Se ʻAuso o Ē na Atiina Aʻe Uiga Eseese

O FILIFILIGA e fai e mātua, e mautinoa lava le aafia ai o le la fanau. E moni lenā mea i aso nei e pei ona iai i tuā i le faatoʻaga o Etena. O le ala fouvale o Atamu ma Eva, sa oo ai ni aafiaga matuā ogaoga i le fanau uma a tagata. (Kenese 2:15, 16; 3:1-6; Roma 5:12) Ae peitaʻi, o loo maua e i tatou taʻitoʻatasi le avanoa e ati aʻe ai se faiā lelei ma Lē na Foafoaina i tatou pe afai e tatou te mananaʻo e faia faapea. Ua faaalia mai lenei mea e ala i le faamatalaga e uiga iā Kaino ma Apelu, le uluaʻi ʻauso i le talafaasolopito o le tagata.

E leai se faamaumauga i le Tusi Paia e faapea na fetalai atu le Atua iā Atamu ma Eva ina ua uma ona tutuli ese mai Etena. Ae peitaʻi, sa leʻi natia e Ieova o ia mai la laʻua fanau. E lē taumatea, sa iloa e Kaino ma Apelu mai o la mātua le mea na tupu. Sa mafai ona la iloa atu “kerupi . . . ma le pelu afi mumū o loo feliuliuai e leoleo ai le ala i le laau o le ola.” (Kenese 3:24) Sa molimauina foʻi e nei tane le moni o le folafolaga a le Atua e faapea, o le afu ma le tigā o le a avea ma mea moni e tutupu i le olaga.—Kenese 3:16, 19.

Sa ao ona iloa lelei e Kaino ma Apelu fetalaiga a Ieova i le gata: “Ou te faatupuina le feitagai ia te oulua ma le fafine, o lau fanau foi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) O mea na iloa e Kaino ma Apelu e uiga iā Ieova, o le a mafai ai ona la atiina aʻe se faiā faamaonia ma ia.

O le manatunatu i le valoaga a Ieova faapea ma ona uiga o Sē e Agalelei, atonu na faatupu ai iā Kaino ma Apelu se faanaunauga e fia maua le faamaoniga a le Atua. Ae o le ā le tele o le a la ati aʻe ai lenā faanaunauga? Po o le a la tali atu ea i faanaunauga o o la loto ina ia tapuaʻi i le Atua ma atiina aʻe lo la itu faaleagaga ma oo ai ina la faaalia le faatuatua iā te ia?—Mataio 5:3, NW.

Avatu e le ʻAuso ia Taulaga

Ina ua mavae se taimi, na avatu ai e Kaino ma Apelu ia taulaga i le Atua. Na avatu e Kaino ia fua o le fanua, a o Apelu na avatu uluaʻi tama a lana lafu. (Kenese 4:3, 4) O nei tane atonu ua tusa ma le taʻi 100 tausaga le matutua, auā e 130 tausaga o Atamu ae fanaua e ia lona atalii o Setu.—Kenese 4:25; 5:3.

O a la taulaga na faaalia ai sa iloa e Kaino ma Apelu lo la tulaga agasala ma sa faanaunau ai e fia maua le finagalo malie o le Atua. E lē taumatea sa la mafaufau i le folafolaga a Ieova e faatatau i le gata ma le Fanau a le fafine. E lē o taʻua mai po o le ā le tele o le taimi ma ni taumafaiga na tuutoina atu e Kaino ma Apelu ina ia atiina aʻe ai se faiā ua faamaonia ma Ieova. Ae o uiga faaalia o le Atua i a la taulaga, ua mafai ai ona malamalama i o la mafaufauga loloto taʻitoʻatasi.

Ua faapea mai nisi tagata popoto, sa manatu Eva, o Kaino o le “fanau” lea o le a na faaumatiaina le gata, auā ina ua fanau mai Kaino na ia faapea ai: “Ua ou maua le tagata mai ia Ieova.” (Kenese 4:1) Afai sa iā Kaino lenei talitonuga, sa matuā sesē lava o ia. I le isi itu, sa ō faatasi le faatuatua ma le taulaga a Apelu. I lea, “o le faatuatua na avatu ai e Apelu i le Atua le taulaga e sili ona lelei i lo Kaino.”—Eperu 11:4.

 O le malamalama faaleagaga o Apelu ma le leai o se malamalama o Kaino, sa lē na o le pau lenā o le mea na eseese ai lenei ʻauso. Sa eseese foʻi o la uiga. O lea la, “ua silasila mai Ieova ia Apelu, atoa ma lana taulaga; a e peitai o Kaino ma lana taulaga, ua ia le silasila i ai.” E foliga mai sa manatu mamā Kaino i lana taulaga, ma sa na ona tau lava ina faataunuu. Ae sa leʻi finagalo le Atua i se tapuaʻiga faatagāfai. Na ati aʻe e Kaino se loto leaga, ma sa silafia e Ieova le sesē o ona uunaʻiga. O uiga faaalia o Kaino ina ua teena lana taulaga, sa faaalia ai lona uiga moni. Na i lo o le saʻili e faasaʻo le mataupu, “ona ita tele ai lea o Kaino, ua faaūū lava ona mata.” (Kenese 4: 5) O ana amioga na faaalia ai ona manatu ma faanaunauga leaga.

Lapataʻiga ma Uiga Faaalia

I le silafia o uiga o Kaino, na aʻoaʻia o ia e le Atua i lona fetalai atu: “Se a le mea ua e ita ai? Se a foi ua faaūū ai ou mata? Pe afai e te amio lelei e te le maua ea le fiafia? a e afai e te le amio lelei o loo taoto i le faitotoa le agasala. E uai atu lona manao ia te oe, e te pule foi oe ia te ia.”—Kenese 4:6, 7.

O loo iai se lesona tāua mo i tatou i inei. O le mea moni, o loo taoto mai i le faitotoʻa le agasala, o loo nofo faatalitali mai e ʻaina i tatou. Peitaʻi, ua tuuina mai e le Atua iā i tatou le faitalia ma e mafai ona tatou filifili e faia le mea saʻo. Na valaaulia e Ieova ia Kaino ina ia “amio lelei,” ae e leʻi faamalosia o ia e Ieova ina ia suia ona ala. Sa filifili e Kaino lava ia lona ala.

Ua faaauau mai le faamatalaga faagaeeina: “Ua fai mai foi Kaino ia Apelu lona uso, ua i ai foi i laua i le fanua, ona tulai atu lea o Kaino ia Apelu lona uso, ma fasioti ia te ia.” (Kenese 4:8) I lea, na avea ai Kaino o se fasioti tagata lē mafaufau ma lē usiusitai. E na te leʻi faaalia lava sina salamō laʻitiiti ina ua fesiligia o ia e Ieova e faapea: “O fea o i ai Apelu lou uso?” Na i lo o lea, sa tali atu Kaino ma le lotomaaa ma le leai o se alofa e faapea: “Ou te lei iloa; o aʻu ea le leoleo o loʻu uso?” (Kenese 4:9) O lenā pepelo tuusaʻo ma le teena o le mea na ia faia ua faaalia ai le leai o se loto alofa o Kaino.

Na faamalaiaina e Ieova ia Kaino ma tuliesea o ia mai le siʻomaga o Etena. O le faamalaiaina o le laueleele e foliga mai ua sili atu ona faia faapea ona o le tulaga o Kaino, ma o le a lē toe fua lelei mai le laueleele i ana galuega. Sa avea o ia ma sē e maumausolo ma faasevasevaloaina i le lalolagi. O le faitioga a Kaino i  le mamafa o lona faasalaga ua faaalia ai le popole e faapea, o le a toe taui atu iā te ia le fasiotiga o lona uso, ae na te leʻi faaalia lava se salamō moni. Na tuuina e Ieova “le faailoga” iā Kaino—e foliga mai i se tulaga iloga ina ia iloa ma mātaulia ai e isi ina ia puipuia ai o ia mai le fasiotia ona o le tauimasui.—Kenese 4:10-15.

Ona “alu atu lea o Kaino ai luma o Ieova, ua mau foi o ia i le nuu o Nota [“nuu o Tagata Maumausolo,” NW], i le itu i sasae o Etena.” (Kenese 4:16) I le aveina o se avā mai ona tuafāfine po o afafine o ona tauaiga, na ia fauina ai se aai na faaigoaina iā Enoka, lona atalii ulumatua. O lē na tupuga mai iā Kaino o Lameko, sa sili atu ona sauā e pei o lona augātamā lē amio Atua. Ae o le gafa o le aiga o Kaino na faaumatia i le Lolo i aso o Noa.—Kenese 4:17-24.

Lesona mo i Tatou

E mafai ona tatou aʻoaʻoina mai faamatalaga e uiga iā Kaino ma Apelu. Ua apoapoaʻi mai le aposetolo o Ioane i Kerisiano ina ia fealofani, “e le pei o Kaino na i loo leaga, na fasioti foi i lona lava uso.” O Kaino ma ‘lana amio sa leaga, a o le amio a lona uso ua tonu.’ Ua taʻua foʻi e Ioane e faapea: “O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau.” Ioe, o le auala e tatou te feutagaʻi ai ma o tatou uso Kerisiano, e maua ai ni āuga lelei i la tatou faiā ma le Atua ma o tatou faamoemoega mo le ola i le lumanaʻi. E lē mafai ona tatou feita i nisi o o tatou uso talitonu ma faatalitalia le mauaina o le faamaoniga a le Atua.—1 Ioane 3:11-15, LT; 4:20.

Atonu sa faapena foʻi ona tausia aʻe ia Kaino ma Apelu, ae sa leai se faatuatua o Kaino i le Atua. O le mea moni, sa ia faaalia le agaga o le Tiapolo, o le ‘fasioti tagata ia ma le tamā o le pepelo.’ (Ioane 8:44) Ua faaalia i le auala na uia e Kaino e faapea, ua iā i tatou uma le faitalia e filifili ai, ma o i latou e filifilia e faia le agasala, ua vavae ese e i latou i latou lava mai le Atua, ma e faasalaina e Ieova i latou e lē salamō.

I le isi itu, na faaalia e Apelu le faatuatua iā Ieova. O le mea moni, “o le faatuatua na avatu ai e Apelu i le Atua le taulaga e sili ona lelei i lo Kaino; ona o lea ua taʻua ai o ia ua amiotonu, o loo taʻuleleia ana taulaga e le Atua.” E ui lava e lē o taʻua i le Tusi Paia se upu e tasi na tautala mai ai Apelu, ae e ala i lona faatuatua e fai ma faaaʻoaʻo, “ua tautala” mai ai o ia.—Eperu 11:4.

O Apelu o le uluaʻi tagata lea i se faasologa umi o ē na tausia le faamaoni. O lona toto lea na ‘alaga atu iā Ieova mai le eleele,’ e lē o faagaloina. (Kenese 4:10; Luka 11:48-51) Afai e tatou te faaalia le faatuatua e pei o Apelu, e mafai foʻi e i tatou ona olioli i se faiā tautele ma tumau ma Ieova.

[Pusa i le itulau 22]

LE FAIFAATOʻAGA MA LE LEOLEO MAMOE

O le faatoʻaina o le laueleele ma le tausia o manu, o nisi na o tiute tauave na tuuina atu e le Atua iā Atamu i le amataga. (Kenese 1:28; 2:15; 3:23) Sa avea lona atalii o Kaino o se faifaatoʻaga, a o Apelu sa avea ma leoleo mamoe. (Kenese 4:2) Talu ai o meaʻai a tagata sa faaaogā na o fualaau taumafa mata ma fualaau faisua seʻia oo i le taimi ina ua mavae le Lolo, aiseā la e tausia ai mamoe?—Kenese 1:29; 9:3, 4.

Ina ia mafai ona ola, sa manaʻomia e mamoe le tausiga mai tagata. Ua faamaonia i le tulaga o Apelu e faapea, na tausia e tagata manu lalata mai lava i le amataga o le talafaasolopito o le tagata. E lē o taʻua mai i le Tusi Paia pe sa faaaogā e uluaʻi tagata ia le suāsusu o manu e fai ma meataumafa, ae e oo lava iā i latou e lē taumamafa i aano o manu, e mafai ona faaaogā le fulufulu mamoe. Ma pe a mate se mamoe, e mafai ona faaaogā o latou paʻu mo ni fuafuaga aogā. Mo se faaaʻoaʻoga, ina ia saunia ni ofu mo Atamu ma Eva, na faia ai e Ieova ni “ofu paʻu” mo i laʻua.—Kenese 3:21.

Po o le ā lava le tulaga, e foliga mai e talafeagai ona manatu e faapea, i le amataga, sa felagolagomaʻi lava ia Kaino ma Apelu. Sa la saunia se mea sa manaʻomia e isi i le aiga ina ia oofu ma taumamafa lelei ai pea.

[Ata i le itulau 23]

O Kaino ma ‘lana amio sa leaga, a o le amio a lona uso ua tonu’