Fesili Mai le ʻAufaitau

O le ā le mamao e faatatauina ai e Kerisiano i aso nei, tapulaa e muta ai faaipoipoga i le va o tauaiga, e pei ona sa faatulaga mai ai i le Tulafono Faa-Mose?

E lē o auʻiliʻiliina mai e le Tulafono na tuuina atu e Ieova i le nuu o Isaraelu sauniga ma taualumaga uma e faia ai faaipoipoga. Ae peitaʻi, o loo faataatia mai ai ni faasāsāga i nisi o faiā faalefaaipoipoga. Mo se faaaʻoaʻoga, i le Levitiko 18:6-20, ua tatou maua ai se lisi o faiā e faasāina e aofia ai “se tasi o lona lava aiga.” Ua matuā auʻiliʻili mai e lenā fuaitau po o ai tonu tauaiga faaletino e lē tatau ona latou faia ni feusuaʻiga o le tasi i le isi. E moni, e lē o ola Kerisiano i lalo o le tulafono Faa-Mose pe noatia i ana poloaʻiga. (Efeso 2:15; Kolose 2:14) Ae peitaʻi, e lē o le uiga o lenei mea faapea, o le a lē amanaʻia ai e Kerisiano lenei mataupu pe a oo i le filifilia po o ai e faaipoipo atu i ai. E tele māfuaaga e faapogaia ai lenei mea.

Muamua lava, o loo iai tulafono a atunuu e faasā ai faaipoipoga i le va o ni tauaiga vavalalata, ma o le matafaioi autū a Kerisiano, o le usitaia lea o tulafono a le atunuu o loo latou nonofo ai. (Mataio 22:21; Roma 13:1) O le mea moni, e eseese tulafono a lea atunuu ma lea atunuu i lenā mataupu. O le tele o tulafono faapena i aso nei, o loo faavae autū lava i le iloiloina o tupuaga. O le mea moni ua mātauina, o faaipoipoga i le va o ni tauaiga faaletino e vavalalata, e telē se avanoa e ono aafia ai a latou fanau i ni tulaga lē atoatoa o le tino ma ni faamaʻi. Ona o lea māfuaaga, faapea foʻi lo latou ‘usiusitai i faipule silisili,’ e tatau ai i Kerisiano o loo sauni atu e faaipoipo ona tausisia tulafono tau i faaipoipoga a le atunuu o loo latou nonofo ai.

Ae e iai foʻi le tulaga e faatatau i mea e talia ma mea e lē talia i le nuu lea e nofo ai se tasi. E toetoe lava o aganuu uma e iai a latou tulafono ma tū masani e faamalosia ai le taofia o faaipoipoga i le va o tagata e aiga vavalalata i le toto, ona e masani ona manatu i na faiā o ni faiga faamataifale, ma ua faasāina ai. E ui lava o faiā patino nei ua faasāina, atonu e matuā ese foʻi lo latou faatulagaina i isi aganuu eseese, ae ua faapea mai le Encyclopædia Britannica, “i le tulaga masani lava ia, o le felataʻi tele o ni faiā tau tupuaga i le va o ni tagata se toʻalua, o le sili atu foʻi lenā ona malolosi ma maumauaʻi faalogona o i laʻua nei e toʻalua, ina ia taofia pe lē faia ni a la faiā tau feusuaʻiga.” O lea, e tusa lava pe leai ni faiā faamataifale o aafia ai, ae e lē mananaʻo Kerisiano e faia ni gaoioiga e matuā lē amanaʻia ai le agaifanua po o faalogona talafeagai o tagata o le nuu, ma lē faalumaina ai le faapotopotoga Kerisiano po o le suafa o le Atua.—2 Korinito 6:3.

Aua foʻi neʻi lē amanaʻia o tatou lotofuatiaifo mai le Atua. O tagata uma lava ua fananau mai ma se faalogona e iloa ai le saʻo ma le sesē, le lelei ma le leaga. (Roma 2:15) E taʻu atu e o latou lotofuatiaifo iā i latou le mea e tatau ma saʻo, ma le mea e lē tatau ma leaga, seʻi vaganā lava ua faapiʻoina pe faamaaaina o latou lotofuatiaifo i ni masaniga matagā. Na tau faaataata mai lava e Ieova lenei manatu ina ua ia tuuina mai i le fanauga a Isaraelu lana tulafono e faatatau i faaipoipoga i le va o tagata e felataʻi a latou faiā faaleaiga. Ua tatou faitau ai e faapea: “O mea ua faia i le nuu o Aikupito, na outou mau ai, aua tou te faia faapea; o mea foi ua faia i le nuu o Kanana ou te faaoo atu ai outou, aua tou te faia faapea; aua neʻi usiusitai foi outou i a latou tu.” (Levitiko 18:3) E matuā faatāua e Kerisiano o latou lotofuatiaifo ua aʻoaʻoina e le Tusi Paia, ma e latou te lē faatagaina e faaleaga i manatu ua faasesēina o nuu, i le saʻo ma le sesē.—Efeso 4:17-19.

O lea la, o le ā se faaiʻuga e mafai ona tatou fai? E ui e lē o ola Kerisiano i lalo o le Tulafono Faa-Mose, ae ua taʻu manino atu e o latou lotofuatiaifo iā i latou e faapea, o faaipoipoga i le va o ni tagata e felataʻi a latou faiā faaleaiga—e pei o le tamā ma le afafine, le tinā ma le atalii, le tuagane ma le tuafafine—e matuā lē taliaina lava i le faapotopotoga Kerisiano. * A o faatuputupulaʻia le liʻo o le ʻauaiga, o le a iloa e Kerisiano e iai tulafono ma tapulaa e pulea ai faaipoipoga faaletulafono, ma e iai tapulaa e aloaʻia e le lautele ma i tū ma aganuu. E tatau ona matuā iloiloina ma le faaeteete nei tapulaa, ina ia mafai ai ona tatou ōgatusa ma fautuaga a le Tusi Paia e faapea: “Ia faamamaluina le faaipoipoga e tagata uma.”—Eperu 13:4, LF.

[Faamatalaga pito i lalo]