O Mataupu Silisili Faale-Atua e Mafai Ona Aogā mo Oe

E LĒ taumatea ua e iloa, o manu, e pulea e lo latou lava natura na faia aʻi. E tele foʻi masini ua fausia ina ia faatino ni faatonuga. Ae o tagata, na faia patino lava ina ia taʻitaʻia e mataupu silisili. E mafai faapefea ona e mautinoa i lenā mea? Ioe, ina ua faia e Ieova, le Puna o mataupu silisili amiotonu uma le uluaʻi tagata, na ia faalauiloa mai e faapea: “Inā ta faia ia o le tagata i lo taʻua faatusa, ia foliga ia i taʻua.” O Lē na Foafoaina Mea, o se agaga; e leai sona tino faaletino e pei o i tatou, o lea ua avea ai i tatou ma ona “faatusa” e ala i lo tatou faaatagia atu o lona peresona, i le faaalia lea o le tele o ona uiga lelei. E mafai e tagata ona faatautaia o latou olaga ina ia ōgatusa ma mataupu silisili, o lona uiga, e tusa ma le mea ua latou talitonu i ai o tulafono o gaoioiga saʻo. Ua faamauina e Ieova i lana Afioga le tele o mataupu silisili faapena.—Kenese 1:26, NW; Ioane 4:24; 17:17.

Atonu e faapea mai se tasi: ‘Ae e faitau selau  mataupu silisili o loo iai i le Tusi Paia. E lē mafai lava ona ou iloa uma na mataupu silisili.’ E saʻo. Ae seʻi manatu la i le mea moni lenei: Ona e aogā uma ia mataupu silisili faale-Atua, ua tauave ai e nisi ni avega e sili atu ona mamafa na i lo o isi. E mafai ona e iloa mai i le Mataio 22:37-39 e faapea, o i inā o loo faaalia ai e Iesu e faapea, i tulafono ma mataupu silisili e tusa ai ma le Tulafono faa-Mose, sa sili atu ona tāua nisi mataupu silisili na i lo o isi.

O fea mataupu silisili e sili atu ona tāua? O mataupu silisili autū o le Tusi Paia, o mataupu silisili ia o loo fesootaʻi atu i la tatou faiā ma Ieova. Afai e tatou te utagiaina nei mataupu silisili, ona avea lea o Lē na Foafoaina Mea ma taaʻiga sili ia tatou taʻiala tau amio. E lē gata i lea, e iai foʻi mataupu silisili e aafia ai la tatou faiā ma isi tagata. O le faatatauina o nei mataupu silisili, o le a fesoasoani iā i tatou e tetee atu ai i lenei uiga, o aʻu e muamua, e tusa lava po o le ā le auala o loo faaupuina ai lea uiga.

Seʻi o tatou amata i se tasi o upu moni i le Tusi Paia e sili ona tāua. O le ā lenā upu moni, ma e faapefea ona aafia ai i tatou?

“Le Silisili Ese i le Lalolagi Uma”

Ua faamanino mai e le Tusi Paia e faapea, o Ieova o Lē Silisili na Foafoaina i tatou, o le Atua e Ona le Malosi Uma Lava. E lē mafai ona iai sē e la te tutusa ma e lē mafai foʻi e se isi ona suia o ia. O se faamatalaga moni autū lenei o loo faamauina i le Tusi Paia.—Kenese 17:1; Failauga 12:1.

Na mātauina e se tasi o tusitala o le tusi o Salamo le mea moni e uiga iā Ieova e faapea: “Na o oe lava o le Silisili ese i le lalolagi uma.” Na faapea mai le tupu o Tavita anamua: “Ieova e, e ou le malo, o faasilisili oe e silisili i mea uma lava.” Ma na faagaeetia le perofeta lauiloa o Ieremia e tusi e faapea: “E leai lava sē tusa ma oe, Ieova e; e sili lava oe, ma lou suafa e sili lea ona malosi.”—Salamo 83:18; 1 Nofoaiga a Tupu 29:11; Ieremia 10:6.

E ao faapefea ona tatou faatatauina nei upu moni e uiga i le Atua i le olaga i aso faisoo?

Ua manino lava la po o ai e tatau ona faasilisilia i o tatou olaga—o Lē na Foafoaina i tatou ma o Lē Foaʻi Ola. Po ua lē tatau ai ea la ona tatou tetee atu i ni faanaunauga ina ia faamuamua i tatou lava—o se faanaunauga atonu e sili atu ona malosi i nisi na i lo o isi? O se mataupu silisili atamai e taʻitaʻia ai o le “ia outou faia mea uma lava ia viia ai le Atua.” (1 Korinito 10:31) Ua faataatia e le perofeta o Tanielu se faaaʻoaʻoga lelei e tusa ai ma lenei mea.

Ua faailoa mai iā i tatou e faamaumauga o talafaasolopito e faapea, na atuatuvale le tupu o Papelonia o Nepukanesa i se tasi aso i se miti ma manaʻo ai e fia iloa le uiga o le miti. E ui sa fenuminumiaʻi tagata uma lava, ae sa faailoa saʻo atu e Tanielu i le tupu le mea lea na ia fia iloa. Pe na viiviia ai Tanielu i lenei mea? E leai, ae na ia avatu le viiga i le “Atua i le lagi, o le na te faaalia mea ua lilo.” Na faapea atili atu Tanielu: “E lei faaalia mai ia te au lenei mea sa lilo ona o se poto ua ia te au e sili i tagata ola uma.” O Tanielu o se tagata sa ola e tusa ai o mataupu silisili. E lētioa ona faamatalaina faatolu o ia i le tusi o Tanielu e faapea, “ua alofateleina” e le Atua.—Tanielu 2:28, 30; 9:23; 10:11, 19.

O le a e maua aogā pe a e faataʻitaʻi iā Tanielu. I le mulimuli i lana faaaʻoaʻoga, o le a avea ai uunaʻiga ma vala e sili ona tāua. O ai e tatau ona viia ona o mea e te faia? E tusa lava po o le ā lou tulaga, o loo iā te oe tomai e gaoioi ai e tusa ma lenei mataupu silisili matuā tāua o le Tusi Paia—o  Ieova o le Alii Pule Silisili Ese. O lou faia faapea o le a “matuā alofagia ai oe” e ia.

Seʻi o tatou talanoaina nei la ni mataupu silisili autū se lua ia e mafai ona taʻitaʻia ai i tatou e tusa ai ma a tatou faiā faaletagata. Ona o le matuā taatele o le faamamafaina o le faamuamua o le tagata lava ia, ua matuā sili ai lava ona faigatā lenei vala o le olaga.

“Manatu ma le Lotomaulalo”

O i latou e faamuamua i latou lava, e seāseā lava faamalieina. E toʻatele ua mananaʻo i se olaga e sili ona lelei, ma ua latou mananaʻo i ai i le taimi lava lenei. Iā i latou, o le amio lelei, o se faailoga o se vaivaiga. Ua latou manatu i le onosai o se mea e na o isi e tatau ona latou faaalia. Ae a oo loa ina manatu i lo latou lava taulau manuia, ua tataga mea uma. Pe e te manatu e iai se isi auala e te filifili ai e fai, e ese mai iā i latou?

O loo fetaiaʻi auauna a le Atua ma lenā uiga i aso faisoo, ae e lē tatau ona pisia ai i latou. E talia e Kerisiano taʻumatuaina le mataupu silisili e faapea, “e le talia o le ua vivii o ia ia te ia, a o le ua viia e [Ieova].”—2 Korinito 10:18.

O le a fesoasoani le faatatauina o le mataupu silisili i le Filipi 2:3, 4. Ua faalaeiauina oe e lenā mau e aua neʻi faia “se mea e tasi ma le finau vale, ma le mitamita fua; a ia taitasi outou ma manatu ma le loto maulalo, ua sili nisi ia te ia.” I lea, o le a e lē “vaavaai ai i [au] lava mea, a ia taitasi ma vaavaai i mea a isi.”

O se tasi o lē sa iai se manatu saʻo e uiga iā te ia lava, ma o sē na iloa lelei lona lava aogā, o Kitiona, o se faamasino o tagata Eperu i aso anamua. Sa leʻi manaʻo o ia e fia avea ma taʻitaʻi iā Isaraelu.  Ae peitaʻi, ina ua tofia o ia e faatinoina lenā tofiga, sa faailoa atu e Kitiona lona lē agavaa. Sa ia faapea atu: “Ua topito ona faatauvaa loʻu aiga i Manase; o aʻu foi, o le aupito itiiti i le aiga o loʻu tama.”—Faamasino 6:12-16.

E lē gata i lea, ina ua uma ona tuuina atu e Ieova le manumalo iā Kitiona, ona faatupu misa ane loa lea o tagata o Efaraima iā te ia. O ā uiga faaalia o Kitiona? Pe na avea le manumalo ma pogai na ia faatāuaina ai o ia lava? E leai. Ae sa ia ʻalofia mala i lona tali filemu atu. “Se a foi se mea ou te mafaia ona fai e tusa ma outou?” Sa agamalu pea Kitiona.—Faamasino 8:1-3.

E moni, o mea tutupu ia na aafia ai Kitiona, na tutupu i aso anamua. Ae e tāua pea ona iloiloina le tala. Ua mafai ona e iloa, e matuā ese mamao lava le uiga lea sa iā Kitiona mai uiga ia o loo matuā taatele i aso nei, ma sa ola o ia e ōgatusa ma lona uiga, ma sa aogā mo ia.

O le uiga taatele lea o le faamuamua o le tagata lava ia, e mafai ona faasesēina ai le manatu i le aogā o i tatou taʻitoʻatasi. Ua faasaʻo e mataupu silisili o le Tusi Paia lenā manatu sesē, i le aʻoaʻoina e uiga i le tāua moni o i tatou e tusa ai ma Lē na Foafoaina Mea ma faapea foʻi ma isi.

O le utagiaina o mataupu silisili o le Tusi Paia, ua mafai ai ona tatou manumalo mai lenei uiga ua taatele i aso nei, o aʻu e muamua. E lē o toe pulea i tatou e na faalogona ma na uiga. O le tele o lo tatou aʻoaʻoina e uiga i mataupu silisili amiotonu, o le tele foʻi lea o lo tatou masani lelei ma le Puna o na mataupu silisili. Ioe, o le mātauina faapitoa o mataupu silisili faale-Atua pe a faitauina le Tusi Paia, e matuā aogā ai lava taumafaiga.—Tagaʻi i le pusa.

Na faia e Ieova tagata e sili atu i lo o manu, ia e tele lava ina gaoioi e tusa ma lo latou natura na faia ai. O le mulimuli i le finagalo o le Atua, e aofia ai le faatatauina o mataupu silisili tauatua. I lea, ua mafai ai ona tatou faatumauina le lelei o la tatou tapasā tau amio, o se taʻiala o le a taʻitaʻia atu ai i tatou i se faiga fou mai i le Atua. Ua faailoa mai e le Tusi Paia iā i tatou māfuaaga e tatou te faatalitalia ai le matuā vave oo mai o se faiga fou i le lalolagi aoao lea o le a “mau ai le amiotonu.”—2 Peteru 3:13.

[Pusa i le itulau 6]

Nisi o Mataupu Silisili Aogā o le Tusi Paia

I totonu o le aiga:

“Aua le saili se tasi i lona lava lelei, a ia taitasi ma saili i le lelei o le isi.”—1 Korinito 10:24.

O le “alofa, . . . e le sailia e ia ana lava mea.”—1 Korinito 13:4, 5.

“Ia taitasi outou ma alofa i lana lava avā faapei o ia lava ia te ia.”—Efeso 5:33.

“O outou fafine, ia outou usiusitai atu i a outou lava tane.”—Kolose 3:18.

“Ia e faalogo i lou tamā, o le na fanaua oe; aua foi e te ʻinoʻino i lou tinā pe a loomatua o ia.”—Faataoto 23:22.

I le aʻoga, i le galuega, po o le pisinisi:

“O fua faatāutau faaaimago e inosia ia . . . O lē amio leaga ua fai e ia le galuega pepelo [“totogi faapiʻopiʻo,” NW].”—Faataoto 11:1, 18.

“O lē gaoi aua neʻi toe gaoi, a e lelei ina faamalosi o ia i galuega a ona lima.”—Efeso 4:28.

“Pe afai e le fia galue se tasi, aua neʻi ʻai foi o ia.”—2 Tesalonia 3:10.

“O mea uma lava tou te faia, ia faia ma le loto, peiseai ua faia [iā Ieova].”—Kolose 3:23.

“O loo loto i matou e amio lelei i mea uma lava.”—Eperu 13:18.

Uiga agaʻi i le ʻoa:

“O le ua faataalise ona mauoa, e le faasaoina o ia.”—Faataoto 28:20.

“O le ua manao i le ario, e le malie o ia i le ario.”—Failauga 5:10.

Ia iloa e le tagata lona lava aogā:

“O tagata e saʻilia lo latou mamalu, pe mamalu ai ea?”—Faataoto 25:27, NW.

“Ia viia oe e le tagata ese, a e le o lou lava gutu.”—Faataoto 27:2.

“Ou te fai atu ai ia te outou uma, aua le faasili le manatu o se tasi i le mea ua tatau ona manatu ai.”—Roma 12:3.

“Pe a manatu se tasi o le tagata aogā ia, a e leai, ua pelogia o ia e ia i lona manatu.”—Kalatia 6:3.

[Ata i le itulau 5]

Na avatu e Tanielu le viiga e tatau i le Atua

[Ata i le itulau 7]

O le feagai ma isi e tusa ai ma mataupu silisili faale-Atua, e saosaolaumea i ni faiā māfana ma le fiafia

[Faamatalaga i Ata i le itulau 7]

U.S. Fish & Wildlife Service, Washington, D.C./Robert Bridges