O le ā le Tau o se Lotofuatiaifo Mamā?

“NA POLOAʻIINA le Malo Ina ia Talia le R$20,000 Tupe Pasili.” O lenei ulutala e lē masani ai, na aliaʻi mai i le nusipepa a Pasili o le Correio do Povo i se taimi e leʻi mamao atu. Na faamatalaina ai i lea mataupu se tala e uiga iā Luiz Alvo de Araújo, o se tagata tufa meli i le atunuu, o lē na faatauina atu se fanua i le malo. Ina ua uma ona sainia pepa e tuuina atu ai lona fanua i le malo, na faateʻia ai Luiz ina ua ia iloa e R$20,000 tupe Pasili (e tutusa ma le $8,000, talā Amerika) ua sili atu na i lo o le tau na malilie i ai!

I le toe faafoʻiina atu o le tupe lea na sili mai, o le mea moni sa lē faigofie ona faia. Ina ua māeʻa ni nai asiasiga, sa leʻi talilelei e matagaluega a le malo, na fautuaina ai Luiz e vaai se loia ina ia foia ai le mataupu i le faamasinoga. “E foliga mai o le sesē o se isi, ae ona o tulaga masani i le tele o le mau feuiaʻiga, e leai se tasi na iloaina le auala e foʻia ai le faafitauli,” ma na taʻua ai e le faamasino o lē na faasalaina le malo ina ia talia le tupe ma totogi le tau o le faamasinoga ma faapea mai atili: “O se faamasinoga uigaese muamua lenei ua ou vaai i ai.”

O Luiz, o se tasi o Molimau a Ieova, ua ia faamatala mai e faapea: “E lē mafai e loʻu lotofuatiaifo ua aʻoaʻoina i le Tusi Paia ona faatagaina aʻu e taofia se mea e lē o saʻu meatotino. Sa tatau lava ona ou taumafai e faafoʻi le tupe.”

O le a vaaia e le toʻatele le matuā ese o lenei uiga, pe faigatā foʻi, ona malamalama i ai. Ae ua faaalia i le Afioga a le Atua e faapea, e matuā faatāuaina e Kerisiano moni le tausia o se lotofuatiaifo mamā i a latou feutagaʻiga ma faipule silisili. (Roma 13:5) O loo maumauaʻi pea Molimau a Ieova ina ia tausisia ‘se loto fuatia ifo lelei, ma ia amio lelei [“faamaoni,” NW] i latou i mea uma lava.’—Eperu 13:18.