Aiseā na Faaumatia ai le Lalolagi Anamua?

O LE Lolo lea na aafia ai le lalolagi aoao sa lē o se mala faalenatura. O se faasalaga mai le Atua. Na tuuina atu le lapataʻiga, ae na teena e le toʻatele. Aiseā? Na faamatala mai e Iesu e faapea: “I ona po a o lei oo le lolo, [o tagata na] aai ma inu, ua latou fai avā foi ma faaavaga, ua oo lava i le aso na ulu atu ai Noa i le vaa, [“ma sa latou leʻi ano atu,” NW] seia oo le lolo, ma aveesea i latou uma.”—Mataio 24:38, 39.

Se Olaga sa Agaʻigaʻi i Luma

Na olioli le lalolagi na iai a o leʻi oo i le Lolo i ni itu lelei tatou te lē o maua i le taimi nei. Mo se faaaʻoaʻoga, na faaaogā e tagata uma se gagana e tasi. (Kenese 11:1) O lenā tulaga na faalaeiauina ai le faia o galuega faatusiata ma faasaienisi, ia na manaʻomia ai ni taumafaiga tuufaatasi a ni tagata se toʻatele faatasi ai ma ni tomai eseese. E lē gata i lenā, o le umi ona ola o tagata na mafai ai e le toʻatele ona faaauau pea ona atiina aʻe mea na latou aʻoaʻoina mo le tele o senituri.

Ua faapea mai nisi sa leʻi umi se taimi na ola ai tagata i na aso, ma o tausaga o loo taʻua i tala o le Tusi Paia sa lē o ni tausaga moni ae o masina. Pe e moni ea lenā tulaga? Seʻi mafaufau foʻi iā Maalaelu. Ua faapea mai le Tusi Paia: “Na ola Maalaelu i tausaga e onogafulu ma le lima, ona fanaua ai lea e ia o Iareto. . . . O aso uma foi o Maalaelu e valu selau ma le ivagafulu ma le lima, o ona tausaga ia; ona oti ai lea.” (Kenese 5:15-17) Pe afai o le tausaga e faauiga atu i le masina, na fanaua la e Maalaelu lona atalii ae faatoʻā  lima ona tausaga! E leai, auā sa latalata atu tagata i le malosi lelei atoatoa lea sa i le uluaʻi tagata, o Atamu. Na latou ola moni lava mo le faitau senituri. O ā ni mea na latou faia?

I le tele o senituri a o leʻi oo i le Lolo, na oo ai le faitau aofaʻi o le lalolagi i se telē lea na mafai ai e le atalii o Atamu o Kaino ona fausia se aai, lea na ia faaigoaina o Enoka. (Kenese 4:17) A o faagasolo vaitaimi a o leʻi oo i le Lolo, na faia ai le tele o atinaʻe eseese. Sa iai fale fai uʻamea mo “e fai mea uma lava ua faia i ʻapa memea ma uamea.” (Kenese 4:22) E mautinoa o nei meafaigaluega na faaaogāina mo faugāfale, galuega faakamuta, suʻisuʻiga, ma faatoʻaga. O galuega uma nei o loo faasino atu i ai tala e uiga i tagata na muaʻi aināina le lalolagi.

O le faatuputupulaʻia o le poto na mafai ai e tupulaga fai aʻe ona atiina aʻe na tomai faapitoa i uʻamea, i mea totō ma le palapala, le tausiga o lafu mamoe ma lafu povi, i mea tau tusitusiga, le valiina ma le mamanuina o ata ma siva. Mo se faataʻitaʻiga, o Iupalu, o “le tupuga ia o i latou uma o e fai kitara ma faaili.” (Kenese 4:21) Na faatuputeleina le agaʻigaʻi i luma o le olaga. Peitaʻi, na faafuaseʻi lava ona oo mai le iʻuga o mea uma. O le ā le mea na tupu?

O le ā le Faafitauli na Tupu?

E ui sa iai itu na lelei ai le lalolagi na iai a o leʻi oo i le Lolo, ae na iai sona amataga leaga. O lē na muaʻi amataina, o Atamu, o sē na fouvale i le Atua. Na fasiotia e Kaino o lē na faia le uluaʻi aai na faamaumauina, lona lava uso. E lētioa lava la ona vave faateleina le amioleaga! Na faatuputupulaʻia āuga leaga na tuufaasolo mai e Atamu i ē tupuga mai iā te ia.—Roma 5:12.

Na faamaonia le faatuputeleina o tulaga leaga ina ua maumauaʻi Ieova e faataga le faaauau pea ona iai mo le isi 120 tausaga. (Kenese 6:3) Ua faapea mai le Tusi Paia: “Ua leaga tele lava tagata i le lalolagi, o manatu uma ua mafaufau ifo ai i o latou loto ua na ona leaga ia i aso uma lava. . . . Ua tumu le lalolagi i le saua.”—Kenese 6:5, 11.

Mulimuli ane, na taʻu patino atu ai iā Noa o le a faaumatia e le Atua tagata uma i se lolo. (Kenese 6:13, 17) E ui lava sa avea Noa ma “lē talaʻi le amiotonu,” ae sa manino mai le faigatā i tagata ona talitonu o le a faaiʻuina mea uma o loo latou iai. (2 Peteru 2:5) E na o le toʻavalu tagata na utagiaina le lapataʻiga ma faasaoina mai ai. (1 Peteru 3:20) Aiseā e tāua ai lenei mea mo i tatou i aso nei?

O le ā Lona Uiga mo i Tatou?

Ua tatou ola nei i taimi e pei o aso o Noa. Ua lē aunoa ona tatou faalogo i faiga faatupu faalavelave mataʻutia, le faatamaʻiaga o se ituaiga o tagata, se fasiotiga tagata tele ona o se mea itiiti na māfua ai, ma sauāga i aiga lea e matuā faateʻia ai. Ua toe faatumulia foʻi le lalolagi i faiga sauā, ma e pei ona sa faia muamua, ua lapataʻia ai foʻi le lalolagi i se faamasinoga o le a aumaia. Na fetalai mai Iesu lava ia o le a ia afio mai o se Faamasino tofia a le Atua, ma tuueseeseina tagata e pei ona tuueseeseina e le leoleo mamoe o mamoe ma oti. O i latou e lē agavaa, na fetalai Iesu e ‘o atu i latou nā i le sala e faavavau.’ (Mataio 25:31-33, 46) Peitaʻi, ua taʻua e le Tusi Paia e faapea i le vaitaimi nei, o le a iai le faitau miliona o i latou o le a faasaoina mai—o se motu o tagata e toʻatele o loo tapuaʻi atu i le Atua moni e toʻatasi. I le lalolagi o loo fotuaʻi mai, o le a olioli ai i se olaga e tumau ona filemu ma saogalemu e leʻi faapea ona iai muamua.—Mika 4:3, 4; Faaaliga 7:9-17.

O le a faaalia ai le moni o faamatalaga a le Tusi Paia ma lapataʻiga e uiga i gaoioiga faafaamasinoga e i latou o loo manatu faatauvaa i ai. Ae na faamatala mai e le aposetolo o Peteru e faapea e lē o amanaʻiaina e na tagata masalosalo mea moni. Na ia tusi: “E o mai i ona aso e gata ai o e tauemu, . . . e faapea mai, Ofea nei le folafolaga o lona afio mai? . . . Auā latou te mananao ia lilo lenei mea ia te i latou, sa i ai le lagi talu anamua, atoa ma le lalolagi na faia mai totonu o le vai, e ala foi i le vai, ona o le afioga a le Atua, o le mea foi lea sa faaumatia ai le lalolagi tuai ina ua lofia i le vai; a o le lagi ma le lalolagi o ona po nei ua tuu mo le afi ona o lea lava afioga; ua taofia ai foi mo le aso e faamasino ai ma fano ai tagata faalematau.”—2 Peteru 3:3-7, LF.

 Ua talaʻia ma le maelega i le lalolagi aoao i aso nei le lapataʻiga e faatatau i le oo mai o le aso faamasino ma le feʻau o le tala lelei e faatatau i le filemu, lea e sosoo mai ina ia usitaia ai le poloaʻiga faavaloaga a Iesu. (Mataio 24:14) E lē tatau ona manatu māmā i lenei lapataʻiga. E faataunuuina e le Atua Silisili ese ana folafolaga.

Le Lalolagi o le a Oo Mai

O le ā le lumanaʻi mo tagata, pe a fua atu i suiga tāua o le a oo mai? Ina ua faatomua atu lana Lauga tautaua i luga o le Mauga, na folafola atu ai e Iesu: “Amuia ē agamalu; auā e fai mo latou tofi le nuu.” Ona ia aʻoaʻoina ai lea o ona soo ina ia tatalo i le Atua: “Ia faia lou finagalo, I le lalolagi e pei ona faia i le lagi.” (Mataio 5:5; 6:10) Ioe, na aʻoaʻoina e Iesu lava ia e faapea o loo iai se lumanaʻi pupula mo tagata faamaoni i inei lava i le lalolagi. Ua ia faasino atu i ai o “le toefuataiga.”—Mataio 19:28.

A o e mafaufau la i le lumanaʻi, aua neʻi e faatagaina tagata tauemu e faamasalosaloina oe i lapataʻiga a le Atua. E moni, o loo foliga mautū mai mea o loo siʻomia ai i tatou ma iai pea lenei lalolagi mo se taimi umi. Peitaʻi, e lē tatau ona faalagolago atu i ai. Ua faasalaina nei lo tatou lalolagi. O lea, tau ina ia faalaeiauina i tatou i le faaiʻuga o le tusi a le aposetolo o Peteru:

“O lenei, o le a teʻa eseese nei mea uma, pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua, e teʻa eseese ai le lagi ina ua mu, e liu suāvai foi o mea na fai aʻi ina ua mu? O lenei, le au pele e, ua outou faatalitali i ia mea, o lea ia outou finafinau ai lava ina ia maua outou e ia ma le manuia, ua le ponā, ma le le mataʻuleagaina. A ia tutupu outou i le alofa tunoa ma le poto i a lo tatou Alii, o lo tatou Faaola lea o Iesu Keriso.” (2 Peteru 3:11, 12, 14, 18) O lea, seʻi aʻoaʻoina se lesona mai le mea na tupu i aso o Noa. Ia faalatalata atu i le Atua. Ia faatuputeleina le poto iā Iesu Keriso. Ia atiina aʻe le tuutoina atu i le Atua, ma ia iai faatasi ma le faitau miliona o ē ua filifili e faasaoina mai i le iʻuga o lenei lalolagi, ae ulu atu i se lalolagi filemu o le a oo mai.

[Ata i le itulau 5]

Sa faia galuega e fai i uʻamea a o leʻi oo i le Lolo

[Ata i le itulau 7]

O loo iai se lumanaʻi ofoofogia