“Onosai, Ona Pau Lenei o le Taimi e Tigā Ai”

PE SA e faalogo muamua i na upu? O upu na, atonu na fai atu e se alii fomaʻi po o se tamaʻitaʻi tausimaʻi a o leʻi faia se togafitiga na fautuaina.

E foliga mai, e te leʻi teena le togafitiga ina ia tau lava ina ʻalofia ai le tigā lea o le a oo mai. Ae na i lo o lea, sa e onosaia le tigā ina ia mafai ai ona maua ni aogā mo lou soifua mālōlōina i le lumanaʻi. I ni tulaga tigāina, o le taliaina po o le teena o ni togafitiga tigā e ono iʻu ai a lē o le ola, o le oti.

E ui lava atonu e lē manaʻomia ona tatou ō soo e vaai se fomaʻi, ae e lē mafai e i tatou uma o ni tagata lē lelei atoatoa ona ola e aunoa ma ni aʻoaʻiga, po o ni faasaʻoga ia e oo ai iā i tatou le tigā i nisi o taimi. (Ieremia 10:23) I le faamamafaina o lenei manaʻoga e tusa ai ma le tulaga o tamaiti, ua faapea mai le Tusi Paia: “Ua fusifusia le valea i le loto o le tama; a e faateaeseina ai ia te ia i le sasa e aoai aʻi.”—Faataoto 22:15.

I lenei tulaga, o le sasa, o se faailoga lea o le pule faamatua. E moni, e toʻaitiiti lava tamaiti e mananaʻo i le aʻoaʻiga. Ae afai e aofia ai ni faasalaga, atonu o le a latou lē fiafia. Ae peitaʻi, o mātua atamamai ma alolofa, e la te lē vaavaai i faalogona tigā o le tamaitiiti, ae o lona lelei i le lumanaʻi. E iloa e mātua Kerisiano le moni o le Afioga a le Atua i le faapea mai: “O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aʻoaʻoina ai.”—Eperu 12:11; Faataoto 13:24.

O le mea moni, e lē na o tamaiti e ao ona aʻoaʻia a o tagata matutua foʻi. Ua fautua mai le Tusi Paia i tagata matutua i le faapea mai: “Ia e taofi mau i upu e aʻoaʻoina [ua aʻoaʻiina ai oe, NW], aua neʻi tuuina atu; ia e leoleo i ai; auā o lou ola lava lea.” (Faataoto 4:13) Ioe, o tagata atamamai—talavou ma ē matutua—o le a taliaina aʻoaʻiga e faavae mai i le Afioga a le Atua, le Tusi Paia, auā o le faia faapea, o le a iʻu ai i le faasaoina o o latou ola.