Pe Mafai Faapefea Ona E Sao Mai le Iʻuga o Lenei Lalolagi?

UA FAAMATALAINA e le Tusi Paia le iʻuga o lenei faiga o mea o se “aso o le toasa, o le aso o le puapuaga ma le tiga, o le aso o le faatafunaina ma le faagaogaoina, o le aso o le pouliuli ma le pogisa, o le aso o ao ma le faamalumalu.” (Sefanaia 1:15) E mautinoa e lē o se ituaiga o aso lenei e masani ona e tulimataʻia! Peitaʻi, na fautuaina e le aposetolo o Peteru ona uso Kerisiano ina ia ‘faatalitali ma naunau atu ia aulia mai le aso o le Atua, e teʻa eseese ai le lagi ina ua mu, e liu suāvai foi o mea na fai aʻi ina ua mu! A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.’—2 Peteru 3:12, 13.

E lē o tautala Peteru i inei e faatatau i se faaumatiaga o le lagi ma le lalolagi faitino. O “lagi” ma le “lalolagi” lea o loo faasino atu i ai Peteru i le mataupu lenei, o faigāmalo faaletagata faafaatusa faimea piʻopiʻo ma le sosaiete o tagata faalēmataʻu. O le a lē faaumatiaina ai i “le aso o Ieova” le lalolagi lava ia ae o le a ‘faaumatia ai tagata agasala o i ai.’ (Isaia 13:9) Mo i latou o loo “mapuitiga, ma feoi ona o mea inosia uma” o loo faia i aso nei i le sosaiete o tagata amioleaga, o le a avea ai le aso o Ieova ma aso o le faaolataga.—Esekielu 9:4.

O lea, pe faapefea e se tasi ona faasaoina mai “i le aso tele ma le silisili o Ieova”? “O le afioga a Ieova” na faaali atu i se tasi o ana perofeta ua saunia ai le tali i lenā fesili: “E iu foi ina faaolaina o i latou uma lava o e valaau atu i le suafa o Ieova.” (Ioelu 1:1; 2:31, 32) O le a fiafia Molimau a Ieova e fesoasoani iā te oe e aʻoaʻoina le uiga o le valaau atu i le suafa o Ieova.