Po o Aofia Oe iā i Latou e Alofaina e le Atua?

“O le ua ia te ia aʻu poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e loʻu Tamā.”—IOANE 14:21.

1, 2. (a) Na faapefea ona faaalia e Ieova lona alofa mo tagata? (e) O le ā na faavaeina e Iesu i le pō o Nisani 14, o le 33 T.A.?

E ALOFA Ieova i lana foafoaga faaletagata. O le mea moni, o le alofa “[“tele,” NW] mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) A o lata mai le taimi e faia ai le Faamanatuga o le maliu o Keriso, ua tatau ai i Kerisiano moni ona sili atu ona lagonaina na i lo se isi lava taimi, e faapea o Ieova e “alofa mai o ia ia te i tatou, ua na auina mai foi lona Alo o le togiola mo a tatou agasala.”—1 Ioane 4:10.

² I le pō o Nisani 14, o le 33 T.A., na faapotopoto ai Iesu ma ona aposetolo e toʻa 12 i le afeafe pito i luga i Ierusalema e faailogaina ai le Paseka, e faamanatu ai le faasaoina o tagata Isaraelu mai Aikupito. (Mataio 26:17-20) Ina ua uma le faailogaina o lenei tausamiga faa-Iutaia, ona tuu atu loa lea e Iesu Iuta le Sekara e alu, ma na faavaeina ai loa le talisuaga faamanatu lea o le a avea ma Faamanatuga Faa-Kerisiano o le maliu o Keriso. * Na faatasi ma Iesu le toʻa 11 o aposetolo na totoe i lenei talisuaga i le faaaogāina o le areto e lē faafefeteina ma le uaina mūmū e fai ma faatusa, o lona tino ma lona toto. O auʻiliʻiliga o le auala na faagasolo ai e Iesu lenei talisuaga o loo aumaia e tusitala o uluaʻi Evagelia e tolu, o Mataio, Mareko, ma Luka ma le aposetolo o Paulo, lea na ia faaupuina lenei talisuaga o “le talisuaga [“afiafi,” NW] a le Alii.”—1 Korinito 11:20; Mataio 26:26-28; Mareko 14:22-25; Luka 22:19, 20.

3. O ā auala tāua ua ese ai faamaumauga a le aposetolo o Ioane mai faamaumauga a isi e faatatau i toe taimi o Iesu ma ona soo i le afeafe pito i luga?

³ Ae o le manatu e mataʻina i inei, e leʻi taʻua lava e le aposetolo o Ioane le tufaina atu o le areto ma le uaina, atonu ai ona e oo ane i le taimi na ia tusia ai lana tusitusiga faa-Evagelia (pe tusa o le 98 T.A.), ua leva ona faavaeina lea faatulagaga i uluaʻi Kerisiano. (1 Korinito 11:23-26) Peitaʻi, e ala i le faagaeeina e le agaga, e na o Ioane ua ia taʻuina mai iā i tatou nisi o faamatalaga tāua e tusa ai o mea na taʻua ma faia e Iesu a o lalata atu lava ona Ia faavaeina le Faamanatuga o Lona maliu, faapea foʻi ma le faatoʻā māeʻa. O nei faamatalaga faafiafia loto ua faatumulia ai le tele o mataupu o le Evagelia a Ioane. Ua faataʻitaʻia manino mai ai le ituaiga o tagata e alofa i ai le Atua. Seʻi o tatou iloiloina le Ioane mataupu e 13 seʻia oo i le mataupu e 17.

Ia Aʻoaʻo Mai le Alofa Uigaese o Iesu

4. (a) Na faapefea ona faamamafa e Ioane le matua autū o le feiloaʻiga a Iesu ma ona soo ina ua ia faavaeina le Faamanatuga? (e) O le ā se tasi o māfuaaga tāua e alofa ai Ieova iā Iesu?

⁴ O le alofa o le matua autū lea i nei mataupu uma ma o loo iai fautuaga faamavae a Iesu i ona soo. O le mea moni, e 31 taimi o loo taʻua ai vala eseese o le upu “alofa” i inā. Ua matilatila ona faamanino mai i nei mataupu na i lo isi, le alofa loloto o Iesu i lona Tamā, o Ieova, faapea ma ona soo. O le alofa o Iesu mo Ieova ua manino mai i faamaumauga uma a Evagelia  e faatatau i lona soifuaga, ae e na o Ioane lava na faamauina le taʻua manino e Iesu faapea: “Ou te alofa i le Tamā.” (Ioane 14:31) Na taʻua foʻi e Iesu faapea e alofa Ieova iā te ia ma na faamatalaina le māfuaaga. Na ia faapea mai: “Faapei ona alofa mai o le Tamā ia te au, e faapea lava ona ou alofa atu ia te outou; ia tumau pea outou i loʻu alofa. Afai tou te tausia aʻu poloaiga, ona tumau lea o outou i loʻu alofa; pei ona ou tausia poloaiga a loʻu Tamā, ma ou tumau i lona alofa.” (Ioane 15:9, 10) Ioe, e alofa Ieova i lona Alo ona o lona usiusitaʻi atoatoa. Maʻeu se lesona lelei mo soo uma o Iesu Keriso!

5. Na faapefea ona faataʻitaʻia e Iesu lona alofa mo ona soo?

⁵ O le loloto o le alofa o Iesu mo ona soo o loo faamamafaina i le amataga lava o faamaumauga a Ioane i le feiloaʻiga mulimuli a Iesu ma ona aposetolo. Na taʻua e Ioane e faapea: “A o lei oo i le tausamiga o le paseka, ua silafia e Iesu ua oo mai ona po e tuua ai e ia lenei lalolagi, a e maliu atu i le Tamā; ua na alofa i ona tagata o i le lalolagi, ua ia alofa ia i latou ua oo i le gataaga.” (Ioane 13:1) I lenā afiafi e lē mafaagaloina, na ia tuuina atu ai iā i latou se lesona aogā i le auauna atu ma le alofa i isi. Na ia mulumuluina o latou vae. O se mea lenei sa tatau ona lotomalilie i latou uma taʻitoʻatasi e fai mo Iesu ma o latou uso, ae na latou faatalatū e fai. Na faia e Iesu lenei galuega maulalo ona ia faapea atu lea i ona soo: “Afai o aʻu le Alii, ma le aʻoaʻo, ua ou mulumuluina o outou vae, e tatau ona outou femulumuluai o outou vae. Auā ua ou avatu le faaaʻoaʻo ia te outou, e pei ona ou faia ia te outou, ia faapea lava e outou ona fai.” (Ioane 13:14, 15) E tatau i Kerisiano moni ona lotomalilie ma fiafia e auauna atu i o latou uso.—Mataio 20:26, 27, faaopoopoga i le pito i lalo, NW; Ioane 13:17.

Mulimuli i le Poloaʻiga Fou

6, 7. (a) O ā faamatalaga tāua ua aumai e Ioane e faatatau i le faavaeina o le Faamanatuga? (e) O le ā le poloaʻiga fou na tuuina atu e Iesu i ona soo, ma o le ā le māfuaaga ua fou ai?

⁶ O faamaumauga a Ioane i le mea na tupu i le afeafe pito i luga i le pō o Nisani 14, e na o le pau lenā o le faamaumauga o loo taʻua patino ai le tuumuli ese o Iuta le Sekara. (Ioane 13:21-30) O le faatusatusa o faamaumauga a Evagelia ua faaalia ai faapea na faatoʻā faavaeina e Iesu le Faamanatuga o Lona maliu ina ua tuumuli lenei tagata faalata. Ona ia talanoa faaumiumi atu loa lea i ona aposetolo faamaoni, ma avatu iā i latou fautuaga ma faatonuga faamavae. A o tatou sauniuni e auai i le Faamanatuga, e tatau ona tatou matuā naunau i le mea na fetalai ai Iesu i lenā sauniga, aemaise ai e mautinoa lo tatou mananaʻo e iai faatasi ma i latou o ē e alofaina e le Atua.

⁷ O le uluaʻi faatonuga lava na tuuina e Iesu i ona soo ina ua uma ona faavaeina le Faamanatuga o lona maliu o se mea e fou. Na ia taʻua e faapea: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou. O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:34, 35) O le ā le mea e fou e faatatau i lenei poloaʻiga? I sina taimi mulimuli ane i lenā afiafi, na faamalamalamaina ai e Iesu ia mataupu, i le faapea mai: “O laʻu poloaiga lenei, ia outou fealofani, pei ona ou alofa atu ia te outou. E le sili lava le alofa o se tasi i lenei alofa, ia tuuina atu e se tasi lona ola e sui aʻi ana uo.” (Ioane 15:12, 13) Na poloaʻia e le Tulafono faa-Mose tagata Isaraelu e ‘alolofa atu i ē latou te tuaoi ia pei o i latou lava ia i latou.’ (Levitiko 19:18) Ae na sili atu le mea na faatatau atu i ai le poloaʻiga  a Iesu. E tatau i Kerisiano ona alofa atu o le tasi i le isi e pei ona alofa Keriso iā i latou, ma ia lotomalilie e faataulaga o latou lava ola mo o latou uso.

8. (a) O le ā o loo aofia ai i le alofa faataulaga? (e) O faapefea ona faaalia e Molimau a Ieova le alofa faataulaga i aso nei?

⁸ O le vaitaimi o le Faamanatuga o se taimi talafeagai lea e iloiloina ai i tatou taʻitoʻatasi faapea foʻi ma le faapotopotoga, ina ia vaai po o iā i tatou moni lava lenei faailoga matilatila o le Faa-Kerisiano moni—o le alofa e pei o le alofa o Keriso. O lea alofa faataulaga e ono uiga faapea, e tuu atu e se Kerisiano lona ola i se tulaga e lamatia ai na i lo le faalataina o ona uso, ma ua faapena lava ona iai i nisi taimi. Ae i le tulaga masani lava ia, e aofia ai lo tatou lotomalilie e faataulaga o tatou manaʻoga totino ina ia fesoasoani ma auauna atu ai i o tatou uso faapea ma isi. Ua avea le aposetolo o Paulo o se faaaʻoaʻoga lelei i lenei tulaga. (2 Korinito 12:15; Filipi 2:17) Ua lauiloa Molimau a Ieova i le lalolagi aoao i lo latou agaga faataulaga, i le fesoasoani atu lea i o latou uso ma o latou tuaoi ma tuuina atu i latou e faailoa atu upu moni o le Tusi Paia i o latou uso a tagata. *—Kalatia 6:10.

O Faiā e Faapelepele i Ai

9. Ina ia faatumauina la tatou faiā tautele ma le Atua ma lona Alo, o le ā le mea tatou te fiafia e fai?

⁹ E leai se mea e sili atu ona tautele iā i tatou na i lo le alofaina e Ieova ma lona Alo, o Keriso Iesu. Peitaʻi, ina ia maua ma lagonaina lenei alofa, e iai se mea e tatau ona tatou faia. I lenā lava pō mulimuli ma ona soo, na faapea atu ai Iesu: “O le ua ia te ia aʻu poloaiga ma tausi i ai, o ia lea e alofa mai ia te au; o lē alofa mai foi ia te au, e alofaina o ia e loʻu Tamā; ou te alofa foi ia te ia, ma ou faaali ia te ia.” (Ioane 14:21) Talu ai tatou te faapelepele i la tatou faiā ma le Atua atoa ma lona Alo, e tatou te usitaʻia ai ma le fiafia a la poloaʻiga. E aofia ai i lea tulaga le poloaʻiga fou ia faaalia le alofa faataulaga atoa ai ma le faatonuga na tuuina mai e Keriso ina ua mavae lona toetū “e talaʻi atu i le nuu, ma molitino atu,” ia taumafai malosi e ‘faia soo’ iā i latou o ē e taliaina le tala lelei.—Galuega 10:42; Mataio 28:19, 20.

10. O ā faiā tautele o loo tatalaina i le vaega faauuina faapea ma “isi mamoe”?

¹⁰ Mulimuli ane i lenā pō, i le taliina o le fesili na tuuina atu iā te ia e le soo faamaoni o Iuta (Tataio), na faapea atu ai Iesu: “Afai e alofa mai se tasi ia te au, e tausia e ia laʻu upu; e alofa foi loʻu Tamā ia te ia; e o mai foi i maua ia te ia, matou te nonofo ma ia.” (Ioane 14:22, 23) A o iai pea lava i le lalolagi, ua iai se faiā māfana faapitoa a Kerisiano faauuina ua valaaulia e nofotupu faatasi ma Keriso i le lagi, ma Ieova atoa ma lona Alo. (Ioane 15:15; 16:27; 17:22; Eperu 3:1; 1 Ioane 3:2, 24) Ae o a latou aumea o “isi mamoe,” o lo latou faamoemoe o le ola e faavavau i luga o le lalolagi, e iai foʻi la latou faiā tautele ma lo latou “leoleo mamoe e toatasi,” o Iesu Keriso, atoa ma lo latou Atua, o Ieova, pe afai e faamaonia lo latou usiusitaʻi.—Ioane 10:16; Salamo 15:1-5; 25:14.

 “E Le ni O le Lalolagi Outou”

11. O le ā le lapataʻiga faatupu manatu na tuuina atu e Iesu i ona soo?

¹¹ A o faagasolo lenei faatasiga mulimuli ma ona soo faamaoni a o leʻi oo i lona maliu, na tuuina atu ai e Iesu se lapataʻiga faatupu manatu: Afai e alofaina se tagata e le Atua, o le a inoino le lalolagi iā te ia. Na ia faapea atu: “Afai e ʻinoʻino mai le lalolagi ia te outou, ua outou iloa ua muamua ona ʻinoʻino mai ia te au, i lona ʻinoʻino ia te outou. Afai a ni tagata o le lalolagi outou, po ua alofa mai le lalolagi i ona tagata; a e le ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi ia te outou. Ia outou manatua le upu na ou fai atu ai ia te outou, E le sili le auauna i lona alii. Afai ua latou faasaua mai ia te au, e faasaua foi ia te outou; afai ua latou tausia laʻu upu, latou te tausia foi la outou.”—Ioane 15:18-20.

12. (a) Aiseā na lapataʻia ai e Iesu ona soo faapea o le a inoino le lalolagi iā i latou? (e) O le ā le mea e lelei ona manatunatu i ai tagata uma a o latalata mai le Faamanatuga?

¹² Na tuuina atu e Iesu lenei lapataʻiga ina ia lē faavaivai ma faamaamulu ai nei aposetolo e toʻa 11 faapea ma Kerisiano moni uma o le a mulimuli mai iā i latou, ona o le inoino o le lalolagi. Na ia faaopoopo atu e faapea: “Ua ou fai atu nei mea ia te outou, ina nei tausuai outou. E tulia outou i sunako e i latou; a e oo lava i le aso e manatu ai se na te fasioti ia te outou, ua na faia le taulaga i le Atua. E faia foi e i latou ia mea ia te outou, auā latou te lei iloa le Tamā atoa ma aʻu.” (Ioane 16:1-3) Ua faamatalaina e se tasi o lomifefiloi faale-Tusi Paia faapea o le ituaiga o veape o loo taʻua i inei o le “tausuai” o lona uiga “o le faapogaia o se tagata e amata ona lē maufaatuatuaina ma lafoaʻia se tasi na tatau ona ia faatuatuaina ma usitaʻi i ai; ua faapogaia ai le paʻū ese atu.” A o latalata mai le taimi e faia ai le Faamanatuga, e tatau i tagata uma ona manatunatu loloto i olaga o ē faamaoni, i aso ua mavae ma aso nei, ma faataʻitaʻi iā latou faaaʻoaʻoga o le tumau i tofotofoga. Aua neʻi faatagaina teteega po o sauāga e faapogaia oe e lafoaʻi Ieova ma Iesu, ae ia maumauaʻi e faatuatua ma usiusitaʻi atu iā i laʻua.

13. O le ā na talosagaina e Iesu mo ona soo i lana tatalo i lona Tamā?

¹³ I lana tatalo faaiʻu a o leʻi tuua lenā afeafe pito i luga i Ierusalema, na faapea atu ai Iesu i lona Tamā: “Ua ou tuu atu lau afioga ia te i latou; ua ʻinoʻino foi le lalolagi ia te i latou, auā e le ni o le lalolagi i latou, faapei o aʻu, ou te le so le lalolagi aʻu. Ou te le ole atu ina ia e ave ese ia te i latou i le lalolagi, a ia e tausi ia te i latou mai lē o loo leaga. E le ni o le lalolagi i latou, faapei o aʻu foi, ou te le so le lalolagi aʻu.” (Ioane 17:14-16, LF) E mafai ona tatou mautinoa faapea o loo tausia e Ieova i latou e alofa i ai, ma faamalosia i latou a o latou tausia le vavae ese mai le lalolagi.—Isaia 40:29-31.

Tumau i le Alofa o le Tamā ma le Alofa o le Alo

14, 15. (a) O le ā na faatusa i ai e Iesu ia lava, i le faaeseesega ma le ā le ‘vine leaga’? (e) O ai “la” o “le vine moni”?

¹⁴ A o faia le talanoaga māfana ma ona soo faamaoni i le pō o Nisani 14, na faatusa ai e Iesu o ia i “le vine moni,” i le faaeseesega ma le ‘vine leaga’ o Isaraelu lē faamaoni. Na ia faapea mai: “O aʻu nei o le vine moni, a o loʻu Tamā o lē  galue vine ia.” (Ioane 15:1) I senituri muamua atu, na tusia ai e le perofeta o Ieremia nei afioga a Ieova i ona tagata liliu ese: “Na ou totōina oe o le vine Soreka . . . Ua faapefea foi ona liua o oe ia te au ma lālā leaga o le vine ese?” (Ieremia 2:21) Na tusi le perofeta o Hosea e faapea: “O Isaraelu, o le vine ia e māfalā [“leaga,” NW]; ua ia fua mai ni fua e fai mona. . . . Ua faalotoloto lua i latou.”—Hosea 10:1, 2.

¹⁵ Na i lo le fuaina mai o fua o le tapuaʻiga moni, na paʻū atu Isaraelu i le faaaposetasi ma fuaina ai fua mo ia lava. E tolu aso a o lumanaʻi lana faatasiga mulimuli ma ona soo faamaoni, na taʻu atu ai e Iesu i taʻitaʻi faalotolotolua o Iutaia e faapea: “Ou te fai atu ai ia te outou, E aveesea le malo o le Atua ia te outou, a e tuuina atu i se nuu e au mai ai ona fua.” (Mataio 21:43) O le nuu fou o “le Isaraelu o le Atua,” ua faia aʻe e le 144,000 o Kerisiano faauuina o ē ua faatusaina “o la” o “le vine moni,” o Keriso Iesu.—Kalatia 6:16; Ioane 15:5; Faaaliga 14:1, 3.

16. O le ā na uunaʻia e Iesu ona aposetolo faamaoni e toʻa 11 e fai, ma o le ā e mafai ona fai atu e faatatau i le vaega totoe faamaoni i lenei taimi o le iʻuga?

¹⁶ Na taʻu atu e Iesu i ona aposetolo e toʻa 11 na iai faatasi ma ia i le afeafe pito i luga: “O la uma lava o ia te au e le fua, e aveeseina e ia; a o la uma e fua, e teuteu e ia, ina ia fua mai ai atili. Ina tumau [“tumau autasi,” NW] ia o outou ia te au, o aʻu foi ia te outou. Faapei o le la e le mafai ona fua pe a na o ia, pe afai e le mau i le vine; e faapea foi outou, pe afai tou te le tumau [“tumau autasi,” NW] ia te au.” (Ioane 15:2, 4) O le talafaasolopito faaonapōnei o tagata o Ieova ua faaalia ai faapea o le vaega totoe faamaoni o Kerisiano faauuina ua tumau autasi ma lo latou Ulu, o Keriso Iesu. (Efeso 5:23) Ua latou taliaina le faamamāina ma le teuteuina. (Malaki 3:2, 3) Talu mai le 1919, ua latou fuaina mai ai le anoanoaʻi o fua o le Malo, muamua o isi Kerisiano faauuina, ma talu mai le 1935, o loo faatupulaʻia pea le “motu o tagata e toatele” o aumea.—Faaaliga 7:9; Isaia 60:4, 8-11.

17, 18. (a) O ā upu a Iesu ua fesoasoani i le vaega faauuina ma isi mamoe e tumau ai i le alofa o Ieova? (e) O le a faapefea ona fesoasoani le auai i le Faamanatuga iā i tatou?

¹⁷ E faatatau atili atu foʻi upu a Iesu i Kerisiano faauuina uma ma ā latou aumea e faapea: “E viia loʻu Tamā i lenei mea, pe a outou fua tele mai; ona fai ai lea outou moʻu soo. Faapei ona alofa mai o le Tamā ia te au, e faapea lava ona ou alofa atu ia te outou; ia tumau pea outou i loʻu alofa. Afai tou te tausia aʻu poloaiga, ona tumau lea o outou i loʻu alofa; pei ona ou tausia poloaiga a loʻu Tamā, ma ou tumau i lona alofa.”—Ioane 15:8-10.

¹⁸ E tatou te mananaʻo uma lava e tumau i le alofa o le Atua, ma ua uunaʻia ai i tatou e lenei tulaga e avea ma Kerisiano e fuatele mai. Ua tatou faia lenei mea e ala i le faaaogāina o avanoa uma e talaʻia ai le “tala lelei o le malo.” (Mataio 24:14) E tatou te faia foʻi le mea e sili tatou te mafaia e faaalia ai “fua o le Agaga” i o tatou lava olaga. (Kalatia 5:22, 23) O le auai i le Faamanatuga o le maliu o Keriso o le a faamalosia ai i tatou i la tatou filifiliga e tumau e faia lenei mea, ona o le a faamanatu mai ai le alofa tele o le Atua ma Keriso iā i tatou.—2 Korinito 5:14, 15.

19. O le ā le isi fesoasoani o le a talanoaina i le mataupu o loo sosoo mai?

¹⁹ Ina ua uma ona faavaeina le Faamanatuga, ona folafola mai lea e Iesu faapea o le a auina mai e lona Tamā i ona soo faamaoni se “Fesoasoani, o le Agaga Paia.” (Ioane 14:26) O le auala e fesoasoani ai lenei agaga i le vaega faauuina ma isi mamoe e tumau ai i le alofa o Ieova o le a iloiloina i le mataupu o loo sosoo mai.

[Faamatalaga pito i lalo]

Fesili Autalu

• O le ā le lesona aogā i le auauna atu ma le alofa i isi na tuuina atu e Iesu i ona soo?

• E tusa ai o le ā le tulaga ua talafeagai ai ona iloiloina i tatou lava i le vaitaimi o le Faamanatuga?

• Aiseā e tatau ai ona tatou lē tausuai i le lapataʻiga a Iesu e faatatau i le inosiaina ma sauāina e le lalolagi?

• O ai “le vine moni”? O ai “la,” ma o le ā o loo faatalitalia mai iā i latou?

[Fesili mo le Suʻesuʻega]

[Ata i le itulau 15]

Na tuuina atu e Iesu i ona aposetolo se lesona e lē mafaagaloina i le auauna atu ma le alofa i isi

[Ata i le itulau 16]

Ua usitaia e soo o Keriso lana poloaʻiga ia faaalia le alofa faataulaga