai ona tatou faaalia pea le agalelei. Ae o le ā lenei ituaiga o malamalama?
7. O le ā e tatau ona tatou faia e faaauau ai pea ona faaalia le fua o le agalelei?
7 E ui lava i lo tatou lē lelei atoatoa, e mafai lava ona tatou faaalia le agalelei pe a tatou savavali i le malamalama faaleagaga. Na pese le faisalamo e faapea: “O lau afioga o le sulu lea i oʻu vae, ma le malamalama i loʻu ala.” (Salamo 119:105) Pe afai e tatou te mananaʻo e faaalia pea “le fua o le malamalama” e ala i “le agalelei uma,” e tatau ona tatou faaaogāina pea lava pea le malamalama faaleagaga o loo maua i le Afioga a le Atua, lea o loo iloiloina ma le faaeteete i lomiga faa-Kerisiano, ma o loo talanoaina e lē aunoa i a tatou sauniga mo le tapuaʻiga. (Luka 12:42; Roma 15:4; Eperu 10:24, 25) E tatou te manaʻomia foʻi ona uaʻi faapitoa atu i faaaʻoaʻoga ma aʻoaʻoga a Iesu Keriso, “le malamalama o le lalolagi” ma o ‘le pupula o le mamalu o Ieova.’—Ioane 8:12; Eperu 1:1-3.
Se Fua o le Agaga
8. Aiseā e mafai ai ona tatou faaalia le agalelei?
8 O le malamalama faaleagaga e mautinoa e fesoasoani iā i tatou e faaalia ai le agalelei. E lē gata i lea, ua mafai ona tatou faaalia lenei uiga ona o loo taʻitaʻiina i tatou e le agaga paia o le Atua, po o le malosi galue. O le agalelei o se vaega o “le fua o le Agaga.” (Kalatia 5:22, 23) Pe afai e tatou te gauaʻi i le taʻitaʻiga a le agaga paia o Ieova, o le a iā i tatou lona fua matagofie o le agalelei.
9. E mafai faapefea ona tatou gaoioi e ōgatusa ma upu a Iesu o loo faamauina i le Luka 11:9-13?
9 O lo tatou faanaunauga e faafiafia Ieova e ala i le faaalia o le fua o le agaga o le agalelei, e tatau ona taʻitaʻiina atu ai i tatou e gaoioi e ōgatusa ma upu a Iesu e faapea: “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuʻituʻi atu, ona toina mai ai lea ia te outou. Auā ai se ole atu, e maua e ia; o lē saili, e iloa e ia; o lē tuʻituʻi, e toina mai ia te ia. O ai se tamā ia te outou e avatu ea e ia i lona atalii se maa, pe a ole mai se areto? Pe a ole mai se iʻa, e avatu ea ia te ia se gata a e le o se iʻa? Pe a ole mai se fuāmoa, e avatu ea ia te ia se akarava? O lenei; o outou e [lē lelei atoatoa ma faapea e] leaga, afai ua iloa e outou ona avatu o mea lelei mā a outou fanau, e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?” (Luka 11:9-13) Seʻi o tatou mulimuli atu i le fautuaga a Iesu e ala i le tatalo atu mo le agaga o Ieova ina ia tatou faaauau ai pea ona faaalia lona fua o le agalelei.
Ia Faia Pea le “Amio Lelei”
10. O ā vala o le agalelei o Ieova o loo taʻua i le Esoto 34:6, 7?
10 O le iai o le malamalamaga faaleagaga mai le Afioga a le Atua faatasi ai ma le fesoasoani a le agaga paia o le Atua, e tatou te faia ai pea le “amio lelei.” (Roma 13:3) E ala i le suʻesuʻeina e lē aunoa o le Tusi Paia, e tatou te aʻoaʻoina ai pea le auala e mafai ai ona tatou faataʻitaʻi atu i le agalelei o Ieova. O le mataupu na muamua atu sa iloiloina ai vala o le agalelei o le Atua lea na taʻua i le faalauiloaga iā Mose o loo faamauina i le Esoto 34:6, 7, lea e tatou te faitau i ai e faapea: “O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala.” O le iloiloina totoʻa o nei faalauiloaga o le agalelei o Ieova o le a fesoasoani ai iā i tatou e faia ai pea le “amio lelei.”
11. E aafia faapefea i tatou i le iloaina faapea o Ieova e alofa mutimutivale ma alofa fua?
11 O lenei faalauiloaga tauatua ua faailoa mai ai iā i tatou le manaʻomia ona faataʻitaʻi atu iā Ieova e ala i le faaalia o le alofa mutimutivale ma le alofa fua. “Amuia ē alofa mutimutivale,” o le faamatalaga lea a Iesu, “auā o le a faaalia iā i latou le alofa mutimutivale.” (Mataio 5:7, NW; Luka 6:36) O le iloaina faapea e alofa fua Ieova, ua uunaʻia ai i tatou e avea ma ē e alolofa fua ma faaleuō i a tatou feutagaʻiga ma isi, e aofia ai i latou o loo tatou talaʻi atu i ai. Ua ōgatusa lea ma le fautuaga a Paulo: “Ia le aunoa a outou upu ma le alofa [“alofa fua,” NW], ia faamāi i le masima, ia iloa e outou ona fai faatatau se tali i tagata e taitoatasi uma.”—Kolose 4:6.
12. (a) Ona o le Atua e telegese lona toʻasa, e faapefea ona tatou gaoioi faatatau i isi? (e) O le alofa o Ieova ua uunaʻia ai i tatou e faia le ā?
12 Ona o le Atua e telegese lona toʻasa, o lo tatou faanaunauga e faia pea le “amio lelei” ua uunaʻia ai i tatou e onosaia ni sesē laiti o uso talitonu ma taulaʻi atu i o latou uiga lelei. (Mataio 7:5; Iakopo 1:19) O le alofa o Ieova ua uunaʻia ai i tatou e faaalia le alofa faamaoni, e oo lava i tulaga e sili ona faigatā. O lenei uiga e matuā manaʻomia lava.—Faataoto 19:22.
13. E faapefea ona tatou gaoioi ina ia faaatagia mai faapea o Ieova e ‘tele le faamaoni’?
13 Ona o lo tatou Tamā faalelagi e ‘tele le faamaoni,’ e tatou te saʻili e ‘faailoa atu ai i tatou o ana auauna i a tatou upu moni.’ (2 Korinito 6:3-7) I mea e fitu e inosia e Ieova o “le laulaufaiva pepelo” ma “le molimau pepelo, na te tautala i mea pepelo.” (Faataoto 6:16-19) O lea o lo tatou faanaunauga e faafiafia le Atua ua uunaʻia ai i tatou e ʻtuu ese le pepelo ma tautalatala faamaoni.’ (Efeso 4:25) Seʻi aua lava neʻi o tatou lē taulau i le faaalia o le agalelei i lenei auala e sili ona tāua.
14. Aiseā e tatau ai ona tatou faamagalo atu?
14 O le faalauiloaga a le Atua iā Mose e tatau foʻi ona uunaʻia ai i tatou e faamagalo atu, ona o Ieova o loo nofosauni e faamagalo. (Mataio 6:14, 15) O le mea moni, e faasalaina e Ieova tagata agasala e lē salamō. O lea la, e tatau ona tatou faatāuaina ana faatulagaga o le agalelei e tusa ai o le tausia o le mamā faaleagaga o le faapotopotoga.—Levitiko 5:1; 1 Korinito 5:11, 12; 1 Timoteo 5:22.
“Ia Matuā Faaeteete”
15, 16. E mafai faapefea e le fautuaga a Paulo o loo faamauina i le Efeso 5:15-19 ona fesoasoani iā i tatou e faaauau ai ona faatino le agalelei?
15 Ina ia faaauau ona faaalia le agalelei e ui i le leaga o loo siʻomia ai i tatou, e manaʻomia le faatumuina o i tatou i le agaga o le Atua ma vaai le auala o loo tatou savavali ai. Ina ia ōgatusa ma lenei mea, na timaʻi ai e Paulo Kerisiano i Efeso e faapea: “O lenei, ia [“matuā,” NW] faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; ia faaaogaina e outou aso o lenei olaga, auā o ona po nei ua leaga. O lenei, aua neʻi faavalea outou, a ia outou iloa le finagalo o le Alii. Aua foi neʻi onā outou i le uaina, o le mea e ulavale ai; a ia faatumuina outou i le Agaga. Ia outou fetautalatalai i salāmo, ma pese, ma siva faaleagaga, ia faaneenee atu ma pepese atu i le Alii i o outou loto.” (Efeso 5:15-19) O lenei fautuaga e mautinoa le talafeagai mo i tatou i nei aso faigatā.—2 Timoteo 3:1.
16 Pe afai e tatou te faaauau ona faatinoina le agalelei, e tatau la ona tatou matuā faaeteete ina ia tatou savavali e pei o i latou o loo faatatauina le atamai faale-Atua. (Iakopo 3:17) E tatau ona tatou ʻalofia agasala matuiā ma e tatau ona faatumuina i tatou i le agaga paia, ma faatagaina i tatou e taʻitaʻia e le agaga. (Kalatia 5:19-25) E ala i le faatatauina o faatonuga faaleagaga o loo aumaia i sauniga faa-Kerisiano, i fonotaga, ma tauaofiaga, e mafai ai ona tatou faia pea le amio lelei. O upu a Paulo i tagata Efeso atonu e faamanatu mai ai foʻi iā i tatou faapea i le tele o mea o loo tatou faapotopoto faatasi ai mo le tapuaʻiga, e tatou te maua aogā i lo tatou pepese mai le loto i “pese faaleagaga”—o le tele lava o loo taulaʻi atu i uiga faaleagaga, e pei o le agalelei.
17. Pe afai ona o lo latou tulaga ua iai ua taofia ai i latou mai le auai e lē aunoa i sauniga, o le ā e ao ona mautinoa e se Kerisiano atonu o loo maua i se maʻi tigaina?
17 Ae faapefea o tatou uso talitonu o ē e lē o mafai ona auai e lē aunoa i sauniga faa-Kerisiano ona o se gasegase tigaina faaumiumi? Atonu e latou te lagonaina le lotovaivai ona ua lē o toe mafai i taimi uma ona latou tapuaʻi iā Ieova faatasi ai ma o latou uso ma tuafāfine faaleagaga. Ae e mafai ona latou mautinoa faapea o loo malamalama Ieova i o latou tulaga, ma tausia i latou i le upu moni, o le a avatu iā i latou le malamalama, ma o le a fesoasoani iā i latou ina ia faia pea le amio lelei.—Isaia 57:15.
18. O le ā o le a fesoasoani iā i tatou e faaauau ai i se ala o le agalelei?
18 O le faaauau i se ala o le agalelei e manaʻomia ai ona puipuia i tatou mai a tatou aumea ma liliu ese mai iā i latou o ē e “le alolofa i tagata amio lelei.” (2 Timoteo 3:2-5, LT; 1 Korinito 15:33) O le faatatauina o lenā fautuaga e fesoasoani lea iā i tatou e ʻalofia ai le “faatiga i le Agaga Paia o le Atua” e ala i gaoioiga e feteenaʻi ma lana taʻitaʻiga. (Efeso 4:30) E lē gata i lea, ua tatou maua le fesoasoani i le faia o le amio lelei pe a tatou atiina aʻe se faiā vavalalata ma i latou o loo faamaonia mai i o latou olaga, e fiafia i le agalelei ma o loo taʻitaʻiina e le agaga paia o Ieova.—Amosa 5:15; Roma 8:14; Kalatia 5:18.
O le Agalelei e Aumai ai Iʻuga Lelei
19-21. Faamatala mea na tutupu e faaalia ai aogā o le faaalia o le agalelei.
19 O le savavali i le malamalama faaleagaga, gauaʻi i le taʻitaʻiga a le agaga o le Atua, ma le vaaia o le auala e tatou te savavali ai o le a fesoasoani iā i tatou e ʻalofia ai mea leaga ma ia faia pea le “amio lelei.” O le faia faapea, e mafai ona aumaia ai iʻuga lelei. Seʻi manatu i le mea na tupu iā Zongezile, o se tasi o Molimau a Ieova i Aferika i Saute. A o alu atu o ia i le aʻoga i se tasi o taeao, na ia siakiina ai le aofaʻi o lana tamaʻi teugatupe o loo i le faletupe. Na faaalia e se fasi pepa mai le masini lea e tala ai tupe se mea sesē o le R42,000 (US$6,000) se faasiliga o le tupe o loo iai. Na tauanau o ia e le sekulatī a le faletupe ma isi e tala mai le tupe ma teuina mo ia i se isi faletupe. Sa na o le ulugalii Molimau lava lea sa nofo ai na la faamālō atu iā te ia mo le leʻi talaina o se tupe.
20 O le aso faigaluega na sosoo ai, na alu atu ai Zongezile ma taʻuina le mea sesē i le faletupe. Na mauaina e faapea o le numera o lana teugatupe e talitutusa ma le numera a se tagata faipisinisi mauʻoa lea na ia teuina le tupe i se teugatupe sesē. I le faateʻia ona o le leʻi faaaogāina e Zongezile o se vaega o lenei tupe, na fesili atu ai le tamāloa faipisinisi iā te ia e faapea: “O le ā lau lotu?” Na faamatalaina e Zongezile faapea o ia o se tasi o Molimau a Ieova. Sa faamālō atu ma le māfana iā te ia tagata maualuluga o le faletupe, ma latou faapea atu: “E matou te moomoo ia faamaoni uma tagata e pei o Molimau a Ieova.” O le mea moni, o gaoioiga o le faamaoni ma le agalelei e mafai ai e isi ona viia Ieova.—Eperu 13:18.
21 O gaoioiga o le agalelei e lē seʻi tau o se mea mataʻina e fai ina ia maua ai se iʻuga lelei. Ina ia faataʻitaʻia lenei mea: O se Molimau talavou o lē na auauna o se faievagelia faataimi atoa i se tasi o motu o Samoa sa alu atu i se falemaʻi i lenā lava vaipanoa. Sa faatalitali tagata mo le vaaia o se fomaʻi, ma na mātauina e le Molimau faapea o se fafine matua na sosoo ane iā te ia i le faasologa, sa tigāina tele. Na ia faia fuafuaga ina ia alu atu ai le fafine i lona avanoa e vave ai ona vaaia le fomaʻi. I se taimi mulimuli ane, na feiloaʻi atu ai lenei Molimau i le fafine matua lenei i le maketi. Na manatua lelei e lenei fafine le Molimau ma gaoioiga lelei na ia faia i le falemaʻi. “Ua ou iloaina nei faapea o Molimau a Ieova e alolofa moni lava i o latou tuaoi,” o le tala lea a le fafine. E ui lava sa leʻi fiafia lenei fafine i le feʻau o le Malo i le taimi muamua, ae o le agalelei na faaalia iā te ia e le Molimau na maua ai se iʻuga lelei. Na ia taliaina le ofo o le faia o se suʻesuʻega faale-Tusi Paia i le aiga ma amata ai ona ia aveina i fale le poto o le Afioga a le Atua.
22. O le ā se tasi o auala mataʻina faapitoa e faia ai pea le “amio lelei”?
22 Atonu, e te mafai foʻi ona faamatalaina mea na tutupu e faailoa ai le aogā o le faaalia o le agalelei. O se tasi o auala mataʻina faapitoa e faia ai pea le “amio lelei” o le faia lea e lē aunoa o se sao i le folafolaina o le tala lelei o le Malo o le Atua. (Mataio 24:14) Seʻi o tatou faaauau ona auai ma le maelega i lenei galuega tāua, i le iloaina faapea o se tasi lea o auala e faia ai le amio lelei, aemaise lava iā i latou e tali mai ma le fiafia. Ae e sili atu ona tāua, o la tatou faiva ma amioga lelei e viia ai Ieova, o le puna o le agalelei.—Mataio 19:16, 17.
Ia Faaauau Ona “Agalelei”
23. Aiseā ua avea ai le faiva faa-Kerisiano o se galuega lelei?
23 O le mea moni e lē mafesiligia le lelei o la tatou galuega o le faiva. E mafai ona iʻu ai i lo tatou faaolataga ma i latou o loo faalogologo i le feʻau a le Tusi Paia ma tuua ai i latou i le auala e taʻitaʻiina ai i le ola e faavavau. (Mataio 7:13, 14; 1 Timoteo 4:16) O lea, pe a tatou fesagaʻi ma filifiliga, o le faanaunauga ina ia faia le mea lelei atonu o le a tatou fesili ifo ai iā i tatou lava e faapea: ‘O le a faapefea e lenei filifiliga ona aafia ai laʻu galuega o le talaʻiga o le Malo? Pe e aogā moni ea le auala o loo oʻu mafaufau i ai? Po o le a fesoasoani ea iā te aʻu e faalaeiau ai i isi e taliaina le “tala lelei e faavavau” ma maua ai se faiā vavalalata ma Ieova le Atua?’ (Faaaliga 14:6) O le fiafiaga sili o le a mauaina mai lea i se filifiliga e faaauilumaina ai manaʻoga o le Malo.—Mataio 6:33; Galuega 20:35.
24, 25. O ā nisi o auala e faia ai mea lelei i le faapotopotoga, ma o le ā e tatou te mautinoa pe a fai e tatou te faaalia pea le agalelei?
24 Seʻi aua lava neʻi o tatou manatu faatauvaa i aafiaga aogā o le agalelei. E mafai ona tatou faaalia pea lenei uiga e ala i le lagolagoina o le faapotopotoga Kerisiano ma le faia o mea e tatou te mafaia e tausia ai manaʻoga o le faapotopotoga. O le mea moni o loo tatou faia mea lelei pe a tatou auai e lē aunoa ma faia se sao i sauniga faa-Kerisiano. O lo tatou auai, e faalaeiauina ai uso tapuaʻi, ma o a tatou tali ua lava saunia e atiina aʻe ai i latou faaleagaga. E tatou te faia foʻi mea lelei pe a tatou faaaogā a tatou alāmanuia e tausia ai le Maota o le Malo ma pe a tatou fesoasoani i le tausiaina ia lelei. (2 Tupu 22:3-7; 2 Korinito 9:6, 7) O le mea moni, “ia tatou agalelei, ia faatatau i mea e tutupu i lea aso ma lea aso, i tagata uma lava, aemaise i le aiga o le faatuatua”—Kalatia 6:10, LF.
25 E tatou te lē mafai ona muaʻi iloa tulaga uma ia e manaʻomia ai ona tatou faaalia le agalelei. O lea, a o tatou fesagaʻi ma luʻi fou, seʻi o tatou saʻilia le malamalama mai le Tusi Paia, ia tatalo mo le agaga paia o Ieova, ma faia le mea e aupito sili tatou te mafaia e faataunuuina ai lona finagalo lelei ma le atoatoa. (Roma 2:9, 10; 12:2) E tatou te mautinoa faapea o le a faamanuia tele i tatou e Ieova a o faaauau ona tatou faaalia le agalelei.
O le a Faapefea Ona E Tali?
• E mafai faapefea ona tatou faataunuuina mea lelei silisili?
• Aiseā ua taʻua ai le agalelei o se ‘fua o le malamalama’?
• Aiseā ua taʻua ai le agalelei o se ‘fua o le agaga’?
• O ā aafiaga e maua mai i a tatou amioga lelei?
[Fesili mo le Suʻesuʻega]
[Ata i le itulau 17]
O le Afioga a le Atua ma lona agaga paia e fesoasoani iā i tatou e faaalia ai le agalelei
[Ata i le itulau 18]
O le faaalia o le agalelei e mauaina ai iʻuga lelei