O Mataupu Silisili E te Filifilia

PO O oe o se tagata e taʻitaʻia e mataupu silisili? Pe e te manatu i mataupu silisili tau amio o ni faiga faaanamua? O le mea moni, o tagata uma lava, o loo taʻitaʻia e ni mataupu silisili e talitonu o ia e tāua. E tusa ma le faamatalaga i le New Shorter Oxford English Dictionary, o se mataupu silisili e mafai ona faamatalaina e faapea, “o se tulafono tau i amioga tatau a le tagata lava ia.” E taʻitaʻia e mataupu silisili a tatou faaiʻuga, ma filifilia le auala e tatou te ola ai. O mataupu silisili e mafai ona avea e pei o se tapasā.

Mo se faataʻitaʻiga, na faamalosiau Iesu i ona soo ina ia tausia le Tulafono Faaauro, lea e maua i le Mataio 7:12: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.” Ua tausia e soo o Confucius mataupu silisili o le li ma jen ia e taʻua ai uiga e pei o le agalelei, lotomaulalo, faaaloalo, ma le faamaoni. E oo lava i tagata e lē ō i ni lotu e iai lava mea e faatāuaina po o taʻiala e taʻitaʻia ai a latou amio.

O ā Ituaiga o Mataupu Silisili?

Peitaʻi ane, e ao ona tatou manatua, o mataupu silisili e mafai ona lelei pe leaga. Mo se faaaʻoaʻoga, ua matuā faatoʻateleina tagata e uunaʻia e le mataupu silisili ua silia i le tusa ma le sefulu tausaga ua mavae, lea ua lauiloa e faapea o aʻu e muamua. E ui lava atonu e lē iloa e le toʻatele lenei faaupuga, pe lagona foʻi e faapea, e lē faatatauina iā i latou, ae o le me-ism po o aʻu e muamua o se mataupu silisili tau amio ua liliu atu i ai le toʻatele ona o lo latou lē amanaʻiaina o tapulaa maualuluga tau amio. E tusa lava pe o le auala lenā, pe e leai foʻi, o loo faamatalaina ai lenā faaupuga, ae o le uiga lea o aʻu e muamua, e faaalia ai le manatu faapito, e masani ona ō faatasi ma le manaʻo tele i meafaitino. Ua faapea mai se tagata e pule i le T.V. i Saina: “E na o le lua lava a matou mataupu silisili. Muamua, o le faamalieina lea o manaʻoga. O le isi o le faateleina o tupe.”

O le uiga lea, o aʻu e muamua, e mafai ona avea e pei o se maneta. Ae e faapefea ona aafia se tapasā i se maneta? Pe a faafesagaʻi mea nei e lua, e mafai ona faasesēina e le maneta le nila o le tapasā. O le auala lava foʻi lenā e mafai ai e le uiga lea o aʻu e muamua ona faafenumiaʻia taʻiala o amioga tatau a se tagata, e ala i le faamuamua o mea o loo tuʻinanau i ai i lo o mea uma lava.

Pe e faateʻia oe pe a e iloa o lenei uiga o aʻu e muamua, e lē o se mea fou? O lenei uiga na amata mai lava i le faatoaga o Etena ina ua lafoaʻia e o tatou uluaʻi mātua tapulaa tau amio na faavaeina e Lē na Foafoaina i tatou. O lenā mea na faalēaogāina ai a laʻua taʻiala tau amio. Ona o ē na tupuga mai iā Atamu ma Eva, ua faalavelavea ai tagata i lenā lava uiga, lea e leʻi leva tele ona taʻua nei o le “me-ism” po o o aʻu e muamua.—Kenese 3:6-8, 12.

Ua mātauina le salalau atu o lenā uiga aemaise lava i le vaitaimi ua taʻua i le valoaga o le Tusi Paia o “aso e gata ai,” ia ua faailogaina i “aso faigata.” E toʻatele tagata ua avea ma ē e “alolofa i latou ia i latou.” E lētioa taaʻina ai i tatou e faaaʻoaʻo atu i  lenā uiga, o aʻu e muamua.—2 Timoteo 3:1-5.

Atonu e te ioe faatasi ma se talavou e igoa iā Olaf o lē na tusi atu i se lālā o Molimau a Ieova i Europa e faapea: “E ese le faigatā ona tumau i le faia o amioga saʻo, aemaise lava i matou talavou. Faamolemole ia faamanatu mai pea iā i matou le tatau ona pipii atu i mataupu silisili o le Tusi Paia.”

Na faaalia e Olaf le manatu mamafa ma le faautauta. E mafai ona fesoasoani mataupu silisili faale-Atua iā i tatou—talavou pe matutua—ina ia pipii atu pea i tapulaa maualuluga tau amio. E mafai ai foʻi ona tatou teena le uiga lea, o aʻu e muamua, e tusa lava po o le taʻu lenā e faaigoa aʻi lea uiga pe e leai foʻi. Afai e te fia iloa atili e uiga i le auala e mafai ai e mataupu silisili o le Tusi Paia ona fesoasoani moni iā te oe, ia iloilo ma le faaeteete le isi mataupu lea e sosoo mai.

[Ata i le itulau 4]

E toʻatele tagata i aso nei e lē o amanaʻia manaʻoga o isi