Se Aai i Luga o le Mauga

NA TAʻU atu e Iesu i ona soo i lana lauga taʻutaʻua i luga o le mauga e faapea: “O outou, o le malamalama o le lalolagi outou. E le mafai ona lilo le aai ua tu i luga o le mauga.”—Mataio 5:14.

O le tele o aai o Iutaia ma Kalilaia na tutū i luga o mauga ae lē o vanu. O le māfuaaga autū o le filifilia o nofoaga i luga o le mauga, ona o le saogalemu. E lē gata i osofaʻiga a ʻautau, ae na masani lava ona faaleagaina e tagata gaoi ia nofoaga na nofoia e Isaraelu. (2 Tupu 5:2; 24:2) Sa faigofie ona puipuia e tagatānuu totoa ia fale sa tutū putuputu faatasi i luga o le mauga na i lo o se aai i mea maulalo, lea na manaʻomia se pa telē e puipuia ai.

Ona sa masani ona valiina puipui o fale o tagata Iutaia i le vali namu, o lea la, sa faigofie ai lava ona vaaia mai i se mea e mamao nei fale papaʻe o loo putuputu faatasi i luga o le mauga. (Galuega 23:3) I le taia i le susulu malosi o le lā i Palesitina, e susulu ai nei aai o loo i luga o le mauga e pei o se molī faailoilo, e pei lava foʻi ona iai aai o le Metitirani i o tatou aso.

Na faaaogā e Iesu lenei tulaga mataʻina o nuu i tua o Kalilaia ma Iutaia e aʻoaʻoina ai ona soo i le matafaioi a se Kerisiano moni. Na ia taʻu atu e faapea: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:16) E ui e lē o faia e Kerisiano galuega lelei ina ia viiviia ai e tagata, ae ua lē faapea ai e lē o mātauina e tagata a latou amioga lelei.—Mataio 6:1.

O na amioga lelei sa matuā matilatila a o faagasolo tauaofiaga itumalo a Molimau a Ieova. Na faasino atu se tasi o nusipepa i Sepania i se tauaofiaga talu ai nei, ma lipotia mai ai e faapea: “A o faaitiitia le fiafia i mataupu faalelotu i nisi o tapuaʻiga, ae e lē o le tulaga lea i Molimau a Ieova. Ona e latou te lē o mananaʻo e mou atu le tāua o le Tusi Paia, o lea e latou te faatatauina ai le Afioga a le Atua.”

O Tomasi, o ia o se tagata e vaavaaia se fale matamata i mātū i sisifo o Sepania lea e masani ona faaaogā e Molimau, na olioli i le iai faatasi ma tagata o ē e faatatauina le Afioga a le Atua. Na ia tolopōina lona taimi e litaea ai mo ni nai vaiaso ina ia iai i le taimi e faia ai le tauaofiaga itumalo a Molimau a Ieova. Ina ua ō ane le toʻatele o le ʻauusufono iā te ia, e aofia ai ma tamaiti, ina ua māeʻa le tauaofiaga e faafetaia o ia mo lana lagolagosua i tausaga ua teʻa, ma faamoemoega ia sologa lelei lona litaea, na tutulu le toeaina ma faapea mai: “O le iloaina lelei o outou o se tasi lea o mea e aupito sili ona ou fiafia i ai i loʻu olaga.”

O se aai i luga o se mauga e tosina atu i ai le vaai a se tagata matamata ona e tumatilatila mai i le tafatafaʻilagi, ma e so o se fale paʻepaʻe lava la o loo iai, e toe faaatagia mai le susulu o le lā. O loo faapena foʻi Kerisiano ona matilatila le ese mai, ona e latou te taumafai e mulimuli atu i tapulaa maualuluga faale-Tusi Paia o le faamaoni, o amioga tatau, ma le alofa mutimutivale.

E lē gata i lea, e faaatagia mai e Kerisiano le malamalama o le upu moni e ala i la latou galuega talaʻi. Na faapea mai le aposetolo o Paulo e faatatau i Kerisiano o le uluaʻi senituri: “O le mea lea matou te le faavaivai ai, o i matou ua i ai lenei faiva ina ua alofaina i matou . . . a ua faailoa matou e i matou i le loto fuatia ifo o tagata uma i luma o le Atua i  lo matou faaali atu le upu moni.” (2 Korinito 4:1, 2) E ui lava na latou fetaiaʻi ma teteega i mea uma na latou talaʻi ai, ae na faamanuia e Ieova la latou faiva, lea pe tusa o le tausaga e 60 T.A., na mafai ai e Paulo ona tusi mai faapea, na talaʻia le tala lelei “i tagata uma lava i le lalolagi.”—Kolose 1:23.

I aso nei, ua faatāuaina ai foʻi e Molimau a Ieova lo latou tiute tauave o le ‘pupula atu o lo latou malamalama i luma o tagata,’ e pei ona poloaʻia ai e Iesu. E ala i upu ma mataupu ua lomia, ua faasalalau atu ai e Molimau a Ieova le tala lelei o le Malo i atunuu e 235 i le lalolagi atoa. Ina ia oo atu le upu moni o le Tusi Paia i le tele o tagata e mafai ai, ua latou saunia a latou lomiga faale-Tusi Paia i gagana pe tusa o le 370.—Mataio 24:14; Faaaliga 14:6, 7.

I le tele o nofoaga, ua feagai ai Molimau ma se luʻi faigatā o le aʻoaʻoina o gagana a tagata ua faimalaga mai i atunuu o loo faasāina pe na taofiofia ai foʻi le galuega talaʻi. Mo se faaaʻoaʻoga, i nisi o aai tetele i le itu i Mātū o Amerika, o loo toʻatele ai le aofaʻiga o tagata o loo ō atu i ai mai Saina ma Rusia. Ua taumafai Molimau i lenā lava atunuu e aʻoaʻoina le gagana a Saina, Rusia, ma isi gagana ina ia mafai ai ona talaʻia le tala lelei i ē fou mai. O le mea moni, ua faia ni aʻoga ua faatulagaina e faavavevave ai le agaʻigaʻi i luma o le aʻoaʻoina o nei gagana, ina ia mafai ai ona talaʻia le tala lelei i isi tagata, a o iai le fanua i se tulaga ua “sinasina mai nei i le seleselegasaito.”—Ioane 4:35.

Na valoia e le perofeta o Isaia e faapea: “O aso e gata ai, e oo ina faatumauina ai o le mauga o i ai le fale o Ieova i tumutumu o atu mauga, e faamaualugaina foi e sili i mauga, ona gasolo ane ai lea o nuu uma i ai.” E ala i a latou amio ma la latou faiva, ua fesoasoani atu ai Molimau a Ieova i tagata i so o se mea ina ia ō mai i “le mauga o i ai le fale o Ieova,” ina ia aʻoaʻoina e faatatau i ala o le Atua ma aʻoaʻo e savavali i ona ala. (Isaia 2:2, 3) O le iʻuga fiafia, e pei ona faasino mai e Iesu, o le a latou ‘vivii atu ai i lo latou Tamā o i le lagi,’ o Ieova le Atua.—Mataio 5:16; 1 Peteru 2:12.