Faafetaiaʻia o “Mea Matuitui o le Tino”

“O loʻu nei alofa tunoa e lava lea e fesoasoani ia te oe.”—2 KORINITO 12:9.

1, 2. (a) Aiseā e tatau ai ona tatou malamalama i le mea moni e faapea e tatou te fesagaʻi ma tofotofoga ma faafitauli? (e) Aiseā e mafai ai ona tatou mautinoa, e ui lava ina fesagaʻi ma tulaga faigatā?

“O I LATOU uma foi o e loto ina nonofo ma le amio Atua ia Keriso Iesu, e sauaina i latou.” (2 Timoteo 3:12) Aiseā ua faapea ai? Auā ua finau mai Satani faapea e pau lava le tulaga ua auauna ai tagata i le Atua ona o le manatu faapito, ma ua ia matuā naunau ai lava e faamaonia lona manatu. Na iai le taimi na lapataʻia ai e Iesu ona aposetolo faamaoni e faapea: “Ua manao tele Satani ia te outou, ia lulu ia te outou pei o le saito.” (Luka 22:31) Na silafia lelei e Iesu faapea e faataga e le Atua ia Satani e tofotofoina i tatou e ala i faafitauli matuiā. O le mea moni, e lē o le uiga o lenā mea faapea o faigatā uma o loo tatou fesagaʻi i le olaga e sau mai iā Satani po o ana temoni. (Failauga 9:11) Peitaʻi ua naunau Satani e faaaogā so o se auala e na te mafaia e gausia ai lo latou faamaoni.

² Ua taʻu mai e le Tusi Paia iā i tatou faapea e tatau ona tatou malamalama i o tatou tulaga faigatā. Po o le ā lava le mea e tupu iā i tatou, e lē fou pe faateʻia ai. (1 Peteru 4:12) O le mea moni, “o [loo] taufaaatoaina ia lava mea tiga i lo [tatou] au uso o i le lalolagi.” (1 Peteru 5:9, LT) I aso nei, ua tuuina atu e Satani omiga ogaoga i auauna uma lava a le Atua. E olioli le Tiapolo e vaai o loo faapuapuagatiaina i tatou i le tele o faafitauli e pei o ni mea matuitui. Ina ia faataunuuina lenā tulaga, e na te faaaogāina lana faiga o mea i se auala e ono faaopoopo po o le faateleina ai foʻi o so se ‘mea matuitui i o tatou tino.’ (2 Korinito 12:7) E ui i lea, e lē faapea o le a gausia ai lo tatou faamaoni i osofaʻiga a Satani. E pei lava ona ‘sauni e Ieova se mea e sao ai’ i lo tatou onosaia o tofotofoga, o le a ia faia foʻi faapena pe a tatou fesagaʻia faalavelave na e pei o ni mea matuitui i o tatou tino.—1 Korinito 10:13.

Le Auala e Faafetaiaʻia ai se Mea Matuitui

3. Na faapefea ona tali mai Ieova ina ua ole atu Paulo iā te ia e aveese le mea matuitui i lona tino?

³ Na ole atu le aposetolo o Paulo i le Atua e aveese le mea matuitui mai lona tino. “Na ou aioi faatolu atu i le Alii ona o lea mea, ina ia alu ese ia te au.” O le ā le tali mai a Ieova i le talosaga faatauanau a Paulo? “O loʻu nei alofa tunoa e lava lea e fesoasoani ia te oe; auā o le vaivai e faaatoaina ai loʻu mana.”  (2 Korinito 12:8, 9) Seʻi o tatou iloiloina lenei tali mai ma vaai pe faapefea ona fesoasoani iā i tatou e faafetaiaʻia ai so o se faafitauli e pei o ni mea matuitui e faatigā iā i tatou.

4. O ā auala na mauaina ai e Paulo aogā mai le agalelei faifua o Ieova?

⁴ Mātau na faalaeiauina e le Atua Paulo e faafetaia le agalelei faifua ua uma ona tuuina atu iā te ia e ala iā Keriso. Ioe, na matuā faamanuiaina Paulo i le tele o auala. Na tuuina atu ma le alofa e Ieova iā te ia le avanoa e avea ai ma soo o Iesu, e ui lava o ia o se tagata na maelega valea e tetee i soo o Iesu. (Galuega 7:58; 8:3; 9:1-4) Mulimuli ane, na tuuina atu ma le agalelei e Ieova iā Paulo le tele o tofiga ma faaeaga o le auaunaga. Ua manino mai ai i inei le lesona mo i tatou. E tusa lava pe tatou te iai i taimi e aupito sili ona leaga o le olaga, ae o loo iā i tatou pea le tele o faamanuiaga lea e tatou te lotofaafetai ai. Ia aua lava nei avea faigatā o le olaga e galo ai iā i tatou le tele o le agalelei o Ieova o loo faaalia mo i tatou.—Salamo 31:19.

5, 6. (a) Na faapefea ona aʻoaʻoina e Ieova Paulo e faapea o le “vaivai e faaatoaina ai” le mana o le Atua? (e) E faapefea i le faaaʻoaʻoga a Paulo ona faamaonia ai e faapea o Satani o le pepelo?

⁵ E faamaonia foʻi le lava o le agalelei faifua o Ieova i se isi auala. Ua lava le mana o le Atua e fesoasoani iā i tatou i faigatā o le olaga. (Efeso 3:20) Na aʻoaʻoina e Ieova Paulo e faapea o le “vaivai e faaatoaina ai” le mana o le Atua. E faapefea? Na ia saunia ma le alofa le malosi atoa e manaʻomia e Paulo ina ia faafetaiaʻia ai ona tulaga faigatā. O lea, o le onosai o Paulo ma lona faalagolago atoatoa atu iā Ieova, ua faaalia ai i Kerisiano uma e faapea na manumalo le mana o le Atua i lenei tagata vaivai ma le agasala. Seʻi mafaufau ane la i le aafiaga na oo i le Tiapolo, lea na faapea mai e auauna tagata i le Atua pe afai e sologa lelei pea le olaga ma leai ni faafitauli. O le faamaoni o Paulo na matuā faateʻia ai lenā agaga taufaaleaga!

⁶ O Paulo lea sa ʻau muamua ma Satani i lana taua faasaga i le Atua, o sē na sauā ma le faamaualuga i Kerisiano, o se Faresaio maelega e mautinoa na iai le taimi na ola ai i mea taugatā e tele ona sa fanau mai i se aiga e maumea. O lea ua auauna nei Paulo iā Ieova ma Keriso e avea ma “le aupito itiiti o le au aposetolo.” (1 Korinito 15:9) I le iai i lenā tulaga, na gauaʻi ai ma le lotomaulalo Paulo i le pulega a le vaega pule o Kerisiano i le uluaʻi senituri. Na ia onosai ma le faamaoni e ui i mea matuitui i lona tino. Na matuā lē fiafia Satani, ona e leʻi avea faigatā o le olaga e faavaivaia ai le maelega o Paulo. E leʻi galo iā Paulo le faamoemoe lea o le a ia auai ai i le Malo faalelagi o Keriso. (2 Timoteo 2:12; 4:18) O le a leai se mea matuitui, po o le ā lava le tigā, e mafai ona faavaivaia ai lona maelega. Tau ina ia faapena foʻi ona faaauau ona malosi lo tatou maelega! E ala i le tausiaina o i tatou i taimi faigatā o le olaga, ua siitia ai i tatou e Ieova i le faaeaga o le fesoasoani e faamaonia Satani o le pepelo.—Faataoto 27:11.

E Tāua Sauniuniga a Ieova

7, 8. (a) O ā auala o loo faamalosia ai e Ieova ana auauna i aso nei? (e) Aiseā e matuā tāua ai le faitauina ma le suʻesuʻeina o le Tusi Paia i aso uma, i le faafetaiaʻia o se mea matuitui i o tatou tino?

⁷ Ua faamalosia e Ieova i aso nei Kerisiano faamaoni e ala i lona agaga paia, lana Afioga, ma lo tatou ʻauuso Kerisiano. I le pei o le aposetolo o Paulo, e mafai ona tatou tuuina atu mea e tatou te popole vale ai iā Ieova e ala i le tatalo. (Salamo 55:22) E ui atonu e lē aveesea e le Atua o tatou tulaga faigatā, ae e mafai ona ia aumaia iā i tatou le atamai e faafetaiaʻia ai na mea, e oo lava i tulaga faigatā ia e matuā lē faigofie ona onosaia. E mafai foʻi ona aumaia e Ieova iā i tatou le malosi—ma tuuina mai le “matuā tele o le mana”—e fesoasoani iā i tatou e onosai ai.—2 Korinito 4:7.

⁸ E faapefea ona tatou mauaina lenā fesoasoani? E tatau ona tatou suʻesuʻeina ma le filigā le Afioga a le Atua, ona o i inā o le a tatou mauaina ai ana faamāfanafanaga moni. (Salamo 94:19) I le Tusi Paia, e tatou te faitau ai i upu o lagona ootia o auauna a le Atua a o latou ole atu mo Lana fesoasoani. O tali mai a Ieova, e masani ona aofia ai upu faamāfanafana, o ni sauniuniga ia e mafaufau loloto i ai. O le suʻesuʻeina o le Afioga a le Atua o le a faamalosia ai i tatou ina ia iloa e mai ‘le Atua le matuā tele o le mana, a e le mai ia te i tatou.’ E pei lava ona manaʻomia  ona tatou aai i meaʻai faaletino i aso uma mo le soifua mālōlōina ma le malosi, e tatau foʻi ona tatou aai e lē aunoa i meaʻai faaleagaga. Po o tatou faia ea lenei mea? Afai e tatou te faia faapena, ona tatou iloa ai lea o lo tatou mauaina o le “matuā tele o le mana” e fesoasoani iā i tatou e onosaia ai so o se mea matuitui faafaatusa e ono faatigā iā i tatou i le taimi nei.

9. E mafai faapefea e toeaina ona fesoasoani iā i latou o loo faafetaiaʻia faafitauli?

⁹ O toeaina Kerisiano e matataʻu i le Atua e mafai ona avea e “pei o se lafitaga i le matagi” o puapuaga, “ma se mea e malu ai i le afā” o faafitauli. O toeaina, e mananaʻo e fetaui i ai lenā faamatalaga faagaeeina, e ole atu ma le lotomaulalo ma le faamaoni iā Ieova e aumai iā i latou “le laulaufaiva o e ua aʻoaʻoina” ina ia mafai ai ona latou iloa ona tali atu i ē o mafatia e ala i le faaaogāina o upu tatau. O upu a toeaina e mafai ona pei o se timu māʻuluʻulu lea e faamālū ma faamalosia ai o tatou mafaufau i taimi faigatā o le olaga. E ala i le tautala “faamafanafana i e loto iti,” e fesoasoani moni ai lava toeaina i o latou uso ma tuafāfine faaleagaga, o ē ua oo ina vaivai po ua lotomomomo ona o se mea matuitui i o latou tino.—Isaia 32:2; 50:4; 1 Tesalonia 5:14.

10, 11. E mafai faapefea e auauna a le Atua ona faalaeiau i isi o loo feagai ma tofotofoga e sili ona faigatā?

¹⁰ O auauna uma lava a Ieova o se vaega o lona aiga Kerisiano autasi. Ioe, o i tatou uma lava e “fefaafeagaiai itu tino,” ma “e tatau ai ona tatou fealofani.” (Roma 12:5; 1 Ioane 4:11) E faapefea ona tatou faataunuuina lenei matafaioi? E tusa ai ma le 1 Peteru 3:8, e tatou te faia faapea e ala i le faaalia o le “fealofani, ia alolofa i le au uso, [ma] ia mutimuti vale i le alofa” iā i latou uma e tatou te aiga i le faatuatua. Ae mo i latou o loo faafetaiaʻia se ituaiga o mea matuitui matuā tigā i le tino, pe talavou pe matutua, e mafai e i tatou uma lava ona magafagafa faapitoa mo i latou na. E faapefea?

¹¹ E tatau ona tatou taumafai e malamalama i lo latou puapuaga. Afai e tatou te lē tigā alofa, lē māfana, po o le lē ano foʻi i ai, atonu e tatou te lē o iloa ua tatou faaopoopo i lo latou puapuaga. O lo tatou malamalama i o latou tulaga faigatā e tatau ona uunaʻia ai i tatou e magafagafa i upu tatou te fai atu, le auala tatou te talanoa atu ai, ma gaoioi ai. O lo tatou uiga mautinoa ma le faalaeiau e mafai ona fesoasoani e faaitiitia ai nisi o tigā ogoogo po o le ā lava le mea matuitui o loo pagatia ai i latou. E ono avea ai i tatou o ni fesoasoani e faamalosia ai i latou.—Kolose 4:11.

Le Auala ua Faafetaiaʻia ai ma le Manuia e Isi

12-14. (a) O le ā le mea sa faia e se tasi o Kerisiano e faafetaiaʻia ai le kanesa? (e) Na faapefea ona fesoasoani ma lagolagosua uso ma tuafāfine faaleagaga iā te ia?

¹² A o tatou tu lata i le iʻuga o nei aso e gata ai, ua faateteleina i aso taʻitasi ia “puapuaga.” (Mataio 24:8) O lea, e foliga mai o le a pagatia tagata  uma lava i le lalolagi i tulaga faigatā, aemaise lava i auauna faamaoni a Ieova, o loo taumafai e faia lona finagalo. Mo se faaaʻoaʻoga, seʻi manatu i se Kerisiano na auauna i le faiva faataimi atoa. Na maua o ia i le kanesa ma sa tatau ona taoto e aveese ona fatu puipui o fāua ma le vai (salivary and lymphatic glands). Ina ua la iloaina ma lana tane faapea ua maua o ia i lenei maʻi, na liliu atu loa i se tatalo umi faatauanau iā Ieova. Na ia faapea mai mulimuli ane, na maofa i le filemu na oo atu iā i laʻua. Peitaʻi, sa ia faafetaiaʻia ni vaitaimi lelei faapea foʻi ma ni vaitaimi faigatā, aemaise lava i āuga mai i ona togafitiga.

¹³ Ina ia taulimaina lona tulaga, sa taumafai ai lenei tuafafine e aʻoaʻoina le tele o mea e na te mafai e faatatau i le kanesa. Sa ia talanoa atu foʻi i ana fomaʻi. I Le Olomatamata, le Ala Mai!, ma lomiga faa-Kerisiano faapena, na ia mauaina ai tala e faatatau i soifuaga o nisi tagata na maua i le kanesa ma na faaalia ai le auala na faafetaiaʻia ai e tagata taʻitoʻatasi lenei maʻi i tulaga taufaalogona. Na ia faitauina foʻi vaega talafeagai o le Tusi Paia o loo faaalia ai le tomai o Ieova e tausia ai ona tagata i taimi o faigatā, ma isi foʻi faamatalaga aogā.

¹⁴ O se tasi o mataupu e faatatau i le faafetaiaʻia o le lotovaivai na siiina mai ai upu atamai nei: “O le ua vavae ese, ua saili o ia i lona manao.” (Faataoto 18:1) O lea na aumaia ai i le mataupu le fautuaga lenei: “Ia teena le faaesea.” * Na taʻua e le tuafafine e faapea: “E toʻatele sa latou taʻu mai o loo latou tatalo mo aʻu; a o isi na telefoni mai. E toʻalua ni toeaina e telefoni mai e lē aunoa e asi mai aʻu. Na aumai ni aʻu teu fugalaau ma le tele o tusi o alofaaga. O nisi foʻi na latou saunia meaʻai. E toʻatele foʻi na latou ofo mai e ave aʻu i le falemaʻi mo oʻu togafitiga.”

15-17. (a) Na faapefea ona faafetaiaʻia e se tasi Kerisiano ia faigatā na oo iā te ia ona o faalavelave faafuaseʻi? (e) O ā fesoasoani na avatu e i latou i le faapotopotoga?

¹⁵ Sa aafia se auauna ua leva a Ieova i New Mexico, i le Iunaite Setete o Amerika, i ni faalavelave se lua tau taavale. Sa manuʻa lona ua ma ona tauʻau, ma faateteleina ai le tulaga o lona maʻi gugu lea na ia fesagaʻia mo le silia i le 25 tausaga. Ua ia faamatala mai e faapea: “Sa faigatā lava ona tuu i luga loʻu ulu ma tauaveina so o se mea e silia ma le lima pauna le mamafa. Ae o le tatalo faatauanau iā Ieova na matuā faamalosia ai aʻu. O le tulaga foʻi lenā i mataupu o loo i Le Olomatamata na matou suʻesuʻeina. Na faamatalaina e se tasi le Mika 6:8, ma na faaalia ai faapea o le feoaʻi ma le Atua ma le loto faamaulalo o lona uiga o le iloaina lea e se tasi o le mea e gata mai ai le mea na te mafaia. Na fesoasoani lenei mau iā te aʻu e iloa ai faapea e ui lava i loʻu tulaga ua iai, ae e lē tatau lava ona ou lotovaivai, e ui lava ina itiiti le taimi o loo oʻu faaaluina i le auaunaga na i lo le mea na ou manaʻo iai. O le auauna iā te ia ma uunaʻiga lelei o le mea tāua lenā.”

¹⁶ Na ia lipoti mai foʻi e faapea: “E faamālō mai lava iā te aʻu toeaina i taimi uma mo aʻu taumafaiga e auai i sauniga ma le auaunaga i le fanua. E faafeiloaʻi ma fusi aʻu e le fanau talavou. Sa matuā lava le onosai o paeonia iā te aʻu ma e masani ona toe fetuunaʻi a latou fuafuaga i aso ou te maʻi tele ai ma lē mafai ai ona auai i le auaunaga. Pe a leaga tele le tau, e latou te aveina ma le agalelei aʻu i toe asiga po o le valaaulia o aʻu i a latou suʻesuʻega faale-Tusi Paia. Ae talu ai e lē mafai ona ou aveina se ato talaʻi, o lea e tuu ai aʻu lomiga e isi i a latou ato pe a ou alu i le galuega talaʻi.”

¹⁷ Mātau le auala na fesoasoani ai toeaina ma uso talitonu i le faapotopotoga i nei tuafāfine e toʻalua e faafetaiaʻia o la tulaga lē atoatoa o le tino e pei o ni mea matuitui. Na latou ofoina atu fesoasoani aogā ma le agalelei ua fuafua e ausia ai manaʻoga patino faaleagaga, i le tino ma tau faalogona. Pe e lē o faalaeiauina ai ea oe e tuuina atu se fesoasoani i isi uso ma tuafāfine o ē o loo feagai ma faafitauli? E mafai foʻi e outou talavou ona fesoasoani iā i latou i la outou faapotopotoga o ē o loo tauivi ma mea matuitui i o latou tino.—Faataoto 20:29.

18. O ā faalaeiauga e mafai ona tatou maua i talaaga o soifuaga o tagata o loo lomia i mekasini o Le Olomatamata ma le Ala Mai!?

¹⁸ Ua tusia i mekasini o Le Olomatamata ma le  Ala Mai! le tele o talaaga o soifuaga ma mea na tutupu i Molimau o ē na faafetaiaʻia, ma o loo faafetaiaʻia pea, ia faafitauli o le olaga. A o e faitauina e lē aunoa na mataupu, o le a e iloa ai le tele o ou uso ma tuafāfine faaleagaga i le lalolagi atoa na onosaia faigatā tau i le tamaoaiga, le maliliu o ē pele ona o mala, ma tulaga mataʻutia i taimi o taua. O isi o loo soifua ma maʻi ua lē mafai ai ona latou gaoioi e faatino nisi o mea. O le toʻatele ua lē mafai ona faia nisi o mea laiti o le soifuaga lea e lē o manatu mamafa i ai i latou o loo malolosi. O o latou maʻi ua matuā tofotofoina ai lava i latou, aemaise lava pe a lē mafai ona latou auai i tiutefai faa-Kerisiano i le tele e latou te mananaʻo ai. Maʻeu so latou matuā talisapaia o le fesoasoani ma le lagolagosua o loo tuuina atu e o latou uso ma tuafāfine iā i latou, o ē laiti ma ē matutua!

O le Tumau e Aumaia ai le Fiafia

19. O le ā na mafai ai e Paulo ona olioli e ui i ona puapuaga ma mea na vaivai ai ia sa pei o ni mea matuitui?

¹⁹ Na olioli Paulo e iloaina le auala na faamalosia ai o ia e le Atua. Na ia faapea mai: “Ua tele ai lava loʻu fiafia i le mitamita i mea ua ou vaivai ai, ina ia tumau i oʻu luga le mana o Keriso. O lea ou te fiafia ai i mea e vaivai ai, o le faaleaga mai, o malaia, o le agatele mai, o le atuatuvale ona o Keriso; auā pe a ou vaivai, ona ou malosi ai lea.” (2 Korinito 12:9, 10) Ona o mea na tutupu iā te ia, na mafai ai e Paulo ona taʻua ma le mautinoa e faapea: “Ou te le fai atu ona o le mativa, auā ua aʻoaʻoina aʻu ia toʻa filemu loʻu loto i mea ua ia te au. Ua ou iloa le mativa, ua ou iloa foi le mauoa, o i mea uma lava ou te i ai, ma mea uma e oo ia te au ua aʻoaʻoina ai aʻu ia ou maʻona, ma ou fia ʻai, ia faulai mai mea, ma ia oge mea. Ou te mafaia mea uma lava ona o ia ua faamalosi mai ia te au.”—Filipi 4:11-13, LF.

20, 21. (a) Aiseā e tatou te mauaina ai le olioli i le mafaufau loloto i “mea e le vaaia”? (e) O ā nisi o “mea e le vaaia” o loo e faamoemoe e vaai i ai i le lalolagi Parataiso?

²⁰ O lea, o le onosaia o soo se mea matuitui lava faafaatusa o loo i o tatou tino, e mafai ai ona tatou maua le faamalieina i le faaalia i tagata uma e faapea o lo tatou vaivai e faaatoaina ai le mana o Ieova. Na tusi Paulo e faapea: “Matou te le faavaivai ai . . . ua faafouina lē [“tagata,” NW] i totonu i lea aso ma lea aso. Auā o lo matou puapuaga mamasagia ma le vave mavae, e saunia ai mo i matou le mamafa o le mamalu faavavau e matua silisili ese foi. O loo matou le manatunatu i mea ua vaaia, a o mea e le vaaia; auā o mea . . . e le vaaia e faavavau ia.”—2 Korinito 4:16-18.

²¹ O le toʻatele lava o tagata o Ieova i aso nei e faamoemoe e ola i lana lalolagi Parataiso ma maua faamanuiaga ua ia folafolaina mai. O na faamanuiaga e ono manatu i ai e “le vaaia” e i tatou i aso nei. Peitaʻi, ua vave tele mai le taimi o le a tatou vaaia ai i o tatou lava mata na faamanuiaga, ioe, ma olioli ai i na faamanuiaga e faavavau. O se tasi o na faamanuiaga o le saʻoloto lea i le ola e aunoa ma se faafitauli e pei o ni mea matuitui! O le a “faaumatia e [le Alo o le Atua] ia galuega a le tiapolo” ma “faaumatia e ia i lona maliu o le ua i ai le malo e oti ai.”—1 Ioane 3:8; Eperu 2:14.

22. O le ā le mautinoa ma le maumauaʻi e tatau ona iā i tatou?

²² O lea, po o le ā lava le mea matuitui i o tatou tino ua oo mai ai tigā iā i tatou i aso nei, seʻi o tatou faaauau pea ona faafetaiaʻia na mea. I le pei o Paulo, o le a tatou maua le malosi ona o Ieova, o lē e foaʻi mai ma le agalelei le mana iā i tatou. Pe a tatou ola i le lalolagi Parataiso, o le a tatou faamanū atu iā Ieova lo tatou Atua i aso uma i mea ofoofogia uma o loo ia faia mo i tatou.—Salamo 103:2.

[Faamatalaga pito i lalo]

O le a Faapefea Ona E Tali?

• Aiseā ma e faapefea ona taumafai le Tiapolo e faavaivaia le faamaoni o Kerisiano moni?

• E faapefea e le “vaivai ona faaatoaina ai” le mana o Ieova?

• E mafai faapefea e toeaina ma isi ona faalaeiauina i latou ua faalavelavea e faafitauli?

[Fesili mo le Suʻesuʻega]

[Ata i le itulau 18]

E faatolu ona tatalo Paulo ina ia aveese e le Atua mea matuitui i lona tino