Ua Iai Foʻi so Latou Lava Atamai

“E FAAPENEI se alagāupu faa-Nigeria: “Ua iai le atamai i tagata matutua, ae o tamaiti ua iai foʻi so latou lava atamai.” Sa iloa e Edwin, o se toeaina i se faapotopotoga Kerisiano i Nigeria, le moni o lenei alagāupu.

I se tasi aso, na maua ai e Edwin se pusa uʻamea i lalo o lana laulau i lo latou fale.

Sa fesili atu Edwin i lana fanau e toʻatolu: “O ai e ana le pusa lenei?”

“O aʻu,” na tali mai ai Emanuele e valu ona tausaga. Sa vave ona ia toe faapea mai, o lenei pusa uʻamea elea, e lima inisi [12 senitimita] faatafafā lona telē, e iai se pu i le ufiufi, sa faia mo le tuuina i ai o meaalofa tauofo mo le galuega a Molimau a Ieova i le lalolagi aoao. Na ia faamatala mai: “Talu ai ou te lē o alu i aso uma i le Maota o le Malo, sa ou manatu ai e fai se pusa, auā afai ou te lē faaaogāina laʻu tupe lea e aumai mo laʻu meaʻai i le aʻoga, e mafai loa ona ou tuu i totonu o le pusa.”

Sa iai se pusa a le tamā o Emanuele i le fale, e faaputu ai tupe ina ia mafai ona auai i le tauaofiaga itumalo faaletausaga. Ae ona o se manaʻoga faafuaseʻi na tulaʻi mai i le aiga, na latou faaaogāina ai le tupe sa i le pusa. Ina ia faamautinoa o le a lē faaaogāina lana tupe o meaalofa tauofo mo se isi lava mea, na ave ai e Emanuele se atigiʻapa tuai i se tagata e ueloina mea, ina ia faamau lelei ai le tapuni. Ae ina ua iloa e le tagata uelo le fuafuaga mo le atigiʻapa, na ia faia ai loa se pusa mo Emanuele mai fasi uʻamea sa taatitia i lona fale faigaluega. Na talosaga atu foʻi Mikaele, le uso laʻitiiti o Emanuele e lima tausaga, mo sana ia foʻi pusa.

I le ofo i le mea na faia e lana fanau, na fesili atu ai Edwin pe aiseā na latou faia ai na pusa. Na tali mai Mikaele: “Ou te manaʻo e fai saʻu meaalofa tauofo!”

E leʻi iloa e o latou mātua, o lea na faaputu e Emanuele, Mikaele ma Uchei lo la tuafafine e iva tausaga, se isi vaega o tupe ia latou leʻi faaaogāina mo a latou meaʻai i le aʻoga, ae tuu i totonu o pusa. O fea na latou maua mai ai lea manatu? Ina ua oo tamaiti i le matutua e iloa ai uu tupe, sa aʻoaʻo i latou e o latou mātua ina ia lafo ni tupe i totonu o pusa mo meaalofa tauofo i le Maota o le Malo. Ua manino mai le utagiaina lelei e tamaiti o lenā lesona.

Na tatalaina na pusa ina ua tutumu. O le aofaʻi o tupe na faaputuina, e $3.13 (U.S.)—o se tupe telē pe a fua atu i se atunuu e na o ni nai selau tālā le aofaʻi o se tupe maua i le tausaga. O na meaalofa tauofo o loo lagolagoina ai le galuega talaʻi a Molimau a Ieova, lea o loo faia nei i atunuu e 235 i le lalolagi aoao.