Fesili Mai le ʻAufaitau

Pe ua saʻo le faapea atu o le alofa mutimutivale o Ieova e faafeoloolo ai lona faamasinotonu?

E ui lava ina faaaogā lenei faaupuga, ae e sili pe a taumafai e ʻalofia, ona e foliga mai e uiga atu faapea e faavaivai pe taofiofia e le alofa mutimutivale o Ieova lona faamasinotonu, e peiseaʻī e sili aʻe lona alofa mutimutivale i le uiga faigatā o le faamasinotonu. E lē saʻo lenei manatu.

O le upu Eperu mo le “faamasinotonu” e mafai foʻi ona uiga atu i le “faamasinoga.” E fesootaʻi vavalalata le faamasinotonu i le amiotonu. Peitaʻi, o le faamasinotonu e masani lava ona iai sona sootaga vavalalata tau i le tulafono. Ae e lē faapena le amiotonu. E moni o le faamasinotonu o Ieova e mafai ona aofia ai le faia o faasalaga ua manaʻomia mo i latou ua tatau i ai, ae e mafai foʻi ona aofia ai le saunia o le faaolataga mo i latou ua tatau i ai. (Kenese 18:20-32; Isaia 56:1; Malaki 4:2) Peitaʻi, o le faamasinotonu a Ieova e lē tatau ona vaai i ai e faigatā po o le manaʻomia ona faavaivai.

O le upu Eperu mo le “alofa mutimutivale” e mafai ona faasino atu i le taofiofia o le faatinoina o se faasalaga. E mafai foʻi ona faasino atu i le faaalia o se gaoioiga o le tigā alofa, e aumaia ai se mapusaga iā i latou o loo manaʻomia.—Teuteronome 10:18; Luka 10:29-37.

O Ieova o se Atua o le faamasinotonu ma le alofa mutimutivale. (Esoto 34:6, 7; Teuteronome 32:4; Salamo 145:9) O lona faamasinotonu ma lona alofa mutimutivale e atoatoa ona lelei, ma e galulue autasi. (Salamo 116:5; Hosea 2:19) O ia uiga e lua e paleni lelei pe e fetaui lelei le tasi ma le isi. O lea, pe a tatou faapea atu o le alofa mutimutivale o Ieova e faafeoloolo ai lona faamasinotonu, e tatou te faapea atu foʻi o lona faamasinotonu e faafeoloolo ai lona alofa mutimutivale.

Na valoia e Isaia e faapea: “E faatalitali Ieova ina ia alofa fua mai ia te outou; o le mea lea e tulai ai o ia e alofa ia te outou; auā o Ieova, o le Atua e faamasino tonu ia.” (Isaia 30:18) Ua faaalia e Isaia i inei e faapea o le faamasinotonu o Ieova e uunaʻia ai gaoioiga o le alofa mutimutivale, ae e lē uiga faapea e faavaivaia po o le taofiofia e lona alofa mutimutivale lona faamasinotonu. E faaalia e Ieova le alofa mutimutivale ona e faamasinotonu o ia ma e alofa.

Ioe, na tusi le tusitala o le Tusi Paia o Iakopo e faapea: “O le alofa mutimutivale e manumalo i le faamasinoga.” (Iakopo 2:13e, NW) Peitaʻi, i mau o loo siʻomia ai, e lē o tautala Iakopo iā Ieova ae o loo faasino i Kerisiano o ē na faaalia le alofa mutimutivale—mo se faaaʻoaʻoga, i ē puapuagatia ma ē matitiva. (Iakopo 1:27; 2:1-9) Pe a faamasinoina i latou o ē na faaalia le alofa mutimutivale, e manatuaina e Ieova a latou amio ma faamagaloina i latou ma le alofa mutimutivale e faavae i le taulaga a lona Alo. O lea, o o latou uiga alofa mutimutivale ua manumalo ai i so o se faamasinoga ua taʻusalaina ai i latou.—Faataoto 14:21; Mataio 5:7; 6:12; 7:2.

O lea la, e lē saʻo le faapea atu o le faamasinoga a Ieova e faafeoloolo e lona alofa mutimutivale i se uiga faapea o lana faamasinotonu e manaʻomia ona faavaivaia e lona alofa mutimutivale. Iā Ieova lava ia, e atoatoa ona paleni nei uiga e lua. E faapaleni e le tasi le isi e pei lava ona paleni na uiga—ma o loo faapaleniina e isi uiga o Ieova, e pei o le alofa ma le atamai.