Le Laau “Loimata Maligi” ma Aogā e Tele o Ona “Loimata”

‘Ina avatu ia ni pulu pasama mo le tiga,’ ua faapea mai ai le Ieremia 51:8. O le suʻesuʻeina o se tasi o laau e maua mai ai lenei vai ua iloga ona mapu ma togafitia ai maʻi, o le a tataʻi ai o tatou mafaufau i le motu o Kioi, i le sami o Ainea.

I LE amatamataga lava o le tau māfanafana, e sauniuni ai le ʻaufaifaatoʻaga o le motu o Kioi mo se seleselega i se auala e lē masani ai le toʻatele. Pe a māeʻa ona latou faamamāina le ogaeleele lea, ona latou faaaogā loa lea o le ele paʻepaʻe e fola faataamilo ai lalo o laau meamata tupu maualalalo nei ua taʻua o le mastic. A māeʻa, ona tātā lea e le ʻaufaifaatoʻaga o paʻu o laau ina ia ‘faamaligiligi mai loimata’ o le laau. Ona amata tulutulu lemū mai ai loa lea i fafo o “loimata” po o le sua manino o le laau. Pe a mavae le lua po o le tolu o vaiaso, ua malō apulupulu, ona ō atu loa lea o le ʻaufaifaatoʻaga i le ao mai nei pulu, a lē o le ao saʻo mai le ogalaau po o le ao mai foʻi i lalo i le fola lea e faia aʻe i le ele paʻepaʻe. O nei “loimata” e taʻua o pulu manogi, na faaaogāina e faia ai le pulu pasama.

Peitaʻi, a o leʻi seleseleina mai, e manaʻomia ai lava le onosai ma ni galuega fitā. E tuai lava ona tutupu ogalaau fepiʻopiʻoaʻi ma lanu efuefu. E 40 i le 50 tausaga e ola ai se laau seʻia oo ina matua—e masani lava o le maualuga e mai le ono i le sefulu futu [lua i le tolu mita].

E ese mai le galuega o le tātāina o tino o ogalaau ma le aoina mai o “loimata,” e iai nisi galuega e sili atu e manaʻomia mo le gaosiaina o le pulu manogi. Pe a māeʻa ona aoina mai e le ʻaufaifaatoʻaga “loimata” o le mastic, ona latou vaimamā lea, fufulu ma faavasega i o latou ituaiga eseese. Ona toe fufulu mulimuli ai lea ma faaaogā loa i isi mea e tele.

O le Talaaga o se Laau Tautele

O le upu Eleni mo le “pulu manogi” e fesootaʻi atu i le faaupuga o lona uiga “ia lilivau nifo.” E foliga mai i lenei taʻu e faapea i aso anamua, na faaaogā ai le apulupulu o le laau o le mastic e fai ma pulu kamu e faamanogi ai le mānava.

O le faamatalaga pito sili ona leva o lenei pulu manogi na faamatalaina e Herodotus, o le tusitala o talafaasolopito Eleni o le senituri lona lima T.L.M. Na taʻua e isi tusitala ma fomaʻi anamuā e iai Apollodorus, Dioscorides, Theophrastus ma Hippocrates—le faaaogāina i vailaau faafomaʻi o le pulu manogi. E ui lava o loo ola solo le laau o le mastic i le talafatai atoa o le Metitirani, ae talu mai le 50 T.A., ua toetoe lava na o Kioi sa gaosia ai le pulu manogi. Na avea foʻi le mastic ma faanaunauga autū o i latou na puleaina Kioi, mai Roma i Genoa ma mulimuli ane ai i tagata Ottoman.

Aogā e Tele o le Pulu Manogi

Sa faaaogāina e fomaʻi i aso anamua i Aikupito le pulu manogi e togafitia ai gasegase eseese e aofia ai  le manava tatā ma le gugu. Na latou faaaogāina foʻi e fai ma mea manogi ma atulalaina ai tino maliu. Atonu na avea le laau o le mastic ma mea na maua mai ai ‘pulu pasama o Kiliata,’ lea o loo taʻua i le Tusi Paia mo togafitiga faafomaʻi ma le faaaogāina i vali e faaaulelei ai foliga (cosmetic) ma mea manogi mo tino maliu ina ia umi ai ona tuu. (Ieremia 8:22; 46:11) Ua taʻua e isi faapea o le laau lea e maua mai ai le pulu natafa (stacte), o se tasi o pulu e aofia i mea manogi mū ia e faaaogā faapitoa mo mea paia, atonu o se ʻauaiga o le laau o le mastic.—Esoto 30:34, 35.

I aso nei, ua aofia ai le pulu manogi i mea o loo faia aʻe ai le vanisi lea e vanisi ai ata tusi, meafale, ma meafai faaili. E faaaogā foʻi e fai ma mea e taofia ai le vevela po o le malūlū ma puluti ai le vai mai le ati atu i se mea, ma e vaai i ai o se vali aupito i lelei e lē matafigofie mo ie ma ata a le ʻautusiata. E faaaogāina foʻi le pulu manogi e faapipii ai mea ma faia ai paʻumanu e avea ma leather. Ona o le manaia o lona manogi ma isi aogā, ua faaaogāina ai le pulu manogi e fai ai fasimoli, o vali e faaaulelei ai foliga ma fagu faamanogi.

Ua taʻua le pulu manogi i lisi e 25 o vailaau faafomaʻi ua aloaʻia a le lalolagi atoa. O loo faaaogāina lava pea i vailaau faafomaʻi anamuā i atunuu Arapi. Ua aogā foʻi le pulu manogi i le faapipiiina o nifo ma faia aʻe ai le vaega i totonu o atigi o fualaau (capsule).

I le avea ma laau e maua mai ai le pulu pasama, ua avea ai aogā e tele o “loimata” o le laau o le mastic lea e “maligi” e maua ai vai e mapu ai ma fai ai togafitiga mo le tele o senituri. Ona o ni māfuaaga tāua, ua faapea mai ai le valoaga a Ieremia: ‘Ina avatu ia ni pulu pasama i le tiga.’

[Ata i le itulau 31]

Kioi

O le seleseleina o le pulu manogi

E aoina ma le faaeteete “loimata” o le “mastic”

[Faamatalaga i Ata]

Kioi ma ata o le seleselega: Courtesy of Korais Library; o isi uma ata: Kostas Stamoulis