Po ua E Maua “le Agaga o le Upu Moni”?
Po ua E Maua “le Agaga o le Upu Moni”?
‘Ona foai mai ai lea e le Tamā ia te outou le tasi Fesoasoani, ina ia tumau pea o ia ia te outou e faavavau; o le Agaga o le upu moni.’—IOANE 14:16, 17, LF.
1. O ā faamatalaga tāua na tuu atu e Iesu i ona soo i ona toe itula ma i latou i le afeafe pito i luga?
“LE ALII e, po o fea e te maliu atu i ai?” O se tasi lenā o fesili na fesili atu ai aposetolo o Iesu iā te ia i toe itula na faatasi ai ma i latou i le afeafe pito i luga i Ierusalema. (Ioane 13:36) A o faagasolo le sauniga, na taʻu atu e Iesu iā i latou o lea ua oo mai le taimi e tuua ai i latou ae toe foʻi atu i lona Tamā. (Ioane 14:28; 16:28) O le a ia lē toe faatasi ma i latou i le tino e aʻoaʻo iā i latou ma taliina a latou fesili. Peitaʻi, na ia faamautinoa atu iā i latou e faapea: “Ou te fai atu foi i le Tamā, ona foai mai ai lea e ia ia te outou le tasi Fesoasoani [po o sē e faamāfanafana], ina ia tumau pea o ia ia te outou e faavavau.”—Ioane 14:16, faaopoopoga i le pito i lalo, NW.
2. O le ā na folafola atu e Iesu o le a ia auina mai i ona soo pe a mavae lona alu ese?
2 Na faailoa atu e Iesu lenā fesoasoani ma ia faamatala ai le auala o le a fesoasoani ai i ona soo. Na ia taʻu atu iā i latou: “Ou te lei fai atu nei mea ia te outou i le amataga, auā na ou i ai ia te outou. A ou te alu atu nei ia te ia na auina mai aʻu . . . e aoga ia te outou, pe a aʻu alu ese; auā afai ou te le alu ese, e le maliu mai le Fesoasoani ia te outou; a e afai ou te alu, ou te auina mai o ia ia te outou. . . . A maliu mai o ia, o le Agaga lea e tupu mai ai le upu moni, e taʻitaʻi e ia ia te outou i upu moni uma.”—Ioane 16:4, 5, 7, 13.
3. (a) O anafea na auina mai ai “le agaga o le upu moni” i uluaʻi Kerisiano? (e) O le ā se tasi o auala tāua na avea ai le agaga o se “Fesoasoani” mo i latou?
3 Na faataunuuina lenei folafolaga i le Penetekoso o le 33 T.A., e pei ona taʻutino mai e le aposetolo o Peteru e faapea: “O Iesu lava lena ua toe faatuina e le Atua; o molimau i matou uma i lena mea. O lenei foi, ona ua siitia o ia i luga e le aao taumatau o le Atua, ma ua maua e ia mai le Tamā o le Agaga Paia na folafolaina, ua liligi ifo ai e ia lenei mea ua outou iloa ma faalogo ai nei.” (Galuega 2:32, 33) E pei ona o le a tatou vaai i ai mulimuli ane, o le liligiina ifo o le agaga paia i le Penetekoso na faataunuuina ai le tele o mea mo uluaʻi Kerisiano. Ae na folafola e Iesu faapea o “le agaga o le upu moni” o le a ‘faamanatu mai ia te i latou mea uma na ia fai atu ai ia te i latou.’ (Ioane 14:26) O le a mafai ai ona latou manatua le faiva ma aʻoaʻoga a Iesu, e oo lava i upu tonu na fetalai ai Iesu, ma latou tusitusia nei mea. O le a faapitoa lava ona fesoasoani lenei tulaga i le aposetolo matua o Ioane i le faaiʻuga o le uluaʻi senituri T.A. ina ua amata ona ia tusia lana Evagelia. O lenā faamaumauga ua aofia ai le fautuaga tautele na tuuina atu e Iesu ina ua ia faavaeina le Faamanatuga o lona maliu.—Ioane, mataupu 13-17.
4. Na faapefea ona fesoasoani “le agaga o le upu moni” i uluaʻi Kerisiano faauuina?
4 Na folafola atu foʻi e Iesu i na uluaʻi soo faapea o le agaga o le a ‘aʻoaʻo ia te i latou i mea uma lava’ ma ‘taʻitaʻi ia te i latou i upu moni uma.’ O le a fesoasoani le agaga iā i latou ia malamalama i mea loloto o le Tusi Paia ma faatumauina le autasi o o latou manatu, malamalamaga, ma fuafuaga. (1 Korinito 2:10; Efeso 4:3) O lea, na faamalosia ai e le agaga paia na uluaʻi Kerisiano e gaoioi o se vaega tuufaatasi o le “auauna faamaoni ma le mafaufau” e tufaina atu i tagata taʻitoʻatasi o le vaega o Kerisiano faauuina ia “mea e ʻai [faaleagaga] i ona itu aso.”—Mataio 24:45.
O Loo Molimau Mai le Agaga
5. (a) O le ā se vaaiga fou na faailoa atu e Iesu i ona soo i le pō o Nisani 14, 33 T.A.? (e) O le ā le matafaioi o le a faia e le agaga paia i le faataunuuina o le folafolaga a Iesu?
5 I le pō o Nisani 14, 33 T.A., na faaataata atu ai e Iesu i ona soo faapea e mulimuli ane o le a ia taliaina i latou ma nonofo faatasi ma ia ma lona Tamā i le lagi. Na ia taʻu atu iā i latou e faapea: “E tele mea e nonofo ai i le maota o loʻu Tamā; ana leai, po ua ou fai atu ia te outou, ou te alu e sauni se mea e nonofo ai outou? Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma aʻu; ina ia i ai outou i le mea ou te i ai aʻu.” (Ioane 13:36; 14:2, 3) O le a latou nofotupu faatasi ma ia i lona Malo. (Luka 22:28-30) Ina ia iā i latou lenei faamoemoe faalelagi, e tatau ona latou “fanau mai . . . le Agaga” o ni atalii faaleagaga o le Atua ma ia faauuina e auauna o ni tupu ma faitaulaga faatasi ma Keriso i le lagi.—Ioane 3:5-8; 2 Korinito 1:21, 22; Tito 3:5-7; 1 Peteru 1:3, 4; Faaaliga 20:6.
6. (a) O anafea na amata ai le valaau mai le lagi, ma e toʻafia na mauaina lenei valaau? (e) O i latou na valaaulia na papatisoina i le ā?
6 O lenei “valaau mai le lagi” na amata i le Penetekoso o le 33 T.A. ma o le vaega autū, e foliga mai na iʻu i le taulotoaʻiga o vaitausaga amata mai i le 1930 seʻia oo i le 1939. (Eperu 3:1) O le aofaʻiga o i latou ua faamaufaailogaina e le agaga paia e avea ma vaega o le Isaraelu faaleagaga e 144,000, na “faatauina nai tagata.” (Faaaliga 7:4; 14:1-4) O i latou nei na papatisoina i le tino faaleagaga o Keriso, i lana faapotopotoga, ma lona maliu. (Roma 6:3; 1 Korinito 12:12, 13, 27; Efeso 1:22, 23) Ina ua mavae lo latou papatisoga i le vai ma le faauuina e le agaga paia, ona latou ulu atu lea i se soifuaga faataulagaina, se soifuaga o le faamaoni seʻia oo i lo latou oti.—Roma 6:4, 5.
7. Aiseā e na o Kerisiano faauuina ai e tagofia ma le tonu le areto ma le uaina i le Faamanatuga?
7 I le avea ai o ni Isaraelu faaleagaga, ua iai nei Kerisiano faauuina i le feagaiga fou i le va o Ieova ma “le Isaraelu o le Atua.” (Kalatia 6:16; Ieremia 31:31-34) Na faamautūina le feagaiga fou e ala i le toto masaa o Keriso. Na taʻua e Iesu lenei mea ina o ia faavaeina le Faamanatuga o lona maliu. Na tusia e Luka e faapea: “Ona tago ai lea o ia i le areto, ua faafetai, ua tofitofi, ma avatu ia te i latou, ua faapea atu, “O loʻu tino lenei, ua foaiina atu mo outou; tou te faia le mea nei e fai ma faamanatuga ia te au.” Sa faapea foi ona tago i le ipu, ina ua uma ona tālisua, ua faapea atu, “O lenei ipu o le feagaiga fou lea i loʻu toto, ua faamaligiina mo outou.” (Luka 22:19, 20) O le vaega totoe, po o sui o loo totoe o le 144,000 o loo iai pea i le lalolagi, o i latou ia ua tagofia ma le tonu le areto ma le uaina lea o loo iai lona uiga faafaatusa i le Faamanatuga o le maliu o Keriso.
8. E faapefea ona iloa e le vaega faauuina faapea ua latou mauaina le valaau mai le lagi?
8 E faapefea ona iloa e le vaega faauuina faapea ua latou mauaina le valaau mai le lagi? Ua latou mauaina ma le matuā mautinoa le molimau a le agaga paia. Na tusi atu le aposetolo o Paulo iā i latou na e faapea: “O i latou uma ua taʻitaʻiina e le Agaga o le Atua, o atalii i latou o le Atua. . . . O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.” (Roma 8:14-17) O lenei molimau a le agaga e malosi tele, o lea o i latou e iai sina faalētonu itiiti lava e faatatau i le mauaina o le valaau mai le lagi e mafai ona ia faaiʻua ma le tonu e faapea e leʻi valaauina i latou, ma o lea la o le a latou lē tagofiaina ai le areto ma le uaina i le Faamanatuga.
Le Agaga ma Isi Mamoe
9. O ā vaega eseese e lua o loo taʻua i Evagelia ma le tusi o Faaaliga?
9 O le mafaufau i le numera faatapulaaina o Kerisiano ua valaauina e faia aʻe ai le Isaraelu faaleagaga, ua taʻua i latou e Iesu o le “lafu mamoe itiiti.” Ua aumaia i latou i totonu o le “lotoā” o le feagaiga fou, e ese mai i le lē mafaitaulia o “isi mamoe” o ē na fetalai i ai Iesu e tatau foʻi ona ia taʻitaʻia mai. (Luka 12:32; Ioane 10:16) O i latou o isi mamoe ua aoaoina i le taimi o le iʻuga o le a faia aʻe ai le “motu o tagata e toatele” ua fuafua e faasaoina i “le puapuaga tele,” ma le faamoemoe e ola e faavavau i le lalolagi parataiso. Ae manatua, o le faaaliga na mauaina e Ioane i le iʻuga o le uluaʻi senituri T.A. o loo faaeseese ai le motu o tagata e toʻatele ma le 144,000 o i latou o le Isaraelu faaleagaga. (Faaaliga 7:4, 9, 14) Po ua mauaina foʻi e isi mamoe le agaga paia, ma afai o lea, o faapefea ona aafia ai o latou olaga?
10. Ua faapefea ona papatisoina isi mamoe “i le suafa o le Tamā, ma le Atalii, ma le Agaga Paia”?
10 O le mea moni e iai le vaega tāua o loo faia e le agaga paia i soifuaga o isi mamoe. Ua latou faailogaina lo latou tuuina atu iā Ieova e ala i le papatisoina “i le suafa o le Tamā, ma le Atalii, ma le Agaga Paia.” (Mataio 28:19) E latou te amanaʻiaina le pule silisili ese a Ieova, e gauaʻi atu iā Keriso o lo latou Tupu ma o le Faaola, ma gauaʻi atu i gaoioiga a le agaga o le Atua, po o le malosi galue i o latou olaga. I lea aso ma lea aso, e latou te atiina aʻe ai “fua o le Agaga,” o le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā.”—Kalatia 5:22, 23.
11, 12. (a) O faapefea ona faapaiaina le vaega faauuina i se auala e matuā faapitoa? (e) O le ā le auala ua faapaiaina ma faamamāina ai isi mamoe?
11 E tatau foʻi ona faataga e isi mamoe le Afioga a le Atua ma lona agaga paia e faamamāina pe faapaiaina i latou. Ua uma ona faapaiaina le vaega faauuina i se auala e matuā faapitoa, ua taʻu amiotonuina ma ua paia i le avea ma faatoʻānofotane a Keriso. (Ioane 17:17; 1 Korinito 6:11; Efeso 5:23-27) Ua tautala le perofeta o Tanielu e faatatau iā i latou o “le au paia a lē Silisili ese,” o ē ua mauaina le Malo i lalo o le pulega a le “Atalii o le tagata,” o Keriso Iesu. (Tanielu 7:13, 14, 18, 27) Muamua atu, na folafola ai e Ieova i le nuu o Isaraelu e ala iā Mose ma Arona e faapea: “O aʻu o Ieova lo outou Atua; ia faapaiaina outou e outou, ma ia paia outou; auā e paia lava aʻu.”—Levitiko 11:44.
12 O le upu “faapaiaina” o lona uiga autū o “gaoioiga po o se faasologa o le faia ia paia, vavae ese, po o le tuu esea mo le auaunaga po o le faaaogā mo Ieova le Atua; o le tulaga o le paia, faapaiaina, po o le faamamāina.” I le tausaga e 1938, na taʻua ai e Le Olomatamata faapea o le vasega a Ionatapa, po o isi mamoe, e “tatau ona aʻoaʻoina faapea o le tuuina atu ma le faapaiaina e manaʻomia mo tagata uma taʻitoʻatasi o le a avea ma vaega o le motu o tagata e toʻatele ma ola i le lalolagi.” I le faaaliga o le motu o tagata e toʻatele o loo faamauina i le tusi o Faaaliga, o loo tautala iā i latou o loo “ua ta foi o latou ofu, ma ua faasinasinaina o latou ofu i le toto o le Tamai mamoe” ma o loo tuuina atu iā Ieova le ‘auaunaga ia te ia i lona malumalu i le ao ma le po.’ (Faaaliga 7:9, 14, 15) I le fesoasoani a le agaga paia, ua faia ai e isi mamoe la latou auaunaga sili e latou te mafaia ina ia faaōgatusa atu ai ma tulaga o le paia e manaʻomia e Ieova.—2 Korinito 7:1.
Lagolagosua i Uso o Keriso
13, 14. (a) E tusa ai ma le tala faatusa a Iesu i mamoe ma oti, o le ā e faalagolago i ai le faaolataga o mamoe? (e) I lenei taimi o le iʻuga, o faapefea ona lagolagosua isi mamoe i uso o Keriso?
13 Na faamatilatila e Iesu le sootaga vavalalata i le va o isi mamoe ma le lafu mamoe itiiti i lana faataoto i mamoe ma oti, lea na aofia i lana valoaga i “le faaiʻuiʻuga o le faiga o mea.” (NW) I lenā faataoto, na faaalia manino ai e Keriso faapea o le faaolataga o isi mamoe o loo fesootaʻi vavalalata atu i a latou amio agaʻi i le vaega faauuina, lea na ia taʻua o “oʻu uso.” Na ia taʻua e faapea: “Ona fai atu ai lea o le Tupu i e o i lona itu taumatau, O mai ia, o outou ua faamanuiaina e loʻu Tamā, ia fai mo outou tofi le malo ua saunia mo outou talu ona faavaeina le lalolagi. . . . E moni, ou te fai atu ia te outou, auā na faia e outou [“e tusa o le tele na outou faia ai,” NW] i le tasi o e aupito itiiti o oʻu uso nei, o aʻu lea na outou faia i ai.”—Mataio 24:3; 25:31-34, 40, LF.
14 O le faaupuga “e tusa o le tele na outou faia ai” e faatatau atu i gaoioiga o le lagolagosua ma le alofa na tuuina atu i uso faauuagagaina o Keriso, lea na faia e le lalolagi a Satani e tusa o ni tagata ese, ma oo ai lava ina tuuina nisi o i latou i le falepuipui. Na latou manaʻomia ni meaʻai, ni lavalava talafeagai, ma le tausiga tau i le soifua mālōlōina. (Mataio 25:35, 36, faaopoopoga i le pito i lalo, NW) I lenei taimi o le iʻuga, talu mai le 1914, o le toʻatele o le vaega faauuina na oo i ai na tulaga. Ua faamaonia mai e talafaasolopito o Molimau a Ieova i ona pō nei e faapea na fesoasoani iā i latou a latou aumea faamaoni, o isi mamoe, ona na uunaʻia i latou e le agaga.
15, 16. (a) O ā gaoioiga o loo fesoasoani faapitoa ai isi mamoe i uso faauuina o Keriso i le lalolagi? (e) O faapefea ona faaalia e le vaega faauuina lo latou lotofaafetai i isi mamoe?
15 I lenei taimi o le iʻuga, ua maua faapitoa ai lava e uso faauuina o Keriso i le lalolagi le lagolagosua maelega a isi mamoe i le faataunuuina o le tofiga mai le Atua, ia ‘talaʻiina atu foi lenei tala lelei o le malo i le atu laulau uma, e fai ma molimau i nuu uma.’ (Mataio 24:14; Ioane 14:12) A o faaitiitia le faitau aofaʻi o ē faauuina i le lalolagi i le faagasologa o tausaga, ae ua faateleina le aofaʻi o isi mamoe ua oo moni atu lava i le faitau miliona. O le faitau afe o i latou nei ua auauna o ni faievagelia faataimi atoa—o paeonia ma misionare—o loo faasalalauina atu le tala lelei o le Malo i “le tuluʻiga o le lalolagi.” (Galuega 1:8) Ua auai isi i le galuega molimau atu i le tele e latou te mafaia ma lagolagosua ma le olioli i le tulaga tau tupe i lenei galuega tāua.
16 Maʻeu le lotofaafetai o uso faauuina o Keriso i lenei lagolagosua mai i a latou aumea faamaoni, o isi mamoe! Na faailoaina moni mai o latou faalogona i le tusi Worldwide Security Under the “Prince of Peace,” na saunia e le vasega a auauna i le 1986. Ua faapea mai: “Talu mai le Taua Lona Lua a le Lalolagi, o le faataunuuga o le valoaga a Iesu mo le ‘faaiʻuiʻuga o le faiga o mea’ (NW) e faalagolago tele i le matafaioi o loo faia e le ‘motu o tagata e toatele’ o ‘isi mamoe.’ . . . O lea e matuā faafetaia ai le ‘motu o tagata e toatele’ faavaomalo, mai gagana eseese mo le vaega mataʻina o loo latou tauaveina i le faataunuuina o le valoaga a [Iesu] i le Mataio 24:14!”
E ‘Le Faaatoatoaina pe a Le i ai i Tatou’
17. O le ā le auala o le a ‘le faaatoatoaina ai i latou [faamaoni anamua o le a toe faatutūina] pe a le i ai’ le vaega faauuina?
17 I le tautala mai o ia o se tasi o le vaega faauuina ma le faasino atu i tane ma fafine faamaoni o ē na soifua a o leʻi oo i le taimi o Keriso, na tusi mai ai le aposetolo o Paulo e faapea: “O i latou uma ia o e na taʻuleleia ona o le faatuatua, na le maua e i latou le mea na folafolaina; ina ua saunia e le Atua se tasi mea e sili ona lelei mo i tatou [le vaega faauuina], ina ia le faaatoatoaina i latou pe a le i ai i tatou.” (Eperu 11:35, 39, 40) A o faagasolo le Meleniuma, o le a gaoioi ai Keriso ma lana 144,000 o uso faauuina i le lagi e avea ma tupu ma faitaulaga ma faasafua mai aogā o le taulaga togiola a Keriso i le lalolagi. O lea o le a ‘faaleleia atoatoa’ ai le tino ma le mafaufau o isi mamoe.—Faaaliga 22:1, 2.
18. (a) O le ā e tatau i mea moni faale-Tusi Paia ona fesoasoani i isi mamoe e malamalama i ai? (e) O le ā le faamoemoe o loo faatalitali i ai isi mamoe i “le faaalia mai o atalii o le Atua”?
18 O nei mea uma ua tatau ona tā mau ai i mafaufau o isi mamoe le māfuaaga na tele ina taulaʻi atu ai Tusitusiga Kerisiano Eleni iā Keriso ma ona uso faauuina ma la latou matafaioi autū i le faataunuuina o fuafuaga a Ieova. O lea la e manatu ai isi mamoe o se faaeaga tutasi le lagolagoina i so o se auala e mafai ai le vasega o auauna faauuina a o faatalitali atu i “le faaalia mai o atalii o le Atua” iā Amaketo faapea foʻi ma le taimi a o faagasolo le Meleniuma. E mafai ona latou tulimataʻi atu le ‘tuusaunoa o mea na faia i le faapologaina e le iu vale, a e oo i le saolotoga o le fanau a le Atua e manuia ai.’—Roma 8:19-21.
Autasia i le Agaga i le Faamanatuga
19. O le ā ua faia e “le agaga o le upu moni” mo le vaega faauuina ma latou aumea, ma o le a faapefea ona autasia faapitoa i latou i le afiafi o Mati 28?
19 I lana tatalo faaiʻu i le pō o Nisani 14, 33 T.A., na fetalai ai Iesu e faapea: “[O] laʻu tatalo . . . ina ia tasi i latou uma, faapei o oe le Tamā o i totonu ia te au, o aʻu foi o i totonu ia te oe, ina ia tasi i latou i totonu ia te i taua; ina ia talitonu le lalolagi ua e auina mai aʻu.” (Ioane 17:20, 21) Ona o le alofa, na auina mai ai e le Atua lona Alo e tuuina atu lona soifua mo le faaolataga o ē faauuina faapea ma le lalolagi o tagata usiusitai. (1 Ioane 2:2) Ua autasia e “le agaga o le upu moni” uso o Keriso ma ā latou aumea. I le afiafi o Mati 28, pe a mavae le goto o le lā, o le a feiloaʻi faatasi ai vaega e lua e faamanatuina le maliu o Keriso ma manatua ai mea uma na faia e Ieova mo i latou e ala i le taulaga a lona Alo pele, o Keriso Iesu. Tau ina ia avea lo latou iai i lenā aso tāua e faamalosia ai lo latou autasi ma toe faafouina ai lo latou naunau e faaauau pea ona faia le finagalo o le Atua, ma faamaonia ai faapea e latou te olioli i le iai faatasi ma i latou o loo alofaina e Ieova.
E Ala i se Autaluga
• O anafea na auina mai ai “le agaga o le upu moni” i uluaʻi Kerisiano, ma na faapefea ona faamaonia le avea ma “Fesoasoani”?
• E faapefea ona iloa e le vaega faauuina ua latou mauaina le valaau mai le lagi?
• O ā auala o loo galue ai le agaga o le Atua i isi mamoe?
• O faapefea ona faia e isi mamoe mea lelei i uso o Keriso, ma aiseā o le a ‘le faaatoatoaina ai i latou pe a le i ai’ le vaega faauuina?
[Fesili mo le Suʻesuʻega]
[Ata i le itulau 21]
Na liligiina ifo i luga o soo “le agaga o le upu moni” i le Penetekoso o le 33 T.A.
[Ata i le itulau 23]
Ua faia e isi mamoe mea lelei i uso o Keriso e ala i le lagolagoina o i latou i le faataunuuina o le tofiga tauatua o le talaʻi