O le ā Uiga Moni o le Tumamā?

TALU ai tulaga matuā palapalā i Europa ma le Iunaite Setete i vaitausaga o le lona 18 ma lona 19 o senituri, na talaʻia ai e misionare o lenā vaitaimi le mea atonu na taʻua o “se aʻoaʻoga o le tumamā.” Na faatutusa e lenei aʻoaʻoga le tupalapalā ma le agasala, ae na faapea mai, o le tumamā ua faalatalata atu ai se tasi i le Atua. Atonu o le mea lenei ua lauiloa ai le faaupuga e faapea, “O le mamā e sosoo atu i le amioatua.”

O le manatu lenei na taʻua e le Salvation Army, lea na faavaeina e William ma Catherine Booth. E tusa ai ma le faamatalaga i le tusi, Health and Medicine in the Evangelical Tradition, o se tasi o a latou uluaʻi faaupuga e faapea: “Fasimoli, Meaʻai, ma le Faaolataga.” O lea, ina ua faavaeina ma le matuā manino e Louis Pasteur ma isi, le fesootaʻiga i le va o faamaʻi ma siama ninii, na atili ai ona faamalosia le faavae faasaienisi mo ni taumafaiga e sili ona lelei mo le soifua mālōlōina o tagata lautele.

O nisi o laasaga na vave ona faia, sa aofia ai le lē manaʻomia ona sogi se molimau o se faamasinoga i le Tusi Paia, ma na faasāina le faaaogāina o se ipu e tasi e feinu uma ai tagata e toʻatele i le aʻoga ma nofoaga e faatali ai nofoaafi. Na oo lava ina faia taumafaiga e suia ai le ipu e tasi lea sa faaaogā i sauniga faalelotu i le tofu o le tagata ma lana ipu. Ioe, e foliga mai sa telē se taulau o na tagata na uluaʻi faavaeina na aʻoaʻoga, i le suia o manatu o tagata i le tumamā.  Sa matuā aogā lea taumafaiga, na iʻu ai lava ina taʻua e se tasi tusitala le iʻuga o lea aʻoaʻoga, “o se maelega aasa i le tumamā.”

Ae peitaʻi, o lenei “maelega aasa i le tumamā,” e foliga mai sa na ona faafoliga mai. E leʻi umi se taimi ae suia loa e le ʻaufaioloa le fasimoli masani e avea ma fasimoli e faaaulelei ai foliga. O le atamai o le faiga o faasalalauga faatosina, ua talitonu ai tagata faatau e faapea, o le faaaogāina o na mea e pei o le fasimoli mo le tumamā, o le a maua ai e lē o loo faaaogāina se tulaga matagofie i le soifuaga, lea e na o le mataʻua mai i ai o isi. Ua faaauilumaina e televise lenei manatu tau faasesē. O tagata lauiloa ma aulelei o loo autū mai i faasalalauga faatosina ma i ata faasolo i televise ma tifaga, e seāseā lava tatou vaai atu o latou faamamāina mai o latou fale, salu mamā o latou fanua, taalao le lapisi, pe faamamā foʻi feʻauvale a a latou taʻifau ma pusi.

E iai foʻi i latou e manatu faapea, o le ō e faigaluega e mafai ona maua ai tupe e totogi ai pili, ae leai ni tupe e maua mai i feʻau i le fale po o isi galuega faamamā. Ma ona e leai ni taui tau tupe o maua ai, aiseā la e tatau ai fua ona latou manatu mamafa i le siʻosiʻomaga? O se tasi o iʻuga o lenei mea, ua manatu ai nisi tagata i aso nei e faapea, o le tumamā sili lava, o le tumamā lea o le tagata iā te ia lava.

Le Silafaga a le Atua i le Tumamā

E lē taumatea o na uluaʻi taumafaiga e aʻoaʻo le tumamā sa fesoasoani i le faaleleia o tulaga o le soifuaga o tagata. Ma e saʻo lea, auā o le tumamā o se uiga na puna mai iā Ieova, le Atua e paia ma mamā. Ua ia aʻoaʻo i tatou ina ia maua aogā e ala i le avea o ni ē e paia ma mamā i o tatou ala uma.—Isaia 48:17; 1 Peteru 1:15.

Ua avea Ieova le Atua ma faaaʻoaʻoga lelei i lenei vala. O le tumamā, faapea foʻi ma isi ona uiga e lē vaaia, o loo vaaia manino mai i foafoaga vaaia a le Atua. (Roma 1:20) Ua tatou mātauina faapea, e lē o faapogaia e le foafoaga lava ia se polusione tumau. O le laueleele ma le tele o ona faataamilosaga faaekolosi, o se mea e maofa ai ona e faamamāina e ia o ia lava, ma ua fuafuaina mo le soifuaga mamā ma mālōlōina. O na galuega mamā e puna mai i na o Lē na Fuafuaina Mea e tumamā i ana feutagaʻiga. O le mea lea, e mafai ai ona tatou faia se faaiʻuga e faapea, e tatau ona mamā tagata tapuaʻi o le Atua i vala uma o o latou olaga.

Vala e Fā o le Tumamā

Ua faailoa mai e le Tusi Paia vala e fā o le tumamā e ao i tagata tapuaʻi o le Atua ona tauivi ina ia ausia. Seʻi o tatou iloiloina nei vala taʻitasi.

Faaleagaga. E tatau ona manatu i le vala lenei o se tumamā e sili ona tāua i lo o vala uma lava, auā e fesootaʻi atu lenei vala ma faamoemoega o se tagata mo le ola e faavavau. Ae peitaʻi, o le vala lenei o le tumamā e sili atu ona lē amanaʻia e le toʻatele o tagata. I se faaupuga faigofie, o le uiga o le mamā faaleagaga, o le aua lava neʻi sopo tapulaa i mea ua uma ona faatuaoi mai e le Atua i le va o le tapuaʻiga moni ma le tapuaʻiga sesē, auā e so o se tapuaʻiga sesē lava, e lē mamā i le silafaga a le Atua. Na tusi mai le aposetolo o Paulo e faapea: “Ia o mai ai outou nai totonu ia te i latou, ma ia outou vavae mai, ua fetalai mai ai le Alii [o Ieova], aua foi tou te papai atu i se mea leaga; ona ou talia ai lea o outou.” (2 Korinito 6:17) Ua faapatino mai foʻi e le soo o Iakopo le vala lenei: “O lenei lava le toaga i lotu e lelei ma le faamaoni i luma o le Atua o le Tamā lea, . . . ia leoleo foi o ia ia te ia, ina neʻi pisia mai o ia i le lalolagi.”—Iakopo 1:27, LF.

Ua faaalia manino mai e le Atua lona lē fiafia i le faafefiloi o le tapuaʻiga sesē ma lana tapuaʻiga moni. E masani lava i tapuaʻiga sesē ona faaaofia ai faiga lē mamā ma tupua ma atua e inosia. (Ieremia 32:35) I lea, ua uunaʻia ai Kerisiano moni ina ia aua neʻi aafia i tapuaʻiga lē mamā.—1 Korinito 10:20, 21; Faaaliga 18:4.

Amioga. I inei foʻi, ua matuā manino lava ona faatuaoi mai ai e le Atua le eseesega i le va o le mea e mamā ma le mea e lē mamā. O le lalolagi atoa, ua iai i le tulaga lea e pei ona faamatalaina i le Efeso 4:17-19: “O loo faapouliuligia o latou mafaufau, o liliueseina i latou i le ola o i le Atua . . . Ua latou le lagona se mea, ua tuuina atu i latou e i latou i le matāitu, e fai mea leaga uma lava ma le tuʻinanau i ai.” O na mafaufauga lē mamā ua faaalia lava i le tele o auala, pe faalialia pe faatogafiti, o lea e manaʻomia ai i Kerisiano ona leoleomaluina i latou.

 Ua iloa e i latou o ē alolofa i le Atua e faapea o le talitane, tauatane, feusuaʻiga a o leʻi faaipoipo, ma ata i feusuaʻiga lē mamā, e solia ai tapulaa a Ieova tau i amioga mamā. Ae peitaʻi, ua matuā taatele lava faiga i faafiafiaga ma tifiga a le lalolagi. O lea la, e tatau i Kerisiano ona leoleomalu i latou mai na uiga. O le ofuina o ofu pupuu ma valavala i sauniga faa-Kerisiano po o faatasitasiga faitele, e tosina atu ai ma le lē tatau manatu i le tino o le tagata, ma e faaalia ai foʻi le aunoa o se manatu mamafa o lea tagata i tapulaa o amioga mamā. E lē gata i le aumaia ai o mafaufauga lē mamā faalelalolagi i le aufaatasiga faa-Kerisiano, ae o le ofuina o ofu faapena e ono faatupu ai ni mafaufauga leaga i isi. O le vala lenei e tatau i Kerisiano ona galulue mamafa ina ia faaalia ai le “poto mai lugā.”—Iakopo 3:17.

Mafaufau. O mafaufauga lilo o se tagata, e lē tatau ona avea ma nofoaga e faaputu ai ni mafaufauga leaga. Na lapataʻi mai Iesu e faatatau i mafaufauga lē mamā i lona fetalai mai: “Ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:28; Mareko 7:20-23) E tutusa lava le faatatauina o nei upu ma le matamata i ata ma tifaga e uiga i feusuaʻiga lē mamā, le faitau i tusi o faamatalaga i faiga o feusuaʻiga matagā, ma le faalogologo i musika ma fatuga o loo faamatala mai ai faiga lē mamā. O lea, e tatau ai i Kerisiano ona ʻaloese mai le faaleagaina o i latou e ala i le mafaufau pea i mafaufauga lē māmā e mafai ona faapogaia ai le faia o amioga, o upu, ma gaoioiga e lē mamā ma lē paia.—Mataio 12:34; 15:18.

Faaletino. I le Tusi Paia, e fesootaʻi lelei lava le paia ma le mamā faaletino. Mo se faaaʻoaʻoga, na tusi mai Paulo e faapea: “Le au pele e, . . . ia tatou faamamā ia te i tatou i mea uma e leaga ai le tino atoa ma le agaga, ia faaatoatoaina lo outou faapaiaina i le mataʻu i le Atua.” (2 Korinito 7:1) O le mea lea, e tatau ai i Kerisiano moni ona tauivi i se tele e mafai ai, ina ia tausia mamā o latou tino, o fale, ma le laufanua. E oo lava i nofoaga e faalēlava le vai e faamamā ma tāʻeʻele ai, e tatau i Kerisiano ona taumafai e faia le mea aupito sili latou te mafaia ina ia tumau ona mamā ma fiafia mai i ai isi tagata.

O le mamā faaletino, e aofia ai le lē faaaogāina o le tapaa, le inutele i le ʻava malosi, ma so o se faaaogāsesēina o vailaau faasāina, na e manogi leaga ma faaleagaina ai le tino. Sa fiafia le tama leoleo mamoe lea e faamatalaina i Le Pese a Solomona, i le manogi manaia o ofu o le teine Sulami. (Pese a Solomona 4:11) O le tausia o lo tatou lava soifua mālōlōina, o se gaoioiga alofa lea e ao ona faia, ona e tatou te ʻalofia ai le faasasala atu o se manogi lē lelei iā i latou o loo i o tatou autafa. Atonu e manaia le manogi o fagu sausau ma mea faamanogi, ae e lē tutusa lava ma le manogi pe a tāʻele e lē aunoa ma ia faamamā lavalava.

Ia Iai se Vaaiga Paleni

E mafai ona soona faamamafa e tagata le mamā faaletino. I se tasi itu, o le soona faamamafa o le tumamā e mafai ona faoa ai lo tatou  olioli i le olaga. E mafai foʻi ona alu ai le tele o le taimi tāua. Ae i le isi foʻi itu, o fale e eleelea ma lē tausia lelei e ono alu ai le tele o tupe i le toe faaleleia. I lo o le soona faamamafa la o le tumamā pe ova foʻi le tupalapalā, ae o le auala paleni lava, o le tausia mamā o o tatou fale ma ia fiafia mai i ai isi.

Ia faigofie ma aua neʻi tele naʻuā. O fale po o potu e gaogaosā e faigatā ona faamamāina, ma atonu o le a faigatā ona iloa atu le palapalā i na siʻomaga o loo tele mea o iai. O fale e talafeagai ae lē gaogaosā, e laʻitiiti se taimi e faaalu i le faamamāina. E matuā fautuaina lava e le Tusi Paia le faafaigofie o le olaga: “Afai ua maua e i tatou o mea e aai ai ma mea e oofu ai, ia gata ai o tatou manao.”—1 Timoteo 6:8.

Tausia pea ia mamā. O se fale mamā, o le tiute tauave lea a tagata uma e nonofo ai. O fale e lē mamā, e masani lava ona amata mai i le lē faamamāina o potu. O le mamā, o lona uiga o le faatulagaina o mea uma i o latou tulaga saʻo. Mo se faaaʻoaʻoga, e lē tatau ona fola solo lavalava palapalā i totonu o le potumoe. O le mea e sili ona mataʻutia, o le faataatitia solo lea o meataalo ma meafaigaluega e ono lamatia ai. O le tele o faalavelave e tutupu i le aiga e māfua ona o ni masaniga tupalapalā.

E manino lava la le ōgatusa o le tumamā ma le soifuaga faa-Kerisiano. E tusa ai ma le olaga amioatua, na talanoa ai le perofeta o Isaia e uiga i “le ala sa.” Ma ua ia faaopoopo mai se manatu manino e faapea, “e le ui atu ai se ua leaga [lē mamā].” (Isaia 35:8) Ioe, o le atiina aʻe o masaniga lelei o le tumamā i le taimi nei, o se faamaoniga malosi lea o lo tatou faatuatua i le folafolaga a le Atua e faapea, ua lē o toe umi se taimi ona ia faavaeina loa lea o se lalolagi parataiso e mamā. Ona viia ai lea e tagata uma i vaega uma o le lalolagi Ieova le Atua, e ala i le faatatauina atoatoa o ana tapulaa e silisili ona lelei o le tumamā.—Faaaliga 7:9.

[Ata i le itulau 6]

O se fale mamā, o le tiute tauave lea a tagata uma e nonofo ai

[Ata i le itulau 7]

O le lalolagi, o se mea e matuā ofo ai ona e faamamāina e ia ia lava