O Ieova—O le Faaa‘oa‘oga Silisili o le Agalelei
O Ieova—O le Faaaʻoaʻoga Silisili o le Agalelei
“Vivii atu ia Ieova o ʻau, auā e lelei Ieova.”—IEREMIA 33:11.
1. Aiseā ua uunaʻia ai i tatou e viia le Atua mo lona agalelei?
O IEOVA le Atua e atoatoa lona lelei. “Ua tele naua lona lelei”! o le alaga lea a le perofeta o Sakaria. (Sakaria 9:17) O le mea moni, ua faaalia le agalelei i mea uma na faia e le Atua e sauniunia ai le lalolagi tatou te fiafia ai. (Kenese 1:31) O le a lē mafai lava ona tatou malamalama i tulafono lavelave uma ia na faagaoioia e le Atua ina o ia foafoaina le vateatea. (Failauga 3:11; 8:17) Ae o nai mea laiti o loo tatou iloa e faatatau i le vateatea ua uunaʻia ai i tatou e viia le Atua mo lona agalelei.
2. E faapefea ona e faamatalaina le agalelei?
2 O le ā le agalelei? O le tulaga e silisili ona lelei tau amio. Peitaʻi, e sili atu na i lo le matuā leai atoatoa o mea leaga uma. O le agalelei, o se vaega o le fua o le agaga, o se uiga ua faaalia ai le faia o se mea lelei. (Kalatia 5:22, 23) E tatou te faaalia le agalelei pe a tatou faia galuega lelei ma aogā i isi. I lenei faiga o mea, o mea o loo manatu i ai nisi vaega o tagata e faapea e lelei, atonu e vaai i ai isi e leaga. Peitaʻi, afai e tatou te mananaʻo e maua le filemu ma le fiafia, e tatau la ona tasi se faatulagaga o le agalelei. O ai la e mafai moni ona faavaeina lenei faatulagaga?
3. O le ā o loo faasino mai i le Kenese 2:16, 17 e faatatau i le faatulagaga o le agalelei?
3 Ua faataatia e le Atua le faatulagaga o le agalelei. I le amataga o le talafaasolopito o le tagata, na poloaʻia ai e Ieova le uluaʻi tagata: “O laau uma o i le faatoaga e te ʻai ai. A o le laau e iloa ai le lelei ma le leaga, aua e te ʻai ai; auā o le aso e te ʻai ai e te oti ai lava.” (Kenese 2:16, 17) Ioe, e manaʻomia ona vaai atu tagata i Lē na Foafoaina i latou mo le iloaina o le lelei ma le leaga.
Faailoaga o le Agalelei Faifua
4. O le ā na faia e le Atua mo tagata ina ua agasala Atamu?
4 Na lamatia le faamoemoe o tagata mo le fiafiaga e faavavau i le lelei atoatoa ina ua agasala Atamu ma teena le amanaʻiaina o le aiā a le Atua e faataatia ai faatulagaga o le agalelei. (Kenese 3:1-6) Peitaʻi, a o leʻi fanauina mai le fanau a Atamu i le agasala ma le oti, na folafola atu e le Atua le oo mai o se Fanau e lelei atoatoa. I le fetalai saʻo atu i “le gata tuai,” o Satani le Tiapolo, na folafola atu ai e Ieova e faapea: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Faaaliga 12:9; Kenese 3:15) O le fuafuaga a Ieova o le faaolaina lea o tagata agasala. I le faailoaga o le agalelei faifua, na faia moni ai e Ieova se sauniuniga mo le faaolataga o i latou o ē e faaalia le faatuatua i le taulaga togiola a lona Alo pele.—Mataio 20:28; Roma 5:8, 12.
5. E ui ina tuufaasolo mai iā i tatou faanaunauga leaga o le loto, ae aiseā e mafai ai ona tatou faaalia sina vaega o le agalelei?
5 O le mea moni, ona o le agasala a Atamu, ua tuufaasolo mai ai faanaunauga leaga o le loto. (Kenese 8:21) E ui i lea, o se mea e fiafia ai ona ua fesoasoani mai Ieova iā i tatou e faaalia sina vaega o le agalelei. O le faaauau i mea ua aʻoaʻoina mai i ana tusitusiga paia tautele, e lē gata ina ‘faapoto ai i tatou e iu ai i le faaolataga’ ma ‘saunia ai mo galuega lelei uma lava,’ ae e mafai ai foʻi ona tatou faia mea lelei i lana silafaga. (2 Timoteo 3:14-17) O lea, ina ia maua aogā mai faatonuga faale-Tusi Paia ma faaalia le agalelei, e tatau ona iā i tatou le uiga sa i le faisalamo o lē na pese: “E lelei oe [Ieova], ua e agalelei foi; ia e aʻoaʻo mai ia te au i au tulafono.”—Salamo 119:68.
E Matuā Viiviia le Agalelei o Ieova
6. Ina ua aumaia e le tupu o Tavita le atolaau o le feagaiga i Ierusalema, o le ā le faaupuga na aofia ai i le pese na usuina e tagata sā Levī?
6 Na silafia e le tupu o Tavita o Isaraelu anamua, le agalelei o le Atua ma saʻilia Lana taʻitaʻiga. “O Ieova, e agalelei ma amiotonu ia,” o le faamatalaga lea a Tavita. “O le mea lea na te faasinoina atu ai le ala i tagata agasala.” (Salamo 25:8) O faatonuga tauatua na tuuina atu i tagata Isaraelu na aofia ai tulafono tāua e sefulu—o Tulafono e Sefulu—na tusia i papa maa e lua ma tuuina i totonu o se pusa paia e taʻua o le atolaau o le feagaiga. Ina ua aumaia e Tavita le Atolaau i le laumua o Isaraelu, o Ierusalema, na usuina ai e tagata sā Levī se pese na aofia ai le faaupuga lenei: “Vivii atu outou ia Ieova; auā e lelei lava o ia; auā e faavavau lava lona alofa.” (1 Nofoaiga a Tupu 16:34, 37-41) Maʻeu le manaia o le faalogo atu i na upu mai fofoga o tagata pepese sā Levī!
7. O le ā na tupu ina ua uma ona tuuina le Atolaau i totonu o le Mea e Sili ona Paia ma ina ua uma le tatalo a Solomona o le faapaiaga?
7 O na lava upu o viiga, na faamamafaina i le faapaiaina o le malumalu o Ieova na fausia e le atalii o Tavita o Solomona. Ina ua uma ona tuuina le atolaau o le feagaiga i le Mea e Sili ona Paia o le malumalu fou na fausiaina, ona amata lea ona vivii tagata sā Levī iā Ieova, “auā e lelei o ia, auā e faavavau lava lona alofa.” I lenā faapaiaga na faatumulia faavavega ai le malumalu i le ao lea na faaataina ai le mamalu o le faatasi ai o Ieova. (2 Nofoaiga a Tupu 5:13, 14) Ina ua uma le tatalo a Solomona o le faapaiaga, “ona paū ifo ai lea o le afi mai le lagi, ua faaumatia ai le taulaga mu ma taulaga.” Ina ua vaaia lenei mea e “le fanauga a Isaraelu uma . . . ona latou faapauu fao ai lea i le paepae, ma latou ifo, ma vivii atu ia Ieova, ua faapea atu, Auā e lelei o ia; auā e faavavau lona alofa.” (2 Nofoaiga a Tupu 7:1-3) Ina ua mavae aso e 14 o le tausamiga, ona toe foʻi atu lea o tagata Isaraelu i o latou aiga “ua olioli ma loto fiafia ona o mea lelei na faia e Ieova ia Tavita, ma Solomona, ma lona nuu o Isaraelu.”—2 Nofoaiga a Tupu 7:10.
8, 9. (a) E ui lava na vivii tagata Isaraelu iā Ieova mo lona agalelei, ae o le ā le ala na oo ina latou uia? (e) O le ā na valoia mo Ierusalema e ala iā Ieremia, ma na faapefea ona faataunuuina lenā valoaga?
8 E faanoanoa, ona sa leʻi faaauau ona ola tagata Isaraelu e ōgatusa ma a latou pese o viiga i le Atua. Na oo tagata Iutaia i le taimi, sa na ona ‘latou vivii ai ia Ieova i o latou laugutu.’ (Isaia 29:13) Na i lo le liliu atu i faatulagaga a le Atua o le agalelei, na amata ona latou faia mea leaga. Ae o le ā na aofia ai i a latou amioga leaga? Na latou agasala i le ifo i tupua, amioga lē mamā, pule sauā i ē matitiva, ma isi agasala matuiā! O le iʻuga, na faaumatia Ierusalema ma ave faatagataotauaina tagata na nonofo i Iuta i Papelonia i le 607 T.L.M.
9 O lea na aʻoaʻia ai e le Atua ona tagata. Peitaʻi, e ala i le perofeta o Ieremia, na ia valoia ai e faapea, o le a lagonaina i Ierusalema le leo o i latou o faapea mai: “Ia outou vivii atu ia Ieova o ʻau, auā e lelei Ieova, auā e faavavau lava lona alofa.” (Ieremia 33:10, 11) Ma na taunuu moni lava lenā folafolaga. Ina ua mavae le faatafunaga o le laueleele mo le 70 tausaga, ona toe foʻi atu loa lea o le vaega totoe o tagata Iutaia i Ierusalema i le 537 T.L.M. (Ieremia 25:11; Tanielu 9:1, 2) Na latou toe fausia le fata faitaulaga i le mea sa iai le malumalu i le mauga o Moria ma amata ai ona ofoina atu taulaga i inā. Na faataatia le faavae o le malumalu i le tausaga lona lua talu ona latou toe foʻi. Maʻeu se taimi fiafia! Na taʻua e Esera faapea: “Ua faavaeina e tufuga ati fale le malumalu o Ieova, ona latou tofia lea o le au faitaulaga ua oofu i latou, ua i ai foi pu, ma sa Levī o le fanauga a Asafo ua i ai sumepalo, e vivii atu ia Ieova e tusa ma le pule a Tavita le tupu o Isaraelu. Sa latou pepese i viiga ma faafetai ia Ieova, auā e lelei o ia, auā e faavavau lona alofa ia Isaraelu.”—Esera 3:1-11.
10. O ā faaupuga mataʻina o loo amata ma faaiʻuina ai le Salamo 118?
10 O se faaupuga faapena o viiga e tusa ai o le agalelei o Ieova o loo aliali mai i le tele o salamo. Na aofia ai i salamo le Salamo 118, na usuina e aiga o Isaraelu e faauma ai le faamanatuina o le Paseka. E amata ma faaiʻuina le salamo lenā i upu e faapea: “Vivii atu ia outou ia Ieova, auā e lelei o ia; auā e faavavau lava lona alofa.” (Salamo 118:1, 29) Atonu o upu mulimuli nei o viiga ia na usuina e Iesu Keriso ma ona aposetolo faamaoni i le pō a o leʻi oo i lona maliu i le 33 T.A.—Mataio 26:30.
“Ia E Faaali Mai ia te Au Lou Mamalu”
11, 12. Ina ua mauaina e Mose sina vaaiga puupuu o le mamalu o le Atua, o le ā le faalauiloaga na ia faalogo atu i ai?
11 O le sootaga o le agalelei o Ieova ma lona alofa na muaʻi faia i senituri a o leʻi oo i le taimi o Esera. Ina ua faatoʻā mavae lava ona tapuaʻia e tagata Isaraelu le tamaʻi povi auro i le vaomatua ma ua uma foʻi ona fasiotia i latou na faia mea sesē, ona ole atu lea o Mose iā Ieova e faapea: “Ia e faaali mai ia te au lou mamalu.” O le silafiaina faapea e lē mafai e Mose ona vaai i Ona fofoga ma ola pea, na fetalai ai Ieova e faapea: “Ou te faaui atu loʻu lelei uma i ou luma.”—Esoto 33:13-20.
12 Na faaui atu le agalelei o Ieova i luma o Mose i le aso na sosoo ai i le Mauga o Sinai. I lenā taimi, na mauaina ai e Mose sina vaaiga puupuu o le mamalu o le Atua ma faalogo atu ai i le faalauiloaga lenei: “O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala; a e taui atu e ia le agasala a mātua i a latou fanau ma le fanau a latou fanau, e oo i le tolu ma le fa o tupulaga.” (Esoto 34:6, 7) Ua faaalia e nei upu faapea o le agalelei o Ieova e fesootaʻi atu i lona alofa ma isi vala o ona uiga totino. O le manatunatu i nei mea o le a fesoasoani iā i tatou e faaalia ai le agalelei. Seʻi o tatou iloiloina muamua le uiga o loo taʻua faalua i lenei faalauiloaga mataʻina o le agalelei o le Atua.
“O le Atua . . . e Tele le Alofa”
13. I le faalauiloaga o le agalelei o Ieova, o le ā le uiga o loo taʻua faalua, ma aiseā ua talafeagai ai?
13 “O Ieova, o le Atua . . . e tele le alofa . . . ; o lē tausi le alofa e oo atu i afe o tupulaga.” O le alofa e na o le pau lea o le uiga o loo taʻua faalua i le faalauiloaga a le Atua iā Mose. Maʻeu le talafeagai, ona o le uiga autū lea o Ieova o le alofa! (1 Ioane 4:8) O le faaupuga ua lauiloa o viiga iā Ieova “auā e lelei lava o ia; auā e faavavau lava lona alofa,” ua faamamafaina ai lenei uiga.
14. O ai patino lava na mauaina le agalelei ma le alofa o le Atua?
14 O se tasi o faalauiloaga o le agalelei o Ieova, o ia “e tele le alofa.” Ua faamaonia patino mai lenei mea i le tausiga alofa o loo ia tauaaoina atu i ana auauna o tagata tuuina atu faamaoni. (1 Peteru 5:6, 7) E pei ona faamaonia e Molimau a Ieova, o loo ia ‘tausia le alofa,’ iā i latou o ē alolofa ma auauna iā te ia. (Esoto 20:6) Na leʻi toe mauaina e le nuu o Isaraelu faaletino le alofa o Ieova, po o lona alofa faamaoni, talu ai lo latou teena o lona Alo. Ae o le agalelei ma le alofa faamaoni o le Atua i Kerisiano faamaoni i nuu uma o le a tumau e faavavau.—Ioane 3:36.
O Ieova—E Alofa Mutimutivale ma Alofa Fua
15. (a) O le faalauiloaga na faalogo i ai Mose i le Mauga o Sinai na amata i le ā le faaupuga? (e) O le ā o loo aofia ai i le alofa mutimutivale?
15 O le faalauiloaga lea na faalogo i ai Mose i le mauga o Sinai na amata mai i le faaupuga: “O Ieova, o Ieova, o le Atua alofa mutimutivale ma le alofa fua.” O le upu Eperu ua faaliliuina “alofa mutimutivale” e ono faatatau atu i le “taufale” ma e fesootaʻi vavalalata atu i le faaupuga mo le “toʻala fanau.” O lea la, o le alofa mutimutivale e aofia ai faalogona loloto o le alofa māfana e mapuna mai i totonu o se tagata. Ae o le alofa mutimutivale, e sili atu na i lo le iai o ni faalogona faamaoni o le tigā alofa. E tatau ona uunaʻia i tatou e faia se mea e faateʻa ese ai mafatiaga o isi. Mo se faataʻitaʻiga, o toeaina Kerisiano alolofa, e latou te iloaina le manaʻomia ona alofa mutimutivale i uso talitonu, i le ‘faaalia o le alofa mutimutivale ma le loto fiafia,’ pe afai o loo talafeagai ona faia faapea.—Roma 12:8, NW; Iakopo 2:13; Iuta 22, 23.
16. Aiseā e mafai ai ona tatou faapea atu o Ieova e alofa fua?
16 O le agalelei o le Atua o loo faaalia foʻi i lona alofa fua. O le tagata e alofa fua e “matilatila lona amanaʻiaina o faalogona o le isi tagata” ma e faaalia se ‘agalelei fiafia aemaise lava iā i latou e maulalo ifo o latou tulaga.ʼ O Ieova o le faaaʻoaʻoga sili ona lelei o le alofa fua i le auala na feutagaʻi ai ma ana auauna faamaoni. Mo se faataʻitaʻiga, e ala i agelu, na faamalosia ai ma le alofa fua e le Atua le perofeta matua o Tanielu ma taʻu atu ai i le teine taupou o Maria le faaeaga o le a ia mauaina, o le fanauina mai lea o Iesu. (Tanielu 10:19; Luka 1:26-38) I le avea ai ma tagata o Ieova, e mautinoa lo tatou talisapaia o le auala alofa o loo ia fetalai mai ai iā i tatou e ala i le Tusi Paia. E tatou te viia o ia mo lenei faailoaga mai o lona agalelei ma taumafai e alofa fua i auala o loo tatou feutagaʻi ai ma isi. Pe afai e faasaʻo e i latou o loo iai agavaa faaleagaga se uso talitonu i “le loto [“agaga,” NW] o le agamalu,” e latou te taumafai e toʻafimālie ma alofa fua.—Kalatia 6:1.
O le Atua e Telegese Lona Toʻasa
17. Aiseā ua tatou olioli ai e faapea o Ieova e “telegese lona toasa”?
17 “O le Atua . . . e telegese lona toasa.” O na upu ua faamamafaina ai se isi foʻi vala o le faailoaga o le agalelei o Ieova. E faapalepale Ieova i o tatou vaivaiga ma tuuina mai iā i tatou le taimi e foʻia ai o tatou vaivaiga matuiā ma faia se agaʻigaʻi i luma faaleagaga. (Eperu 5:12–6:3; Iakopo 5:14, 15) O le onosai o le Atua ua aogā foʻi iā i latou e leʻi oo ina avea ma ona tagata tapuaʻi. O loo iai pea le taimi e latou te tali atu ai i le feʻau o le Malo ma salamō. (Roma 2:4) Peitaʻi, e ui lava ina onosai Ieova, o nisi taimi e uunaʻia o ia e lona agalelei e faaalia lona toʻasa, e pei ona ia faia ina ua tapuaʻia e tagata Isaraelu le tamaʻi povi auro i le Mauga o Sinai. Ua lē o toe umi ae faaalia loa le toʻasa o le Atua i se auala e sili atu pe a ia aumaia le iʻuga i le faiga amioleaga o mea a Satani.—Esekielu 38:19, 21-23.
18. E tusa ai o le faamaoni, o le ā le eseesega o Ieova ma taʻitaʻi faaletagata?
18 “O Ieova, o le Atua . . . e tele . . . le faamaoni.” Maʻeu le eseese o Ieova mai taʻitaʻi faaletagata, o ē e faia folafolaga tetele ona lē taulau lea ona faataunuuina na folafolaga! I le faaeseesega, o tagata tapuaʻi o Ieova e mafai ona faalagolago atu i mea uma ua taʻua i lana Afioga faagaeeina. Talu ai o le Atua e tele le faamaoni, e mafai pea la ona tatou faatuatua atu i ana folafolaga. O lona agalelei, ua taulau ai pea ona tali mai lo tatou Tamā faalelagi i a tatou tatalo mo upu moni faaleagaga e ala i le sauniaina o le anoanoaʻi o na upu moni.—Salamo 43:3; 65:2.
19. O le ā le faaaliga mataʻina o le agalelei ua faailoa e Ieova i tagata agasala ua salamō?
19 “O Ieova, o le Atua . . . o lē faamagalo foi i le amioletonu ma le solitulafono ma le agasala.” Talu ai lona agalelei, ua nofosauni Ieova e faamagalo i tagata agasala ua salamō. Ma le mautinoa, e tatou te lotofaafetai ona ua saunia e lo tatou Tamā alofa faalelagi le faamagaloga e ala i le taulaga a Iesu. (1 Ioane 2:1, 2) O le mea moni, ua tatou fiafia, ona o i latou uma e faaalia le faatuatua i le togiola, ua mafai ona olioli i se faiā faapelepele ma Ieova, faatasi ai ma le faamoemoe o le ola e lē uma i lana lalolagi fou ua ia folafolaina mai. O māfuaaga mataʻina moni lava nei e tatou te vivii ai iā Ieova mo le faaalia mai o lona agalelei i tagata!—2 Peteru 3:13.
20. O ā faamaoniga o loo iā i tatou faapea e lē manatu māmā le Atua i amioga leaga?
20 “E le faasaoina lava e [Ieova] o e agasala.” O le isi lenei o māfuaaga moni e vivii ai iā Ieova mo lona agalelei. Aiseā? Auā o se vala tāua o le agalelei o le lē manatu māmā lea i so o se faiga amioleaga. E lē gata i lea, “pe a faaalia le Alii o Iesu mai le lagi, faatasi ma agelu o lona malosi,” o le a aumaia loa le taui ma sui “i e ua le iloa le Atua, ma ua le anaana i le tala lelei.” O le a “faasalaina i latou lava i le fanoga e faavavau.” (2 Tesalonia 1:6-9) O le a mafai e tagata tapuaʻi o Ieova ua faasaoina ona olioli atoatoa i le ola e aunoa ma le faalavelavea e tagata faalēmataʻu o ē “inoino i le amio lelei.”—2 Timoteo 3:1-3, LT.
Faaaʻoaʻo i le Agalelei o Ieova
21. Aiseā e tatau ai ona tatou faaalia le agalelei?
21 E tatou te lē mafesiligia le tele o māfuaaga mo le viia ma le faafetaia o Ieova mo lona agalelei. I le avea ai ma ana auauna, pe lē tatau ai ea ona tatou faia le mea e sili ona lelei e faaalia ai lenei uiga? Ioe, auā na timaʻi le aposetolo o Paulo i uso Kerisiano e faapea: “Ia faaaʻoaʻo outou i le Atua, faapei o le fanau pele.” (Efeso 5:1) E faaalia pea i taimi uma e lo tatou Tamā faalelagi le agalelei, ma e tatau foʻi la ona tatou faia faapea.
22. O le ā o le a tatou iloiloina i le mataupu o loo sosoo mai?
22 Pe afai e tuuina atu ma le loto atoa i tatou iā Ieova, e mautinoa la lo tatou faanaunau atu e faaaʻoaʻo i lona agalelei. Ona e tatou te tupuga mai iā Atamu agasala, e lē faigofie la iā i tatou ona faia o le mea lelei. Peitaʻi, i le mataupu o loo sosoo mai, o le a tatou vaai ai i le māfuaaga e tatou te mafai ai ona faaalia le agalelei. O le a tatou iloiloina ai foʻi auala eseese e mafai ma e tatau ai ona tatou faataʻitaʻi iā Ieova—le faaaʻoaʻoga silisili o le agalelei.
O le a Faapefea Ona E Tali?
• O le ā le agalelei?
• O le ā le faaupuga faale-Tusi Paia o loo faamatilatila ai le agalelei o le Atua?
• O ā nisi o faalauiloaga o le agalelei o Ieova?
• Aiseā e tatau ai ona tatou faataʻitaʻi i le faaaʻoaʻoga o le agalelei o Ieova?
[Fesili mo le Suʻesuʻega]
[Ata i le itulau 12]
Na aʻoaʻia e Ieova ona tagata i aso anamua ona latou te leʻi ola e tusa ai o a latou alaga o viiga
[Ata i le itulau 12]
Na toe foʻi i Ierusalema se vaega totoe faamaoni
[Ata i le itulau 13]
Na faalogo Mose i se faalauiloaga mataʻina o le agalelei o le Atua
[Ata i le itulau 15]
O le agalelei o Ieova ua vaaia i le auala ua fesootaʻi mai ai iā i tatou e ala i le Tusi Paia