O se Lafitaga Mai le Matagi

I LUGA o mauga maualuluga o Europa, e mafai ona e maua ai se laau malosi o loo ola ai e taʻua o le alpine rose. O lenei laau tupu maulalo o le alpine rose, e masani ona ola faapuloulou i le palapala ina ia puipuia ai mai matagi malolosi i nofoaga maualuluga. Ona o le matagia pea o na nofoaga, ua tagitoʻia ai le ola o laau o le mauga ona ua faaitiitia ai le susū e manaʻomia e laau, ua oo ai ina mago ai le ʻea ma le palapala, ma liaʻiina ai o latou aa.

E masani lava ona lē āfaina le alpine rose i matagi malolosi ona e tupu i vaipapa. E ui lava atonu e faalētele se palapala i nei nofoaga, ae ua avea vaipapa ma puipuiga mai matagi ma mafai ai e le laau ona maua le vai. I le tele o taimi o le tausaga, e tau leiloa atu i le vaai, ae i le tau māfanafana, e matuā matagofie ai mauga ia o loo ola ai nei alpine rose i fugalaau mūmū sesega.

Na faamatalaina e le perofeta o Isaia e faapea, o le a tofia e le Atua “alii,” ma o le a avea i latou taʻitoʻatasi “e pei o se lafitaga i le matagi.” (Isaia 32:1, 2) I lalo o le taʻitaʻiga a le Tupu, o Keriso Iesu, o le a pei ai nei alii faaleagaga, po o ovasia, o ni papa tū, e tutū mausalī i taimi o mafatiaga po o puapuaga. E latou te ofoina mai lafitaga maufaatuatuaina i taimi faigatā, ma fesoasoani i ē matitiva ina ia leoleomalu a latou vai faaleagaga mai le Afioga a le Atua ia o loo iai.

O matagi malolosi o sauāga, le lotovaivai, po o le lē atoatoa o le malosi, e mafai ona taia ai se Kerisiano, ma vaivai ai lona faatuatua pe afai e lē o puipuia o ia. E mafai e toeaina Kerisiano ona saunia le puipuiga e ala i le faalogologo lelei atu i lona faafitauli, ofoina atu fautuaga e faavae mai le Tusi Paia, ma avatu faalaeiauga po o se fesoasoani tatau. I le pei o lo latou Tupu tofia o Keriso Iesu, e latou te mananaʻo ai e fesoasoani atu iā i latou ua “tuulafoaiina.” (Mataio 9:36) Ma e latou te naunau e fesoasoani atu i isi ua faaleagaina e matagi o aʻoaʻoga sesē. (Efeso 4:14) E matuā aogā lava ia na fesoasoani i le taimi tatau.

Na faamatala mai e Miriama e faapea: “Na ou oo i se vaitaimi faigatā o loʻu olaga ina ua tuua e ni aʻu uō mamae le upu moni, ma i le taimi lava lenā sa pagatia ai loʻu tamā ina ua pa se alātoto i le faiʻai. I le taumafai e foʻia le mafatia o loʻu mafaufau, sa amata loa ona ma feoaʻi ma saʻu uō tama o le lalolagi. E leʻi pine lava mulimuli ane, ina ua ou lagona le lē toe aogā, na ou faailoa atu ai loa i toeaina o le faapotopotoga e faapea, ua ou filifili e tuua le upu moni, auā ua ou mautinoa e lē o toe alofa Ieova iā te aʻu.

“I lenā taimi faigatā, na faamanatu mai ai e se toeaina agaalofa iā te aʻu ia tausaga na ou auauna ai e avea o se faifeʻau paeonia sauatoa. Sa ia taʻu mai iā te aʻu e faapea, sa avea o se mea mataʻina iā te ia loʻu faamaoni, ma sa ia talosaga mai ma le agalelei iā te aʻu ina ia faataga le ʻautoeaina e fesoasoani mai iā te aʻu, e faamautinoa mai iā te aʻu le alofa o Ieova. O lo latou naunau alofa mai i lenā taimi faigatā sa pei o ‘se lafitaga’ mo aʻu i le taimi o le matagi malosi faaleagaga sa pepesi mai iā te aʻu. E leʻi atoa se masina, ae ou faamutaina le ma faiā ma laʻu uō tama, ma talu mai lenā taimi, o loo faaauau pea ona ou savali i le ala o le upu moni.”

E lagona e toeaina le tauia o i latou pe a latou vaai atu o olaola faaleagaga uso Kerisiano, na mafaia nei mea uma ona o la latou puipuiga na avatu i le taimi tonu na manaʻomia ai. Ma o nei “lafitaga” ua aumaia ai iā i tatou se faataʻitaʻiga o le anoanoaʻi o fesoasoani faaleagaga na o le a tatou olioli ai i le taimi o le Pulega Faa-Meleniuma a Keriso.